Sirbi Kristu e Rei Lealmente

“Na dje a wòrdu duná dominio, gloria i un reino, pa tur pueblo, nashon i hende di tur idioma por sirbié.”—DANIEL 7:14.

1, 2. Kon nos por sa ku Kristu no a risibí poder kompletu di Reino na aña 33 di nos era?

KUA gobernante lo por duna su bida pa su súpditonan i bolbe biba pa goberná komo rei? Kua rei lo por biba riba tera, stimulá e konfiansa i lealtat di su súpditonan na dje, pa despues goberná for di shelu? E úniko persona ku lo por a hasi esei i hopi kos mas ta Hesukristu. (Lukas 1:32, 33) Na Pentekòste di aña 33 di nos era, despues di Kristu su morto, resurekshon i subimentu na shelu, Dios a nombr’é komo “kabes riba tur kos na e iglesia.” (Efesionan 1:20-22; Echonan 2:32-36) Asina Kristu a kuminsá goberná, ounke esei ainda tabata den un forma limitá. Su promé súpditonan tabata kristiannan ungí ku spiritu, kendenan a forma e Israel spiritual, “e Israel di Dios.”—Galationan 6:16; Kolosensenan 1:13.

² Kasi 30 aña despues di e Pentekòste di aña 33 di nos era, apòstel Pablo a konfirmá ku ainda Kristu no a tuma poder kompletu di Reino, pero e tabata “na man drechi di Dios, sperando for di e tempu ei padilanti, te ora su enemigunan wòrdu hasí un banki pa su pianan.” (Hebreonan 10:12, 13) Anto, kasi na final di e promé siglo di nos era, e biehitu apòstel Juan a mira adelantá den un vishon kon e Soberano di Universo, Yehova, ta instalá Hesukristu komo Rei di e Reino selestial resien establesí. (Revelashon 11:15; 12:1-5) Awe, mirando bèk den historia, nos por repasá e evidensia konvinsente ku ta konfirmá ku Kristu a kuminsá goberná komo Rei Mesiániko den shelu na 1914. *

3. (a) Ki aspekto nobo e bon nobo di e Reino a haña desde 1914? (b) Ki preguntanan nos por hasi nos mes?

³ Sí, desde 1914 e bon nobo di e Reino a haña un aspekto nobo sumamente eksitante. For di e tempu ei, Kristu ta gobernando aktivamente komo Rei di e Reino selestial di Dios, ounke e ta hasiendo esei “meimei di [su] enemigunan.” (Salmo 110:1, 2; Mateo 24:14; Revelashon 12:7-12) Ademas, rònt mundu, su súpditonan leal ta respondiendo ku entusiasmo na su outoridat dor di partisipá den un programa mundial di edukashon bíbliko hamas bisto den historia di humanidat. (Daniel 7:13, 14; Mateo 28:18) Kristiannan ungí ku spiritu, “yunan di e reino,” ta sirbi komo “embahadornan pa Kristu.” Nan ta haña e apoyo leal di un multitut kresiente di Kristu su “otro karnénan,” kendenan ta fungi komo mensahero di e Reino di Dios. (Mateo 13:38; 2 Korintionan 5:20; Juan 10:16) Pero kada un di nos tin ku analisá nos mes pa mira si di bèrdat nos ta rekonosé Kristu su outoridat. Nos ta firmemente leal na dje? Kon nos por ta leal na un Rei ku ta goberná den shelu? Pero, laga nos konsiderá promé pakiko nos mester ta leal na Kristu.

Un Rei Ku Ta Inspirá Lealtat

4. Komo Rei nombrá, kiko Hesus a logra durante su ministerio riba tera?

⁴ Nos lealtat na Kristu ta fundá riba apresio pa loke el a hasi i tambe pa su kualidatnan sobresaliente. (1 Pedro 1:8) Tempu ku Hesus tabata riba tera komo e Rei nombrá pero ku  ainda no a kuminsá goberná, el a demostrá na eskala chikitu loke lo e hasi komo Rei reinante na eskala mundial na e debido tempu di Dios. El a alimentá hende ku tabatin hamber. El a kura hende enfermo, siegu, desabilitá, surdu i muda. Asta el a lanta algun morto bèk na bida. (Mateo 15:30, 31; Lukas 7:11-16; Juan 6:5-13) Ademas, loke nos ta siña tokante Hesus su bida riba tera ta permití nos konosé su kualidatnan komo e futuro Gobernante di tera. I esun di mas notabel ta su amor apnegá. (Marko 1:40-45) Den e konteksto aki, supuestamente Napoleon Bonaparte a yega di bisa: “Alexander, Cesar, Karel de Grote i ami mes a funda imperionan, pero a base di kiko nos a realisá nos hazañanan? A base di poder. Hesukristu so a funda su reino a base di amor, i awendia miónes di hende ta dispuesto di muri p’e.”

5. Kiko a hasi e personalidat di Hesus asina atraktivo?

⁵ Pa motibu ku Hesus tabata un persona mansu i humilde di kurason, e hendenan ku tabata kargá ku e preshonnan di bida a sinti nan refreská pa medio di su siñansa edifikante i personalidat bondadoso. (Mateo 11:28-30) Muchanan a sinti nan kómodo serka dje. Hòmbernan humilde ku tabatin disernimentu tabata ansioso pa bira su disipel. (Mateo 4:18-22; Marko 10:13-16) Su kompashon i trato respetuoso a pone hopi hende muhé temeroso di Dios bira leal na dje. Hopi di nan a kontribuí ku nan tempu, esfuerso i poseshonnan material pa perkurá p’e segun ku el a kumpli ku su ministerio.—Lukas 8:1-3.

6. Ki sintimentu tierno Hesus a revelá ora Lázaro a muri?

⁶ Kristu a revelá algun di su sintimentunan di mas tierno ora su amigu stimá Lázaro a muri. E angustia di Maria i Marta a konmov’é asina tantu ku e no por a evitá di saka un suspiro di tristesa, i el a “yora.” El a bira “masha emoshoná” i a pena profundamente, maske e tabata sa ku djis despues lo el a lanta Lázaro bèk na bida. Anto, konmoví pa amor i kompashon, Hesus a usa e outoridat ku Dios a dun’é pa lanta Lázaro for di morto.—Juan 11:11-15, 33-35, 38-44.

7. Dikon Hesus meresé nos lealtat? (Wak tambe e kuadro na página 31.)

⁷ Hesus su gran amor pa loke ta korekto i su odio kontra hipokresia i maldat ta hasi un impreshon profundo riba nos. Dos biaha el a aktua ku kurashi pa kore ku komersiantenan golos for di e tèmpel. (Mateo 21:12, 13; Juan 2:14-17) Ademas, komo hende riba tera, el a pasa den tur tipo di kontratempu, loke a dun’é oportunidat pa e eksperensiá personalmente tur e preshon- i problemanan ku nos ta enfrentá. (Hebreonan 5:7-9) Hesus tabata sa tambe kiko kier men ser víktima di odio i inhustisia. (Juan 5:15-18; 11:53, 54; 18:38–19:16) Finalmente, ku kurashi el a enfrentá un morto kruel pa kumpli ku e boluntat di su tata i duna su súpditonan bida eterno. (Juan 3:16) E kualidatnan di Kristu ei no ta impulsá bo pa sigui sirbié lealmente? (Hebreonan 13:8; Revelashon 5:6-10) Pero kiko nos mester hasi pa por ta un súpdito di Kristu e Rei?

Kon Bo Por Bira un Súpdito?

8. Ki rekisitonan súpditonan di Kristu tin ku kumpli kuné?

⁸ Pensa riba e komparashon aki: Pa bo bira siudadano di un otro pais, por lo general bo tin ku kumpli ku sierto rekisitonan básiko. Kisas esnan ku ke bira siudadano mester tin un bon reputashon i kumpli ku sierto normanan di salú. Di manera similar, súpditonan di Kristu tin ku kumpli ku normanan haltu di moralidat i nan mester tin un bon salú spiritual.—1 Korintionan 6:9-11; Galationan 5:19-23.

9. Kon nos por mustra ku nos ta leal na Kristu?

⁹ Ademas, Hesukristu tin derecho di eksigí pa su súpditonan ta leal na dje i na su Reino. Nan ta mustra e lealtat ei dor di biba na armonia ku loke el a siña hende tempu ku e tabata riba tera komo Rei nombrá. Por ehèmpel, nan ta pone interesnan di Reino i e boluntat di Dios promé ku tur interes material. (Mateo 6: 31-34) Tambe nan ta hasi esfuerso sinsero pa imitá e personalidat di Kristu, asta bou di e sirkunstansianan di mas difísil. (1 Pedro 2:21-23) Huntu ku esei, e súpditonan di Kristu ta sigui su ehèmpel dor di tuma inisiativa pa hasi bon na otro hende.—Mateo 7:12; Juan 13:3-17.

10. Kon nos por mustra lealtat na Kristu (a) den famia i (b) den kongregashon?

¹⁰ Un otro manera tambe ku Hesus su siguidónan ta mustra nan lealtat na dje ta dor di reflehá su kualidatnan den nan famia. Por ehèmpel, esposonan ta mustra lealtat na nan Rei selestial dor di imitá Kristu den e manera ku nan ta trata nan kasá i yunan. (Efesionan 5:25, 28-30; 6:4; 1 Pedro 3:7) Esposanan ta mustra ku nan ta leal na Kristu dor di nan kondukta limpi i dor di desplegá “un spiritu suave i ketu.” (1 Pedro 3:1-4; Efesionan 5:22-24) Yunan ta leal na Kristu ora nan ta sigui su ehèmpel di obedensia. Komo hóben, Hesus a keda sumiso na su mayornan, ounke nan tabata imperfekto. (Lukas 2:51, 52; Efesionan 6:1) Kristu su súpditonan ta hasi esfuerso pa imit’é lealmente dor di ‘tene kompashon ku otro, stima otro manera ruman’ i trata otro ku ‘miserikòrdia.’ Nan ta trata na imitá Kristu i ser “humilde den spiritu, no pagando malu ku malu òf insulto ku insulto.”—1 Pedro 3:8, 9; 1 Korintionan 11:1.

Súpditonan Ta Obedesé Su Lei

11. Na kua leinan Kristu su súpditonan ta someté nan?

¹¹ Meskos ku hende ku ke bira siudadano di un pais ta kumpli ku e leinan di nan pais nobo, e súpditonan di Kristu tambe ta someté nan na “e lei di Kristu” dor di biba na armonia ku tur loke Hesus a siña i manda hende hasi. (Galationan 6:2) Foral ku “e lei real” di amor nan ta kumpli lealmente. (Santiago 2:8) Kiko e leinan aki ta enserá?

12, 13. Kon nos ta someté nos lealmente na “e lei di Kristu”?

¹² Súpditonan di Kristu tin nan imperfekshon- i fayonan. (Romanonan 3:23) P’esei, nan tin ku sigui kultivá “un amor sinsero” pa “stima otro fervientemente di kurason.” (1 Pedro 1:22) “Si un di [nan] tin un keho kontra un otro,” kristiannan ta apliká lealmente e lei di Kristu dor di “soportá otro i pordoná otro.” Obedensia na e lei aki ta yuda nan pasa imperfekshon por haltu i haña motibu pa stima otro. Bo no ta gradisidu di por ta den kompania di hende ku ta lealmente sumiso na nos Rei amoroso i ku ta bisti nan mes ku amor, “e laso perfekto di unidat”?—Kolosensenan 3:13, 14.

¹³ Ademas, Hesus a splika ku e amor ku el a laga komo ehèmpel tabata mas grandi ku e  amor ku hende por lo general tin pa otro. (Juan 13:34, 35) Si nos ta stima solamente esnan ku ta stima nos, nos lo no ta hasiendo nada “ekstraordinario” [NW]. Den e kaso ei nos amor lo ta inkompletu i defisiente. Hesus a insta nos pa imitá e amor di su Tata dor di tin un amor basá riba prinsipio asta pa enemigunan ku ta odia nos i persiguí nos. (Mateo 5:46-48) E amor aki ta impulsá súpditonan di e Reino tambe pa perseverá lealmente den nan trabou prinsipal. Kua trabou?

Lealtat Poné na Prueba

14. Pakiko e trabou di prediká ta asina importante?

¹⁴ Awe súpditonan di e Reino di Dios tin e trabou krusial di “duna testimonio tokante di e reino di Dios.” (Echonan 28:23) Ta masha importante pa nan hasi esei pasobra e Reino Mesiániko lo demostrá ku Yehova tin derecho di ta e gobernante supremo di universo. (1 Korintionan 15:24-28) Ora nos ta prediká e bon nobo, e hendenan ku ta tende ta haña oportunidat pa bira súpdito di e Reino di Dios. Ademas, e manera ku hende ta reakshoná riba e mensahe ei ta forma e base riba kua Kristu e Rei por husga humanidat. (Mateo 24:14; 2 Tesalonisensenan 1:6-10) P’esei, un manera prinsipal den kua nos ta mustra nos lealtat na Kristu ta dor di obedesé su mandato pa informá otro hende tokante e Reino.—Mateo 28:18-20.

15. Dikon e lealtat di kristiannan ta ser poné na prueba?

¹⁵ Di mes, Satanas ta hasi tur loke ta posibel pa oponé e trabou di prediká, i gobernantenan humano no ta rekonosé e outoridat ku Dios a duna Kristu. (Salmo 2:1-3, 6-8) P’esei, Hesus a spièrta su disipelnan: “Un esklabo no ta mas ku su shon. Si nan a persiguí mi, boso tambe nan lo persiguí.” (Juan 15:20) P’esei siguidónan di Kristu ta haña nan mes den un guera spiritual ku ta pone nan lealtat na prueba.—2 Korintionan 10:3-5; Efesionan 6:10-12.

16. Kon súpditonan di e Reino ta duna “Dios loke ta di Dios”?

¹⁶ No opstante, súpditonan di e Reino di Dios ta keda leal na nan Rei invisibel sin falta rèspèt pa outoridatnan humano. (Tito 3:1, 2) Hesus a deklará: “Duna Cesar loke ta di Cesar, i Dios loke ta di Dios.” (Marko 12:13-17) P’esei e súpditonan di Kristu ta obedesé leinan di gobièrnu ku no ta na konflikto ku e leinan di Dios. (Romanonan 13:1-7) Sin embargo, ora e korte supremo hudiu a bai kontra e leinan di Dios dor di prohibí Hesus su disipelnan di sigui prediká, nan a bisa na un manera firme pero ku rèspèt ku nan mester a “obedesé Dios mas ku hende.”—Echonan 1:8; 5:27-32.

17. Dikon nos por enfrentá prueba di lealtat ku kurashi?

¹⁷ Klaru ku e súpditonan di Kristu mester tin hopi kurashi pa keda leal na nan Rei ora nan ta wòrdu persiguí. No opstante, Hesus a bisa: “Bendishoná boso ta ora ku hende insultá boso i persiguí boso, i ta gaña tur klase di maldat riba boso pa mi kousa. Regosihá i sea kontentu, pasobra boso rekompensa den shelu ta grandi.” (Mateo 5:11, 12) Di eksperensia e promé siguidónan di Kristu a komprobá ku e palabranan ei ta bèrdat. Asta ora nan a ser sutá pa motibu ku nan a sigui prediká tokante e Reino, nan a alegrá pasobra “nan a wòrdu konsiderá digno pa sufri bèrgwensa pa su nòmber. I tur dia, den tèmpel i di kas pa kas, nan tabata sigui siña hende i prediká Hesus komo e Kristu.” (Echonan 5:41, 42) Nos ta elogiá boso ku ta demostrando e mesun spiritu di lealtat ora boso ta pasa den kontratempu, enfermedat, tristesa òf oposishon.—Romanonan 5:3-5; Hebreonan 13:6.

18. Kiko e palabranan ku Hesus a bisa Ponsio Pilato ta indiká?

 ¹⁸ Tempu ku Hesus tabata un rei nombrá pero ku ainda no a asumí su kargo, el a spliká e gobernadó romano Ponsio Pilato: “Mi reino no ta di e mundu aki. Si mi reino tabata di e mundu aki, mi sirbidónan lo a bringa, pa mi no wòrdu entregá na e hudiunan; ma ta asina ku mi reino no ta di e mundu aki.” (Juan 18:36) P’esei, súpditonan di e Reino selestial no ta usa arma kontra ningun hende ni no ta tuma parti den ningun konflikto humano. Komo personanan leal na e “Prens di Pas,” nan ta keda kompletamente neutral den e konfliktonan di mundu.—Isaias 2:2-4; 9:6, 7.

Rekompensa Eterno pa Súpditonan Leal

19. Pakiko súpditonan di Kristu por wak futuro ku konfiansa?

¹⁹ E súpditonan leal di Kristu, e “Rei di reinan,” ta wak futuro ku konfiansa. Nan ta den pleno ekspektativa di e demostrashon ku pronto lo e duna di su poder sobrenatural komo rei. (Revelashon 19:11–20:3; Mateo 24:30) E restu di e “yunan [leal] di e reino” ungí ku spiritu ta anhelá pa risibí nan herensia presioso komo rei ku Kristu den shelu. (Mateo 13:38; Lukas 12:32) E “otro karnénan” leal di Kristu ta spera ansiosamente riba e aprobashon di nan Rei ora e deklará: “Bin, boso ku ta bendishoná di mi Tata, heredá e reino [su region aki riba tera ku lo ta un Paradeis] ku ta prepará pa boso desde e fundashon di mundu.” (Juan 10:16; Mateo 25:34) P’esei, laga tur súpdito di e Reino keda determiná pa sigui sirbi Kristu e Rei lealmente.

[Nota]

Bo Por Splika?

• Pakiko Kristu ta meresé nos lealtat?

• Kon Kristu su súpditonan ta mustra nan lealtat na dje?

• Pakiko nos ke ta leal na Kristu e Rei?

[Preguntanan di Estudio]

[Kuadro na página 31]

MAS DI KRISTU SU KUALIDATNAN SOBRESALIENTE

Imparsialidat—Juan 4:7-30.

Kompashon—Mateo 9:35-38; 12:18-21; Marko 6:30-34.

Amor apnegá—Juan 13:1; 15:12-15.

Lealtat—Mateo 4:1-11; 28:20; Marko 11:15-18.

Empatia—Marko 7:32-35; Lukas 7:11-15; Hebreonan 4:15, 16.

Aktitut rasonabel—Mateo 15:21-28.

[Plachi na página 29]

Dor di mustra amor pa otro, nos ta someté nos lealmente na “e lei di Kristu”

[Plachi na página 31]

E kualidatnan di Kristu ta impulsá bo pa sirbié lealmente?