Wardadónan Ku Ta “Ehèmpel pa e Tou”
Wardadónan Ku Ta “Ehèmpel pa e Tou”
“Pastoriá e tou di Dios meimei di boso . . . boluntariamente, . . . ku hopi afan; . . . siendo ehèmpel pa e tou.”—1 PEDRO 5:2, 3.
1, 2. (a) Ku ki privilegio Hesus a enkargá apòstel Pedro, i pakiko e konfiansa di Hesus no tabata pòrnada? (b) Ki sintimentu Yehova tin pa wardadónan nombrá?
POKO tempu promé ku Pentekòste di aña 33 di nos era, Pedro ku seis otro disipel tabata kome un desayuno ku Hesus a prepará na oriya di Laman di Galilea. No tabata e promé biaha ku Pedro a mira Hesus despues ku el a resusitá i sin duda tabata algu emoshonante pa sa ku Hesus tabata na bida. Pero kisas Pedro tabatin un tiki miedu tambe. Al fin i al kabo, apénas un par di dia promé, el a bisa públikamente ku e no tabata konosé Hesus mes. (Lukas 22:55-60; 24:34; Juan 18:25-27; 21:1-14) Hesus a reprendé Pedro kende tabatin un kurason arepentí pa su falta di fe? Nò. Al kontrario, el a enkargá Pedro ku e privilegio di alimentá i pastoriá su “lamchinan.” (Juan 21:15-17) Manera e relato bíbliko di e historia di e kongregashon kristian di promé siglo ta mustra, no ta pòrnada Hesus a pone su konfiansa den Pedro. Huntu ku e otro apòstelnan i ansianonan di Yerusalèm, Pedro en bèrdat a pastoriá e kongregashon kristian atraves di un periodo di prueba severo i oumento rápido.—Echonan 1:15-26; 2:14; 15:6-9.
2 Awe, pa medio di Hesukristu, Yehova a nombra hòmbernan kualifiká pa sirbi komo wardadónan spiritual pa guia Su karnénan atraves di e tempu di mas krítiko den historia humano. (Efesionan 4:11, 12, BPK; 2 Timoteo 3:1) Yehova tabatin motibu pa konfia den e hòmbernan ei? E hermandat kristian pasífiko ku ta eksistí rònt mundu ta demostrá ku sí. Ta bèrdat ku e wardadónan aki ta hendenan ku sa faya, meskos ku Pedro. (Galationan 2:11-14; Santiago 3:2) I tòg, ta nan Yehova a enkargá ku e kuido di e karnénan ku “el a kumpra ku e sanger di su propio Yu.” (Echonan 20:28, NW) Yehova tin un kariño profundo pa e hòmbernan aki i e ta konsiderá nan “digno di dòbel onor.”—1 Timoteo 5:17.
3. Kon wardadónan spiritual ta mantené un aktitut boluntario, di buena gana i ku afan?
3 Kon wardadónan spiritual ta mantené un aktitut boluntario, di buena gana i ku afan, birando asina ehèmpel pa e tou? Meskos ku Pedro i e otro wardadónan di promé siglo, nan ta dependé riba e spiritu santu di Dios, i esei ta duna nan e forsa ku nan tin mester pa kumpli ku nan responsabilidat. (2 Korintionan 4:7) Ademas, spiritu santu ta produsí den nan e fruta di spiritu, lokual ta amor, goso, pas, pasenshi, kariño, bondat, fe, suavedat i dominio propio. (Galationan 5:22, 23) Laga nos konsiderá den ki manera spesífiko wardadónan por pone un ehèmpel den demostrá e fruta aki den nan trabou di pastoriá e tou di Dios bou di nan kuido.
Stima e Tou i Kada Karné Individual
4, 5. (a) Kon Yehova i Hesus ta mustra amor pa e tou? (b) Den ki manera wardadónan spiritual ta demostrá amor pa e tou?
4 E kualidat di mas importante ku e spiritu di Dios ta produsí ta amor. Yehova ta manifestá su amor pa henter e tou, i prueba di esei ta e abundansia di alimento spiritual ku e ta perkurá p’e. (Isaias 65:13, 14; Mateo 24:45-47) Pero e ta bai mas aleu ku djis alimentá e tou. E tin un interes amoroso den kada karné individual. (1 Pedro 5:6, 7) Hesus tambe ta stima e tou. El a entregá su alma na fabor di dje, i e konosé kada karné personalmente, “na nan nòmber.”—Juan 10:3, 14-16.
5 Wardadónan spiritual ta imitá Yehova i Hesus. Nan ta demostrá amor pa henter e tou di Dios dor di “okupá [nan mes ku] siñamentu” di e kongregashon. Nan diskursonan basá riba Beibel ta yuda alimentá i protehá e tou, i nan trabou duru den e aspekto aki ta bisto pa tur hende. (1 Timoteo 4:13, 16) Loke ta ménos bisto ta e tempu ku nan ta dediká na mantené registronan, atendé korespondensia, traha programa i perkurá pa hopi otro detaye pa asina garantisá ku e reunionnan di kongregashon i otro aktividatnan ta tuma lugá “korektamente i na un manera ordená.” (1 Korintionan 14:40) Gran parti di e trabou aki ta ser hasí for di bista públiko i probablemente ta risibí masha poko rekonosementu. E ta en bèrdat un trabou ku nan ta hasi ku amor.—Galationan 5:13.
6, 7. (a) Kon wardadónan por siña konosé e karnénan mihó? (b) Pakiko tin biaha ta benefisioso pa nos papia ku un ansiano tokante nos sintimentunan?
6 Wardadónan kristian amoroso ta hasi esfuerso pa mustra interes personal den kada karné di e kongregashon. (Filipensenan 2:4) Por ehèmpel, un wardadó por siña konosé un karné dor di traha kuné den e trabou di prediká. Hopi bes Hesus tabata huntu ku su siguidónan den e trabou di prediká i a usa e okashonnan ei pa animá nan. (Lukas 8:1) Un wardadó kristian ku hopi eksperensia a bisa: “Pa mi, un di e mihó maneranan pa siña konosé i animá un ruman hòmber òf un ruman muhé ta dor di traha kuné den sirbishi di vèlt.” Si bo no a haña chèns últimamente di traha ku un di e ansianonan den sirbishi di vèlt, pakiko bo no ta buska un oportunidat pa hasi esaki pronto?
7 Amor a motivá Hesus pa ta solidario ku su siguidónan tantu den nan alegria komo den nan tristesa. Por ehèmpel, ora 70 di su disipelnan a regresá ku goso for di nan predikashon, Hesus a ‘yena ku alegria.’ (Lukas 10:17-21, BPK) Sin embargo, ora el a mira e efekto ku morto di Lázaro tabatin riba Maria i e miembronan di su famia i amigunan, el “a yora.” (Juan 11:33-35) Meskos tambe, wardadónan amoroso djawe no ta indiferente pa ku e sintimentunan di e karnénan. Amor ta motivá nan pa “regosihá ku esnan ku ta regosihá” i pa “yora ku esnan ku ta yora.” (Romanonan 12:15) Ora bo tin bo momentonan di alegria òf di tristesa, sinti bo liber pa papia di bo sintimentunan ku wardadónan kristian. Bo eksperensianan gososo lo animá nan, i ora bo konta nan di bo pruebanan, esei lo duna nan chèns di fortalesé bo i konsolá bo.—Romanonan 1:11, 12; 1 Tesalonisensenan 1:6; 3:1-3.
8, 9. (a) Kon un ansiano a mustra amor na su kasá? (b) Pakiko ta importante pa un wardadó mustra amor na su famia?
8 E amor ku un wardadó tin pa e tou ta partikularmente bisto den e manera ku e ta trata su mes famia. (1 Timoteo 3:1, 4) Si e ta kasá, e amor i e onor ku e ta mustra na su esposa ta sirbi komo ehèmpel pa otro hòmbernan kasá imitá. (Efesionan 5:25; 1 Pedro 3:7) Pensa por ehèmpel riba e komentarionan di un señora kristian ku yama Linda. Su kasá a sirbi komo superintendente pa mas ku 20 aña promé ku su morto. Linda a bisa: “Semper mi esposo tabata drùk ku asuntunan di kongregashon. Pero el a laga mi sinti ku mi tabata parti di un tim. Hopi bes e tabata ekspresá su apresio pa mi sosten, i e tabata dediká su tempu liber na mi. Komo resultado di esei, mi a sinti mi stimá i mi no tabata envidiá e tempu ku e tabata dediká na sirbi e kongregashon.”
9 Si un wardadó kristian tin yu, e manera amoroso ku e ta disipliná nan i elogiá nan regularmente ta sirbi komo un modelo pa otro mayornan imitá. (Efesionan 6:4) De echo, e amor ku e ta mustra na su famia ta duna evidensia kontinuo ku e ta meresé e konfiansa ku el a risibí ora el a ser nombrá komo wardadó pa medio di spiritu santu.—1 Timoteo 3:4, 5.
Promové Goso i Pas dor di Komuniká
10. (a) Kiko por afektá e goso i pas di e kongregashon? (b) Ki kuestion a menasá e pas di e kongregashon di promé siglo, i kon e kuestion ei a ser resolvé?
10 Spiritu santu por produsí goso i pas den kurason di un kristian individual, entre un kuerpo di ansiano i den henter e kongregashon. Sin embargo, falta di komunikashon franko por afektá e goso i pas aki. Salomon di antigwedat a remarká: “Plannan ta frakasá pa falta di deliberashon.” (Proverbionan 15:22, BPK) Di otro banda, komunikashon respetuoso i franko ta promové goso i pas. Por ehèmpel, ora e kuestion di sirkunsishon a menasá di desbaratá e pas di e kongregashon di promé siglo, e kuerpo gobernante den Yerusalèm a buska e guia di spiritu santu. Ademas, e ansianonan aki a ekspresá nan diferente puntonan di bista riba e asuntu aki. Despues di un konsiderashon profundo, nan a yega na un desishon. Ora nan a informá e kongregashonnan di nan desishon unánime, e rumannan a “regosihá pa motibu di e enkurashamentu,” i esaki a promové goso i pas.—Echonan 15:6-23, 25, 31; 16:4, 5.
11. Kon ansianonan por promové goso i pas den e kongregashon?
11 Awe tambe wardadónan ta promové goso i pas den e kongregashon dor di komuniká bon ku otro. Ora problemanan ta menasá e pas di e kongregashon, nan ta reuní huntu i ekspresá nan opinionnan na un manera franko. Ku rèspèt nan ta skucha komentario di otro. (Proverbionan 13:10; 18:13) Despues ku nan resa pidi pa spiritu santu, nan ta basa nan desishonnan riba prinsipionan di Beibel i riba e guia publiká dor di “e esklabo fiel i prudente.” (Mateo 24:45-47; 1 Korintionan 4:6) Unabes e kuerpo di ansiano tuma un desishon sano basá riba e Skritura, kada ansiano ta someté su mes na e guia di spiritu santu dor di sostené e desishon ei asta ora e mayoria no a respaldá su opinion personal. E modestia ei ta promové goso i pas i ta sirbi komo un bon ehèmpel pa e karnénan por mira kon nan mester kana ku Dios. (Mikeas 6:8) Abo ta koperando den un forma modesto ku e desishonnan basá riba Beibel ku e wardadónan den e kongregashon ta tuma?
Mustra Pasenshi i Bondat
12. Pakiko Hesus mester a trata su apòstelnan ku pasenshi i bondat?
12 Ounke e apòstelnan tabata faya bes tras bes, Hesus a trata nan ku pasenshi i bondat. Por ehèmpel, vários biaha el a purba inkulká den nan ku nan mester ta humilde. (Mateo 18:1-4; 20:25-27) I tòg, riba e último anochi di Hesus su bida riba tera, despues ku el a kaba di duna nan un lès di humildat dor di a laba nan pia, “a lanta un diskushon entre nan tokante kua di nan tabata wòrdu konsiderá di ta esun di mas grandi.” (Lukas 22:24; Juan 13:1-5) Hesus a skual e apòstelnan? Nò, el a rasoná bondadosamente ku nan, i el a bisa nan: “Ken ta mas grandi: esun ku ta sinta na mesa òf esun ku ta sirbi? No ta esun ku ta sinta na mesa? Ma ami ta meimei di boso manera esun ku ta sirbi.” (Lukas 22:27) E pasenshi i e bondat ku Hesus a demostrá—kompañá pa su bon ehèmpel—ku tempu a konmové su apòstelnan.
13, 14. Ki ora spesialmente wardadónan mester ta bondadoso?
13 Di igual manera, kisas un wardadó spiritual tin ku konsehá un ruman vários biaha relashoná ku un sierto fayo. E ruman por asta iritá e wardadó. Sin embargo, si e wardadó kòrda riba su mes fayonan ora e ta “spièrta esnan ku ta hiba un bida desordená,” lo e por mustra pasenshi i bondat na su ruman. Den e forma ei e ta imitá Hesus i Yehova, kendenan ta mustra e kualidatnan aki na tur kristian—inkluso e wardadónan.—1 Tesalonisensenan 5:14; Santiago 2:13.
14 Tin biaha, wardadónan por haña nan ta duna konseho fuerte na un ruman ku a kometé un piká serio. Si e ruman no arepentí, e wardadónan mester sak’é for di e kongregashon. (1 Korintionan 5:11-13) Asta si mester yega asina leu, e manera ku nan ta trata e persona ta demostrá ku nan ta odia e piká, i no e pekadó. (Hudas 23) Ora un karné ku a dual haña un trato bondadoso serka e wardadónan, ta bira mas fásil pa despues di tempu e bolbe na e tou.—Lukas 15:11-24.
Fe Ta Motivá Bon Obra
15. Den ki manera wardadónan ta imitá e bondat di Yehova, i kiko ta motivá nan pa hasi esei?
15 ‘Yehova ta bon pa tur hende,’ asta pa esnan ku no ta apresiá loke e ta hasi pa nan. (Salmo 145:9; Mateo 5:45) Su bondat ta spesialmente bisto den e echo ku e ta manda su pueblo prediká “e evangelio . . . di e reino.” (Mateo 24:14) Wardadónan ta reflehá e bondat di Dios dor di hiba delantera den e trabou di prediká aki. Kiko ta motivá nan pa hasi esfuerso inkansabel? Esei ta fe firme den Yehova i den su promesanan.—Romanonan 10:10, 13, 14.
16. Kon wardadónan por “hasi bon” na e karnénan?
16 Ademas di “hasi bon na tur hende” pa medio di e predikashon, wardadónan tin e responsabilidat di hasi loke ta bon “spesialmente na esnan ku ta di e famia di fe.” (Galationan 6:10) Un manera ku nan ta hasi esaki ta pa medio di bishitanan di pastoreo edifikante. Un ansiano a bisa: “Mi ta gusta hasi bishita di pastoreo. Esaki ta duna mi oportunidat pa elogiá e rumannan pa nan esfuersonan i pa yuda nan realisá ku nos ta apresiá nan trabou duru.” Tin biaha, wardadónan por sugerí un ruman kon e por mehorá su sirbishi na Yehova. Dor di hasi esei, wardadónan sabí ta imitá apòstel Pablo. Wak por ehèmpel kon el a insta e rumannan na Tesalónika: “Nos tin konfiansa den Señor tokante di boso, ku boso ta hasiendo i lo sigui hasi loke nos ta ordená.” (2 Tesalonisensenan 3:4) Tal ekspreshonnan di konfiansa ta stimulá e bon tendensianan di e karnénan i ta bira mas fásil pa nan ta “obediente na esnan ku ta hiba delantera.” (Hebreonan 13:17, NW) Dia bo risibí un bishita di pastoreo edifikante, ekspresá bo apresio p’e.
Suavedat Ta Rekerí Dominio Propio
17. Ki lès Pedro a siña di Hesus?
17 Hesus tabatin un spiritu suave, asta ora el a ser provoká. (Mateo 11:29) Dia el a ser traishoná i arestá, el a manifestá suavedat i un gran dominio propio. Di otro banda, Pedro sí a aktua sin pensa; el a saka un spada i tuma vengansa. Pero Hesus a rekord’é: “Bo ta kere ku mi no por pidi mi Tata, i mesora e lo pone mas ku diesdos legion di angel na mi disposishon?” (Mateo 26:51-53; Juan 18:10) Pedro a siña su lès i despues el a skirbi kristiannan: “Kristu . . . a sufri pa boso, lagando un ehèmpel pa boso, pa boso sigui den su pasonan . . . Ora ku el a wòrdu zundrá, e no a zundra bèk; ora ku el a sufri, e no a menasá.”—1 Pedro 2:21-23.
18, 19. (a) Ki ora spesialmente wardadónan tin ku desplegá suavedat i dominio propio? (b) Ki preguntanan nos lo konsiderá den e siguiente artíkulo?
18 Di igual manera, pa wardadónan por tin éksito nan tambe mester tin un spiritu suave asta ora nan ser tratá inhustamente. Por ehèmpel, kisas nan ta purba yuda un miembro di e kongregashon ku no ta reakshoná faborablemente. Si e persona en kuestion ta débil òf malu spiritualmente, lo e por “papia sin pensa, manera hinká di spada” ora e haña konseho. (Proverbionan 12:18) Sin embargo, meskos ku Hesus, wardadónan no ta reakshoná ku palabra skèrpi ni ku akshonnan di vengansa. Mas bien, nan ta ehersé dominio propio i ta sigui mustra sintimentu di kompañero, lokual por resultá di ta un bendishon pa esun ku tin mester di yudansa. (1 Pedro 3:8, 9) Abo ta siña for di e ehèmpel di e ansianonan i ta manifestá suavedat i dominio propio ora bo risibí konseho?
19 Sin duda, tantu Yehova komo Hesus ta apresiá e trabou duru di e míles di wardadónan ku ta kuida e tou mundial di buena gana. Nan tin un amor profundo tambe pa e míles di sirbidónan ministerial ku ta apoyá e ansianonan den “sirbi e santunan.” (Hebreonan 6:10) Pakiko anto algun ruman hòmber batisá kisas ta vasilá pa hasi esfuerso pa alkansá e “bon trabou” aki? (1 Timoteo 3:1) I kon Yehova ta entrená esnan ku e ta nombra komo wardadó? Nos lo konsiderá e preguntanan aki den e siguiente artíkulo.
Bo Ta Kòrda?
• Den ki manera wardadónan ta mustra amor pa e tou?
• Kon tur miembro di e kongregashon por promové goso i pas?
• Pakiko wardadónan ta mustra pasenshi i bondat ora nan ta duna konseho?
• Kon ansianonan ta desplegá bondat i fe?
[Preguntanan di Estudio]
[Plachi na página 18]
Amor ta motivá ansianonan pa sirbi e kongregashon
[Plachinan na página 18]
Nan ta dediká tempu tambe na nan famia tantu den rekreo . . .
. . . komo den sirbishi
[Plachi na página 20]
Bon komunikashon entre e ansianonan ta promové goso i pas den e kongregashon