E Situashon Aktual di Pobresa

HOPI biaha bo por mira Vicente * ta hala un garoshi kargá ku kos dor di e kayanan di São Paulo, Brazil. E ta kana piki karton, sobrá di metal i plèstik. Ora kuminsá bira skur, e ta pone algun karton bou di su garoshi i ta kai drumi. Ta manera kos ku e no ta tende e bochincha ku outo i konvoi ta hasi den e kaya hopi drùk kaminda e ta pasa anochi. Un tempu e tabatin un trabou, un kas i un famia; pero el a pèrdè tur kos. Awor e ta pasa trabou pa gana su pida pan di kada dia riba kaya.

Desafortunadamente, miónes di hende rònt mundu ta biba den pobresa ekstremo, meskos ku Vicente. Na paisnan den desaroyo tin hopi hende ku ta haña nan mes obligá ta biba riba kaya òf den barionan hopi pober. Unda ku bo bira bo ta mira hende ta pidi limosna: hende lam, hende siegu, muhénan ku yu na pechu. Na lusnan di tráfiko, muchanan ta kore meimei di e outonan pará na lus, tratando di bende mangel ku e speransa di haña dòsplaka.

Ta difísil pa hustifiká tal pobresa. E revista britániko The Economist a komentá: “Nunka promé e rasa humano tabata asina riku, òf mihó ekipá ku e konosementu médiko, teknológiko i intelektual nesesario pa kombatí pobresa.” Hopi hende sigur a benefisiá di e konosementu aki. E kayanan di statnan grandi den vários pais den desaroyo ta di pak ku outonan nobis-nobis. Sentronan komersial ta di stòk ku lo último di tur aparato, anto hende pa kumpra nan tin na granèl. Dos sentro komersial na Brazil a tene un kampaña di promoshon spesial. Nan a keda habrí henter e anochi di 23 pa 24 di desèmber 2004. Un di nan a kontratá bailadónan di samba pa entretené e kumpradónan. E evenemento a atraé kasi 500.000 kumpradó!

Sin embargo, tin masha hopi hende ku no ta benefisiá di e rikesa di hende riku. E diferensia grandi entre hende riku i hende pober  a pone hopi persona yega na e konklushon ku tin un nesesidat urgente pa kombatí pobresa. E revista brazilero Veja a deklará: “E aña aki [2005] e bataya kontra pobresa lo mester ta e tópiko prinsipal riba agènda mundial.” Veja a informá tambe di e proposishon ku tin pa bin ku un “Marshall Plan” nobo ku e intenshon di yuda e paisnan di mas pober, foral esnan na Afrika. * Sin embargo, maske e proposishonnan ei ta duna e impreshon ku tin progreso, e mesun revista a agregá: “Tin tambe masha hopi motibu pa duda di nan resultado. Si mayoria di e paisnan no tin masha gana di kontribuí, ta pasobra e rekursonan rara bes ta yega na e hendenan pa kua nan ta destiná.” Desafortunadamente, debí na korupshon i burokrasia, gran parti di e fondonan suministrá dor di gobièrnunan, agensianan internashonal i personanan individual nunka ta yega na e hendenan ku realmente tin mester di nan.

Hesus tabata sa ku pobresa lo ta un problema kontinuo. El a bisa: “E pobernan boso tin semper serka boso.” (Mateo 26:11) Akaso esaki ta nifiká ku semper lo tin pobresa riba tera? No por hasi nada pa drecha e situashon? Kiko kristiannan por hasi pa yuda hende pober?

[Nota]