Pronto Dios Su Propósito pa e Tera Lo Kumpli

ORA Adam ku Eva tabata den Paradeis ainda, nan a haña e mandato aki di Dios: “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.”—Génesis 1:28.

Hasi e tera someté na nan a nifiká mas ku djis kultivá òf kuida un parti chikitu di e tera. Adam ku Eva i nan desendientenan tabatin ku ekstendé e Paradeis te ora ku el a abarká henter e planeta. Sin embargo, e promé pareha humano a peka i Dios a saka nan for di e hòfi di Edén. (Génesis 3:23, 24) Pero esei no a nifiká ku nunka mas hende lo a someté e tera.

Komo ku Dios lo bai bendishoná humanidat obediente, nan lo por someté e tera. Ora e pueblo di Israel di antigwedat tabatin Dios su bendishon, nan kunukunan tabata produsí bon kosecha i nan hòfinan tabata pari masha bon fruta. Lo bai tin kondishonnan similar segun ku nos planeta gradualmente ta bira un paradeis. Manera Dios su Palabra inspirá, Beibel, ta primintí, “tera [lo] duna su fruta; Dios, nos Dios, ta bendishoná nos.” (Salmo 67:6) De echo, e tera su sabana- i serunan, su palu- i flornan, su riu- i lamannan lo alegrá. (Salmo 96:11-13; 98:7-9) Nos planeta lo bona ku matanan bèrdè, paranan kolorido, bestianan maravioso i hende kariñoso.

 Pronto un Mundu Nobo!

Awe nos ta na drèmpel di un mundu nobo ku Yehova Dios a primintí. Apòstel Pedro a skirbi: “Segun su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13) Tin hende despues di lesa e palabranan ei di Pedro ta konkluí ku kisas e planeta aki nunka lo no bira un paradeis. Kisas nan ta pensa ku e shelu i tera material lo ser remplasá. Akaso ta asina?

Kiko ta e “shelunan nobo”? Esei no ta e shelu material kreá dor di Dios. (Salmo 19:1, 2) Pedro a kaba di referí den e versíkulonan promé na “shelunan” simbóliko, esta, gobièrnunan humano ku ta den un posishon mas haltu ku nan súpditonan. (2 Pedro 3:10-12) E “shelunan” aki no tabatin éksito den goberná humanidat i nan lo pasa bai. (Jeremias 10:23; Daniel 2:44) E “shelunan nobo” ku lo remplasá nan ta e Reino di Dios formá pa Rei Hesukristu i su 144.000 ko-herederonan resusitá pa bida selestial.—Romanonan 8:16, 17; Revelashon 5:9, 10; 14:1, 3.

E “tera nobo” ku Pedro a menshoná no ta un planeta nobo. Yehova a traha e tera perfekto pa hende biba riba dje pa eternidat. (Salmo 104:5) Tin biaha Beibel ta usa e palabra “tera” pa referí na hende. (Génesis 11:1) E “tera” ku pronto lo ser destruí ta konsistí di hende ku ta hasi nan mes parti di e mundu malbado aki. Den mesun manera un mundu di hende impio òf malbado a sufri destrukshon den e Diluvio di tempu di Noe. (2 Pedro 3:5-7) Kiko anto e “tera nobo” ta? E ta un sosiedat nobo di hende, esta, Dios su adoradónan berdadero, ku ta “rekto den nan kurason.” (Salmo 125:4; 1 Juan 2:17) Tur lei pa e “tera nobo” lo bin for di e “shelunan nobo.” Hòmbernan fiel riba tera lo hasi sigur ku hende ta kumpli ku e instrukshonnan aki.

Kosnan Nobo i Maravioso!

Yehova definitivamente a duna nos un kas maravioso ora ku el a prepará e tera pa hende biba riba dje. E mes a bisa ku tur su trabou riba tera tabata “masha bon.” (Génesis 1:31) Satanas e Diabel a pone Adam ku Eva rebeldiá. (Génesis 3:1-5; Revelashon 12:9) Sin embargo, pronto Dios lo sòru pa e rektonan haña “loke ta bida berdadero.” Esei ta “bida eterno” den kondishonnan perfekto den Paradeis. (1 Timoteo 6:12, 19) Laga nos konsiderá awor algun di e bendishonnan ku hende lo disfrutá di dje e tempu ei.

Durante Kristu su Reinado di Mil Aña, Satanas lo ser frená i lo e no por trese kalamidat riba humanidat. Apòstel Juan a bisa: “Mi a mira un angel [e arkangel Miguel, esta, Hesukristu] ta baha for di shelu ku e yabi di e abismo i un kadena grandi den su man. I el a gara e dragon, e kolebra di antigwedat, kende ta Diabel i Satanas, i a mar’é pa mil aña, i a tir’é den e abismo, i a sera i seya esaki over di dje, pa e no gaña e nashonnan mas, te ora ku e mil añanan a keda kumplí.” (Revelashon 20:1-3; 12:12) Fuera di ta liber di e influensia di Satanas miéntras ku e ta den abismo, humanidat lo disfrutá di hopi otro bendishonnan mas bou di gobernashon di e Reino.

Maldat, violensia i guera lo ta kosnan di pasado. Beibel ta primintí: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas  abundante. E hustunan lo heredá e tera, i lo biba den dje pa semper.” (Salmo 37:10, 11, 29) Yehova Dios lo “hasi gueranan stòp te na e fin di tera.” (Salmo 46:9) Esakinan ta garantia maravioso ku lo tin pas i siguridat!

Lo tin un abundansia di kuminda saludabel i sabroso riba nos mesa. E salmista a kanta: “Lo tin abundansia di maishi den e tera, riba kabes di e serunan.” (Salmo 72:16) E tempu ei ningun hende lo no tin ku soportá e doló teribel di hamber.

Ningun hende lo no sufri di malesa i enfermedat. De echo, “ningun habitante lo no bisa: ‘Mi ta malu.’” (Isaias 33:24; 35:5, 6) Ora ku Hesukristu tabata riba tera, el a kura leproso i tambe hende paralisá i esnan siegu. (Mateo 9:35; Marko 1:40-42; Juan 5:5-9) Imaginá bo kiko lo e hasi den e mundu nobo! Pensa riba e felisidat ku lo tin ora ku hende siegu, surdu, paralisá i muda haña kurashon.

Segun ku humanidat obediente ta alkansá perfekshon humano, e dañonan kousá pa behes ta ser eliminá. Brel di bista, garoti, krùk, ròlstul, hospital i remedi lo pasa pa historia. Imaginá bo e kambionan ku lo tin segun ku nos ta rekuperá nos vigor di hubentut! (Jòb 33:25) Tur mainta nos lo lanta refreská for di un bon sosiegu djanochi, kla pa kuminsá un dia nobo di aktividat gososo.

E resurekshon di sernan kerí i di otro personanan lo trese goso na nos kurason. (Juan 5:28, 29; Echonan 24:15) Ki emoshonante lo ta pa yama bonbiní na Abel, Noe, Abraham, Sara, Jòb, Moisés, Ruth, David, Elias, Ester, i hopi hende mas! Miónes di otro hende tambe lo ser resusitá. Mayoria di nan nunka a siña tokante Yehova, pero nan lo haña un bonbiní serka personanan ansioso pa siña nan tokante Dios, su propósito i su Yu, Hesukristu. Segun ku esnan resusitá ta siña konosé nan Kreadó, e tera di bèrdat lo ta yená ku e konosementu di Yehova.

Mas importante ku tur, nos lo por adorá e úniko Dios berdadero pa semper. Nos lo tin e privilegio di ‘sirbi Yehova ku goso,’ i nos lo traha huntu den armonia segun ku nos ta konstruí kasnan bunita, kultivá e tera i, finalmente, someté henter e tera. (Salmo 100:1-3; Isaias 65:21-24) Ki un delisia lo ta pa biba pa semper den un paradeis bunita, produktivo i pasífiko ku ta trese onor na Yehova su nòmber santu!—Salmo 145:21; Juan 17:3.

Un Último Tèst pa Humanidat

Durante Hesus su Reinado di Mil Aña, lo e apliká e benefisionan di su sakrifisio di reskate na tur hende obediente. Di e manera ei tur piká ku tempu lo ser eliminá i humanidat lo ta elevá na perfekshon humano. (1 Juan 2:2; Revelashon 21:1-4) Unabes e efektonan di Adam su piká ta kompletamente eliminá, hende perfekto lo kumpli ku e normanan di Dios den sentido físiko, mental, moral i spiritual. Pues nan lo “biba” den e pleno sentido di palabra ora nan alkansá perfekshon sin piká. (Revelashon 20:5) Esaki i e tera transformá den Paradeis lo trese hopi gloria pa Yehova!

 Despues ku Kristu su Reinado di Mil Aña terminá, Satanas e Diabel i su demoñonan, òf angelnan malbado, lo ser librá pa un tempu kòrtiku for di e abismo kaminda a tira nan un dies siglo promé. (Revelashon 20:1-3) Nan lo haña chèns di hasi un último intento pa desviá hende for di Dios. Ounke algun hende lo entregá na mal deseo, e rebelion aki lo frakasá. Yehova lo ehekutá e personanan egoista i rebelde ei huntu ku Satanas i tur su demoñonan. Nunka mas maldat lo bolbe lanta kabes. Tur malechor lo ser destruí pa semper, i e hustunan lo risibí bida eterno.—Revelashon 20:7-10.

Abo Lo T’ei?

Un eternidat di felisidat tin dilanti di hende ku ta stima Yehova Dios. Bida eterno den Paradeis lo no ta niun tiki laf. De echo, bida lo bira mas interesante segun ku tempu ta pasa, pasobra no tin límite na e konosementu di Yehova Dios. (Romanonan 11:33) Semper lo bo tin algu nobo di siña, i lo bo tin tempu de sobra pa atkerí konosementu. Kon bin? Pasobra lo bo no biba pa apénas 70 òf 80 aña, sino pa eternidat.—Salmo 22:26; 90:10; Eklesiastés 3:11.

Si bo ta stima Dios, semper lo bo ta masha felis hasiendo su boluntat. Apòstel Juan a skirbi: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Pues, no laga nada stroba bo di agradá Yehova Dios dor di hasi loke ta hustu. Tene na mente e maravioso speransa ku e Palabra di Dios, Beibel, ta pone bo dilanti. Sea determiná pa hasi e boluntat di Yehova, i nunka desviá for di e kaminda aki. E ora ei lo bo t’ei ora ku Dios su propósito pa e tera ser kumplí i nos planeta—nos kas—bira un paradeis eterno.

[Plachi na página 4]

Ku Dios su bendishon, e kunukunan di Israel a produsí na abundansia

[Plachi na página 7]

Kua ta e bendishonnan ku bo ta spera di disfrutá di dje den Paradeis?