Laga Boso Mannan Ta Fuerte

“Laga boso mannan ta fuerte, boso ku den e dianan aki ta skucha e palabranan aki for di boka di e profetanan.”—ZAKARIAS 8:9.

1, 2. Dikon e bukinan di Hageo i Zakarias ta meresé nos atenshon?

E PROFESIANAN di Hageo i Zakarias a wòrdu skirbí un 2.500 aña pasá. Sin embargo, definitivamente nan ta kontené lèsnan hopi importante pa bo bida. E relatonan bíbliko ku nos ta haña den e dos bukinan aki ta mas ku simplemente historia. Nan ta parti di “tur loke a wòrdu skirbí promé ayá . . . pa nos instrukshon.” (Romanonan 15:4) Hopi di loke nos ta lesa den e dos bukinan aki ta laga nos kòrda riba situashonnan real ku a bin ta tuma lugá desde ku e Reino a ser establesí den shelu na aña 1914.

² Refiriendo na suseso- i sirkunstansianan ku e pueblo di Dios di pasado a eksperensiá, apòstel Pablo a deklará: “Awor e kosnan aki a sosodé ku nan komo un ehèmpel, i nan a wòrdu skirbí komo un spièrtamentu pa nos, riba kendenan e finnan di e siglonan a bin.” (1 Korintionan 10:11) Pues podisé bo ta puntra bo mes: ‘Ki balor e bukinan di Hageo i Zakarias tin den nos tempu?’

3. Riba kiko Hageo i Zakarias ta enfoká?

³ Manera e artíkulo anterior a menshoná, e profesianan di Hageo i Zakarias a abarká e tempu ora ku e hudiunan, librá for di koutiverio na Babilonia, a regresá nan tera ku Dios a duna nan. E dos profetanan a enfoká riba e rekonstrukshon di e tèmpel. E hudiunan a pone fundeshi di e tèmpel na aña 536 promé ku nos era. Ounke algun hudiu di edat a focus riba pasado, mayoria tabata “grita duru di goso.” Pero en realidat algu hopi mas importante a sosodé den nos tempu. Kon asina?—Esdras 3:3-13.

4. Kiko a sosodé poko despues di Promé Guera Mundial?

⁴ Poko despues di Promé Guera Mundial, Yehova a libra su ungínan for di koutiverio na Babilonia e Grandi. Esaki tabata un indikashon grandi di Yehova su sosten. Promé ku esei, a parse manera kos ku lidernan religioso i nan sosionan polítiko a para e trabou públiko di prediká i siña otro hende ku e Studiantenan di Beibel tabata hasi. (Esdras 4:8, 13, 21-24) Sin embargo, Yehova Dios a eliminá opstákulonan ku tabata stroba e trabou di prediká i di hasi disipel. Atraves di e dékadanan ku a sigui despues di aña 1919, e trabou di Reino a sigui prosperá i nada no por a para su progreso.

5, 6. Na ki gran logro Zakarias 4:7 ta señalá?

⁵ Nos por tin sigur ku e trabou di prediká i siña hende ku Yehova su sirbidónan obediente ta hasi den nos tempu, lo sigui bai dilanti ku e sosten di Yehova. Na Zakarias 4:7 [BPK] nos ta lesa: “Lo e karga e último piedra trese bou di gritu di húbilo: Esta presioso, esta presioso.” Na ki gran logro den nos tempu esaki ta señalá?

⁶ Zakarias 4:7 ta señalá na e tempu ora ku lo trese e adorashon berdadero di e Señor Soberano na su estado perfekto den e patio terenal di su tèmpel spiritual. E tèmpel ei ta Yehova su areglo pa ador’é a base di e sakrifisio di rekonsiliashon di Kristu Hesus. Ta bèrdat ku e gran tèmpel spiritual a eksistí for di e promé siglo di nos era. Sin embargo, adorashon berdadero den su patio terenal, es desir, riba tera, tin ku alkansá ainda su estado perfekto. Awe tin  miónes di adoradó ku ta sirbi den e patio terenal di e tèmpel spiritual. Esakinan i multitut di hende resusitá lo alkansá perfekshon durante Hesukristu Su Reinado di Mil Aña. Na fin di e mil aña, ta Dios su adoradónan berdadero so lo tin riba e tera hasí limpi.

7. Ki papel Hesus tin den trese adorashon berdadero na su estado perfekto den nos tempu, i dikon esaki mester ta un animashon pa nos?

⁷ Gobernadó Zorobabel i Sumo Saserdote Josué tabata presente pa mira final di e konstrukshon di e tèmpel na aña 515. Zakarias 6:12 i 13 a predisí e papel similar ku Hesus lo tin den hiba adorashon berdadero na su estado perfekto. Nos ta lesa den e versíkulonan ei: “Asina e SEÑOR di ehérsitonan ta bisa: ‘Mira, un hòmber, kende su nòmber ta Rama, pasobra e lo sprùit for di kaminda ku e ta; i e lo traha e tèmpel di SEÑOR. . . . I ta e lo risibí e onor i lo sinta i goberná riba su trono. Asina e lo ta un saserdote riba su trono.’” Hesus ta den shelu i e ta esun ku a pone e liña di rei for di David sprùit. Mirando ku t’e ta sostené e trabou di Reino na e tèmpel spiritual, bo ta kere ku tin un persona ku por stroba progreso di e trabou ei? Definitivamente ku nò! Esaki mester animá nos pa sigui padilanti den nos sirbishi i no laga preokupashonnan di bida diario desviá nos, no ta bèrdat?

Prioridatnan

8. Dikon nos mester pone e trabou na e tèmpel spiritual na promé lugá den nos bida?

⁸ Pa nos por tin Yehova su sosten i bendishon, nos tin ku sòru pa e trabou na e tèmpel spiritual keda na promé lugá den nos bida. Distinto for di e hudiunan ku a bisa: “E tempu no a yega,” nos tin ku kòrda ku nos ta bibando den “e último dianan.” (Hageo 1:2; 2 Timoteo 3:1) Hesus a predisí ku su fiel siguidónan lo prediká e bon nobo di Reino i hasi disipel. Nos mester tene kuidou pa nos no neglishá nos privilegio di prediká e bon nobo. E trabou di prediká i di siña hende ku e rumannan ungí a reanudá na aña 1919, despues ku esaki a para temporalmente debí na oposishon di mundu, no ta kla ainda. Pero, bo por tin sigur ku lo e keda kla un dia!

9, 10. Yehova su bendishon ta dependé di kiko, i esaki ta nifiká kiko pa nos?

⁹ Te na e grado ku nos ta sigui traha diligentemente, te na e grado ei nos lo ser rekompensá,  sea komo pueblo òf individualmente. Tuma nota di Yehova su promesa ku ta duna nos e garantia ei. For di momento ku e hudiunan a bolbe kuminsá adorá Yehova di henter nan alma i a reanudá seriamente e trabou riba e fundeshi di e tèmpel, Yehova a bisa: “For di awe padilanti lo mi bendishoná boso.” (Hageo 2:19) Nan lo a haña su pleno fabor atrobe. Awor konsiderá e bendishonnan ku tabatin den Dios su promesa: “Lo tin pas pa e simia: e mata di wendrùif lo duna su fruta, e tera lo duna su produkto, i e shelunan lo duna nan serena; i lo mi hasi e restante di e pueblo aki heredá tur e kosnan aki.”—Zakarias 8:9-13.

¹⁰ Meskos ku Yehova a bendishoná e hudiunan ei den sentido spiritual i material, asina lo e bendishoná nos segun ku nos diligentemente—i ku un kurason kontentu—ta hasi e trabou ku el a asigná nos. E bendishonnan aki ta entre otro, pas entre nos mes, siguridat, prosperidat i kresementu spiritual. Pero, bo por tin sigur ku pa nos sigui haña Dios su bendishon nos tin ku hasi e trabou na e tèmpel spiritual na e manera ku Yehova ke pa nos hasié.

11. Kon nos lo por analisá nos mes?

¹¹ Awor ta tempu pa nos ‘pensa bon riba nos kondukta.’ (Hageo 1:5, 7) Nos tin ku para ketu un ratu i analisá nos prioridatnan den bida. Yehova su bendishon riba nos awe ta dependé di e grado ku nos ta glorifiká su nòmber i ta sigui padilanti den nos trabou na su tèmpel spiritual. Lo bo por puntra bo mes: ‘Mi prioridatnan a kambia? Kon mi selo pa Yehova, pa su bèrdat i pa su trabou ta kompará ku e selo ku mi tabatin tempu ku mi a batisá? Mi interes den un estilo di bida kómodo ta afektando e atenshon ku mi ta duna Yehova i su Reino? Miedu di hende—òf ser preokupá pa loke otro hende lo pensa—ta stroba mi?’—Revelashon 2:2-4.

12. Hageo 1:6 i 9 ta trese dilanti ki situashon ku tabata reina entre e hudiunan?

¹² Nos no ke pa Dios keda sin drama su bendishon riku riba nos debí ku nos ta neglishá e trabou di glorifiká su nòmber. Kòrda ku despues di a kuminsá bon, e hudiunan restorá a kuminsá ‘hinka hopi esfuerso den nan mes kas,’ segun Hageo 1:9 [BPK]. Nan a kuminsá konsentrá solamente riba nan propio nesesidatnan diario i nan estilo di bida. Komo konsekuensia nan “a kosechá poko,” nan tabatin un skarsedat di bon kuminda i kos di bebe i falta di paña pa tene nan kurpa kayente. (Hageo 1:6) Yehova a kita su bendishon. Tin un lès den esaki pa nos?

13, 14. Kon nos por apliká e lès ku nos a saka for di Hageo 1:6 i 9, i dikon esaki ta importante?

¹³ Bo no ta di akuerdo ku pa nos sigui disfrutá di Dios su bendishon, nos tin ku resistí e buskamentu di kos pa nos mes te na e grado ku nos ta neglishá Yehova su adorashon? Nos tin ku hasi esfuerso pa resistí esaki sea ku e aktividat òf interes ku ta kitando nos atenshon ta e afan pa gana hopi plaka, ta proyektonan  pa bira riku lihé, ta plannan ambisioso pa edukashon avansá ya asina nos por tin un karera deseabel den e mundu aki òf ta programanan pa yuda nos alkansá nos pleno potensial òf pa satisfasé deseonan personal.

¹⁴ Kosnan asina kisas no ta un piká riba nan mes. Sin embargo bo no ta ripará ku for di e punto di bista di haña bida eterno, e kosnan ei en realidat ta “obranan morto”? (Hebreonan 9:14) Den ki sentido? Nan ta spiritualmente morto, bano i improduktivo. Si un persona persistí den nan, e obranan ei lo por hiba na morto spiritual. Esei a sosodé ku algun kristian ungí den tempu di e apòstelnan. (Filipensenan 3:17-19) El a sosodé tambe ku algun kristian den nos tempu. Kisas bo sa di algun ruman ku pokopoko a ser distraí for di aktividatnan kristian i for di e kongregashon; anto awor nan no ta demostrá ningun inklinashon pa bolbe bèk na e sirbishi di Yehova. Nos sigur ta spera ku e personanan ei lo bolbe na Yehova, pero echo ta ku korementu tras di “obranan morto” por pone hende pèrdè Yehova su aprobashon i bendishon. Bo por imaginá ki un situashon tristu esei lo ta. Lo e nifiká ku bo ta pèrdè e goso i pas ku Dios su spiritu ta produsí. Anto imaginá bo ki un gran pèrdida lo e ta si bo no por benefisiá di e kaluroso hermandat kristian!—Galationan 1:6; 5:7, 13, 22-24.

15. Kon Hageo 2:14 ta mustra e seriedat di nos adorashon?

¹⁵ Esaki ta un asuntu masha serio mes. Tuma nota na Hageo 2:14 kon Yehova a mira e hudiunan ku a neglishá Yehova su kas di adorashon pa nan a bai fura nan propio kasnan, sea ku ta literalmente nan tabata fura nan kas ku palu òf nan tabata djis konsentrá riba hasi nan kas bunita. “‘Asina e pueblo aki ta. I asina e nashon aki ta mi dilanti,’ SEÑOR ta deklará, ‘i asina kada obra di nan mannan ta; i loke nan ta ofresé einan ta impuru.’” Kualke sakrifisio superfisial ku e hudiunan, ku no tabatin berdadero entusiasmo ni interes, a ofresé riba e altar temporal na Yerusalèm tabata inaseptabel tanten ku e pueblo tabata neglishá adorashon berdadero.—Esdras 3:3.

Dios Ta Garantisá Ku Lo E Sostené Su Adoradónan

16. Basá riba e vishonnan ku Zakarias a haña, di kiko e hudiunan por tabata sigur?

¹⁶ Hudiunan obediente ku tabata traha riba rekonstrukshon di Dios su tèmpel a ser sigurá di Dios su sosten. Dios a indiká esei pa medio di un seri di ocho vishon ku Zakarias a risibí. E promé vishon a garantisá nan ku e tèmpel lo keda kla i ku Yerusalèm i Huda lo gosa di prosperidat tanten ku e hudiunan obedientemente a sigui ku e trabou nan dilanti. (Zakarias 1:8-17) E di dos vishon a primintí ku lo bin un fin na tur gobièrnu ku a oponé adorashon berdadero. (Zakarias 1:18-21) E otro vishonnan a sigurá e hudiunan di Dios su protekshon riba e trabou di konstrukshon, ku un multitut di hende for di hopi nashon lo basha bin na Yehova su kas di adorashon ora e ta kla, tambe ku lo tin berdadero pas i siguridat i ku opstákulonan aparentemente insuperabel ku ta stroba nan di kumpli ku e trabou ku Dios a asigná nan lo wòrdu kitá. Ademas, maldat lo a ser eliminá i nan lo tabatin supervishon i protekshon di e angelnan. (Zakarias 2:5, 11; 3:10; 4:7; 5:6-11; 6:1-8) Bo por komprondé dikon e hudiunan obediente, teniendo tantu garantia di Dios su sosten, a ahustá nan estilo di bida i a konsentrá nan atenshon riba e trabou pa kua Dios a libra nan for di Babilonia.

17. En bista di e garantia ku nos tin, kiko nos mester puntra nos mes?

 ¹⁷ Di un manera similar, e garantia ku nos tin ku adorashon berdadero lo triunfá sigur, mester stimulá nos na aktividat i motivá nos pa pensa seriamente riba Yehova su kas di adorashon. Puntra bo mes: ‘Si di bèrdat mi ta kere ku awor ta e tempu pa hasi e trabou di prediká e bon nobo di Reino i di hasi disipel, mi metanan i estilo di bida ta kuadra ku e konvikshon ei? Mi ta dediká sufisiente tempu na studia Dios su Palabra profétiko, na hasié mi interes intenso, i na kòmbersá tokante dje ku otro rumannan kristian i tambe ku otro hendenan ku mi ta topa?’

18. Ki tin nos dilanti segun Zakarias kapítulo 14?

¹⁸ Zakarias a referí tambe na e destrukshon di Babilonia e Grandi siguí pa e guera di Armagedón. Nos ta lesa: “Lo ta un dia úniko ku ta konosí pa SEÑOR—lo no tin ni dia ni anochi, ma ora nochi ta sera lo sosodé ku tin lus.” Sí, e dia di Yehova lo ta en bèrdat un dia skur i friu pa su enemigunan riba tera! Pero pa Yehova su adoradónan fiel lo e ta un dia di lus kontinuo i aprobashon. Zakarias ta deskribí tambe kon tur kos den e mundu nobo lo proklamá Yehova su santidat. Adorashon berdadero na Dios su gran tèmpel spiritual lo ta e úniko forma di adorashon riba tera. (Zakarias 14:7, 16-19) Ki un garantia remarkabel! Nos lo eksperensiá kumplimentu di loke a ser predisí i nos lo mira e vindikashon di Yehova su soberania. E dia ei di Yehova lo ta úniko!

Bendishonnan Permanente

19, 20. Dikon bo ta haña Zakarias 14:8 i 9 un animashon?

¹⁹ Despues di e tremendo logro ei, Satanas i su demoñonan lo keda restringí na un abismo di inaktividat. (Revelashon 20:1-3, 7) E ora ei bendishonnan lo kore durante Kristu Su Reinado di Mil Aña. Zakarias 14:8 i 9 ta bisa: “Lo sosodé den e dia ei ku awanan bibu lo kore for di Yerusalèm, esun mitar pa laman di pariba i e otro mitar pa laman di pabou; esaki lo sosodé tantu den zomer komo den wenter. I [Yehova] lo ta rei riba henter e tera; den e dia ei [Yehova] lo ta e úniko, i su nòmber e úniko.”

²⁰ “Awanan bibu,” òf “un riu di e awa di bida,” ku ta representá Yehova su provishonnan pa humanidat haña bida eterno, lo kore kontinuamente for di e asiento di e Reino Mesiániko. (Revelashon 22:1, 2) Un multitut grandi di adoradó di Yehova, ku a sobrebibí Armagedón, lo benefisiá dor di ser librá for di e kondena di morto heredá for di Adam. Asta esnan ku ta morto kaba lo benefisiá pa medio di un resurekshon. Asina lo kuminsá un fase nobo di Yehova su gobernashon di e tera. Tur hende rònt mundu lo rekonosé Yehova komo e Soberano Universal, e úniko persona ku mester ser adorá.

21. Kiko mester ta nos determinashon?

²¹ En bista di tur loke Hageo i Zakarias a predisí i tur loke a kumpli kaba, nos tin motibu sólido pa sigui padilanti den e trabou ku Dios a asigná nos pa hasi den e patio terenal di su tèmpel spiritual. Laga nos tur sigui hasi esfuerso pa mantené interesnan di Reino na promé lugá miéntras ku nos ta warda riba e tempu ora ku lo hiba adorashon berdadero na su estado perfekto. Zakarias 8:9 ta urgi nos: “Laga boso mannan ta fuerte, boso ku den e dianan aki ta skucha e palabranan aki for di boka di e profetanan.”

Bo Ta Kòrda?

• Ki paralelo históriko ta hasi e bukinan di Hageo i Zakarias hopi importante pa nos awe?

• Hageo i Zakarias ta siña nos ki lès tokante nos prioridatnan?

• Dikon un konsiderashon di Hageo i Zakarias ta duna nos motibu pa mira futuro ku konfiansa?

[Preguntanan di Estudio]

[Plachi na página 26]

Hageo i Zakarias a animá e hudiunan pa traha di henter nan alma i pa asina haña bendishon

[Plachinan na página 27]

Abo ta ‘hinkando hopi esfuerso den bo mes kas’?

[Plachi na página 28]

Yehova a primintí bendishon, i el a dun’é tambe