Pregunta di Lektor

Kiko Hesus tabata ke men ora el a bisa Nikodemo: “Ni un hende no a subi na shelu, sino esun ku a baha for di shelu, esta, e Yu di hende”?—Juan 3:13.

E tempu ei Hesus tabata riba tera, i e no a subi na shelu òf bai shelu bèk ainda. Sin embargo, loke nos sa tokante Hesus i e konteksto di su palabranan por yuda nos komprondé kiko e tabata ke men.

Hesus “a baha for di shelu” den e sentido ku promé e tabata biba den e region di spiritu huntu ku su Tata. Pero na e tempu stipulá, Dios a transferí e bida di su Yu pa e matris di Maria, i asina Hesus a nase komo hende. (Lukas 1:30-35; Galationan 4:4; Hebreonan 2:9, 14, 17) Hesus lo a ser resusitá despues di su morto komo un kriatura spiritual i bolbe bèk serka Yehova. P’esei poko promé ku nan a mata Hesus, e por a pidi den orashon: “Glorifiká mi serka bo mes, Tata, ku e gloria ku mi tabatin serka bo promé ku mundu tabata.”—Juan 17:5; Romanonan 6:4, 9; Hebreonan 9:24; 1 Pedro 3:18.

Ora ku Hesus tabata papia ku Nikodemo, un fariseo i maestro den Israel, Hesus no a bai shelu bèk ainda. Naturalmente, no tabatin ningun otro hende ku a muri i subi na shelu, ke men na e region di spiritu. Hesus mes a deklará ku Juan Boutista tabata sin igual entre e profetanan di Dios, pero tòg “esun di mas chikitu den e reino di shelu ta mas grandi kuné.” (Mateo 11:11) Anto apòstel Pedro a splika ku asta fiel Rei David a muri i tabata ainda den su tumba; David no a subi na shelu. (Echonan 2:29, 34) Tabatin un motibu pakiko, personanan ku a muri promé ku Hesus, manera por ehèmpel David, Juan Boutista i otro hòmbernan di fe, no a bai shelu. Nan a muri promé ku Hesus a inougurá e kaminda òf posibilidat pa hende ser resusitá pa bida selestial. Apòstel Pablo a skirbi ku Hesus ‘a bai nan dilanti’ pa ‘inougurá un kaminda nobo i bibu’ den shelu.—Hebreonan 6:19, 20; 9:24; 10:19, 20.

Ya ku Hesus no a muri i ser resusitá ainda, kiko e tabata ke men ora el a bisa Nikodemo: “Ni un hende no a subi na shelu, sino esun ku a baha for di shelu, esta, e Yu di hende”? (Juan 3:13) Ban wak e konteksto, esta, e loke Hesus tabata papia over di dje ku Nikodemo.

Ora ku e gobernante hudiu ei a bin serka Hesus den skuridat di anochi, Hesus a bis’é: “Di bèrdat, di bèrdat, mi ta bisa bo, si un hende no nase di nobo, e no por mira e reino di Dios.” (Juan 3:3) Nikodemo a puntra e ora ei: ‘Kon esei por ta? Kon un hende por nase pa di dos biaha?’ E no a komprondé e siñansa divino aki tokante drentamentu den e Reino di Dios. Akaso tabatin un manera ku lo e por a siña tokante esaki? Wèl, no a base di loke hende sa; ningun hende lo por a siñ’é tokante esei pasobra ningun di nan no a yega di bai shelu i pues no por a splika nada tokante kon pa drenta den e Reino. E úniko eksepshon tabata Hesus. É por a siña Nikodemo i otro hende pasobra é sí a baha for di shelu i tabata kualifiká pa siña hende tokante e kosnan ei.

Pues e pregunta basá riba e teksto aki ta ilustrá un punto balioso relashoná ku studiamentu di e Palabra di Dios. No ta rasonabel pa duda di un pasashi bíbliko djis pasobra e ta parse difísil pa komprondé. Nos mester mira loke Beibel ta bisa den un sierto pasashi den lus di otro pasashinan i e mester ta na armonia ku nan. Ademas, hopi biaha e konteksto, es desir, e situashon ku tabata reina òf e tópiko bou di diskushon, por yuda nos haña e nifikashon rasonabel i lógiko di un pasashi ku nos no por komprondé.