Bo Ta Prepará pa Sobrebibí?
Bo Ta Prepará pa Sobrebibí?
“Bai den e arka, abo i tur hende di bo kas, pasobra ta abo so mi a mira ku ta hustu mi dilanti den e tempu aki.”—GÉNESIS 7:1.
1. Ki areglo pa hende sobrebibí Yehova a hasi den tempu di Noe?
YEHOVA “a trese un diluvio riba e mundu di e impionan” den tempu di Noe, pero tambe el a hasi areglo pa hende sobrebibí. (2 Pedro 2:5) E Dios berdadero a duna e hòmber hustu Noe instrukshonnan detayá pa traha un arka pa preservá bida durante e diluvio mundial. (Génesis 6:14-16) Manera nos lo a spera di un fiel sirbidó di Yehova, “asina Noe a hasi; konforme tur loke Dios a orden’é, el a hasi.” Pa un parti, ta debí na Noe su obedensia ku nos ta na bida awe.—Génesis 6:22.
2, 3. (a) Kon e hendenan den tempu di Noe a reakshoná riba su aktividat? (b) Ku ki konfiansa Noe a drenta e arka?
2 Konstrukshon di e arka no tabata un tarea fásil. Hopi hende muy probablemente a keda masha asombrá ku loke Noe i su famia tabata logrando. Sin embargo, esei no tabata sufisiente pa konvensé nan ku pa haña salbashon nan mester a drenta den e arka. Finalmente, Dios su pasenshi ku e mundu malbado ei a kaba.—Génesis 6:3; 1 Pedro 3:20.
3 Despues ku Noe i su famia a traha duru pa vários dékada, Yehova a bisa Noe: “Bai den e arka, abo i tur hende di bo kas, pasobra ta abo so mi a mira ku ta hustu mi dilanti den e tempu aki.” Ku fe i konfiansa den Yehova su palabra, “Noe, ku su yu hòmbernan, su esposa i esposanan di su yu hòmbernan, a bai den e arka.” Yehova a sera e porta pa asina protehá su adoradónan. Ora ku e Diluvio a bin riba tera, e arka ku Dios a perkurá a resultá di ta konfiabel i a logra preservá bida.—Génesis 7:1, 7, 10, 16.
Paralelonan Awe Ku Ta Similar na e Tempu di Noe
4, 5. (a) Ku kiko Hesus a kompará e tempu di su presensia? (b) Ki similaridatnan tin entre e tempu di Noe i nos tempu?
4 “E binida di e Yu di hende lo ta meskos ku e dianan di Noe.” (Mateo 24:37) Ku e palabranan aki Hesus a indiká ku e tempu di su presensia invisibel lo ta similar na e tempu di Noe, i en bèrdat ta asina. Foral desde aña 1919, un mensahe di atvertensia similar na esun ku Noe a duna ta ser deklará na hende di tur nashon. Por lo general, nan ta reakshoná meskos ku e hendenan den tempu di Noe.
5 Pa medio di e Diluvio, Yehova a tuma akshon kontra un mundu “yen di violensia.” (Génesis 6:13) Tabata bisto pa tur hende ku Noe i su famia no a partisipá den tal violensia, sino mas bien nan a sigui pasífikamente ku nan trabou di konstruí un arka. Den esaki tambe nos ta mira un paralelo ku nos tempu. Hende sinsero awe por ‘distinguí entre e hustu i e malbado, entre un ku ta sirbi Dios i un ku no ta sirbié.’ (Malakias 3:18) E onrades, bondat, pas i diligensia ku Testigunan di Yehova ta desplegá ta ser atmirá pa opservadónan imparsial, i e kualidatnan aki ta distinguí Dios su pueblo for di mundu en general. E Testigunan ta rechasá tur sorto di violensia i ta laga e spiritu di Yehova guia nan. Ta p’esei nan ta ser bendishoná ku pas i ta p’esei nan ta sigui kana den un kaminda hustu.—Isaias 60:17.
6, 7. (a) Kiko e hendenan den tempu di Noe no a realisá, i kon awe ta meskos? (b) Ki ehèmpelnan ta mustra ku por lo general hende ta rekonosé ku Testigunan di Yehova ta otro?
6 E hendenan den tempu di Noe no a realisá ku Noe tabatin e respaldo di Dios i ku e tabata aktua a base di Dios su instrukshon. P’esei nan no a tuma su predikashon na serio i no a aktua a base di su mensahe di atvertensia. Kiko di awe? Ounke hopi hende ta keda impreshoná ku e obra i komportashon di Testigunan di Yehova, mayoria di nan no ta tuma e bon nobo ni e spièrtamentu di Beibel na serio. Bisiñanan, doñonan di trabou òf famianan kisas ta papia masha bon di e kualidatnan ekselente di kristiannan berdadero pero den e mesun rosea nan ta lamentá: “Úniko kos, mare nan no tabata Testigu di Yehova!” Loke e opservadónan aki no ta realisá ta ku e Testigunan ta desplegá e kualidatnan ei manera amor, pas, kariño, bondat, suavedat i dominio propio pasobra Dios su spiritu ta guia nan. (Galationan 5:22-25) E echo ku nan ta desplegá e kualidatnan aki lo mester pone hende kere mas lihé den e mensahe ku nan ta prediká.
7 Por ehèmpel na Rusia, Testigunan di Yehova tabata traha un Salòn di Reino. Un hòmber ku a para papia ku un di e trahadónan a bisa: “Esaki sí ta un sitio di konstrukshon straño; no tin humamentu, no tin palabra malu, anto ningun hende no ta fuma! Abo kisas ta un Testigu di Yehova?” E trahadó a puntr’é: “Si mi bisa nò, lo bo kere mi?” E hòmber a kontestá mesora: “Nò, lo mi no kere bo.” Den un otro stat ruso, e alkalde a keda masha impreshoná ora ku el a mira e Testigunan traha nan Salòn di Reino nobo. El a bisa ku ounke ántes e tabata haña ku tur grupo religioso ta meskos, despues di a mira e inegoismo sinsero di Testigunan di Yehova den akshon, e no ta pensa asina mas. Esakinan ta dos ehèmpel so ku ta mustra ku e sirbidónan di Yehova ta otro for di e hendenan ku no ta pega na normanan bíbliko.
8. Di kiko ta dependé ku nos lo sobrebibí e fin di e mundu malbado aki?
8 Durante e periodo final di e “mundu antiguo” ku a ser destruí dor di e Diluvio, Noe tabata un fiel “predikadó di hustisia.” (2 Pedro 2:5) Den e último dianan aki di e sistema di kosnan aktual, e pueblo di Yehova ta proklamá Dios su normanan hustu i ta deklará e bon notisia ku hende tin e posibilidat di sobrebibí i drenta e mundu nobo. (2 Pedro 3:9-13) Meskos ku Noe i su famia temeroso di Dios a ser preservá den e arka, sobrebibensia ta dependé awe di un persona su fe i su fiel asosiashon ku e parti terenal di Yehova su organisashon universal.
Fe Ta Nesesario pa Sobrebibí
9, 10. Dikon fe ta esensial si nos ke sobrebibí e fin di e sistema di kosnan di Satanas?
9 Kiko un persona mester hasi p’e por sobrebibí e destrukshon inminente di e mundu aki ku ta bou di kontròl di Satanas? (1 Juan 5:19) Na promé lugá e tin ku rekonosé ku e tin mester di protekshon. Kaba e tin ku hasi uso di e protekshon ei. E hendenan den tempu di Noe a sigui ku nan bida diario na nan manera akustumbrá i nan no a haña ku tabata nesesario pa buska protekshon kontra e binidero kalamidat. Nan tabata falta un kos mas: fe den Dios.
10 Di otro banda, Noe ku su famia a rekonosé ku nan tabatin mester di protekshon i liberashon. Tambe nan a ehersé fe den e Soberano Universal, Yehova Dios. Apòstel Pablo a skirbi: “Sin fe ta imposibel pa agradá [Yehova], pasobra esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” Pablo a agregá: “Pa medio di fe Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka pa salbashon di e hendenan di su kas, pa medio di kual el a kondená mundu i a bira un heredero di e hustisia ku ta segun fe.”—Hebreonan 11:6, 7.
11. Kiko nos por siña for di e manera ku Yehova a perkurá protekshon den pasado?
11 Pa sobrebibí e fin di e aktual sistema di kosnan malbado, nos tin ku hasi mas ku kere ku lo e ser destruí. Nos tin ku ehersé fe den e provishonnan ku Dios a hasi pa nos sobrebibí, i mustra nos fe dor di probechá plenamente di nan. Klaru ku nos tin ku ehersé fe tambe den e sakrifisio di reskate di Dios su Yu, Hesukristu. (Juan 3:16, 36) Sin embargo, ta bon pa nos kòrda ku ta solamente esnan ku tabata den e arka di Noe a sobrebibí e Diluvio. Di igual manera, e statnan di refugio den antiguo Israel a duna protekshon na e matadó ku a mata un persona no intenshonalmente, solamente si el a hui bai promé na un di e statnan ei i despues a keda den e stat te na morto di e sumo saserdote. (Numbernan 35:11-32) Den tempu di Moisés, e di dies plaga riba Egipto a mata tur primogénito di e egipsionan, pero esnan di e israelitanan a skapa. Dikon? Yehova a instruí Moisés: “Nan [e israelitanan] mester kohe un poko di e sanger [di e lamchi di Pasku] i pone esaki na e dos kozeinnan na banda i na esun ariba di porta di e kasnan kaminda nan ta kome e lamchi. . . . I ningun di boso no mag sali for di porta di su kas te ora dia habri.” (Eksodo 12:7, 22) Ta kua primogénito den e israelitanan lo a tribi ignorá e instrukshon ei ku Dios a duna i bai pafó di un kas marká ku e sanger di sprengu riba e dos kozeinnan i ariba di e porta?
12. Ki pregunta kada un di nos tin ku hasi nos mes, i dikon?
12 P’esei nos tin motibu pa pensa kuidadosamente riba nos situashon personal. Nos ta realmente paden di Yehova su areglo pa haña protekshon spiritual? Ora ku e tribulashon grandi dal aden, lágrimanan di goso i di gradisimentu lo kore na kara di esnan ku a buska tal protekshon. Pa otro hende, lo tin solamente lágrimanan di tristesa i lamento.
Ahustenan Progresivo Ta Prepará Nos pa Sobrebibí
13. (a) Ki propósito ahustenan den e organisashon tabatin? (b) Splika algun di e ahustenan progresivo ku a tuma lugá.
13 Yehova a hasi ahustenan kada bes mihó den e parti terenal di su organisashon. Esakinan a sirbi pa embeyesé, stabilisá i fortalesé su areglo pa duna nos protekshon spiritual. Di dékada di 1870 pa aña 1932, miembronan di e kongregashon tabata elegí hende hòmber pa e puesto di ansiano i diákono. Na 1932 a remplasá e sistema di elegí ansiano ku e sistema di un komité di sirbishi elegí dor di e kongregashon pa yuda un direktor di sirbishi ku tabata ser apuntá. Durante 1938, a hasi areglo pa nombramentu teokrátiko di tur sirbidó den kongregashon. Desde 1972, bou di guia di e Kuerpo Gobernante di Testigunan di Yehova, ta hasi rekomendashon i si esakinan keda aprobá, kongregashonnan ta haña karta ku ta nombra superintendentenan i sirbidónan ministerial teokrátikamente. Atraves di añanan, e karga di trabou di e Kuerpo Gobernante a oumentá i a hasi kambionan pa fasilitá nan trabou.
14. Kua programa di entrenamentu a kuminsá na 1959?
14 Na 1950, un konsiderashon kuidadoso di Salmo 45:16 a hiba na un programa kontinuo di entrenamentu. E teksto ei ta bisa: “Bo yunan lo ta na lugá di bo tatanan; lo bo nombra nan komo prens den henter e pais.” Ansianonan ku awor ta hiba delantera den e kongregashon ta ser entrená pa debernan teokrátiko ku nan mester kumplí kuné aktualmente i despues di Armagedón. (Revelashon 16:14, 16) Na 1959 a kuminsá ku e Skol di Ministerio di Reino. E tempu ei, a hasi areglo pa duna un kurso di instrukshon di un luna largu prinsipalmente pa sirbidónan di kongregashon, manera superintendentenan presidente tabata ser yamá e tempu ei. Awor a ekstendé e skol aki i e ta ofresé instrukshon na tur superintendente i sirbidó ministerial. E ruman hòmbernan aki na nan turno ta hiba delantera den entrená Testigunan di Yehova individual den nan respektivo kongregashonnan. Pues asina tur ruman ta haña yudansa spiritual i ta ser yudá pa oumentá e efektividat di nan ministerio komo proklamadó di e bon nobo di Reino.—Marko 13:10.
15. Menshoná dos manera ku ta protehá e puresa di e kongregashon kristian.
15 Personanan ku ke bira parti di e kongregashon kristian tin ku kumpli ku sierto rekisitonan. Ta lógiko ku no ta permití bofonadónan di tempu aktual bira parti di e kongregashon, meskos ku no a permití bofonadó drenta den e arka di Noe. (2 Pedro 3:3-7) Foral desde 1952, Testigunan di Yehova a duna mayor sosten na un areglo ku ta yuda protehá e kongregashon, esta, di ekspulsá pekadónan ku no arepentí. Klaru ku amorosamente e rumannan ta yuda malechornan ku realmente repentí pa nan ‘traha bereanan stret pa nan pianan.’—Hebreonan 12:12, 13; Proverbionan 28:13; Galationan 6:1.
16. Den ki kondishon spiritual e pueblo di Yehova ta?
16 E prosperidat spiritual di e pueblo di Yehova no ta un sorpresa ni ta pa kasualidat. Mediante profeta Isaias, Yehova a bisa: “Mira, mi sirbidónan lo kome, ma boso lo pasa hamber. Mira, mi sirbidónan lo bebe, ma boso lo tin set. Mira, mi sirbidónan lo regosihá, ma boso lo wòrdu brongosá. Mira, mi sirbidónan lo dal gritu di goso ku un kurason kontentu, ma boso lo grita yora ku un kurason pisá, i boso lo lamentá ku un spiritu kibrá.” (Isaias 65:13, 14) Yehova ta sigui perkurá un abundansia di kuminda spiritual oportuno i saludabel ku ta mantené nos spiritualmente fuerte.—Mateo 24:45.
Sea Prepará pa Sobrebibí
17. Kiko lo yuda nos prepará pa sobrebibí?
17 Awor, mas ku nunka promé, ta tempu pa “nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro.” (Hebreonan 10:23-25) Dor di keda hopi pegá i aktivo ku un di e mas ku 98.000 kongregashonnan di Testigunan di Yehova ku tin lo yuda nos prepará nos mes pa sobrebibí. Nos lo tin e sosten di rumannan den fe segun ku nos di kurason ta hasi esfuerso pa desplegá ‘e personalidat nobo’ i pa yuda otro hende siña tokante Yehova su provishon pa salbashon.—Efesionan 4:22-24; Kolosensenan 3:9, 10; 1 Timoteo 4:16.
18. Dikon bo ta determiná pa keda pegá ku e kongregashon kristian?
18 Satanas i su mundu malbado tin e deseo intenso di tenta nos i kita nos for di e kongregashon kristian. Sin embargo, nos por keda un parti di e kongregashon i por sobrebibí e fin di e aktual sistema di kosnan malbado. Laga nos amor pa Yehova i gratitut pa su provishonnan amoroso, motivá nos pa ta mas determiná ku nunka pa stroba e intentonan di Satanas. Un kos ku lo yuda fortalesé nos determinashon ta di meditá riba e bendishonnan ku nos tin aktualmente. Den e siguiente artíkulo nos lo trata algun di e bendishonnan aki.
Kiko Ta Bo Kontesta?
• Kon nos tempu ta similar ku esun di Noe?
• Kua kualidat ta esensial pa sobrebibí?
• Ki ahustenan progresivo a fortalesé Yehova su areglo pa protehá nos?
• Kon nos personalmente por prepará pa sobrebibí?
[Preguntanan di Estudio]
[Plachi na página 22]
E hendenan den tempu di Noe no a tum’é na serio
[Plachi na página 23]
Ta bale la pena tuma Dios su mensahenan di atvertensia na serio
[Plachi na página 24]
Kiko ta e propósito di e Skol di Ministerio di Reino?
[Plachi na página 25]
Awor ta tempu pa keda pegá ku e kongregashon kristian