Pregunta di Lektor

Si demoñonan ta molestiá un persona, kiko e por hasi pa haña alivio?

E Palabra di Dios ta mustra ku hende ku ta sufri di atake di demoño por libra di e molèster ei. Orashon ta hunga un papel masha importante pa haña e liberashon ei. (Marko 9:25-29) Pero si demoño ta molestiá un persona, e tin ku dal mas paso. Susesonan relashoná ku e kristiannan di promé siglo ta ilustrá kiko mas kisas ta nesesario pa hasi.

Algun persona den antiguo Efeso tabata metí den demonismo promé ku nan a bira siguidó di Kristu. Sin embargo, unabes nan a tuma e desishon pa sirbi Dios, “esnan ku tabata praktiká magia a trese nan bukinan huntu i a kima nan dilanti di tur.” (Echonan 19:19) Dor di destruí nan bukinan tokante divinashon, e kreyentenan nobo ei na Efeso a pone un ehèmpel pa ken ku ta deseá di libra su mes di atake di demoño awe. Ta apsolutamente nesesario pa personanan asina deshasí di tur opheto relashoná ku spiritismo. Esaki ta inkluí buki, revista, pelíkula, material for di fuentenan elektróniko manera Internet, grabashonnan musikal ku tin un karakter spiritista, i tambe amuleto òf otro artíkulonan ku hende ta bisti komo “protekshon” òf ku ta ligá ku práktikanan spiritista.—Deuteronomio 7:25, 26; 1 Korintionan 10:21.

Algun aña despues ku e kristiannan ei na Efeso a destruí nan bukinan tokante magia, apòstel Pablo a skirbi: “Nos lucha . . . [ta] kontra e forsanan spiritual di maldat.” (Efesionan 6:12) Pablo a urgi kristiannan: “Bisti e armadura kompletu di Dios, pa boso por para firme kontra e trampanan di Diabel.” (Efesionan 6:11) E konseho ei ainda ta válido. Kristiannan tin ku fortifiká nan spiritualidat pa por defendé nan mes kontra di spiritunan malbado. Pablo a enfatisá: “Riba tur kos, tumando e eskudo di fe, ku kual boso lo por paga tur e flechanan sendí di e malbado.” (Efesionan 6:16) Un persona ta fortifiká su fe dor di studia Beibel. (Romanonan 10:17; Kolosensenan 2:6, 7) Pues anto, un estudio regular di Beibel ta yuda nos desaroyá fe ku ta sirbi komo un baluarte òf defensa kontra e influensia di spiritunan malbado.—Salmo 91:4; 1 Juan 5:5.

E kristiannan ei na Efeso tabatin ku dal un otro paso importante. Pablo a bisa nan: “Ku tur orashon i súplika pidi tur ora bai den spiritu.” (Efesionan 6:18) Sí, awe ta masha importante mes pa personanan ku ke libra nan mes di atake di demoño hasi orashon intenso na Yehova pa pidié su protekshon. (Proverbionan 18:10; Mateo 6:13; 1 Juan 5:18, 19) Apropiadamente Beibel ta bisa: “Someté boso na Dios. Resistí Diabel i e lo hui for di boso.”—Santiago 4:7.

Pero no ta e persona ku ta bou di atake di demoño so tin ku pidi den orashon ferviente pa Yehova dun’é alivio. Otro kristiannan berdadero tambe por hasi orashon na fabor di e persona ku profundamente ta deseá di sirbi Yehova i ku sinseramente ta purba resistí e spiritunan malbado. Nan por pidi Dios pa laga ku e persona afligí pa demoño por haña e fortalesa spiritual nesesario pa resistí e atakenan di demoño. Siendo ku e Palabra di Dios ta bisa ku “e orashon efektivo di un hende hustu por logra hopi,” orashonnan di Dios su sirbidónan sigur lo benefisiá personanan afligí ku ta hasiendo nan máksimo esfuerso pa “resistí Diabel.”—Santiago 5:16.

[Plachi na página 31]

Kreyentenan na Efeso a destruí nan bukinan tokante magia