Kon Felis Bo Ta?

KISAS en bèrdat bo ta puntra bo mes: ‘Kon felis mi ta?’ Sosiólogonan ta hasiendo hopi esfuerso pa purba saka afó kon abo òf otro hende lo kontestá, pero nan tarea no ta nada fásil. Meskos ku bo no por midi e amor ku un hòmber tin pa su esposa òf e kantidat di tristesa ku un morto ta kousa den famia, asina bo no por midi e felisidat ku un persona ta sinti. Emoshon no ta un kos ku bo por kuantifiká. Sin embargo, sientífikonan ta rekonosé un bèrdat básiko sí: Tur ser humano tin e potensial pa ta felis.

Apesar ku hende a nase ku e potensial pa ta felis, problemanan serio ta pone ku awe ta reina un gran infelisidat. Por ehèmpel, den algun stat, víktimanan di AIDS a yena santananan. Outoridatnan ta permití pa bolbe habri e grafnan mas bieu pa traha lugá pa dera esnan ku a muri resientemente. Na algun parti di Afrika, hopi hende ta gana nan pan di kada dia ku trahamentu di kaha di morto. I unda ku bo bira, bo ta mira hopi kara tristu di hende ku ta sufri di enfermedat serio i di esnan ku a pèrdè famia i amigu den morto.

Kiko di paisnan mas próspero? Kambio di sirkunstansia inesperá por pone hende ku no ta prepará pèrdè nan siguridat finansiero di un dia pa otro. Na Merka, hopi penshonado mester a bai traha bèk pasobra nan a pèrdè parti di nan penshon. Hopi bes gastunan médiko ta kaba ku tur loke un famia a spar. Un konsehero hurídiko a bisa: “Bo ta bira tristu ora bo ta mira e hendenan aki kana drenta ku gastunan enorme i yen di problema ku salú. Hopi biaha bo ta haña bo ta bisa nan: ‘Boso ta bai pèrdè boso kas.’” Pero kiko di hende ku no tin preokupashon finansiero? Nan tambe lo por ta infelis?

Tin hende ta manera e famoso kompositor Richard Rodgers. Nan a bisa di dje: “Masha poko hende a yega di duna asina tantu deleite na asina tantu hende.” Pero maske su kantikanan a deleitá otro hende, e tabata sufri di depreshon króniko. El a alkansá e dos metanan ku hopi hende ta ambishoná, esta, plaka i fama. Pero e tabata felis? Un persona ku a skirbi su biografia a remarká: “[Rodgers] a bira sumamente eksitoso den su trabou, el a hiba un bida di luho i dos biaha el a gana e Premionan di Pulitzer huntu ku su partner. Pero hopi biaha tambe e tabata infelis i deprimí.”

Manera bo por a ripará, ora hende dependé di rikesa pa haña felisidat, hopi bes nan ta keda desilushoná. Un reportero di invershon pa e korant The Globe and Mail di Toronto, Canada, a deskribí e “soledat i bashí” ku hopi hende riku ta sinti. Segun un konsehero finansiero, ora mayornan riku ta malkriá nan yunan ku hopi plaka i e kosnan ku plaka por kumpra, “mayoria bes nan ta sembra e simianan di miseria pa futuro.”

 Tin un Base Sólido pa Felisidat?

Pa un mata floria, e mester haña bon tera, awa i un klima apropiá. Meskos tambe, investigadónan ta rekonosé ku sierto kondishonnan di bida ta kontribuí na felisidat. Esakinan ta inkluí un salú satisfaktorio, bon trabou, sufisiente kuminda, dak riba kabes, paña pa bisti, logronan di deseonan kreativo i berdadero amigu.

Probablemente bo ta di akuerdo ku e kondishonnan ei por yuda hasi hende felis. Pero tin un faktor ku ta mas importante. Esei ta konosementu di “e Dios felis,” kende su nòmber ta Yehova. (1 Timoteo 1:11, NW) Kon e konosementu ei ta yuda? Yehova ta nos Kreadó, i el a duna nos e potensial pa ta felis. Ta lógiko anto ku e sa kiko por hasi nos berdaderamente felis. E siguiente artíkulo ta deskribí kon e ta dirigí hende di tur parti di mundu òf sirkunstansia di bida na felisidat duradero.

[Plachi na página 4]

Meskos ku un mata di flor, felisidat mester haña e kondishonnan adekuá pa e por krese

[Rekonosementu pa Potrèt na página 3]

© Gideon Mendel/CORBIS