No Tene Miedu—Yehova Ta ku Bo!

MAS ku 50 aña pasá, djis despues ku e promé bòmnan nuklear a eksplotá, e sientífiko Harold C. Urey, ganadó di Premio Nobel, a bisa tokante futuro: “Nos lo kome ku miedu, drumi ku miedu, biba ku miedu i muri ku miedu.” Awe, en bèrdat tin hopi hende ku miedu den e mundu aki, i esei no ta nada straño pasobra tur dia korantnan ta skirbi tokante atakenan horendo di terorismo, krímen violento i enfermedatnan misterioso.

Komo kristian, nos sa kiko e kondishonnan aki ta nifiká. Nan ta indiká ku nos ta bibando den “e último dianan” di e mal sistema di kosnan aki, ku segun profesia di Beibel lo ta karakterisá pa “tempunan trabahoso.” (2 Timoteo 3:1) Pues esei ta duna nos mas konvikshon ku pronto Yehova Dios lo trese un mundu nobo den kua hustisia lo biba. (2 Pedro 3:13) Pero nos komo kristian ta liber di miedu?

Sirbidónan di Dios i Miedu

Jakòb, David i Elias tabata algun sirbidó di Yehova ku a haña sierto miedu ora nan tabata den situashonnan peligroso. (Génesis 32:6, 7; 1 Samuel 21:11, 12; 1 Reinan 19:2, 3) No ku nan no tabatin fe, al kontrario, nan tabatin pleno konfiansa den Yehova. Pero Jakòb, David i Elias tabata hende; p’esei nan por a haña miedu. Disipel Santiago a skirbi: “Elias tabata un hòmber ku un naturalesa meskos ku di nos.”—Santiago 5:17.

Kisas nos tambe ta haña miedu ora nos pensa riba un opstákulo ku nos ta enfrentando awor òf unu ku nos por topa den futuro. Esei ta komprendibel. Al fin i al kabo, Beibel ta bisa ku Satanas e Diabel ta determiná pa “hasi guera” kontra esnan ku ta “warda e mandamentunan di Dios i [ku] tin e testimonio di Hesukristu.” (Revelashon 12:17) Ounke e palabranan ei ta apliká spesífikamente na kristiannan ungí, Pablo a skirbi: “Tur hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12) Tòg, ora nos haña nos konfrontá ku problema, nos no mester laga miedu dominá nos. Pakiko nò?

‘Un Dios di Liberashon’

E salmista David a skirbi: “Dios ta un Dios di liberashonnan pa nos.” (Salmo 68:20) Bes tras bes Yehova a demostrá ku e por libra su pueblo, sea dor di skapa nan for di situashonnan peligroso òf dor di duna nan e forsa pa nan wanta. (Salmo 34:17; Daniel 6:22; 1 Korintionan 10:13) Kuantu di e “liberashonnan” ei bo por kòrda for di bo estudio di Beibel?

Ku yudansa di e Indèks di Publikashonnan Watch Tower, * kisas bo por analisá susesonan di bida real manera e Diluvio mundial di dia di Noe, e liberashon di Lòt ku su yu muhénan for di Sodoma i Gomora, e Eksodo di Israel for di Egipto i nan biahe dor di Laman Kòrá òf e kòmplòt frakasá di Haman pa kaba ku e hudiunan. Ora bo lesa i despues meditá riba e relatonan emoshonante aki, bo fe ku Yehova ta un Dios di liberashon lo bira mas fuerte. Esaki, na su turno, lo yuda bo enfrentá pruebanan di bo fe sin miedu.

Ehèmpelnan Djawe

Bo por pensa riba algun ehèmpel aktual di perseveransia den bo mes área, kisas di un kristian ku pa motibu di su fieldat a ser enkarselá? Tal bes bo konosé un kristian di edat ku ta sirbiendo Yehova apesar ku su salú a bai atras. Òf  pensa riba hóbennan ku ta mantené nan mes separá for di mundu apesar di e preshon enorme ku nan kompañeronan di skol ta pone riba nan. Tin tambe mayornan soltero ku ta lantando yu sin un kasá, òf personanan soltero ku ta sirbiendo Yehova apesar di nan sintimentunan di soledat. Kiko bo ta siña for di e personanan aki? Ora bo meditá riba nan fieldat, esei por yuda bo perseverá sin miedu bou di kualke prueba.

No ta ora nos haña nos ku oposishon i persekushon so nos no mester tin miedu, sino tambe ora nos kuminsá duda ku Yehova ta stima nos. Nos tin ku kultivá konfiansa ku e reskate di Kristu ta konta pa kada un di nos. (Galationan 2:20) E ora ei nos por aserká Yehova sin miedu. Si nos no ta sinti nos digno di e amor di Yehova, nos por meditá riba e palabranan ku Hesus a dirigí na su siguidónan: “Dos mòfi no ta wòrdu bendí pa ún sèn? I ni un di nan lo no kai na suela si no ta e boluntat di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.”—Mateo 10:29-31.

Hopi bes e revistanan Toren di Vigilansia i Spièrta! ta publiká eksperensianan di Testigunan di Yehova di nos tempu ku a enfrentá prueba sin miedu. Esaki no ta nifiká ku nan no tabata tristu òf preokupá pa motibu di situashonnan difísil ku nan a pasa aden. Pero nan no a laga e sintimentunan ei stroba nan di sigui sirbi Yehova. E relatonan publiká ei por yuda abo tambe perseverá sin miedu. Laga nos konsiderá dos ehèmpel.

Un Leshon A Kambia Su Bida

E Spièrta! di 8 di mei 2003 tabatin e artíkulo “Un Leshon Ku A Kambia Mi Bida.” Den dje, Stanley Ombeva, un Testigu di Yehova na Kenia, ta papia di e problemanan ku el a konfrontá ora un outo ku tabata kore muchu duru a dal e. Ora su salú a bai atras, el a pèrdè su trabou i tur benefisio. Ruman Ombeva ta atmití den su relato: “Segun ku mi a realisá kon serio mi kondishon tabata, mi a bira negativo, egoista i krepchi. Tin biaha, mi tabata rabia, kunsumí i pulushá riba kualke ko’i kèns.” Apesar di su pesadia, e hòmber kristian aki no a haña miedu. E no a laga desilushon kaba kuné i kita tur su ánimo den bida. Mas bien, el a konfia den Yehova. Ruman Ombeva a bisa: “Semper el a sostené mi den tur loke mi a pasa aden, i el a hasi esei asina tantu ku tin biaha mi tabatin bèrgwensa di mi mes. Mi a proponé mi mes firmemente pa lesa i meditá riba tekstonan ku mi sa ku lo tabata un konsuelo pa mi den mi situashon.”

Ruman Ombeva su komentarionan franko a yuda hopi otro hende perseverá sin miedu. Un ruman muhé kristian a skirbi: “Ora mi a lesa e artíkulo aki mi wowo a yena ku awa. Mi a sinti ku pa medio di dje Yehova a konsolá mi i demostrá su interes tierno i amoroso den mi.” Un otro Testigu a skirbi: “E tipo di artíkulonan aki ta duna nos ku ta pasando den situashonnan similar i ku ta sufri den silensio un gran animashon.”

Tratando ku Angustia Emoshonal

Un otro eksperensia konmovedor ta esun di Herbert Jennings, ku a aparesé den e artíkulo “Bo No Sa Kon Bo Bida Lo Ta Mañan.” * Ruman Jennings ta sufri di e asina yamá  trastorno di beis bipolar. Reflekshonando riba e etapa inisial di su enfermedat, el a bisa: “Tabata un berdadero lucha pa djis asistí na e reunionnan kristian. Apesar di esei, mi tabata kompletamente konvensí kon importante asosiashon spiritual ta. Pa trata ku e situashon, hopi bes mi tabata drenta Salòn di Reino despues ku mayoria hende a tuma nan asiento i a bai nèt promé ku nan a kuminsá move na final dje programa.”

No tabata fásil pa prediká tampoko. Ruman Jennings a konta: “Tabatin dia, despues ku mi a yega na un kas, ku simplemente mi no tabatin e kurashi pa primi e bèl. Sin embargo, mi no a entregá pa motibu ku mi tabata sa ku nos ministerio ta nifiká salbashon pa nos mes i pa esnan ku ta respondé faborablemente. (1 Timoteo 4:16) Despues di un ratu, mi por a dominá mi emoshonnan, bai n’e siguiente porta i purba atrobe. Dor di sigui prediká, mi salú spiritual a keda basta bon i esei a yuda mi trata mihó ku e situashon.”

Ruman Jennings su relato franko a yuda hopi lektor enfrentá nan angustianan ku e mesun determinashon, esta, sin miedu. Por ehèmpel, un ruman muhé kristian a skirbi: “Den e 28 añanan ku mi tin ta lesa e revistanan Toren di Vigilansia i Spièrta!, nunka mi a yega di sinti mi asina konmoví manera ora mi a lesa e artíkulo aki. Mi tabatin ku stòp ku mi sirbishi di tempu kompletu i mi a sinti mi hopi kulpabel, pensando ku si mi tabatin mas fe, lo mi por a kontinuá. Ora mi a lesa kon Ruman Jennings tabatin ku laga su asignashon para pa motibu di su enfermedat, esei a yuda mi mira mi situashon na un manera balansá. E artíkulo tabata berdaderamente un kontesta riba mi orashonnan!”

Meskos tambe, un ruman hòmber kristian a skirbi: “Despues ku mi a sirbi dies aña largu komo ansiano di kongregashon, mi tabatin ku renunsiá mi privilegio pa motibu di un enfermedat mental. E idea ku mi a frakasá a deprimí mi asina tantu ku mi no por a ni lesa e artíkulonan di historia di bida, ku hopi bes ta papia di e logronan ekstraordinario di Yehova su pueblo. Pero Ruman Jennings su perseveransia tabata un animashon pa mi. Mi a lesa e artíkulo vários biaha.”

Sigui Padilanti ku Konfiansa

Meskos ku e rumannan Ombeva i Jennings, hopi Testigu di Yehova ta sigui adorá Yehova Dios sin miedu apesar di opstákulonan difísil. Si bo ta un di nan, bo ta digno di nos atmirashon. Bo por ta sigur ku “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.”—Hebreonan 6:10.

Meskos ku Yehova a yuda su pueblo fiel di antigwedat vense nan enemigunan, e por yuda bo vense kualke opstákulo ku por presentá. P’esei, tuma na pechu e palabranan ku Yehova a papia pa medio di profeta Isaias: “No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.”—Isaias 41:10.

[Nota]

[Plachinan na página 16]

Meskos ku Stanley Ombeva (ariba) i Herbert Jennings (man drechi), hopi ta esnan ku ta sirbiendo Yehova sin miedu

[Rekonosementu pa Potrèt na página 14]

Potrèt di USAF