Puntonan Sobresaliente di Buki Ún di Salmonan
E Palabra di Yehova Ta Bibu
Puntonan Sobresaliente di Buki Ún di Salmonan
KIKO lo ta un título apropiá pa un buki bíbliko ku ta konsistí prinsipalmente di alabansa na nos Kreadó, Yehova Dios? E nòmber di mas apropiá lo ta Salmonan, es desir, Alabansanan. E buki di mas largu den Beibel ta kontené kantikanan bunita komponé ku ta konta tokante Dios su kualidatnan maravioso i obranan poderoso i ta relatá kantidat di profesia. Hopi di e kantikanan ta ekspresá e emoshonnan ku nan eskritornan a sinti ora nan tabata konfrontá atversidat. E ekspreshonnan aki ta abarká un periodo di alrededor di mil aña, for di tempu di profeta Moisés te na e tempu despues di eksilio. E eskritornan tabata Moisés, Rei David i otronan. E saserdote Esdras ta esun ku aparentemente a kompilá e buki den su forma final.
For di tempu antiguo, hende a parti e buki di Salmonan den sinku sekshon òf kolekshon di kantika: (1) Salmonan 1-41; (2) Salmonan 42-72; (3) Salmonan 73-89; (4) Salmonan 90-106, i (5) Salmonan 107-150. E artíkulo aki ta konsiderá e promé kolekshon. Tur e salmonan den e sekshon aki—ménos tres—ta ser atribuí na Rei David di antiguo Israel. Beibel no ta identifiká e kompositornan di Salmo 1, 10 i 33.
“MI DIOS, MI BARANKA”
Despues ku e promé salmo a deklará bendishoná òf felis e hende ku su delisia ta den e lei di Yehova, e di dos salmo ta papia spesífikamente tokante e Reino. * E grupo di salmonan aki ta konsistí prinsipalmente di súplikanan na Dios. Por ehèmpel, Salmo 3-5, 7, 12, 13, i 17, ta petishonnan pa ser librá for di enemigu. Salmo 8 ta enfatisá Yehova su grandesa na komparashon ku hende su kondishon insignifikante.
Deskribiendo Yehova komo e Protektor di su pueblo, David a kanta: “Mi Dios, mi baranka, den kende mi ta tuma refugio.” (Salmo 18:2) Den Salmo 19 David ta alabá Yehova komo e Kreadó i Dunadó di Lei; den Salmo 20 e ta alab’é komo e Salbadó i den Salmo 21 komo e Salbadó di su Rei ungí. Salmo 23 ta pinta Yehova komo e Gran Wardadó, miéntras ku Salmo 24 ta deskribié komo e Rei glorioso.
Kontesta Riba Pregunta Bíbliko:
2:1, 2—Kiko ta e “kos bano” ku e nashonnan ta plania? E “kos bano” ta e gobièrnunan humano su preokupashon konstante pa sigui konserbá nan propio outoridat. Esaki ta algu bano pasobra nan propósito lo frakasá sigur. Akaso e pueblonan di e nashonnan realmente por ferwagt ku nan lo tin éksito ora ku nan tuma nan posishon ‘kontra Yehova i kontra su ungí’?
2:7—Kiko ta “e dekreto” di Yehova? E dekreto aki ta e aliansa òf pakto pa un Reino ku Yehova a sera ku su Yu stimá, Hesukristu.—Lukas 22:28, 29, NW.
2:12—Den ki manera e gobernantenan di e nashonnan por “sunchi e yu”? Den tempu bíbliko, un sunchi tabata un ekspreshon di amistat i fieldat. E tabata un manera pa yama huéspetnan bonbiní. E reinan di tera ta haña òrdu pa sunchi e Yu, es desir, yam’é bonbiní komo e Rei Mesiániko.
3:título di introdukshon—Kiko ta e propósito di e enkabesamentu ku ta ser duná na algun di e salmonan? E enkabesamentu tin biaha ta identifiká e eskritor i/òf ta duna informashon tokante e sirkunstansianan bou di kua a komponé e salmo, manera ta e kaso ku Salmo 3. E título di introdukshon (skirbí ku lèter skùin den Beibel Santu) tin biaha ta splika tambe e propósito òf uso di e kantika en partikular ei (Salmo 4 i 5) i tambe ta duna instrukshonnan musikal (Salmo 6).
3:2—Kiko ta “Sela”? En general, komentaristanan ta kere ku e ekspreshon aki ta representá un pousa pa meditá den silensio, sea ora di kanta so òf durante kantamentu i tokamentu di músika instrumental. Nan tabata usa e pousa pa enfatisá e pensamentu òf emoshon di un salmo. No tin nodi lesa e palabra ei durante lesamentu públiko di e Salmonan.
11:3—Ta kua fundeshinan ta ser destruí? Esakinan ta e fundeshinan riba kua sosiedat humano ta basá: lei, órden i hustisia. Ora esakinan ta desorganisá i konfuso, ta reina desórden sosial i no tin hustisia. Den sirkunstansianan asina, “e hustu” tin ku pone su pleno konfiansa den Dios.—Salmo 11:4-7.
21:3—Kiko ta remarkabel tokante “un korona di oro fini”? Beibel no ta bisa si e korona tabata literal òf a simbolisá e gloria adishonal di David debí na su tantísimo viktorianan. Sin embargo, e versíkulo aki ta señalá profétikamente na e korona di rei ku Hesus a haña serka Yehova na aña 1914. E echo ku e korona ta trahá di oro ta duna e idea ku su reino ta di e mihó kalidat ku tin.
22:1, 2—Dikon David kisas a sinti ku Yehova a bandon’é? David tabata bou di asina un preshon intenso di su enemigunan ku su ‘kurason a bira manera was i a dirti den su paden.’ (Salmo 22:14) Podisé a parse David ku Yehova a bandon’é. Ora Hesus tabata klabá na staka, e tambe a sinti asina. (Mateo 27:46) E palabranan di David ta reflehá su reakshon humano riba su situashon desesperá. Sin embargo, for di su orashon ku tin pará skirbí na Salmo 22:16-21 ta bisto ku David no a pèrdè fe den Dios.
Lès pa Nos:
1:1. Nos mester evitá di asosiá ku hende ku no ta stima Yehova.—1 Korintionan 15:33.
1:2. Nos no tin ku laga ni un dia pasa sin konsiderá asuntunan spiritual.—Mateo 4:4.
4:4. Ora nos ta rabiá, ta sabí pa nos dominá nos lenga pa nos no bisa algu ku lo duel nos despues.—Efesionan 4:26.
4:5. Nos sakrifisionan spiritual ta “sakrifisionan di hustisia” solamente si nos tin e motivashon korekto i nos kondukta ta konforme e rekisitonan di Yehova.
6:5. Por tin un motibu mas mihó ku esaki pakiko nos ke sigui biba?—Salmo 115:17.
9:12, NW. Yehova ta buska dramamentu di sanger afin di kastigá esnan kulpabel di sanger, pero e ta kòrda riba “e sklamashon di esnan afligí.”
15:2, 3; 24:3-5. Adoradónan berdadero mester papia bèrdat i evitá huramentu falsu i kalumnia.
15:4. Nos mester hasi tur loke nos por pa kumpli ku nos palabra, asta si ta masha difísil pa hasi esei. Úniko eksepshon ta ora nos realisá ku nos a hasi un promesa ku ta kontrario na siñansanan bíbliko.
15:5. Komo adoradó di Yehova, nos tin ku tene kuidou pa nos no hasi mal uso di plaka.
17:14, 15. E “hòmbernan di mundu” ta dediká nan mes na optené un bon nivel di bida, lanta un famia i laga atras un herensia. David su preokupashon prinsipal den bida tabata pa traha un bon nòmber serka Dios di manera ku e por a ‘mira Dios su kara,’ es desir, eksperensiá Yehova su fabor. Ora ku David a “spièrta,” den e sentido di bira plenamente konsiente di Yehova su promesa- i garantianan, David lo a sinti ‘satisfecho di mira Dios su kara,’ esta, lo el a alegrá ku Yehova ta kuné. Meskos ku David, nos tambe no mester fiha nos kurason riba tesoronan spiritual?
19:1-6. Si e kreashon, ku no por papia ni rasoná, ta duna gloria na Yehova, nos ku por pensa, papia i adorá no mester hasié muchu mas?—Revelashon 4:11.
19:7-11. Esta bon Yehova su rekisitonan ta pa nos!
19:12, 13. Erornan i aktonan di arogansia ta pikánan ku nos tin ku evitá.
19:14. Nos mester paga tinu no solamente na loke nos ta hasi sino tambe na loke nos ta bisa i pensa.
“BO TA SOSTENÉ MI DEN MI INTEGRIDAT”
Den e promé dos salmonan di e grupo aki, David ta ekspresá e deseo sinsero i determinashon firme pa mantené su integridat. El a kanta: “Ma pa loke t’ami, lo mi kana den mi integridat.” (Salmo 26:11) Den su orashon pa pordon di piká, el a atmití: “Miéntras ku mi a keda ketu, mi kurpa a para kaba na nada dor di mi kehamentu henter dia.” (Salmo 32:3) Na Yehova su sirbidónan fiel David a duna e garantia aki: “E wowonan di SEÑOR ta riba e hustunan, i su oreanan ta atento pa skucha nan sklamashon.”—Salmo 34:15.
Ki balioso e konseho duná den Salmo 37 tabata pa e israelitanan, i pa nos ku ta bibando den “e último dianan” di e sistema di kosnan aki! (2 Timoteo 3:1-5) Papiando profétikamente di Hesukristu, Salmo 40:7 i 8 ta deklará: “Ata, mi ta bin; den e ròl di e buki ta pará skirbí tokante di mi; pa hasi bo boluntat, o mi Dios, ta un delisia pa mi; bo Lei ta den mi kurason.” E último salmo di e sekshon ta trata David su petishon pa Yehova su yudansa durante e añanan turbulento ku a sigui despues di su piká ku Bètsabé. El a kanta: “Ma pa loke t’ami, bo ta sostené mi den mi integridat.”—Salmo 41:12.
Kontesta Riba Pregunta Bíbliko:
26:6—Kon nos, meskos ku David, figurativamente ta atendé Yehova su altar? E altar ta representá Yehova su boluntat den e sentido ku e ta aseptá e sakrifisio di reskate di Hesukristu pa redenshon di humanidat. (Hebreonan 8:5; 10:5-10) Nos ta atendé Yehova su altar dor di ehersé fe den e sakrifisio ei.
29:3-9—Kiko e salmo ke deskribí dor di kompará e bos di Yehova ku un tormenta ku ta inspirá rèspèt profundo segun ku e ta pasa? Simplemente esaki: Yehova su poder asombroso!
31:23—Kon Yehova ta paga abundantemente un persona ku ta aktua ku orguyo? E pago aki ta kastigu. Un persona hustu ta haña su rekompensa òf pago pa su erornan ku no ta intenshonal den forma di disiplina for di Yehova. Pero komo ku un persona orguyoso no ta bira bèk for di su mal kaminda, su pago abundante ku e ta haña ta kastigu severo.—Proverbionan 11:31; 1 Pedro 4:18.
33:6—Kiko ta e “rosea” di Yehova su boka? E rosea aki ta Dios su forsa aktivo, òf spiritu santu, ku el a usa pa krea e shelu material. (Génesis 1:1, 2) Beibel ta yam’é e rosea di su boka pasobra, meskos ku un rosea poderoso, Yehova por mand’é hasi kosnan ku ta keda na un distansia.
35:19, BPK—Kiko David tabata ke men ku su petishon pa no laga esnan ku ta odi’é kinipí wowo ku otro? E echo ku nan a kinipí wowo ku otro lo a indiká ku e enemigunan di David tabata gosa ku nan plannan malisioso kontra dje tabatin éksito. David a pidi pa esaki no sosodé.
Lès pa Nos:
26:4. Lo ta sabí di nos parti pa evitá di asosiá ku hende ku ta skonde nan identidat. Sea ku ta hendenan den ‘chat room’ riba Internet, esnan na skol i na trabou ku ta pretendé di ta nos amigunan pa motibunan tramposo, apóstatanan kendenan ta pone un maskarada di sinseridat i hende ku ta hiba un bida dòbel.
26:7, 12; 35:18; 40:9. Nos tin ku alabá Yehova públikamente na reunionnan kristian.
26:8; 27:4. Nos gusta asistí na reunionnan kristian?
26:11. Miéntras ku David a ekspresá su determinashon pa mantené su integridat, el a hasi petishon tambe pa ser salbá. Sí, nos por mantené nos integridat apesar di nos imperfekshon.
29:10. E echo ku Yehova ta sintá riba “e diluvio” ta indiká ku e tin pleno kontròl di su poder.
30:5. Yehova su kualidat prinsipal ta amor, no rabia.
32:9. Yehova no ke pa nos ta manera buriku ku ta obedesé pasobra ta usa un bosal òf zuip. Al kontrario, su deseo ta pa nos skohe pa obedes’é pasobra nos ta komprondé su boluntat.
33:17-19. Ningun sistema trahá pa hende, sin importá kon poderoso, por trese salbashon. Nos konfiansa mester ta den Yehova i su areglo di Reino.
34:10. Ki un gran estímulo esaki ta pa personanan ku ta pone interesnan di Reino na promé lugá den nan bida!
39:1, 2. Ora ku hende malbado ta buska informashon pa perhudiká nos rumannan den fe, ta sabí di nos parti pa ‘warda nos boka ku un bosal’ i keda ketu.
40:1, 2. Spera riba Yehova por yuda nos trata ku depreshon i asina sali “for di e pos di destrukshon, for di e lodo di klei.”
40:5, 12. Si nos no pèrdè for di bista e echo ku nos bendishonnan ta “muchu hopi pa konta,” kalamidatnan i faltanan personal, pa hopi ku nan por ta, lo no aplastá nos.
‘Bendishoná Sea Yehova’
Ki un konsuelo i animashon e 41 salmonan di e promé kolekshon ta! Sea ku nos ta pasando dor di prueba òf ta sufri di un mal konsenshi, nos por saka fortalesa i animashon for di e parti aki di Dios su Palabra poderoso. (Hebreonan 4:12) E salmonan aki ta kontené informashon ku ta duna nos guia konfiabel kon nos mester biba. Bes tras bes nos ta ser garantisá ku sin importá ki difikultat nos haña nos aden, Yehova lo no bandoná nos.
E promé kolekshon di salmonan ta terminá ku e palabranan: “Bendishoná sea [Yehova], e Dios di Israel, for di eternidat te na eternidat. Amèn i Amèn.” (Salmo 41:13) Despues di a konsiderá e promé grupo di salmonan nos tambe no ta sinti nos konmoví pa bendishoná òf alabá Yehova?
[Nota]
[Komentario na página 19]
Si e kreashon, ku no por papia ni rasoná, ta duna gloria na Yehova, kuantu mas nos mester hasié!
[Plachi na página 17]
David a komponé mayoria di e promé 41 salmonan
[Plachi na página 18]
Bo sa kua salmo ta deskribí Yehova komo e Gran Wardadó?
[Plachi na página 20]
No laga ni un dia pasa sin konsiderá asuntunan spiritual
[Rekonosementu pa Potrèt na página 17]
Streanan: Kortesia di United States Naval Observatory
[Rekonosementu pa Potrèt na página 19]
Streanan, página 18 i 19: Kortesia di United States Naval Observatory
[Rekonosementu pa Potrèt na página 20]
Streanan: Kortesia di United States Naval Observatory