Kon pa Yega na Kurason di un Mucha

BO A yega di sinti bo tristu ora bo mira un mucha ta hunga guera? Esenanan asina a bira algu komun i koriente asta entre mucha hopi chikitu ya ku violensia a penetrá den mundu di entretenimentu. Kon lo bo por yuda un mucha p’e kambia ko’i hunga di guera pa ko’i hunga di pas? Waltraud, un señora Testigu di Yehova ku tin hopi aña komo misionero na Afrika, a haña un manera pa yuda un mucha hòmber hasi esei.

Guera a pone ku Waltraud tabatin ku bandoná e pais kaminda e tabata biba i muda pa un otro pais na Afrika. Einan el a kuminsá studia Beibel ku mama di un mucha hòmber di sinku aña. Ki ora ku el a bishitá e mama, e mucha hòmber tabata hunga ku un skopèt chikitu di plèstik, e úniko ko’i hunga ku e tabatin. Nunka Waltraud a mir’é mek e skopèt riba nada, pero semper e tabata bezig ta habri i sera e skopèt, komo si fuera ta bala e ta hinka aden.

Waltraud a bisa e mucha: “Werner, bo sa dikon mi ta biba den bo pais? Pa motibu di guera; mi tabatin ku hui for di kaminda mi tabata biba pa skapa di hòmbernan peligroso ku tabata tira hende ku skopèt ku ta parse esun ku bo tin. Bo ta kere ku e tiramentu ei tabata un kos bon?”

“Nò, e no ta bon,” Werner a kontestá tristu.

“Bo tin rason,” Waltraud a bis’é. Kaba el a puntra Werner: “Bo sa dikon mi ta bishitá abo ku bo mama tur siman? Ta pasobra Testigunan di Yehova ke yuda hende biba na pas, tantu na pas ku Dios komo na pas ku nan próhimo.” Ku aprobashon di Werner su mama, Waltraud a bisa Werner: “Si bo duna mi bo skopèt, lo mi bent’é afó, i lo mi sòru pa bo haña un trùk di ko’i hunga ku tin kuater wil.”

Werner a dun’é su skopèt. E tabatin ku warda kuater siman, pero su ko’i hunga nobo a yega, un trùk di ko’i hunga trahá di palu! El a asept’é ku un sonrisa grandi.

Abo ta tuma tempu pa papia ku bo yunan? Bo ta purba yega na nan kurason di manera ku nan ta sinti nan motivá pa deshasí di ko’i hunga ku ta parse arma di guera? Si ta asina, lo bo ta siñando nan un lès ku lo benefisiá nan pa restu di nan bida.