“Nos Mester Obedesé Dios Mas Ku Hende”

‘E Bataya Ta di Yehova’

DOS ehérsito enemigu a enfrentá otro, kada un pará na un banda di e vaye. Durante 40 dia e hòmbernan di Israel a kremp di miedu i a ser bombardiá ku e insultonan di Goliat, e guerero poderoso di e filisteonan.—1 Samuel 17:1-4, 16.

Na bos haltu Goliat a reta e israelitanan ku e palabranan aki: “Skohe un hòmber pa boso mes i lag’é baha bin serka mi. Si e por bringa ku mi i mata mi, e ora ei nos lo bira boso sirbidó; ma si mi prevalesé kontra dje i mat’é, e ora ei boso lo bira nos sirbidó i sirbi nos. . . . Awe mi ta reta e trupanan di Israel; duna mi un hòmber, pa nos bringa ku otro”!—1 Samuel 17:8-10.

Den tempu antiguo, tabata normal pa guereronan poderoso representá nan ehérsito den un kombate man-na-man. Viktoria a bai pa e ehérsito di e guerero ganadó. Pero den e kaso aki e retadó di Israel no tabata un sòldá komun i koriente. E tabata un gigante masha haltu, un enemigu feros i intimidante. Sin embargo, dor di hasi bofon di e ehérsito di e pueblo di Yehova, Goliat a seya su kondena.

Esaki no tabata un simpel kompetensia militar. E konfrontashon tabata entre Yehova i e diosnan di e filisteonan. Rei Saul di Israel, en bes di mustra kurashi i dirigí su ehérsito kontra e enemigunan di Dios, a paralisá di miedu.—1 Samuel 17:11.

Un Hóben Ta Konfia den Yehova

Durante e impase aki, un hóben ku ya a ser ungí pa bira rei di Israel a bishitá su rumannan ku tabata den e ehérsito di Saul. Su nòmber tabata David. Ora el a tende e palabranan di Goliat, el a puntra: “Ta ken e filisteo insirkunsidá aki ta, ku e ta reta e ehérsitonan di e Dios bibu?” (1 Samuel 17:26) Den bista di David, Goliat a representá tantu e filisteonan komo nan diosnan. David, hopi indigná, i ku su rason, a deseá di defendé Yehova i Israel i bringa kontra e gigante pagano. Pero Rei Saul a bis’é: “Bo no ta kapas pa bai kontra e filisteo aki pa bringa kuné; abo ta un hóben ainda.”—1 Samuel 17:33.

Wak kon distinto e aktitut di Saul ku di David tabata for di otro! Saul a mira un hóben wardadó di karné ku kier a bringa kontra un gigante kurtí. Sin embargo, David a mira un hòmber ku a reta e Señor Soberano Yehova. David su kurashi tabata basá riba su konvikshon ku Dios lo no laga hende hasi bofon di Su nòmber i di Su pueblo sin kastigá nan. Miéntras ku Goliat tabata broma ku su forsa, David a pone su konfiansa den Yehova, evaluando e situashon for di Dios su punto di bista.

‘Ami Ta Bin Riba Bo den e Nòmber di Yehova’

David su fe tabata bon fundá. El a kòrda ku Dios a yud’é libra su karnénan for di un ber i un leon. E hóben wardadó tabatin sigur ku Yehova lo a yud’é awor pa bringa kontra e inmenso atversario filisteo aki. (1 Samuel 17:34-37) Armá ku un simpel slenger i sinku piedra lizu, David a sali bai enfrentá Goliat.

E hóben David a aseptá e reto aparentemente imposibel aki dor di konfia den e  fortalesa ku Yehova ta suministrá. Ku kurashi el a bisa e filisteo: “Bo ta bin riba mi ku spada, ku lansa i ku yabalina, ma ami ta bin riba bo den e nòmber di [Yehova] di ehérsitonan, e Dios di e ehérsitonan di Israel, kende bo a reta. Awe SEÑOR lo entregá bo den mi man . . . Pa henter mundu sa ku tin un Dios na Israel, i pa henter e asamblea aki por sa ku SEÑOR no ta libra ku spada ni ku lansa; pasobra e bataya ta di SEÑOR.”—1 Samuel 17:45-47.

Kiko tabata e resultado? E relato inspirá ta bisa: “David a prevalesé riba e filisteo ku un slenger i un piedra, i el a dal e filisteo mata; ma David no tabatin spada den su man.” (1 Samuel 17:50) David no tabatin spada den su man, pero e tabatin e sosten poderoso di Yehova Dios. *

A keda probá ku David su fe den Yehova den e kompetensia ei tabata na su lugá! Ora nos tin ku skohe entre tene miedu di hende òf konfia den Yehova su poder di salba, e loke nos tin ku skohe ta bisto: “Nos mester obedesé Dios mas ku hende.” (Echonan 5:29) Ademas, ora nos ta mira situashonnan difísil manera Yehova Dios ta mira nan, nos por tin un bista balansá asta di problemanan ku ta intimidá nos.

[Nota]

[Kuadro/Plachi na página 9]

KON GRANDI GOLIAT TABATA?

E relato na 1 Samuel 17:4-7 ta bisa nos ku Goliat su haltura tabata mas ku seis kodo, esta, rònt di tres meter. Un indikashon di e tamaño i forsa di e filisteo tabata su korasa di skama di bròns. Esei a pisa 57 kilo! E kabu di su lansa tabata manera un balki, i e punta di heru a pisa 7 kilo. Figurá bo, e armadura di Goliat muy probablemente tabata mas pisá ku David mes!