‘Bo Rekordatorionan Ta Mi Delisia’

“Tur loke a wòrdu skirbí promé ayá a wòrdu skirbí pa nos instrukshon.”—ROMANONAN 15:4.

1. Kon Yehova ta duna nos rekordatorio, i dikon nos tin mester di nan?

YEHOVA bes tras bes ta duna su pueblo rekordatorio pa yuda nan trata ku e preshonnan di e tempu difísil aki. Algun di e rekordatorionan aki ta bin dilanti durante nos lesamentu di Beibel personal, miéntras ku otro rekordatorionan kisas ta bin dilanti den forma di informashon òf komentario durante reunionnan kristian. Mayoria kos ku nos ta lesa òf tende na e okashonnan ei ta kosnan ku nos sa kaba. Probablemente nos a yega di konsiderá informashonnan similar kaba. Pero komo ku nos tin e tendensia di lubidá, nos kontinuamente tin ku refreská nos memoria relashoná ku Yehova su propósito-, lei- i instrukshonnan. Nos mester apresiá Dios su rekordatorionan. Nan ta enkurashá nos pasobra nan ta yuda nos enfoká riba e kosnan ku a motivá nos pa sigui un kurso di bida na armonia ku e boluntat di Dios. P’esei e salmista a kanta na Yehova: “Bo testimonionan [òf, “rekordatorionan,” NW] . . . ta mi delisia.”—Salmo 119:24.

2, 3. (a) Dikon Yehova a konserbá te den nos tempu e historia di bida di personahenan bíbliko? (b) Kua relatonan for di e Skritura nos lo trata den e artíkulo aki?

² Apesar ku e Palabra di Dios a ser skirbí hopi siglo pasá, e ta bibu i aktivo. (Hebreonan 4:12) E ta duna nos relatonan verídiko di e bida di personahenan bíbliko. Ounke ta asina ku kompará ku tempu bíbliko, kustumbernan i puntonan di bista a kambia hopi, e problemanan sí ku nos ta konfrontá ta hopi biaha similar na esnan ku e hendenan di e tempu ayá a konfrontá. Hopi di e relatonan ku Beibel a konserbá pa nos benefisio, ta duna nos ehèmpelnan konmovedor di personanan ku a stima Yehova i ku a sirbié fielmente apesar di sirkunstansianan desfaborabel. Otro relatonan ta hala atenshon na e tipo di kondukta ku Dios ta odia. Yehova a laga inkluí tur e relatonan personal aki den Beibel, tantu bon komo malu, pa rekordá nos di lèsnan importante. Apòstel Pablo a skirbi: “Tur loke a wòrdu skirbí promé ayá a wòrdu skirbí pa nos instrukshon, pa dor di perseveransia i e enkurashamentu di Skrituranan nos por tin speransa.”—Romanonan 15:4.

³ Laga nos enfoká riba tres relato den e Skritura: e relato di David su manera di trata ku Saul, esun di Ananias i Safira, i esun di Hosé su komportashon ku e esposa di Potifar. Kada un di e relatonan aki ta siña nos algun lès balioso.

Leal na e Areglonan di Dios

4, 5. (a) Ki situashon tabatin ku a enbolbé Rei Saul i David? (b) Kon David a reakshoná riba Saul su rabia kontra dje?

⁴ Rei Saul a resultá infiel na Yehova i no tabata digno di goberná riba Su pueblo. Pues, Dios a rechas’é i a manda profeta Samuel ungi David komo e futuro rei di Israel. Ora ku David a demostrá su abilidat i balentia ekstraordinario komo guerero i a wòrdu aklamá pa e pueblo, Saul a kuminsá mira David komo un rival. Vários biaha Saul a purba mat’é. Pero tur biaha David a sobrebibí e atakenan pasobra Yehova tabata kuné.—1 Samuel 18:6-12, 25; 19:10, 11.

 ⁵ Pa años, David a hañ’é obligá ta biba komo fugitivo. Ora ku David a haña un chèns pa mata Saul, su kompañeronan a urgié pa hasi esei, bisando ku ta Yehova a entregá David su enemigu den su man. Sin embargo, David tabata nenga di hasi esei. Su lealtat na Yehova i e rèspèt ku e tabatin pa Saul su posishon komo rei ungí di e pueblo di Dios a motiv’é pa aktua asina. No ta Yehova a nombra Saul komo rei di Israel? Wèl, Yehova lo kit’é tambe ora ku e haña ta bon. David a rasoná ku e no tabatin derecho di intervení. Despues ku David a hasi tur loke ku e tabata por bou di e sirkunstansianan ei pa suavisá Saul su rabia kontra dje, David a konkluí: “Siguramente SEÑOR lo dal é, òf su dia di muri lo yega, òf e lo bai den bataya i peresé. SEÑOR warda mi di saka mi man kontra SEÑOR su ungí”!—1 Samuel 24:3-15; 26:7-20.

6. Dikon ta importante pa nos konsiderá e historia di David i Saul?

⁶ E relato aki ta kontené un lès masha importante. Bo a yega di puntra bo mes dikon sierto problemanan ta surgi den e kongregashon kristian? Podisé tin un persona ta aktua den un manera ku no ta korekto. Su komportashon kisas no ta enbolbé malecho serio, pero e ta molestiá bo. Kon bo mester reakshoná? Motivá pa interes kristian den e persona ei i lealtat na Yehova, bo por disidí di papia kuné den un manera bondadoso, ku e meta di resolvé e asuntu. Pero kiko si e problema ta persistí? Despues ku bo a hasi tur loke rasonablemente bo por a hasi, lo bo tin ku laga e asuntu den man di Yehova. Esei ta loke David a hasi.

7. Den imitashon di David, kon nos mester reakshoná si nos ta eksperensiá inhustisia òf prehuisio?

⁷ Òf podisé bo ta konfrontá problemanan di inhustisia sosial òf di prehuisio religioso. Kisas no tin muchu kos ku bo por hasi tokante esei na e momentonan aki. Situashonnan asina por ta hopi difísil pa soportá, pero David su reakshon riba inhustisia ta siña nos un lès. E salmonan ku David a skirbi ta un registro konmovedor di su orashonnan sinsero na Dios pa ward’é di e garanan di Saul. Pero tambe nan ta registrá su lealtat na Yehova i su interes profundo pa Dios su nòmber sea glorifiká. (Salmo 18:1-6, 25-27, 30-32, 48-50; 57:1-11) David a keda leal na Yehova apesar ku Saul a sigui aktua na un manera inhustu pa hopi aña. Nos tambe mester keda fiel na Yehova i na su organisashon sin importá ki inhustisia nos ta sufri i sin importá kiko otro hende ta hasi. Nos por tin sigur ku Yehova ta plenamente konsiente di e situashon.—Salmo 86:2.

8. Kon Testigunan di Yehova na Mozambique a reakshoná ora ku nan lealtat na Yehova a ser poné na prueba?

⁸ Kristiannan na Mozambique ta un ehèmpel di nos tempu di personanan ku a pega fielmente na Yehova den tempu di prueba. Na 1984 nan pueblitonan kada bes tabata ser ataká pa miembronan armá di un movementu di resistensia ku tabata hòrta kos, kima kasnan i mata hende. Tabata parse ku e kristiannan berdadero aki no por a hasi kasi nada pa  defendé nan mes. E movementu militarisá tabata purba reklutá e habitantenan di e área òf obligá nan sostené e movementu den otro maneranan. Testigunan di Yehova a haña ku debí na nan posishon di neutralidat kristian nan no por a hasi esei. Komo ku nan a nenga di partisipá, e movementu a bira furioso riba nan. Nan a mata rònt di 30 Testigu di Yehova den e periodo turbulento ei, pero ni sikiera e menasa di morto no por a kibra e lealtat di Dios su pueblo. * Meskos ku David, nan a soportá inhustisia pero ku tempu nan a sali viktorioso.

Un Rekordatorio Ku Ta Sirbi Komo un Spièrtamentu

9, 10. (a) Kon nos por benefisiá di sierto ehèmpelnan den Beibel? (b) Kiko tabatin di malu den loke Ananias ku Safira a hasi?

⁹ Algun di e personanan menshoná den e Skritura ta sirbi komo rekordatorionan ku ta spièrta nos pa kondukta ku nos mester evitá. De echo, Beibel ta kontené hopi relato di personanan, asta algun sirbidó di Dios, ku a hasi loke ta malu i ku a sufri e konsekuensianan. (1 Korintionan 10:11) Un di e relatonan ei ta esun di Ananias i Safira, un pareha kasá ku tabata miembro di e kongregashon kristian di promé siglo na Yerusalèm.

¹⁰ Despues di Pentekòste di aña 33 di nos era, a surgi e nesesidat di perkurá materialmente pa e kreyentenan nobo ku a keda Yerusalèm pa benefisiá di asosiashon ku e apòstelnan. Algun miembro di e kongregashon a bende nan propiedat pa haña fondo pa kompartí ku otro ya asina ningun kristian mester a pasa nesesidat. (Echonan 2:41-45) Ananias ku Safira a bende un tereno i a trese solamente un parti di e benta pa e apòstelnan, pretendiendo ku nan donashon a representá tur e plaka ku nan a haña di e benta. Ta bèrdat ku Ananias ku Safira tabatin derecho di duna kuantu ku nan tabata ke, pero nan motivashon tabata robes, i nan a aktua na un manera desonesto. Nan kier a impreshoná e apòstelnan i e kongregashon, i nan kier a laga parse di ta hasi mas di loke en realidat nan a hasi. Apòstel Pedro, bou di inspirashon di spiritu santu, a desenmaskará nan desonestidat i hipokresia, i Yehova a mata nan.—Echonan 5:1-10.

11, 12. (a) Menshoná algun rekordatorio bíbliko tokante onestidat. (b) Ki benefisionan onestidat ta trese?

¹¹ Si un dia nos sinti e tentashon pa no papia bèrdat den un intento pa laga hende pensa  bon di nos, laga e historia di Ananias ku Safira sirbi komo un spièrtamentu serio. Kisas nos por gaña otro hende, pero nos no por gaña Yehova. (Hebreonan 4:13) Bes tras bes e Skritura ta konsehá nos pa nos ta onesto ku otro, pasobra lo no tin lugá pa ningun gañadó despues ku limpia e tera di inhustisia. (Proverbionan 14:2; Revelashon 21:8; 22:15) E motibu pa esaki mester ta bisto. E promotor di tur mentira ta ningun otro sino Satanas e Diabel.—Juan 8:44.

¹² Un bida onesto ta trese masha hopi benefisio. Entre nan, nos tin un konsenshi limpi i e satisfakshon di ku otro hende ta konfia nos. Den hopi kaso, kristiannan a haña trabou òf a keda ku nan trabou pasobra nan tabata onesto. Sin embargo, e benefisio di mas importante ta ku onestidat ta duna nos e chèns di forma amistat ku Dios Todopoderoso.—Salmo 15:1, 2.

Keda Moralmente Puru

13. Den ki situashon Hosé a haña su mes, i kon el a reakshoná?

¹³ Na edat di 17 aña nan a bende Hosé, un yu hòmber di patriarka Jakòb, komo katibu. Ku tempu el a bira parti di e famia di kas di Potifar, un ofisial egipsio, kaminda Hosé a kapta atenshon di e esposa di su doño. E muhé kier a tene relashon seksual ku Hosé, kende tabata un mucha hòmber ku bon tipo, i dia tras dia e tabata urgi Hosé: “Drumi ku mi.” Hosé tabata leu di su famia den un pais kaminda ningun hende no tabata konos’é. Fásilmente e por a tene relashon ku e muhé aki sin ku otro hende a sa di esei. Sin embargo, ora ku e esposa di Potifar finalmente a kue Hosé tene, Hosé a hui bai.—Génesis 37:2, 18-28; 39:1-12.

14, 15. (a) Dikon e historia di Hosé ta importante pa nos? (b) Dikon un ruman muhé kristian ta gradisidu ku el a hasi kaso di Dios su rekordatorionan?

¹⁴ Hosé a lanta den un famia temeroso di Dios, i e tabata sa ku relashon seksual entre hende ku no ta kasá ku otro ta malu. El a puntra: “Kon anto mi por hasi e maldat grandi aki i peka kontra Dios?” Probablemente el a yega na e konklushon ei pasobra el a kòrda riba e norma ku Dios a pone pa hende den e hòfi di Edén: monogamia, esta, un solo esposa pa un solo esposo. (Génesis 2:24) Dios su pueblo djawe por benefisiá si nan reflekshoná riba e manera ku Hosé a reakshoná den e situashon ei. Na algun lugá, hende su aktitut pa ku relashon seksual ta asina permisivo ku otro hóbennan ta hasi bofon di esnan ku ta nenga di enbolbé nan mes den inmoralidat. Relashon seksual pafó di matrimonio entre adultonan ta komun. Pues, e relato di Hosé ta un rekordatorio oportuno pa nos. Te ainda Dios su  norma ta ku fornikashon i adulterio ta piká. (Hebreonan 13:4) Hopi hende ku a kai pa e preshon pa partisipá den relashon seksual ilísito ta di akuerdo ku tin motibunan konvinsente pa no hasi esei. Entre e resultadonan indeseabel por tin e sintimentu di humiashon, un mal konsenshi, yalusí, embaraso i malesa transmití seksualmente. Manera e Skritura ta rekordá nos, un persona ku praktiká fornikashon ta “peka kontra su mes kurpa.”—1 Korintionan 5:9-12; 6:18; Proverbionan 6:23-29, 32.

¹⁵ Jenny, * un Testigu di Yehova soltera, tin motibu pa apresiá Dios su rekordatorionan. Na trabou tabatin un kolega ku bon tipo ta tira riba dje. Ora ku Jenny no a reakshoná, e hòmber a kuminsá mustr’é mas atenshon. Jenny a atmití: “Mi tabatin ku lucha pa keda moralmente puru, ya ku bo ta sinti bo bon ora ku un persona di e sekso opuesto ta tuma nota di bo.” Sin embargo, el a bin realisá ku e hòmber simplemente tabata purba agregá su nòmber na e lista di hende muhé ku el a drumi kuné. Ora ku Jenny a sinti ku su determinashon pa resistí tabata debilitá, el a roga Yehova pa yud’é keda fiel na dje. Jenny a haña ku e kosnan ku el a siña segun ku el a hasi investigashon den Beibel i den publikashonnan kristian tabata manera rekordatorionan ku a stimul’é pa keda alerta. Un di e rekordatorionan ei tabata e historia di Hosé i e esposa di Potifar. Jenny a konkluí: “Tanten ku mi keda rekordá mi mes kuantu mi ta stima Yehova, mi no tin ku tene miedu ku lo mi kometé e gran maldat aki i peka kontra dje.”

Hasi Kaso di Dios Su Rekordatorionan!

16. Kon nos por benefisiá di repasá i meditá riba e bida di personanan menshoná den Beibel?

¹⁶ Nos tur por oumentá nos apresio pa e normanan di Yehova dor di purba komprondé dikon el a preservá sierto relatonan den e Skritura pa nos. Kiko nan ta siña nos? Ki kualidatnan òf tendensianan ku e personahenan bíbliko a demostrá nos tin ku imitá òf evitá? Literalmente sentenáres di persona ta aparesé den e páginanan di e Palabra di Dios. Lo ta bon pa tur hende ku ta stima instrukshon divino kultivá e deseo pa haña e sabiduria ku ta duna bida, i esei ta inkluí e lèsnan ku nos por siña for di e ehèmpelnan ku Yehova a preservá pa nos kuidadosamente. Hopi biaha e revista aki mes a presentá artíkulonan tokante e tipo di personanan ei kende nan historia di bida tin algu di siña nos. Pakiko bo no ta tuma tempu pa repasá e artíkulonan ei?

17. Kiko abo ta pensa di Yehova su rekordatorionan, i dikon?

¹⁷ Nos por ta hopi gradisidu pa e interes amoroso ku Yehova ta desplegá na hende ku ta hasi esfuerso pa kumpli ku su boluntat! Nos siguramente no ta perfekto, meskos ku e hòmbernan i muhénan menshoná den Beibel no tabata perfekto. Sin embargo, e registro ku tin di nan akshonnan ta un rekurso sumamente balioso pa nos. Hasiendo kaso di Yehova su rekordatorionan, nos por evitá di kometé erornan serio, i nos por imitá e ekselente ehèmpel di esnan ku a kana den e kamindanan di hustisia. Si nos hasi asina, nos lo por kanta huntu ku e salmista: “Bendishoná ta esnan ku ta warda [Yehova] su testimonionan [“rekordatorionan,” NW], ku ta busk’é ku henter nan kurason; mi alma ta warda bo testimonionan [“rekordatorionan,” NW], i mi ta stima nan masha hopi mes.”—Salmo 119:2, 167.

[Nota]

Kon Lo Bo Kontestá?

• Kiko nos por siña for di David su aktitut pa ku Saul?

• Kiko e relato di Ananias ku Safira ta siña nos?

• Dikon e historia di bida di Hosé ta importante foral pa nos awe?

[Preguntanan di Estudio]

[Plachi na página 26]

Dikon David a nenga di laga nan mata Saul?

[Plachi na página 27]

Kiko nos ta siña for di e relato di Ananias ku Safira?

[Plachi na página 28]

Kiko a pone Hosé rechasá proposishonnan inmoral?