E Balor di “un Vaso mas Delikado”

“Boso, esposonan, biba ku boso esposanan ku komprenshon, manera ku un vaso mas delikado, komo ku e ta hende muhé; i dun’é onor,” segun apòstel Pedro. (1 Pedro 3:7) Akaso e echo ku Beibel ta referí na hende muhé komo “un vaso mas delikado” ta rebahá nan di un manera òf otro? Laga nos wak kiko e eskritor inspirá kier a bisa originalmente.

E sustantivo griego tradusí komo “onor” ta nifiká “preis, balor, . . . rèspèt.” Pues, un esposo kristian mester trata su esposa ku ternura, mustrando e debido konsiderashon na dje manera na un vaso delikado i presioso. Esaki di ningun manera ta rebahá e esposa. Por ehèmpel, tuma e famoso lampi di Tiffany ku dibuho di lotus. En bèrdat nos por konsiderá e lampi masha bunita i fini aki komo delikado. Akaso e karakter frágil di e lampi ta baha su balor? Al kontrario! Na un findishi na 1997, nan a bende e lampi original di Tiffany ku dibuho di lotus pa 2,8 mion dòler! Su komposishon delikado a sirbi pa realsá su balor, no bah’é.

Asina tambe, ora duna onor na un hende muhé manera na un vaso mas delikado, esei no ta baha su balor. Pa un esposo biba ku su kasá “ku komprenshon” ta nifiká ku e esposo ta tuma na kuenta e esposa su puntonan fuerte i su limitashonnan, loke e gusta i loke e no gusta, su punto di bista i su sintimentunan. Un esposo amoroso ta rekonosé i respetá e diferensianan di personalidat ku tin entre e ku su esposa. E esposo ta mustra e debido konsiderashon na e esposa “pa [su] orashonnan no wòrdu strobá.” (1 Pedro 3:7) Un esposo ku no ta respetá e birtutnan femenino di su esposa ta pone su propio relashon ku Dios na peliger. Pues, ta bisto ku e Palabra di Dios no ta rebahá hende muhé. Mas bien e ta duna nan dignidat i ta onra nan.

[Rekonosementu pa Potrèt na página 32]

© Christie’s Images Limited 1997