Kiko Ta Dios Su Propósito pa e Tera?

DIKON bo ta gusta kana keiru den un parke òf kana pasa banda di flornan ku ta hole dushi? Dikon bo ta sinti bo animá i kontentu ora bo mira un playa bunita ku su santu blanku òf serunan haltu ku nan tòpnan te den nubia? Dikon bo ta para pa skucha paranan den palu kanta nan melodia alegre? I dikon ta asina dushi pa mira yunan di kachó hunga ku otro òf mira un tou di karné kome yerba den sabana?

Tin un solo kontesta riba tur e preguntanan aki. Nos a ser kreá pa biba den Paradeis! Ei ta kaminda nos promé mayornan, Adam ku Eva, a kuminsá nan bida. Nos a haña nos deseo pa biba den Paradeis for di nan, i nan a hañ’é for di nan Kreadó, Yehova Dios. E tabata sa ku nos komo hende lo ta felis den Paradeis pasobra el a krea nos ku e kualidatnan nesesario pa disfrutá di nos kas terenal ku ta asina maravioso.

Dikon Yehova a krea e tera? “El a form’é pa e wòrdu habitá” dor di hende. (Isaias 45:18) Esun ku “a traha tera” a duna Adam ku Eva un bunita paradeis komo nan hogar, e hòfi di Edén. (Jeremias 10:12; Génesis 2:7-9, 15, 21, 22) Nan lo mester a disfrutá sin fin di e riunan, flornan i palunan den e hòfi! Tabatin paranan masha bunita den shelu, i tur tipo di bestia tabata move riba tera; anto ningun di nan no tabata forma un peliger pa hende. Piská i otro kriaturanan tabata landa den e awanan limpi i kristalino di e tera. Mas importante ainda, Adam ku Eva tabata huntu. Nan por a prokreá yu. Anto den e gososo kompania di nan kresiente famia nan por a ekstendé nan hogar paradísiko.

Ounke e tera no ta un paradeis awe, nos por kompar’é ku un kas ekselente di un famia felis. E tera ku Dios a duna nos komo nos kas tin tur loke nos mester: lus, kalor, awa i kuminda. Nos ta masha kontentu ku solo su lus i kalor i ku luna su brio suave den  anochi! (Génesis 1:14-18) Den e bodega di e tera tin kombustibelnan ku nos por usa, manera karbon i petroli. Nos tin awa debí na e siklo di awa i e tera su sistema di riu, lago i laman. Anto yerba bèrdè ta e tera su tapeit.

Meskos ku nos por warda kuminda den un kas, asina tin kuminda na abundansia riba tera. Mediante kosechanan den kunuku i frutanan den hòfi, Yehova ta duna nos ‘tempu di bon kosecha i ta satisfasé nos kurason ku alegria.’ (Echonan 14:16, 17) Siendo ku e tera ta un kas asina ekselente kaba, imaginá bo kon lo e ta ora ku “e Dios felis,” Yehova, hasié un paradeis!—1 Timoteo 1:11, NW.

 [Rekonosementu pa Potrèt na página 2]

PORTADA: Tera: NASA photo; Streanan: NASA, ESA and AURA/Caltech