Un Lès Tokante Orguyo i Humildat

UN INSIDENTE den e bida di Rei David ta resaltá e diferensia entre berdadero humildat i orguyo. Esei a sosodé despues ku David a konkistá Yerusalèm i a hasié su siudat kapital. David a konsiderá Yehova komo e berdadero Rei di Israel, p’esei el a hasi areglo pa trese e Arka—ku a simbolisá Dios su presensia—den e stat. E okashon aki tabata asina importante pa David ku el a demostrá su goso abiertamente segun ku e tabata kana tras di e saserdotenan ku a karga e Arka. E habitantenan di Yerusalèm a mira nan rei “ta bula” i “baila . . . ku tur su forsa.”—1 Krónikanan 15:15, 16, 29; 2 Samuel 6:11-16.

Sin embargo, David su kasá, Mikal, sí no a partisipá den e proseshon alegre ei. El a wak e proseshon for di un bentana, i en bes di atmirá David su manera di ekspresá alabansa na Yehova, el a kuminsá “despresi’é den su kurason.” (2 Samuel 6:16) Dikon Mikal a reakshoná asina? Evidentemente, el a duna demasiado importansia na su posishon komo yu muhé di e promé rei di Israel, Saul, i awor komo esposa di e segundo rei di Israel. Podisé el a sinti ku su kasá, siendo rei, no mester a rebahá su mes na nivel di e pueblo komun i partisipá den nan forma di selebrá. E sintimentunan di orguyo ei tabata bisto den e manera ku el a kumindá David ora esaki a yega kas. Na un manera sarkástiko Mikal a bisa: “Esta bunita e rei di Israel a distinguí su mes awe! El a eksponé su mes awe den bista di e kriánan di su sirbidónan, manera un hende vulgar ta eksponé su mes sin ni un tiki di bèrgwensa!”—2 Samuel 6:20.

Kon David a reakshoná riba e krítika aki? David a skual Mikal dor di deklará ku Yehova a rechasá Mikal su tata, Saul, i a skohe David na su lugá. David a agregá: “Lo mi ta mas despresiá ainda ku esaki i lo mi ta humilde den mi mes bista; ma serka e kriánan di kendenan bo a papia, serka nan lo mi ta distinguí.”—2 Samuel 6:21, 22.

Sí, David tabata determiná pa sigui sirbi Yehova ku humildat. E aktitut aki ta yuda nos komprondé dikon Yehova a yama David “un hòmber konforme mi kurason.” (Echonan 13:22; 1 Samuel 13:14) De echo, David tabata imitando e mihó ehèmpel di humildat, esta, e ehèmpel di Yehova Dios mes. Un punto interesante ta ku e ekspreshon ku David a usa ora el a bisa Mikal, “lo mi ta humilde” ta bin di un verbo básiko na hebreo ku tambe ta ser usá pa deskribí Dios su propio punto di bista di humanidat. Ounke Yehova ta e Persona mas importante den universo, Salmo 113:6 i 7 ta deskribié komo esun ‘kende ta humiá su mes [baha for di su posishon òf dignidat pa trata un persona ku tin un posishon inferior] pa mira e kosnan ku ta den shelu i riba tera; e ta lanta hende pober for di stòf, i ta lanta esnan den nesesidat for di e lugá di benta sushi.’

Komo ku Yehova ta humilde, no ta straño ku e ta odia e “wowonan altanero” di hende orguyoso. (Proverbionan 6:16, 17) Komo ku Mikal a desplegá e karakterístika malbado aki i a falta rèspèt pa e persona ku Dios a skohe komo rei, el a pèrdè e privilegio di haña un yu hòmber di David. El a muri sin haña ni un yu. Ki un lès importante esaki ta pa nos! Ken ku ta deseá Dios su aprobashon tin ku apliká e palabranan aki: “Bisti boso mes ku humildat pa ku otro, pasobra ‘Dios ta resistí e orguyosonan, ma ta duna grasia na e humildenan.’”—1 Pedro 5:5.