Goso Ku Ta Bin dor di Kana den Integridat

“Ta e bendishon di SEÑOR ta hasi riku, i e no ta agregá tristesa na dje.”—PROVERBIONAN 10:22.

1, 2. Dikon nos mester evitá di pensa demasiado riba futuro?

“SINTA pensa muchu riba futuro . . . ta stroba nos di mira e presente manera e ta,” segun un filósofo merikano. Esaki ta bèrdat den kaso di muchanan ku ta pensa asina tantu riba loke nan lo por hasi ora nan bira grandi, ku ta te ora nan no ta mucha mas nan ta realisá e benefisionan ku infansia tabatin.

² Asta nos komo adoradónan di Yehova tin biaha ta sigui e manera di pensa aki. Konsiderá e siguiente situashon. Nos ta anhelá pa Dios kumpli ku su promesa di trese un paradeis riba tera. Ansiosamente nos ta spera un bida sin malesa, behes, doló i sufrimentu. Ounke ta bon pa nos ta den ekspektativa di e kosnan ei, kiko lo pasa si nos ta kuminsá pensa asina tantu riba e bendishonnan físiko di futuro ku nos no ta mira e bendishonnan spiritual ku nos tin aktualmente? Esta lamentabel esei lo ta! Fásilmente nos lo por bira tur desanimá i nos ‘kurason por sinti malu debí ku nos speransa a ser posponé’ mas di loke nos a imaginá. (Proverbionan 13:12) Problema- i difikultatnan den bida lo por pone nos kai den e gara di desanimashon òf laga nos sinti duele di nos mes. En bes di purba superá situashonnan desfaborabel, nos lo por desaroyá un aktitut di keha. Tur esaki nos por evitá dor di meditá ku apresio riba nos bendishonnan aktual.

3. Riba kiko nos lo enfoká den e artíkulo aki?

³ Proverbionan 10:22 ta deklará: ‘Ta e bendishon di Yehova ta hasi riku, i e no ta agregá tristesa na dje.’ E prosperidat spiritual di e sirbidónan aktual di Yehova no ta un bendishon ku mester hasi nos kontentu? Laga nos konsiderá algun aspekto di  nos prosperidat spiritual i wak kiko nan ta nifiká pa nos personalmente. Tumando tempu pa reflekshoná riba e bendishonnan ku Yehova a drama na abundansia riba e “hende hustu ku ta kana den su integridat” di bèrdat lo fortalesé nos determinashon pa sigui sirbi nos Tata selestial ku goso.—Proverbionan 20:7.

‘Bendishonnan Ku Ta Hasi Nos Riku’ for di Awor

4, 5. Kua siñansa di Beibel abo personalmente ta apresiá, i dikon?

⁴ Nos tin un konosementu eksakto di siñansanan bíbliko. E religionnan di kristiandat por lo general ta bisa ku nan ta kere den Beibel. Sin embargo, nan no ta di akuerdo ku otro tokante kiko e ta siña. Asta miembronan di e mesun grupo religioso hopi biaha tin puntonan di bista distinto for di otro relashoná ku kiko realmente e Skritura ta siña. Ki distinto nan situashon ta for di sirbidónan di Yehova! Sin importá di kua nashon, kultura òf grupo étniko nos ta, nos ta adorá e Dios berdadero ku nos konosé na nòmber. E no ta un dios misterioso ku ta konsistí di tres den un. (Deuteronomio 6:4; Salmo 83:18, NW; Marko 12:29) Tambe nos sa ku e kuestion di mas importante ku tin relashoná ku Dios su soberania universal pronto lo ser resolvé i ku dor di mantené nos integridat na Dios, kada un di nos personalmente ta enbolbí den e kuestion ei. Nos konosé e bèrdat tokante e mortonan i nos no ta yen di miedu di un Dios ku hopi persona ta kere ta tormentá hende den fièrnu di kandela òf ta manda nan purgatorio.—Eklesiastés 9:5, 10.

⁵ Ademas, ta ki un goso pa sa ku nos no ta un produkto aksidental di evolushon deskontrolá! Al kontrario, nos ta kreashon di Dios, trahá den su propio imágen. (Génesis 1:26; Malakias 2:10) E salmista a kanta na Dios: “Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.”—Salmo 139:14.

6, 7. Ki kambionan den bo bida òf den bida di hende ku bo konosé a resultá di ta un bendishon?

⁶ Nos ta evitá kustumbernan i práktikanan perhudisial. Den medionan di komunikashon tin kantidat di spièrtamentu pa e peligernan di humamentu, bebementu di mas i aktividat seksual parotin. Mayoria hende no ta hasi kaso di e spièrtamentunan aki. Pero kiko ta pasa ora un persona sinsero siña ku e Dios berdadero ta kondená e kosnan ei i ku esnan ku ta práktika nan ta hasi Dios tristu? Wèl, e persona ei ta sintié konmoví pa stòp ku e práktikanan aki! (Isaias 63:10; 1 Korintionan 6:9, 10; 2 Korintionan 7:1; Efesionan 4:30) Ounke e persona ta hasi esaki prinsipalmente pa agradá Yehova Dios, e mes tambe ta haña benefisionan adishonal: mihó salú i pas mental.

⁷ Pa hopi hende ta masha difísil pa stòp ku kustumbernan ku ta malu. Pero tòg tur aña míles di nan ta logra hasié. Nan ta dediká nan mes na Yehova i ta ser batisá den awa, demostrando asina públikamente ku nan a eliminá e práktikanan ku ta desagradá Dios for di nan bida. Ki un animashon esei ta pa nos tur! Nan ta yuda reforsá nos determinashon pa no bira katibu di kondukta pekaminoso i perhudisial.

8. Ki konseho basá riba Beibel ta kontribuí na felisidat den famia?

⁸ Nos por tin un bida di famia felis. Den hopi pais bida di famia ta debilitando. Hopi matrimonio ta kaba na divorsio, lagando hopi biaha atras yunan ku daño emoshonal severo.  Den algun pais europeo, kasi 20 porshento di tur kas ta konsistí di famianan di un solo mayor. Kon Yehova a yuda nos kana den e kaminda di integridat relashoná ku bida di famia? Por fabor lesa Efesionan 5:22–6:4, i tuma nota di e konseho ekselente ku e Palabra di Dios ta duna esposo, esposa i yu. Dor di apliká loke tin pará skirbí einan i den otro partinan di e Skritura sigur ta fortalesé e laso matrimonial, ta yuda mayornan lanta nan yunan den e manera korekto, i ta kontribuí na un bida di famia felis. Esei no ta un bendishon ku ta hasi nos kontentu?

9, 10. Kon nos perspektiva pa futuro ta diferente for di esun di mundu?

⁹ Nos tin e siguransa ku e problemanan di mundu pronto lo ser resolvé. Apesar di konosementu sientífiko i teknológiko i di e esfuersonan sinsero di sierto lidernan, problemanan serio di bida aktual te ainda no tin solushon. Klaus Schwab, fundadó di e Foro pa Ekonomia Mundial, a menshoná resientemente ku “e lista di retonan ku mundu ta konfrontá ta bira mas i mas largu i e tempu pa trata nan ta bira mas kòrtiku.” El a papia di “peligernan ku ta afektá tur nashon, manera terorismo, destrukshon di medio ambiente i instabilidat finansiero.” Schwab a konkluí: “Awor, mas ku nunka, mundu ta konfrontá realidatnan ku ta rekerí akshon kolektivo i desididu.” Segun ku siglo 21 ta avansá, hende en general ta sigui mira futuro di humanidat skur.

¹⁰ Ta ki un satisfakshon pa sa ku Yehova a instituí un areglo ku tin e kapasidat pa resolvé tur e problemanan di humanidat: e Reino Mesiániko di Dios! Pa medio di e Reino ei, e Dios berdadero lo “hasi gueranan stòp” i trese un “abundansia di pas.” (Salmo 46:9; 72:7) E Rei ungí, Hesukristu, ‘lo libra esun den nesesidat, esun afligí i e pober for di opreshon i violensia.’ (Salmo 72:12-14) Bou di e gobernashon di Reino lo no tin skarsedat di kuminda. (Salmo 72:16) Yehova “lo seka tur lágrima kita for di [nos] wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:4) E Reino a keda establesí kaba den shelu i pronto lo tuma e akshon nesesario pa resolvé tur problema riba tera.—Daniel 2:44; Revelashon 11:15.

11, 12. (a) Korementu tras di plaser ta produsí felisidat duradero? Splika. (b) Kiko ta produsí berdadero felisidat?

¹¹ Nos sa kiko ta produsí berdadero felisidat. Kiko realmente ta produsí felisidat? Un sikólogo a bisa ku felisidat tin tres ingrediente: plaser, embolbimentu (den aktividatnan manera trabou i famia) i propósito (trahando den direkshon di un propósito òf meta mas importante ku bo mes). Di e tres kosnan aki, el a menshoná plaser komo esun di ménos importansia i a remarká: “Esaki ta digno di ser menshoná den notisia pasobra masha hopi hende ta enfoká nan bida riba plaser.” Kiko ta Beibel su punto di bista di esaki?

¹² Rei Salomon di antiguo Israel a deklará: “Mi a bisa mi mes: ‘Bin awor, lo mi pone bo na prueba ku plaser. P’esei, gosa bo mes.’ I mira, esaki tambe tabata banidat. Di harimentu mi a bisa: ‘Ta lokura,’ i di plaser: ‘Di kiko e ta sirbi?’” (Eklesiastés 2:1, 2) Bíblikamente, kualke felisidat ku ta bin di plaser ta a lo mehor temporal. Kiko di embolbimentu den trabou? Nos tin e trabou di mas signifikativo pa partisipá aden, esta, e trabou di prediká e Reino i hasi disipel.  (Mateo 24:14; 28:19, 20) Dor di kompartí ku otro hende e mensahe di salbashon deskribí den Beibel, nos ta partisipá den un trabou ku por resultá den nos propio salbashon i den salbashon di esnan ku skucha nos. (1 Timoteo 4:16) Komo “Dios su kolaboradónan,” nos ta eksperensiá ku di bèrdat “ta mas bendishoná pa duna ku pa risibí.” (1 Korintionan 3:9; Echonan 20:35) E trabou aki ta duna nos bida un propósito i ta duna e Kreadó un kontesta pa Satanas e Diabel, esun ku ta reproch’é. (Proverbionan 27:11) Pues, Yehova a mustra nos ku deboshon na Dios ta produsí felisidat berdadero i duradero.—1 Timoteo 4:8, NW.

13. (a) Den ki manera e Skol di Ministerio Teokrátiko ta un bendishon ku ta hasi nos kontentu? (b) Kon abo a benefisiá di e Skol di Ministerio Teokrátiko?

¹³ Nos tin un programa di entrenamentu importante i efektivo. Gerhard ta sirbi komo ansiano den un kongregashon di Testigunan di Yehova. Kòrdando riba su hubentut, el a konta: “Komo hóben mi tabatin masha problema pa papia. Ora mi tabata bou di preshon, apénas mi por a papia kla i mi tabata kuminsá gaga. Mi tabata sinti mi inferior i a haña kompleho. Mi mayornan a hasi areglo pa mi sigui un lès pa korigí mi moda di papia, pero esei no a yuda. Mi problema tabata algu sikológiko no físiko. Sin embargo, tabatin un provishon maravioso for di Yehova: e Skol di Ministerio Teokrátiko. Mi partisipashon den e skol aki a duna mi kurashi. Mi a hasi mi bèst pa praktiká loke mi tabata siña. I esei a duna resultado! Mi a kuminsá papia mas vlòt, mi no tabatin kompleho mas i mi a haña mas kurashi den sirbishi. Awor mi ta duna asta diskurso públiko. Mi ta realmente gradisidu na Yehova. El a duna mi un bida nobo pa medio di e skol aki.” E manera ku Yehova ta entrená nos pa hasi su trabou no ta un motibu pa alegrá?

14, 15. Na ora di angustia, ki yudansa tin ku ta fásil pa haña? Menshoná un ehèmpel.

¹⁴ Nos ta haña un relashon personal ku Yehova i sosten for di e hermandat internashonal i uní. Katrin ta biba na Alemania, i el a keda sumamente angustiá ora el a tende e informenan di un temblor severo i di e tsunami ku esei a kousa na zùitost Asia. Su yu muhé tabata di bishita na Tailandia ora ku e katástrofe a tuma lugá. Pa 32 ora largu e mama aki no tabata sa si su yu muhé tabata na bida òf si e tabata entre e víktimanan ku ora pa ora tabata bira mas tantu. Ki un alivio Katrin a sinti ora ku finalmente el a haña un yamada di telefòn ku a sigur’é ku su yu muhé tabata sano i salvo!

¹⁵ Kiko a yuda Katrin pasa dor di e oranan di angustia ei? El a skirbi: “Mi a pasa kasi henter e tempu ei den orashon na Yehova. Mi a ripará bes tras bes kuantu fortalesa i pas mental esaki a duna mi. Ademas, rumannan spiritual amoroso a bishitá mi i a sostené mi.” (Filipensenan 4:6, 7) Kuantu mas pió su situashon lo tabata si lo e mester a pasa e oranan di angustia ei sin e benefisio di orashon na Yehova i sin e konsuelo di un amoroso hermandat spiritual! Nos  relashon íntimo ku Yehova i ku su Yu huntu ku nos asosiashon íntimo ku e hermandat kristian ta un bendishon úniko, muchu presioso pa nos mir’é komo algu komun i koriente.

16. Konta un eksperensia ku ta ilustrá e balor di e speransa di resurekshon.

¹⁶ Nos tin e speransa di bolbe mira nos sernan kerí ku a muri. (Juan 5:28, 29) Un hòmber hóben ku yama Matthias a lanta komo un Testigu di Yehova. Sin embargo, e no a apresiá su bendishonnan i el a drif bai for di e kongregashon kristian ora e tabata tiner. Awor e ta skirbi: “Nunka mi no tabatin kòmbersashonnan realmente profundo ku mi tata. Atraves di añanan, nos tabatin hopi pleitu ku otro. Pero tòg mi tata semper tabata ke lo mihó pa mi. E tabata stima mi masha hopi, lokual mi no a realisá e tempu ei. Na 1996, ora mi tabata sintá na su kama, ku su man tené i yorando amargamente, mi a bis’é kuantu ta duel mi tur loke mi a hasi i ku mi ta stim’é masha hopi. Pero e no por a tende mi. Despues di tabata malu pa un periodo kòrtiku, el a fayesé. Si mi ta na bida pa mira mi tata den e resurekshon, lo mi drecha loke mi a faya kuné den pasado. Anto sigur lo e keda hopi kontentu di sa ku awor mi ta sirbi komo ansiano i ku ami ku mi kasá tin e privilegio di sirbi komo pionero.” Ki un bendishon e speransa di resurekshon ta pa nos!

“E No Ta Agregá Tristesa na Dje”

17. Ki benefisio nos ta saka ora nos ta meditá riba e bendishonnan di Yehova?

¹⁷ Hesukristu a bisa relashoná ku su Tata selestial: “E ta hasi su solo sali riba mal hende i riba bon hende, i ta laga awa yobe riba hende hustu i riba hende inhustu.” (Mateo 5:45) Si Yehova Dios ta drama bendishon asta riba hende inhustu i malbado, kuantu mas lo e hasi esei riba e hendenan ku ta kana den e kaminda di integridat! Salmo 84:11 ta deklará ku Yehova “no ta keda sin duna loke ta bon na esnan ku ta kana den rektitut.” Ora nos meditá riba e kuido i interes spesial ku Yehova a mustra na esnan ku ta stim’é, nos kurason ta yena ku gratitut i goso!

18. (a) Den ki manera ta asina ku Yehova no ta agregá doló na su bendishon? (b) Dikon hopi sirbidó fiel di Dios ta sufri?

¹⁸ ‘E bendishon di Yehova’ ta loke a duna prosperidat spiritual na su pueblo. I Beibel ta sigurá nos ku “e no ta agregá tristesa na dje.” (Proverbionan 10:22) Pero dikon anto hopi sirbidó fiel di Dios ta pasa dor di tèst- i pruebanan ku ta kousa nan hopi doló i sufrimentu? Difikultat i angustia ta sosodé ku nos pa tres motibu prinsipal. (1) Nos propio inklinashon pekaminoso. (Génesis 6:5; 8:21; Santiago 1:14, 15) (2) Satanas ku su demoñonan. (Efesionan 6:11, 12) (3) E mundu malbado. (Juan 15:19) Ounke Yehova ta permití kos malu pasa ku nos, no ta é ta kousa nan. De echo, “tur bon regalo i tur don perfekto ta for di ariba, i ta baha bin for di e Tata di lusnan.” (Santiago 1:17) E bendishonnan di Yehova no ta kousa doló.

19. Kiko ta spera esnan ku sigui kana den integridat?

¹⁹ Ora nos ta eksperensiá prosperidat spiritual esei ta enserá semper ku nos ta hala mas serka Dios. Ora nos desaroyá un relashon íntimo kuné, nos ta ‘montoná pa nos mes e tesoro di un bon fundeshi pa futuro, pa nos por gara loke ta bida berdadero,’ esta, bida eterno. (1 Timoteo 6:12, 17-19) Den e futuro mundu nobo di Dios, nos lo haña tantu rikesanan spiritual komo bendishonnan físiko. E bida berdadero lo ta e tipo di bida ku tur ku sigui “obedesé” Yehova lo tin. (Deuteronomio 28:2) Despues di a fortalesé nos determinashon, laga nos sigui kana gososamente den integridat.

Kiko Bo A Siña?

• Dikon no ta sabí pa pensa demasiado riba futuro?

• Ki bendishonnan nos ta disfrutá di dje awor?

• Dikon fiel sirbidónan di Dios ta sufri?

[Preguntanan di Estudio]