Yehova Ta Deklará “e Fin for di Prinsipio”

“[Esun] kende ta deklará e fin for di prinsipio, i for di tempunan antiguo, kosnan ku no a wòrdu hasí ainda.”—ISAIAS 46:10.

1, 2. Kiko ta remarkabel di e susesonan asosiá ku e konkista di Babilonia, i kiko e echo aki ta indiká tokante Yehova?

DEN e skuridat di anochi, sòldánan enemigu kuchikuchi ta kana pasa dor di Riu Eufrates den direkshon di nan ophetivo, e poderoso stat di Babilonia. Segun ku nan ta yega serka di e entrada di e stat, nan ta mira algu sorprendente. E bewakernan a laga e dos blatnan inmenso di e porta den muraya di Babilonia habrí! E sòldánan ta subi for di e riu i ta drenta e stat. Rápidamente nan ta kapturá e stat. Nan lider, Siro, umbes ta tuma kontròl di e pais konkistá i despues ta saka un dekreto ku ta libra e prezunan israelita. Míles di eksiliado ta regresá kas pa restorá e adorashon di Yehova na Yerusalèm.—2 Krónikanan 36:22, 23; Esdras 1:1-4.

² E susesonan ei di aña 539 pa 537 promé ku nos era, awor ta bon konfirmá dor di historiadónan. Loke ta remarkabel ta ku un 200 aña promé e susesonan ei tabata konosí kaba. Yehova a inspirá su profeta Isaias pa deskribí e kaida di Babilonia dje tantu tempu ei di antemano. (Isaias 44:24–45:7) Dios no solamente a revelá e sirkunstansianan rondó di e konkista di Babilonia, sino asta nòmber di e lider konkistadó. * Yehova a bisa e israelitanan, ku e tempu ei tabata su testigunan: “Kòrda e kosnan di ántes kosnan di hopi tempu pasá, pasobra ami ta Dios, i no tin ningun otro Dios. Ami ta Dios, i no tin ningun manera mi, Kende ta deklará e fin for di prinsipio, i for di tempunan antiguo, kosnan ku no a wòrdu hasí ainda.” (Isaias 46:9, 10) Yehova di bèrdat ta un Dios ku por sa di antemano kiko lo sosodé.

3. Nos lo konsiderá kontesta riba kua preguntanan?

³ Kuantu Dios sa tokante futuro? Akaso Yehova sa di antemano kiko kada un di nos ta bai hasi? Nos futuro ta predestiná? Den e  artíkulo aki i esun siguiente nos lo konsiderá Beibel su kontesta riba e preguntanan aki i riba otro pregunta mas.

Yehova—Un Dios di Profesia

4. Ken ta e Fuente di e profesianan ku tin pará skirbí den Beibel?

⁴ Siendo ku Yehova tin e kapasidat di sa futuro di antemano, el a inspirá su sirbidónan den tempu bíbliko pa skirbi hopi profesia. Esaki ta permití nos sa di antemano kiko Yehova ta bai hasi. Yehova a deklará: “Mira, e kosnan di ántes a pasa, awor mi ta deklará kosnan nobo; promé ku nan sali na kla, mi ta anunsiá nan na boso.” (Isaias 42:9) Ki un gran privilegio e pueblo di Dios tin!

5. Ki responsabilidat un persona tin ora ku e haña konosementu di antemano di loke Yehova ta bai hasi?

⁵ Profeta Amos ta sigurá nos: “SEÑOR Dios no ta hasi nada, sin ku e revelá su konseho sekreto na su sirbidónan, e profetanan.” Un hende ku haña e konosementu di antemano aki tin un responsabilidat. Tuma nota di e ilustrashon impaktante ku Amos a usa: “Leon a gruña! Ken lo no tin temor?” Meskos ku e gruñamentu di un leon ta provoká mesora un reakshon di tantu hende komo bestia ku tend’é, asina profetanan manera Amos mesora a anunsiá Yehova su deklarashonnan. “Señor DIOS a papia! Ken por laga di profetisá?”—Amos 3:7, 8.

Yehova Su “Palabra” Lo ‘Alkansá Su Propósito’

6. Den ki manera Yehova su “propósito” a kumpli en konekshon ku e kaida di Babilonia?

⁶ Yehova a bisa mediante su profeta Isaias: “Mi propósito lo wòrdu establesí i lo mi kumpli ku tur loke ta agradá mi.” (Isaias 46:10b) Pa loke a trata Babilonia, Dios su “propósito” a enserá yama Siro for di Persia pa konkistá Babilonia i kousa Babilonia su kaida. Yehova a deklará e propósito ei hopi tempu di antemano, i manera nos a menshoná kaba, el a kumpli al pie de la letra na aña 539 promé ku nos era.

7. Dikon nos por tin konfiansa ku Yehova su “palabra” semper ta kumpli?

⁷ Kasi kuater siglo promé ku Siro a konkistá Babilonia, Rei Josafat di Huda a konfrontá e ehérsitonan kombiná di Amon i Moab. Ku konfiansa el a bisa den orashon: “O SEÑOR, e Dios di nos tatanan, no ta abo ta Dios den e shelunan? I no ta abo ta goberná riba tur e reinonan di e nashonnan? Poder i forsa ta den bo man, asina ku ningun hende no por para kontra bo.” (2 Krónikanan 20:6) Isaias a ekspresá e mesun konfiansa ora el a deklará: “SEÑOR di ehérsitonan a plania [“konsehá,” NW], i ken por anulá esaki? I pa loke ta su man ekstendí, ken por hal’é bèk?” (Isaias 14:27) Mas despues, ora ku Rei Nabukodonosor di Babilonia a rekobrá su sano huisio despues di un periodo di lokura, el a rekonosé humildemente: “Ningun hende no por detené [Dios] su man ni bis’é: ‘Kiko bo a hasi?’” (Daniel 4:35) Sí, Yehova ta sigurá su pueblo: “Mi palabra ku ta sali for di mi boka . . . lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.” (Isaias 55:11) Nos por tin e pleno  konfiansa ku Yehova su “palabra” semper ta kumpli. Dios su propósito ta infalibel.

Dios Su “Propósito Eterno”

8. Kiko ta Dios su “propósito eterno”?

⁸ Apòstel Pablo a menshoná den su karta na e kristiannan na Efeso, ku Dios tin un “propósito eterno.” (Efesionan 3:11) Esaki no ta simplemente un plan di akshon, komo si fuera Dios tabatin ku plania kon lo e bai traha. Mas bien, e tin keber ku Yehova su determinashon pa kumpli ku loke originalmente tabata su propósito pa humanidat i pa e tera. (Génesis 1:28) Pa yuda nos komprondé kon infalibel Dios su propósito ta, laga nos konsiderá e promé profesia registrá den Beibel.

9. Kon Génesis 3:15 ta konektá ku Dios su propósito?

⁹ E promesa na Génesis 3:15 ta indiká ku inmediatamente despues ku Adam ku Eva a peka, Yehova a disidí ku su muhé simbóliko lo a bai produsí un simia, un yu hòmber. Yehova a mira tambe di antemano e resultado di e enemistat entre su muhé simbóliko i Satanas, i e enemistat entre nan simianan ku lo ta kontra otro. Ounke Yehova lo a permití e Simia di Dios su muhé simbóliko sufri herida na su hilchi, na Dios su debido tempu e Simia lo a heridá e kolebra, Satanas e Diabel, den kabes. Miéntras tantu, Yehova su propósito a avansá sin faya atraves di e liña di desendensia selektá, te ora Hesus a aparesé komo e Mesias primintí.—Lukas 3:15, 23-38; Galationan 4:4.

Asuntunan Ku Yehova A Determiná di Antemano

10. Akaso Yehova a predeterminá for di prinsipio ku Adam ku Eva lo peka? Splika.

¹⁰ Papiando di e papel ku Hesus a hunga den Dios su propósito, apòstel Pedro a skirbi: “E [Hesus] tabata konosí kaba promé ku e fundashon di mundu, ma a aparesé den e último tempunan aki pa boso motibu.” (1 Pedro 1:20) Akaso Yehova a predeterminá for di prinsipio ku Adam ku Eva lo peka i ku e sakrifisio di reskate proveé dor di Hesukristu lo bira nesesario? Nò. E palabra “fundashon” ta ser tradusí for di un ekspreshon griego ku literalmente ta nifiká tiramentu abou di simia. Tabatin un “tiramentu abou di simia,” es desir, yu humano a ser konsebí, promé ku Adam ku Eva a peka? Nò. Ta despues di nan akto di desobedensia Adam ku Eva a prokreá yu. (Génesis 4:1) Pues, despues di e rebelion pero promé ku Adam ku Eva a konsebí yu, Yehova a predeterminá ku e “simia” lo presentá. Hesus su morto i resurekshon a perkurá pa e areglo amoroso di e reskate, mediante kua lo eliminá piká heredá i tur e obranan di Satanas.—Mateo 20:28; Hebreonan 2:14; 1 Juan 3:8.

11. Ki desaroyo Yehova a predeterminá den e realisashon di su propósito?

 ¹¹ Dios a predeterminá un otro desaroyo den e realisashon di su propósito. Loke Pablo a skirbi na e efesionan ta indiká esaki, esta, ku Dios lo “reuní huntu tur kos den Kristu, tantu loke ta den e shelunan komo loke ta riba tera.” Anto relashoná ku “loke ta den e shelunan,” es desir, e personanan skohí pa ta heredero huntu ku Kristu, Pablo a splika: “Nos a optené un herensia, siendo predestiná [“predeterminá,” NW] konforme e propósito di esun ku ta obra tur kos segun e konseho di su boluntat.” (Efesionan 1:10, 11) Sí, Yehova a determiná di antemano ku un kantidat limitá di hende lo forma un parti sekundario di e simia di Dios su muhé simbóliko i ku nan huntu ku Kristu lo duna humanidat e benefisionan di e reskate. (Romanonan 8:28-30, NW) Apòstel Pedro a referí na e hendenan aki komo “un nashon santu.” (1 Pedro 2:9) Apòstel Juan tabatin e privilegio di haña sa via un vishon e kantidat di persona ku lo bira ko-heredero huntu ku Kristu: 144.000. (Revelashon 7:4-8; 14:1, 3) Den union ku Kristu komo Rei, nan ta sirbi “pa e alabansa di [Dios] su gloria.”—Efesionan 1:12-14.

12. Kon nos por sa ku e personanan individual di e 144.000 no ta predestiná?

¹² E echo ku Yehova a predeterminá e kantidat di 144.000 hende no ta nifiká ku sierto personanan tabata predestiná pa sirbi Dios fielmente den e manera aki. De echo, e konseho- i spièrtamentunan ku tin den e Skritura Griego Kristian a ser skirbí prinsipalmente pa guia i fortalesé e ungínan pa nan por mantené integridat i tene nan mes digno di nan yamada selestial. (Filipensenan 2:12; 2 Tesalonisensenan 1:5, 11; 2 Pedro 1:10, 11) Yehova sa di antemano ku 144.000 persona lo kualifiká pa sirbi su propósito. Ken nan lo resultá di ta, ta dependé di e manera ku esnan invitá skohe pa hiba nan bida, i esei ta un desishon ku kada un di nan tin ku tuma personalmente.—Mateo 24:13.

Loke Yehova Sa di Antemano

13, 14. E manera ku Yehova ta usa su kapasidat di sa kos di antemano ta na armonia ku kiko, i dikon?

¹³ Siendo ku Yehova ta un Dios di profesia i propósito, kon e ta usa su kapasidat di sa kos di antemano? Pa kuminsá, nos tin sigur ku tur Dios su kamindanan ta berdadero, hustu i amoroso. Ora ku apòstel Pablo a skirbi e kristiannan hebreo di promé siglo di nos era, el a konfirmá ku Dios su huramentu i su promesa ta “dos kos inkambiabel, den kuanan ta imposibel pa Dios gaña.” (Hebreonan 6:17, 18) Den Pablo su karta na e disipel Tito, tambe el a ekspresá e pensamentu aki ora el a skirbi ku Dios “no por gaña.”—Tito 1:2.

¹⁴ Ademas, ounke Yehova su poder no tin límite, nunka e ta aktua inhustu. Moisés a deskribí Yehova komo “un Dios di fieldat i sin inhustisia, hustu i rekto e ta.” (Deuteronomio 32:4) Kiko ku Yehova hasi ta na armonia ku su personalidat maravioso. Su akshonnan ta manifestá e armonia perfekto di  su kualidatnan prinsipal di amor, sabiduria, hustisia i poder.

15, 16. Ki opshonnan Yehova a pone dilanti Adam den e hòfi di Edén?

¹⁵ Konsiderá kon Yehova su kualidatnan prinsipal a ser manifestá den e susesonan ku a tuma lugá den hòfi di Edén. Komo un Tata amoroso, Yehova a proveé tur loke e kriaturanan humano tabatin mester. El a krea Adam ku e kapasidat di pensa, di rasoná riba un asuntu i di yega na un konklushon. Distinto for di bestia, ku pa gran parti ta ser dirigí pa instinto, Adam tabatin e kapasidat di skohe. P’esei despues di a krea Adam, Dios a wak abou for di su trono selestial i a mira “tur loke el a traha, i ata, tur kos tabata masha bon.”—Génesis 1:26-31; 2 Pedro 2:12.

¹⁶ Ora ku Yehova a skohe pa duna Adam e mandamentu pa no kome di “e palu di konosementu di bon i malu,” El a proveé sufisiente instrukshon di manera ku Adam por a disidí kiko pa hasi. El a permití Adam kome for di “tur palu di e hòfi” ku eksepshon di un palu, i a spièrt’é di e resultadonan fatal di kome di e fruta di e palu prohibí. (Génesis 2:16, 17) El a splika Adam kiko lo ta e konsekuensianan di su akshon. Kiko Adam lo hasi?

17. Dikon nos por bisa ku Yehova ta selektivo den loke e ta skohe pa mira di antemano?

¹⁷ Yehova aparentemente a skohe pa no mira di antemano kiko Adam—i Eva—lo hasi, ounke ku e tabatin e kapasidat di por sa tur kos di antemano. P’esei e asuntu no ta si Yehova por mira futuro di antemano, sino si e ta skohe pa hasi esei. Ademas, nos por rasoná ku Yehova, siendo un Dios di amor, lo no a predeterminá konsientemente i kruelmente ku rebelion lo mester a tuma lugá, kompañá pa tur su konsekuensianan tristu. (Mateo 7:11; 1 Juan 4:8) Pues, Yehova ta selektivo den loke e ta skohe pa mira di antemano.

18. Dikon e echo ku Yehova ta selektivo den loke e ta skohe pa mira di antemano no ta indiká imperfekshon di su parti?

¹⁸ Akaso e echo ku Yehova ta selektivo den skohe loke e ta mira di antemano ta nifiká ku di un manera òf otro e ta imperfekto òf falta poder? Nò. Moisés a deskribí Yehova komo “e Baranka,” i a agregá: “Su obra ta perfekto.” No ta Yehova ta responsabel pa e konsekuensianan di piká humano. E efektonan desastroso ku nos tur ta eksperensiá awe a originá di Adam su akto inhustu di desobedensia. Apòstel Pablo a rasoná bon kla ku “dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.”—Deuteronomio 32:4, 5; Romanonan 5:12; Jeremias 10:23.

19. Ki preguntanan nos lo konsiderá den e siguiente artíkulo?

¹⁹ For di loke nos a trata te asina leu, nos a siña ku no tin inhustisia serka Yehova. (Salmo 33:5) Al kontrario, Yehova ta usa tur su kapasidat, kualidatnan moral i normanan na armonia ku su propósito. (Romanonan 8:28) Komo e Dios di profesia, Yehova ta “deklará e fin for di prinsipio, i for di tempunan antiguo, kosnan ku no a wòrdu hasí ainda.” (Isaias 46:9, 10) Tambe nos a mira ku e ta selektivo den usa su kapasidat di mira futuro di antemano. Pues anto, ki efekto esaki mester tin riba nos? Kon nos por hasi sigur ku nos desishonnan ta konforme Dios su propósito amoroso? I ki bendishonnan nos lo haña dor di hasi esei? E siguiente artíkulo lo trata e preguntanan aki.

[Nota]

Bo Por Splika?

• Ki ehèmpelnan di antigwedat ta konfirmá ku Dios su “palabra” semper ‘a alkansá su propósito’?

• Kiko Yehova a predeterminá en konekshon ku su “propósito eterno”?

• Den ki manera Yehova ta usa su kapasidat di mira futuro di antemano?

[Preguntanan di Estudio]

[Plachi na página 22]

Josafat tabatin konfiansa den Yehova

[Plachi na página 23]

Dios a predisí Hesus su morto i resurekshon

[Plachi na página 24]

Akaso Yehova a predeterminá loke Adam ku Eva lo hasi?