Historia di Bida

Sirbiendo Yehova ku Goso Apesar di Problema ku Salú

SEGUN E RELATO DI VARNAVAS SPETSIOTIS

Na 1990, na edat di 68 aña, mi a bira kompletamente paralisá. Sin embargo, ya awor mi tin 15 aña ta sirbi gososamente komo un minister di tempu kompletu riba e isla di Chipre (òf Cyprus). Kiko a duna mi e fortalesa pa sigui aktivo den e sirbishi di Yehova apesar di problema ku salú?

MI A nase dia 11 di òktober 1922 den un famia di nuebe yu: kuater mucha hòmber i sinku mucha muhé. Nos tabata biba den e pueblito Xylophagou, na Chipre. Ounke mi mayornan tabata relativamente bon pará, tòg kriamentu di un famia grandi asina a enbolbé hopi trabou pisá den kunuku.

Mi tata, Antonis, di naturalesa tabata kurioso i tabata gusta lesa i studia. Poko despues ku mi a nase, Tata tabata di bishita serka un maestro di skol di e pueblito i el a mira un tratado titulá E Prekstul di Pueblo, publiká dor di e Studiantenan di Beibel (manera Testigunan di Yehova tabata konosí e tempu ei). El a kuminsá les’é, i a keda apsorbá den su kontenido. Komo resultado, Tata i un di su amigunan, Andreas Christou, tabata entre e promé hendenan riba e isla pa asosiá nan mes ku Testigunan di Yehova.

Kresementu Apesar di Oposishon

Ku tempu, nan dos a haña mas publikashon basá riba Beibel for di Testigunan di Yehova. Poko despues, Tata ku Andreas a sinti nan motivá pa kompartí ku e otro hendenan di e pueblito e bèrdatnan bíbliko ku nan a siña. Nan aktividat di prediká a provoká  oposishon fuerte di parti di klero griego òrtodòks i di otro hende ku tabata haña Testigunan di Yehova un mal influensia.

Pero hopi di e hendenan lokal no por a keda sin respetá e dos maestronan di Beibel aki. Mi tata tabata bon konosí pa su bondat i generosidat. Hopi biaha el a duna un man na famianan pober. Tin biaha e tabata sali kuchikuchi for di kas anochi lat i bai pone trigu òf pan na porta di famianan den nesesidat. Tal kondukta kristian apnegá a hasi e mensahe di e dos predikadónan aki mas atraktivo.—Mateo 5:16.

Komo resultado, rònt di dies hende a reakshoná faborablemente riba e mensahe di Beibel. Segun ku nan komprondementu di e bèrdat a krese, nan a sinti e nesesidat di reuní den vários kas pa studia Beibel komo grupo. Rònt di aña 1934, Nikos Matheakis, un minister di tempu kompletu di Gresia, a bin Chipre i a reuní huntu ku e grupo na Xylophagou. Ku pasenshi i determinashon, Ruman Matheakis a yuda organisá e grupo i a yuda nan haña un mihó komprondementu di e Skritura. E grupo aki despues a bira e promé kongregashon di Testigunan di Yehova na Chipre.

Segun ku e obra kristian a progresá i mas hende a aseptá e bèrdat bíbliko, e rumannan a sinti ku nan tabatin mester di un lugá permanente pa tene nan reunionnan. Mi ruman hòmber mayó, George, ku su kasá, Eleni, a ofresé un lugá ku nan tabata usa komo mangasina. E propiedat aki, ku tabata pegá ku nan kas, a ser drechá i kombertí den un lugá apropiá pa tene reunion. Pues asina e rumannan a bira doño di nan promé Salòn di Reino riba e isla. Esta gradisidu nan tabata! I esaki a stimulá mas ekspanshon!

Tumando e Bèrdat na Serio

Na 1938, na edat di 16 aña, mi a disidí ku mi ke bira karpinté. Pues, Tata a manda mi na e kapital di Chipre, Nikosia. Demostrando bon pre-vishon, el a hasi areglo pa mi keda  serka Nikos Matheakis. Hopi hende riba nos isla te ainda ta kòrda e ruman aki pa su selo i hospitalidat. Su gran entusiasmo i kurashi firme tabata kualidatnan nesesario pa kualke kristian na Chipre den e tempu ei.

Ruman Matheakis a yuda mi masha hopi mes pa mi por a haña un base sólido di konosementu bíbliko i pa hasi progreso spiritual. Miéntras mi tabata keda serka dje, mi a asistí na tur e reunionnan ku tabata tene den su kas. Pa promé biaha, mi a sinti ku mi amor pa Yehova tabata kresiendo. Mi a desaroyá e determinashon pa kultivá un relashon signifikativo ku Dios. Den un par di luna, mi a pidi Ruman Matheakis si mi por kompañ’é den sirbishi di vèlt. Esaki tabata na aña 1939.

Despues di poko tempu, mi a bai kas bèk pa bishitá mi famia. E tempu ku mi a pasa den kompania di mi tata a profundisá mi konvikshon ku mi a haña e bèrdat i e propósito di bida. Na sèptèmber 1939, Segundo Guera Mundial a kuminsá. Hopi mucha hòmber di mi edat a ofresé nan mes pa bai guera, pero siguiendo e instrukshon di Beibel, mi a disidí di keda neutral. (Isaias 2:4; Juan 15:19) E mesun aña ei, mi a dediká mi bida na Yehova i mi a batisá na 1940. Pa promé bes, mi a sinti ku mi no tabatin miedu di hende mas!

Na 1948 mi a kasa ku Efprepia. Nos a ser bendishoná ku kuater yu. No a dura hopi ku nos a bin realisá ku nos tabatin ku traha duru pa por ‘lanta nan den e disiplina i instrukshon di Yehova.’ (Efesionan 6:4) Nos orashon- i esfuersonan tabata enfoká riba inkulká un amor profundo pa Yehova den nos yunan i tambe rèspèt pa su leinan i prinsipionan.

Problemanan di Salú Ta Bira un Reto

Na 1964, na edat di 42 aña, mi a kuminsá sinti mi man i pia drechi ta bira dof. Pokopoko esaki a plama pa mi banda robes. Dòkternan a diagnostiká mi ku debilidat muskular, un malesa inkurabel ku despues di tempu ta hiba na parálisis kompletu. E notisia a shòk mi pisá. E sirkunstansia aki a surgi asina lihé i ònferwagt! Aplastá pa sintimentunan di rabia i indignashon, mi a pensa: ‘Dikon esaki mester a pasa nèt ku ami! Kiko mi a hasi pa meresé esaki?’ Sin embargo, ku tempu mi a logra superá e promé shòk di e diagnósis. E ora ei mi a sinti mi aplastá pa ansiedat i insiguridat.  Un kantidat di pregunta a keda bira rònt den mi kabes. Lo mi bira kompletamente paralisá i tin ku bai dependé totalmente di otro hende? Kon lo mi trata ku esei? Lo mi por mantené mi famia, esta, mi kasá i nos kuater yunan? Mi tabata kremp ora mi pensa riba e kosnan ei.

Na e punto krítiko aki den mi bida, mas ku nunka promé, mi a sinti e nesesidat di akudí na Yehova den orashon i kont’é sinseramente tur mi preokupashon i ansiedat. Mi tabata hasi orashon di dia i anochi ku awa na wowo. No a tarda ku mi a sinti mi konsolá. E palabranan konsolador di Filipensenan 4:6 i 7 a resultá hopi sierto den mi kaso: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.”

Tratando ku Parálisis

Mi kondishon a sigui empeorá. Mi a bin realisá ku mi mester ahustá purá na mi sirkunstansia nobo. Komo ku mi no por a traha mas komo karpinté, mi a disidí di buska un trabou ménos pisá ku tabata pas ku mi kondishon físiko i ku tòg a yuda mi mantené mi famia. Na kuminsamentu, mi a bende eiskrim for di un vèn chikí. Mi a hasi esaki pa mas o ménos seis aña te ora ku mi malesa a pone ku mi mester usa ròlstul. Despues mi a kambia bai hasi vários trabou mas fásil.

Pero desde 1990 mi salú a bai asina atras ku mi no por a traha mas. Awor mi ta dependé kompletamente di otro hende, asta pa hasi kosnan ku lo ta normal pa un persona salú. Mi tin mester di yudansa ora di bai drumi, pa baña mi kurpa i pa bisti paña. Pa mi asistí na reunionnan kristian, un hende mester pusha mi den ròlstul te na outo, kaba hisa mi hinka mi den outo. Ora nos yega Salòn di Reino, mester hisa mi saka mi for di outo, pone mi den ròlstul, anto kaba pusha mi hiba paden. Durante reunion, mi tin un kalentador eléktriko band’i mi pa tene mi pianan kayente.

Pero apesar di mi parálisis, mi ta asistí na tur e reunionnan ku basta regularidat. Mi ta komprondé ku einan ta kaminda Yehova ta siña nos, i asosiashon ku mi rumannan spiritual ta un berdadero refugio i un fuente di sosten i animashon. (Hebreonan 10:24, 25) Bishitanan regular di rumannan spiritualmente maduro ta un yudansa konstante pa mi. Mi no por keda sin sinti meskos ku David: “Mi kopa ta yen te basha over.”—Salmo 23:5.

Mi kasá stimá atraves di tur e añanan aki tabata un yudansa maravioso. Mi yunan tambe a yuda mi masha bon mes. Ya pa vários aña, nan ta yuda mi ku mi nesesidatnan di tur dia. Loke nan ta hasi no ta fásil, i segun ku e añanan ta pasa, ta bira mas i mas difísil pa kuida mi. Nan ta realmente ehemplar den kultivá pasenshi i gasta nan mes na mi fabor, i mi ta pidi Yehova pa sigui bendishoná nan.

Un otro provishon maravioso di Yehova pa fortifiká su sirbidónan ta orashon. (Salmo 65:2) Komo kontesta riba mi súplikanan sinsero, Yehova a duna mi e fortalesa pa sigui fiel den e fe durante tur e añanan aki. Spesialmente ora mi ta sinti mi desanimá, orashon ta duna mi alivio i ta yuda mi mantené mi goso. Komunikashon konstante ku Yehova ta refreská mi i ta renobá mi determinashon pa sigui padilanti. Mi ta kompletamente konvensí ku Yehova ta tende e orashonnan di su sirbidónan i ta duna nan e pas mental ku nan tin mester.—Salmo 51:17; 1 Pedro 5:7.

Mas ku tur kos, mi ta sinti mi yen di energia atrobe kada biaha ku mi kòrda ku Dios ku tempu lo kura tur hende ku ser bendishoná ku bida den Paradeis bou di e Reino di su Yu, Hesukristu. Mas ku un biaha lágrimanan di  goso a yega di kore na mi kara ora mi meditá riba e speransa maravioso ei.—Salmo 37:11, 29; Lukas 23:43; Revelashon 21:3, 4.

Sirbiendo Komo Minister di Tempu Kompletu

Rònt di aña 1991 mi a realisá, despues di a analisá mi situashon, ku e mihó manera pa evitá di sinti duele di mi mes tabata pa keda okupá den kompartí e presioso bon notisia di e Reino ku otro hende. E aña ei mi a kuminsá sirbi komo un minister di tempu kompletu.

Komo ku mi ta desabilitá, mi ta duna testimonio prinsipalmente via karta. Sin embargo, pa mi, skirbimentu no ta un kos fásil; mi tin ku hasi hopi esfuerso. Ta difísil pa mi tene e pèn firmemente den mi man dor ku e malesa a debilitá mi múskulonan. Sin embargo, ku perseveransia i orashon, mi tin ya 15 aña ta prediká dor di skirbi karta. Tambe mi ta usa telefòn pa prediká na hende. Nunka mi no ta pèrdè un oportunidat pa papia tokante mi speransa di e mundu nobo i di e tera transformá den Paradeis ku mi famia-, amigu- i bisiñanan ku ta bin bishitá mi na kas.

Komo resultado, mi a disfrutá di hopi eksperensia animante. Mi a keda masha kontentu di mira un di mi nietunan, ku un 12 aña pasá mi a studia kuné, hasi progreso spiritual i mustra apresio pa e bèrdat bíbliko. Motivá pa su konsenshi bíblikamente entrená, el a keda fiel i firme riba e kuestion di neutralidat kristian.

Mi ta keda kontentu foral ora hende ku mi skirbi, tuma kontakto ku mi pa mas informashon tokante Beibel. De bes en kuando, tin hende ta pidi mas literatura bíbliko. Por ehèmpel, un señora a bèl mi i gradisí mi pa e karta animante ku mi a manda pa su kasá. El a haña e pensamentunan den e karta masha interesante. Esaki a hiba na hopi kòmbersashon bíbliko kuné i ku su kasá den mi kas.

Un Speransa Maravioso i un Punto di Bista Positivo

Atraves di añanan, mi a mira e kantidat di proklamadónan di Reino oumentá den e parti aki di mundu. E Salòn di Reino chikí ku ta pegá ku e kas di mi ruman hòmber George a wòrdu ekspandé i renobá vários biaha. E ta un bunita lugá di adorashon, ku dos kongregashon di Testigunan di Yehova ta usa.

Tata a muri na 1943, na edat di 52 aña. Pero ki un gran herensia spiritual el a laga atras! Ocho di su yunan a aseptá e bèrdat i ainda ta sirbi Yehova. Den e pueblito Xylophagou, kaminda Tata a nase, huntu ku pueblitonan bisiña, tin awor tres kongregashon, ku un total di 230 publikadó di Reino!

Resultadonan positivo asina tabata un gran motibu di goso pa mi. Awor, na edat di 83 aña, mi ta ripití ku konfiansa e palabranan di e salmista: “Leon chikitu sí tin nesesidat i ta pasa hamber, ma esnan ku ta buska SEÑOR lo no tin falta di ningun kos bon.” (Salmo 34:10) Ansiosamente mi ta spera riba e tempu ora ku e profesia ku tin pará na Isaias 35:6 lo bira realidat: “E kohonan lo bula manera biná.” Mi ta desididu pa sigui sirbi Yehova ku goso te na e tempu ei, apesar di mi problemanan di salú.

[Mapa na página 17]

(Pa e teksto den su formato kompleto, wak e publikashon)

TURKIA

SIRIA

LÍBANO

CHIPRE

Nikosia

Xylophagou

Laman Mediteráneo

[Plachinan na página 17]

E promé Salòn di Reino na Xylophagou, usá te ainda

[Plachinan na página 18]

Ami ku Efprepia na 1946 i awe

[Plachi na página 20]

Mi ta haña goso den prediká via telefòn i karta