“Skohe Bida pa Bo Biba”

“Mi a pone bida i morto boso dilanti, e bendishon i e maldishon. P’esei, skohe bida pa bo biba.”—DEUTERONOMIO 30:19.

1, 2. Den ki aspektonan hende a ser kreá den Dios su imágen?

“LAGA nos traha hende segun nos imágen, konforme nos semehansa.” E deklarashon ei ku Dios a hasi ta pará skirbí den e promé kapítulo di Beibel. Di akuerdo ku esei, Génesis 1:26 i 27 ta informá: “Dios a krea hende segun su mes imágen; segun e imágen di Dios el a krea hende.” Pues, e promé hende tabata distinto for di tur otro kreashon riba tera. El a parse su Kreadó, pasobra e por a imitá Dios su aktitut den su manera di rasoná, i den demostrá amor, hustisia, sabiduria i poder. E tabatin e fakultat di konsenshi pa yud’é tuma desishonnan ku lo benefisi’é i agradá su Tata selestial. (Romanonan 2:15) Ku poko palabra, Adam tabatin boluntat liber. Opservando e diseño di su yu terenal, Yehova a evaluá loke el a krea asin’aki: “Ata, tur kos [ta] masha bon.”—Génesis 1:31; Salmo 95:6.

² Komo desendiente di Adam, nos tambe ta trahá den Dios su imágen i semehansa. Sin embargo, di bèrdat nos por skohe kiko nos ta hasi? Sí, ounke Yehova tin e kapasidat di sa di antemano kiko lo bai pasa, e no ta predeterminá nos akshonnan individual i nan resultado final. Nunka lo e no permití bida di su yunan terenal ser dirigí dor di predestinashon. Pa yuda nos kapta e importansia di usa nos boluntat liber pa skohe e kaminda korekto, laga nos siña promé un lès for di e nashon di Israel.—Romanonan 15:4.

 E Israelitanan Tabatin Libertat di Skohe

3. Kua tabata e promé di e Dies Mandamentunan, i kon e israelitanan fiel a skohe pa obedes’é?

³ Yehova a bisa e israelitanan: “Ami ta SEÑOR [Yehova] bo Dios, kende a saka bo for di tera di Egipto, for di e kas di sklabitut.” (Deuteronomio 5:6) Na aña 1513 promé ku nos era, e nashon di Israel a eksperensiá un liberashon milagroso for di sklabitut den Egipto i p’esei nan no tabatin motibu pa duda e palabranan ei. Yehova, mediante su portabos Moisés, a deklará den e promé di e Dies Mandamentunan: “Bo no mag tin otro dios mi dilanti.” (Eksodo 20:1, 3) Na e okashon ei, e nashon di Israel a skohe pa obedesé. Boluntariamente nan a duna Yehova nan deboshon eksklusivo.—Eksodo 20:5, NW; Numbernan 25:11, NW.

4. (a) Ki chòis Moisés a pone dilanti di Israel? (b) Ki chòis nos tin awe?

⁴ Un 40 aña despues, Moisés na un manera enfátiko a rekordá un otro generashon di israelita di e chòis òf eskoho ku nan mester a hasi. El a deklará: “Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan.” (Deuteronomio 30:19) Awe ta meskos, nos tin un chòis. Nos por skohe pa sirbi Yehova fielmente ku bida eterno na bista, òf nos por skohe pa desobedes’é i sufri e konsekuensianan. Konsiderá dos ehèmpel di hendenan ku a skohe nèt kontrali di otro.

5, 6. Ki eskoho Josué a hasi, i ku ki resultado?

⁵ Na aña 1473 promé ku nos era, Josué a dirigí e israelitanan pa drenta e Tera Primintí. Den un yamada urgente i motivador ku el a hasi promé ku su morto, Josué a roga henter e nashon: “Si ta desagradabel den boso bista pa sirbi SEÑOR, skohe pa boso mes awe kende boso lo sirbi: sea e diosnan ku boso tatanan tabata sirbi, kualnan tabata na e otro banda di Riu Eufrates, òf e diosnan di e amoreonan, den kende nan tera boso ta biba.” Anto refiriendo na su famia, el a sigui bisa: “Pa loke ta ami i mi kas, nos lo sirbi SEÑOR [Yehova].”—Josué 24:15.

⁶ Mas promé, Yehova a urgi Josué pa tene hopi kurashi i sea fuerte, i a dun’é e instrukshon pa no kita for di obedensia na e Lei di Dios. Al kontrario, dor di meditá riba e buki di Lei di dia i anochi, Josué lo por tabatin éksito den su kaminda. (Josué 1:7, 8) Josué a hasi esei i e tabatin éksito. Loke el a skohe a hiba na hopi bendishon. El a deklará: “Ni un di e bon promesanan ku SEÑOR a hasi na e kas di Israel no a faya; tur a keda kumplí.”—Josué 21:45.

7. Den tempu di Isaias, ki eskoho algun israelita a hasi, i ku ki konsekuensia?

⁷ Na kontraste, konsiderá e situashon den Israel un 700 aña despues. Pa e tempu ei, hopi israelita tabata sigui kustumbernan pagano. Por ehèmpel, riba e último dia di aña, e hendenan tabata reuní pa un bankete ku a konsistí di un variedat di kuminda sabroso i biña dushi. Pero esaki no tabata un simpel reunion sosial. E tabata un seremonia religioso ku a onra dos dios pagano. Profeta Isaias a skirbi Dios su punto di bista di e infieldat aki: “Boso ku ta bandoná SEÑOR, ku ta lubidá mi seru santu, ku ta pone mesa pa [“e dios di,” NW] Fortuna, i ku ta yena kopa ku biña mesklá pa [“e dios di,” NW] Destino.” Nan tabata kere ku e kosecha di e aña tabata dependé, no di Yehova su bendishon, sino di pai ‘e dios di Fortuna’ i ‘e dios di Destino.’ Pero en realidat, nan kaminda rebelde i nan eskoho deliberá a determiná nan fin desastroso. Yehova a deklará: “Lo mi destiná boso pa spada, i boso tur lo hinka rudia pa wòrdu matá. Pasobra mi a yama, ma boso no a kontestá; mi a papia, ma boso no a tende. Boso a hasi loke ta malu den mi bista, i a skohe loke mi no tabatin delisia den dje.” (Isaias 65:11, 12) Nan eskoho imprudente a resultá den nan destrukshon, i e diosnan di Destino i Fortuna no tabatin poder pa prevení esei.

 Hasiendo e Eskoho Korekto

8. Segun Deuteronomio 30:20, hasi e eskoho korekto ta enserá kiko?

⁸ Ora ku Moisés a enkurashá Israel pa skohe bida, el a indiká tres paso ku nan mester a tuma: “Dor di stima SEÑOR bo Dios, dor di obedesé su bos i dor di tene duru na dje.” (Deuteronomio 30:20) Laga nos analisá kada un di e pasonan aki ya asina nos por hasi e eskoho korekto.

9. Kon nos por demostrá nos amor pa Yehova?

⁹ Dor di stima Yehova bo Dios: Nos ta skohe pa sirbi Yehova pasobra nos stim’é. Nos ta tuma na pechu e ehèmpelnan di tempu di Israel ku ta sirbi komo un spièrtamentu pa nos. Pues, nos ta resistí tur tentashon pa kometé inmoralidat i nos ta evitá estilonan di bida ku lo por pone nos kai den mundu su trampa di materialismo. (1 Korintionan 10:11; 1 Timoteo 6:6-10) Nos ta pega fielmente na Yehova i ta sigui su leinan òf estatutonan. (Josué 23:8; Salmo 119:5, 8) Promé ku e israelitanan a drenta e Tera Primintí, Moisés a urgi nan: “Mira, mi a siña boso estatutonan i huisionan meskos ku SEÑOR mi Dios a ordená mi, pa boso hasi asina na e tera ku boso ta bai drenta pa poderá di dje. Asina anto, warda nan i kumpli ku nan, pasobra esei ta boso sabiduria i boso komprondementu den bista di e pueblonan ku lo tende tur e estatutonan aki.” (Deuteronomio 4:5, 6) Awor ta e tempu pa nos demostrá nos amor pa Yehova dor di pone su boluntat na promé lugá den nos bida. Definitivamente nos lo ser bendishoná si nos skohe pa hasi esei.—Mateo 6:33.

10-12. Ki lèsnan nos ta siña dor di konsiderá loke a sosodé den tempu di Noe?

¹⁰ Dor di obedesé Dios su bos: Noe tabata “un predikadó di hustisia.” (2 Pedro 2:5) Kasi tur e hendenan promé ku Diluvio no a presta atenshon i “no a hasi kaso” di Noe su spièrtamentu. Ku ki konsekuensia? “E diluvio a bini i a bari nan tur.” Hesus a spièrta ku nos tempu, durante “e presensia dje Yu di hende,” lo ta meskos. Loke a pasa den tempu di Noe ta sirbi komo un spièrtamentu serio pa e hendenan djawendia ku ta skohe pa no hasi kaso di Dios su mensahe.—Mateo 24:39, NW.

¹¹ Hende ku ta hasi bofon di e spièrtamentunan divino ku Dios su sirbidónan di tempu aktual ta proklamá, mester realisá kiko lo ta e resultado si nan keda sin hasi kaso di e spièrtamentunan ei. Apòstel Pedro a bisa di e hasidónan di bofon ei: “Di nan mes boluntat nan no kier aseptá e echo aki, ku pa medio di e palabra di Dios e shelunan a eksistí di hopi tempu pasá i e tera a wòrdu formá for di awa i pa medio di awa, dor di kual e mundu di e tempu ei a wòrdu destruí, siendo inundá ku awa. Ma e shelunan i e tera aktual pa medio di su palabra ta wòrdu reservá pa kandela, wardá pa e dia di huisio i destrukshon di hendenan impio.”—2 Pedro 3:3-7.

¹² Mira e kontraste entre e hendenan aki i e chòis ku Noe i su hendenan di kas a hasi. “Pa medio di fe Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka.” Dor di hasi kaso di e spièrtamentu, Noe a trese salbashon pa e hendenan di su kas. (Hebreonan 11:7) Laga nos ta personanan ku ta lihé pa tende e mensahe di Dios i hasi kaso di dje obedientemente.—Santiago 1:19, 22-25.

13, 14. (a) Pakiko ta sumamente importante pa nos ‘tene duru na Yehova’? (b) Kon nos mester laga Yehova, “nos Alfarero,” moldia nos?

¹³ Dor di tene duru na Yehova: Pa nos ‘skohe bida i keda biba,’ nos no solamente tin ku stima Yehova i obedes’é, sino tambe nos tin ku ‘tene duru na Yehova,’ es desir, persistí den hasi su boluntat. Hesus a bisa: “Dor di boso perseveransia boso lo gana boso alma.” (Lukas 21:19) Bon mirá, loke nos skohe relashoná ku esaki ta revelá kiko tin den nos kurason. Proverbionan 28:14 ta remarká: “Bendishoná ta e hende ku semper tin temor, ma esun ku hasi su kurason duru lo kai den kalamidat.” Fárao di antiguo Egipto tabata un ehèmpel di esaki. Segun ku kada un di e Dies Plaganan tabata asotá Egipto, Fárao a hasi su kurason  duru en bes di desplegá temor di Dios. Yehova no a obligá Fárao desobedes’é sino mas bien a permití e gobernante arogante ei di skohe. En todo kaso, Yehova su boluntat a kumpli, manera apòstel Pablo a splika relashoná ku e manera ku Yehova a mira Fárao: “Ta pa e propósito aki mi a lanta bo, [òf, “laga bo permanesé,” NW] pa demostrá mi poder den bo i pa mi nòmber por wòrdu proklamá den henter mundu.”—Romanonan 9:17.

¹⁴ Siglonan despues ku Israel a ser librá for di Fárao su kontròl, profeta Isaias a deklará: “O SEÑOR, abo ta nos Tata, nos ta e klei i abo ta nos Alfarero; i nos tur ta e obra di bo man.” (Isaias 64:8) Segun ku nos ta laga Yehova moldia nos mediante nos estudio personal i aplikashon di su Palabra, nos gradualmente ta bisti e personalidat nobo. Nos ta bira mas mansu i moldiabel, i asina ta bira mas fásil pa nos pega fielmente na Yehova pasobra sinseramente nos ke agrad’é.—Efesionan 4:23, 24; Kolosensenan 3:8-10.

“Siña Nan”

15. Segun Deuteronomio 4:9, Moisés a rekordá Israel di kua responsabilidat ku a konsistí di dos aspekto?

¹⁵ Moisés a bisa e nashon di Israel ku tabata kla pa drenta e Tera Primintí: “Solamente, paga tinu i warda bo alma ku tur diligensia, pa bo no lubidá e kosnan ku bo wowo a mira, i pa nan no kita for di bo kurason tur e dianan di bo bida; ma siña nan na bo yunan i na bo nietunan.” (Deuteronomio 4:9) Pa e pueblo por tabatin Yehova su bendishon i prosperá den e tera ku nan tabata serka di heredá, nan tabatin ku kumpli ku un responsabilidat dilanti di Yehova nan Dios. E responsabilidat aki a konsistí di dos aspekto: nan no mester a lubidá e kosnan maravioso ku Yehova a hasi dilanti nan wowo, i nan mester a siña e kosnan ei na e futuro generashonnan. Komo e pueblo di Dios awe, nos tin ku hasi meskos si nos ke ‘skohe bida i keda biba.’ Kiko nos a mira ku nos propio wowo ku Yehova a hasi na nos fabor?

16, 17. (a) Kiko misioneronan entrená na Galaad a logra hasi den e predikashon di Reino? (b) Ki ehèmpelnan abo konosé di rumannan ku a mantené nan selo?

¹⁶ Nos ta masha kontentu di mira kon Yehova a bendishoná nos trabou di prediká i hasi disipel. For di dia ku e Skol Bíbliko di Galaad di Watchtower a habri na aña 1943, misioneronan den hopi pais a hiba delantera den e trabou di hasi disipel. Te ku awe tin graduadonan di e promé klasnan di e skol aki ku ta mantené un selo pa e predikashon di Reino, apesar ku nan ta di edat avansá i limitashonnan físiko ta stroba algun di nan. Un ekselente ehèmpel ta Mary Olson, kende a gradua di Galaad na 1944. El a sirbi komo misionero, promé na Uruguay, despues na Colombia i awor na Puerto Rico. Ounke Ruman Olson no por hasi mashá mas dor di problema ku salú kousá pa behes, el a keda ku su entusiasmo pa prediká. Hasiendo bon uso di su konosementu di spañó, e ta programá tempu tur siman pa  sali ku e publikadónan lokal den sirbishi di vèlt.

¹⁷ Nancy Porter, ku awor ta biuda i kende a gradua for di Skol di Galaad na 1947, ainda ta sirbi na Bahámas. E tambe ta un misionero ku ta keda okupá den e trabou di prediká. Ruman Porter a bisa den e historia di su bida: “Siña otro hende bèrdat di Beibel ta un fuente spesial di goso. E ta perkurá un rutina spiritual ordená ku a duna mi bida struktura i stabilidat.” * Ora Ruman Porter i otro sirbidónan fiel wak atras, nan no ta lubidá loke Yehova a hasi. Kiko di nos? Nos ta meditá ku apresio riba e manera ku Yehova a bendishoná e obra di Reino den nos área?—Salmo 68:11.

18. Kiko nos por siña dor di lesa e historia di bida di misioneronan?

¹⁸ Nos ta hopi kontentu ku loke e “veteranonan” aki den sirbishi di Yehova a logra i te ainda ta logra. Lesando e historia di nan bida ta un fuente di animashon pa nos pasobra ora nos mira loke Yehova a hasi pa e rumannan fiel aki, esei ta fortifiká nos determinashon pa sigui sirbi Yehova. Abo ta lesa ku regularidat e historianan emoshonante ei ku ta sali den E Toren di Vigilansia i meditá riba nan?

19. Kon mayornan kristian por hasi bon uso di e historianan di bida ku ta sali den E Toren di Vigilansia?

¹⁹ Moisés a rekordá e israelitanan ku nan no mester a lubidá tur loke Yehova a hasi pa nan i ku e kosnan aki no mester a kita for di nan kurason pa e restu di nan bida. Kaba el a agregá un paso mas: “Siña nan na bo yunan i na bo nietunan.” (Deuteronomio 4:9) Historianan di bida real tin un atrakshon spesial. Hóbennan ku ta krese tin mester di bon ehèmpel. Rumannan muhé soltero por siña hopi lès for di e ehèmpel di rumannan muhé di edat kende nan historia di bida ta sali den E Toren di Vigilansia. Tantu rumannan hòmber komo rumannan muhé tin mayor oportunidat di ta okupá ku e predikashon di e bon nobo dor di bai sirbi den un teritorio di otro idioma den nan mes pais. Mayornan kristian, dikon boso no ta usa e eksperensianan di e fiel misioneronan di Galaad i di otro rumannan pa motivá boso yunan pa skohe un bida di sirbishi di tempu kompletu?

20. Kiko nos tin ku hasi pa “skohe bida”?

²⁰ Pues anto, kon kada un di nos por “skohe bida”? Dor di usa nos maravioso don di boluntat liber pa mustra Yehova ku nos stim’é, i dor di sigui hasi nos bèst den su sirbishi tanten ku e ta permití nos e privilegio ei. Pasobra manera Moisés a deklará, Yehova “ta bo bida i e largura di bo dianan.”—Deuteronomio 30:19, 20.

[Nota]

Bo Ta Kòrda?

• Kiko bo a siña for di e ehèmpelnan ku nos a konsiderá di hende ku a skohe kontrali di otro?

• Ki pasonan nos tin ku tuma pa asina nos “skohe bida”?

• Beibel ta urgi nos pa kumpli ku kua responsabilidat ku ta konsistí di dos aspekto?

[Preguntanan di Estudio]

[Plachi na página 26]

“Mi a pone bida i morto boso dilanti”

[Plachi na página 29]

Noe i su famia a salba dor ku nan a obedesé Dios su bos

[Plachi na página 30]

Mary Olson

[Plachi na página 30]

Nancy Porter