Negligensia i Maltrato di Hende Grandi

ANOCHI ora e bewaker a sali hasi su kontròl, e no tabata prepará pa e esena horibel ku tabata ward’é. Djis pafó di un kompleho di apartamento luhoso, el a topa dos kurpa sin bida. Tabata trata aki di un pareha kasá di edat avansá ku a bula for di bentana di nan apartamento na di ocho piso. Nan suisidio a kousa gran konsternashon, pero e motibu di nan akto tabata mas impaktante ainda. Un nota ku a ser hañá den saku di e hòmber a bisa: “Nos ta pone fin na nos bida pa motibu di e maltrato i hostigamentu konstante di nos yu hòmber i suegra.”

Kisas e insidente riba su mes no ta kos ku ta pasa tur dia, pero e kousa fundamental sí ta alarmante ya ku el a bira masha komun. En bèrdat, maltrato di hende di edat ta un problema práktikamente rònt mundu. Konsiderá e siguiente informenan:

• Den un estudio, 4 porshento di hende grandi kanades a konta ku nan a bira víktima di maltrato òf manipulashon—por lo general dor di un miembro di famia. Sin embargo, hopi hende grandi tin muchu bèrgwensa òf muchu miedu pa papia tokante nan situashon penoso. Segun ekspertonan, e sifra real por ta kasi 10 porshento.

• “India, ku su fachada di lasonan fuerte di famia, ta kayendo den otro debí na un kantidat kresiente di hende grandi ku ta ser rechasá dor di nan yunan,” segun e revista India Today.

• Di akuerdo ku e mihó kálkulonan disponibel, “entre 1 pa 2 mion merikano di 65 aña di edat òf mas a sufri entre otro leshon, maltrato, i manipulashon na man di un persona ku nan tabata dependé ariba pa kuido òf protekshon,” segun e Sentro Nashonal pa Maltrato di Hende Grandi. Un fiskal supstituto na San Diego, California, ta yama maltrato di hende grandi “un di e problemanan di mas serio ku outoridatnan ta konfrontando awe.” El a agregá: “Mi ta premirá ku pa e próksimo par di añanan e problema aki ta bai oumentá.”

• Na Canterbury, Nueva Zelandia, tin e preokupashon kresiente ku hende di edat ta birando víktima di nan mes famia—partikularmente di esnan ku tin problema ku droga, alkohòl òf gèmbelmentu. E kantidat di kasonan di maltrato di hende grandi ku ta wòrdu raportá na Canterbury a oumentá drástikamente di 65 na 2002 pa 107 na 2003. E ehekutivo prinsipal di un organisashon ku a ser establesé pa prevení e tipo di maltrato aki a bisa ku probablemente e kantidat aki ta representá djis un frakshon chikitu di e totalidat.

 • E Federashon Hapones di Asosiashonnan di Bar a rekomendá pa “víktimanan di edat avansá risibí asta mas atenshon ku víktimanan di maltrato di mucha òf otro violensia doméstiko,” segun The Japan Times. Pakiko? Wèl, e korant a bisa ku un di e motibunan ta ku “kompará ku maltrato di mucha òf di kasá, maltrato di hende grandi tin tendensia di tuma mas tantu tempu pa sali na kla. Esaki ta entre otro debí ku hende grandi ta sinti nan responsabel ora e maltrato a ser kousá dor di nan yunan i tambe debí ku gobièrnu i outoridatnan lokal te asina leu no a haña un manera efikas pa trata ku e problema.”

E par di ehèmpelnan aki di loke ta sosodiendo rònt mundu ta pone nos puntra: Pakiko asina tantu hende grandi ta ser neglishá i maltratá? Tin speransa ku kosnan lo drecha? Ki konsuelo tin pa hende grandi?