Sí, Bo Por Haña Felisidat

TIN biaha ta difísil pa haña felisidat, esta, felisidat berdadero i permanente. E motibu prinsipal di esaki ta pasobra hopi hende, den nan afan pa haña felisidat, ta buska den e direkshon robes. Tur loke nan tin mester ta un amigu di konfiansa i kompetente ku lo por mustra nan e fuente korekto!

Beibel ta e fuente di e guia nesesario ei. Tuma por ehèmpel djis un di su bukinan, ku ta Salmonan. E buki aki ta un kolekshon di 150 kantika sagrado dirigí na Yehova Dios, di kua Rei David di Israel di antigwedat a komponé mas o ménos mitar. Ounke ta bon pa sa ken e eskritor tabata, ta mas importante pa sa ku e buki aki a ser skirbí bou di inspirashon di e Amigu di mas grandi di humanidat, ku ta Yehova. Nos por ta sigur anto ku e ta kontené guia divino pa nos benefisio i ku e ta mustra kua ta e kaminda ku ta hiba na felisidat.

E eskritornan di e Salmonan tabata konvensí ku un persona su felisidat ta dependé di su relashon saludabel ku Dios. E salmista a skirbi: “Bendishoná [“Felis,” NW] ta e hende ku ta teme SEÑOR.” (Salmo 112:1) Ningun relashon humano, ningun poseshon material ni ningun logro personal por trese e felisidat ku hende ta haña dor ku nan ta pertenesé na ‘e pueblo ku su Dios ta Yehova!’ (Salmo 144:15) Bida di vários sirbidó di Yehova di nos tempu ta konfirmá esaki.

Susanne, den su 40’i piku aña, mes ta un ehèmpel. * El a bisa: “Awe, hopi hende ta djòin sierto gruponan pa logra metanan komun òf pasobra nan tin interesnan komun. Sin embargo, rara bes nan ta mira tur otro hende den e grupo komo nan amigu. Den e pueblo di Yehova sí kosnan ta diferente. Nos amor pa Yehova ta pone ku nos tin kariño pa otro. Nos ta sinti nos kómodo den e pueblo di Yehova, sin importá na ki parti di mundu nos  ta. E unidat aki ta enrikesé nos bida enormemente. Ken mas por bisa ku nan tin amigu di nivel sosial i kustumbernan totalmente distinto i di asina tantu diferente nashonalidat? Mi por bisa di henter mi kurason ku, komo parti di e pueblo di Yehova, mi ta felis.”

Maree, kende a nase na Eskosia, tambe a siña ku un bon relashon ku Yehova ta masha importante pa haña felisidat. El a konta: “Promé ku mi a siña e bèrdat di Beibel, mi tabata gusta wak pelíkulanan di horor. Pero anochi mi no por a pega soño sin un krus den mi man pa kore ku e zumbi- i vampironan, riba kua hopi di e pelíkulanan tabata basá. Pero unabes mi a siña e bèrdat i a stòp di wak e pelíkulanan ei, mi relashon ku Yehova a hasi posibel ku mi por bai drumi sin miedu, felis di ta sirbi un Dios mas poderoso ku demoñonan òf vampironan di fantasia.”

Konfiansa den Yehova Ta Hiba na Felisidat

Nos no tin motibu pa duda ku e Kreadó ta todopoderoso i ku su sabiduria no tin límite. David tabata sa ku e por tabatin konfiansa kompletu den Yehova i ku e por a buska refugio den dje, p’esei el a skirbi: ‘Felis ta e hende ku ta pone su konfiansa den Yehova.’—Salmo 40:4.

Maria a bisa: “E eksperensia ku mi a haña na Spaña i otro kaminda a siña mi ku ora nos hasi kosnan manera Yehova ke, maske nos sintimentu- i emoshonnan por inkliná nos pa hasi nan otro manera, nos ta haña e mihó resultadonan posibel. Esaki ta resultá den felisidat pasobra e kaminda di Yehova ta semper esun di mihó.”

Andreas, un ansiano kristian ku a sirbi den vários pais europeo, tambe sa di eksperensia personal ku nos por pone nos konfiansa den Yehova. El a bisa: “Mi ruman mayó, kende no tin mesun religion ku mi, tabatin un influensia grandi riba mi durante mi hubentut. El a enkurashá mi pa sigui un karera ku finansieramente lo a duna mi hopi satisfakshon. P’esei el a keda sumamente desapuntá ora mi a kuminsá ku e sirbishi di tempu kompletu, i no a dependé riba e asina yamá siguridat ku areglonan di penshon di e mundu aki ta ofresé. Durante mi sirbishi di tempu kompletu, nunka mi a pasa nesesidat, i mi a haña bendishonnan ku otro hende solamente por a soña kuné.”

Na 1993, Felix a haña un invitashon pa yuda ku e trabounan pa amplia e fasilidatnan di e sukursal di Testigunan di Yehova na Selters, Alemania. Unabes e trabou a finalisá, nan a invit’é  pa bira miembro permanente di e famia di Bètel einan. Kon el a reakshoná? E di: “Mi a aseptá e invitashon ku sierto reserva. Pero awor mi tin kasi dies aña aki kaba, i mi ta konvensí ku Yehova a kontestá mi orashonnan. E sa kiko ta mihó pa mi. Dor di pone tur mi konfiansa den dje i lag’é dirigí mi, mi ta dun’é oportunidat pa e mustra mi kiko e ke pa mi hasi.”

Susanne, menshoná anteriormente, kier a sirbi komo un predikadó di tempu kompletu, un pionero, pero e tabatin problema pa haña un trabou part-time. Despues ku el a warda un aña pa haña algu di hasi, el a aktua ku konfiansa den Yehova. El a konta: “Mi a entregá mi solisitut pa sirbi komo pionero regular. Mi a spar sufisiente pa paga mi gastunan normal pa mas o ménos un luna. I esta un luna eksitante esei a resultá di ta! Mi sirbishi tabata un fuente di hopi goso, pero pa loke ta trabou, mi tabatin vários entrevista ku no a duna resultado. Sin embargo, manera Yehova a primintí, e no a laga mi na kaya. Riba e último dia di luna, mi por a firma un kontrakt pa un trabou. Awor mi tabata sa ku mi por a ègt konfia den Yehova! E promé eksperensia aki den e sirbishi di tempu kompletu a yuda mi haña un bida felis i yen di satisfakshon.”

Konseho di Dios Ta Kontribuí na Felisidat

Rei David a kometé algun fayo serio. P’esei tin biaha, e tabatin mester di konseho sabí. Nos ta mes dispuesto ku David pa aseptá konseho i instrukshon?

Un biaha, Aida, di Fransia, a realisá ku el a kometé un fayo serio. El a konta: “Mi preokupashon prinsipal tabata pa drecha mi relashon ku Yehova. Nada otro no a preokupá mi.” El a bai buska yudansa serka ansianonan kristian. Despues ku el a sirbi pa mas ku 14 aña den e ministerio di tempu kompletu, e ta bisa awor: “Mi ta hopi kontentu ku Yehova a pordoná mi mi eror!”

Si nos ta dispuesto pa aseptá konseho di Dios, nos no ta kometé fayo fásilmente. Judith a splika: “Tempu ku mi tabatin 20 aña, mi tabata gusta un sosio komersial aleman kende a hasi tur loke e tabata por pa impreshoná mi. E tabata un hòmber respetá, ku un karera briante, pero e tabata kasá kaba! Mi a realisá ku mi tabatin ku skohe entre sea obedesé e leinan di Yehova òf bira lomba pa Dios kompletamente. Mi a konfia mi mayornan e asuntu. Mi tata tabata stret ora el a rekordá mi loke Yehova a ferwagt di mi. El a papia hopi franko ku mi—nèt loke mi tabatin mester! Tòg mi a purba di buska un hustifikashon. Pa vários siman mi mama a pasa anochinan largu papiando ku mi tokante kon importante e leinan di Dios ta i kon nan por protehá nos bida. Mi ta sumamente gradisidu ku di kurason mi a kuminsá sinti mi atraí na Yehova. Su disiplina i su siñansa a duna mi hopi felisidat: añanan largu di satisfakshon den e sirbishi di tempu kompletu i un ekselente esposo kristian, ku ta stima mi i ku ta stima Yehova di henter su kurason.”

E eksperensianan aki ta enfatisá bon kla anto e bèrdat i importansia di e palabranan di David: “Felis ta esun ku su eror ta pordoná, kende su piká ta tapá. Felis ta e hende ku SEÑOR no ta tuma su krímen na kuenta.”—Salmo 32:1, 2, BPK.

Hende Ku Ta Mustra Konsiderashon na Otro Ta Haña Felisidat

David a skirbi: ‘Felis ta esun ku ta kòrda riba e pobernan.’ El a kontinuá: ‘Yehova lo libr’é den e dia di angustia. Yehova lo proteh’é i ten’é na bida, i e lo wòrdu yamá felis.’ (Salmo 41:1, 2) E konsiderashon amoroso ku David a mustra na Mefi-boset, e yu koho di Jonatan, David su amigu stimá, ta un ehèmpel di e aktitut korekto ku nos mester tin pa ku hende pober òf di kondishon humilde.—2 Samuel 9:1-13.

Marlies, kende a sirbi komo misionero pa 47 aña, tin e privilegio di prediká na hende ku a haña nan ta hui for di e áreanan di krísis di Afrika, Asia i Ost Europa. El a bisa: “Nan tin tur tipo di problema, i por lo general nan ta sinti ku nan no ta ser aseptá kompletamente i ku asta  nan ta ser diskriminá. Semper ora bo ta yuda hende asina e ta hasi bo felis.”

Marina, kende tin 40’i piku aña, a skirbi: “Komo soltera, mi sa kiko ke men ora otro hende ta mustra interes den bo. Esaki ta impulsá mi pa animá otro hende dor di yama nan òf skirbi nan karta. Hopi a ekspresá nan apresio. E echo ku mi por yuda otro hende ta duna mi goso.”

Dimitar, di 20’i piku aña, a bisa: “Mi a mama a lanta mi su so. Tempu ku mi tabata mucha, mi tabata kontentu di por tabatin un superintendente di Estudio di Buki di Kongregashon ku tabata bai ku mi tur siman den sirbishi pa entrená mi. Te awe mi ta gradisidu pa su persistensia. Mi sa ku no tabata semper fásil pa motivá mi.” Komo muestra di gratitut pa e yudansa ku Dimitar a risibí un tempu, awor é ta yuda otronan: “Mi ta purba sali den sirbishi di vèlt ku un hóben i tambe ku un ruman di edat avansá por lo ménos un biaha pa luna.”

E buki di Salmonan ta menshoná tambe otro kosnan ku ta hasi hende felis. Un di nan ta e importansia di konfia riba e forsa ku Yehova ta duna bo i no riba esun di bo mes: ‘Felis ta e hende, kende su fortalesa ta den Yehova.’—Salmo 84:5.

Corinna por konta di esaki. El a muda bai un pais kaminda tabatin un nesesidat grandi den e trabou di prediká. “Mi a haña mi ku un idioma nobo, un kultura nobo i un manera nobo di pensa. Mi a sinti komo si fuera mi tabata riba un otro planeta. E idea so di prediká den un ambiente straño a duna mi hopi nèrvio. Mi a pidi Yehova yuda mi i, ku e forsa ku el a duna mi, mi por a prediká henter dia den un teritorio isolá. Ku tempu, esaki a bira masha normal. Mi a kuminsá hopi estudio di Beibel, i ainda mi ta benefisiando di e eksperensia aki. Mi a siña ku asta e opstákulonan ku aparentemente ta insuperabel nos por vense ku e forsa di Yehova.”

Sí, vários faktor ta kontribuí na felisidat. Nan ta entre otro, kultivá amistat ku Dios i ku su pueblo, konfia plenamente den Yehova, aseptá su konseho i mustra konsiderashon na otro hende. Si nos kana den e kamindanan di Yehova i obedesé su leinan, nos por haña su aprobashon i esei ta hasi nos felis.—Salmo 89:15; 106:3; 112:1; 128:1, 2.

[Nota]

[Plachi na página 12]

Maria

[Plachi na página 13]

Maree

[Plachi na página 13]

Susanne i Andreas

[Plachi na página 15]

Corinna

[Plachi na página 15]

Dimitar