“E Mihó Final Ku Mi Por A Imaginá”

UN DOSENTE di un skol sekundario na Spaña a skirbi: “Testigunan di Yehova tin mas ku shen aña ta demostrá berdadero solidaridat, onrades intachabel i, mas ku tur kos, un fe indestruktibel.” Kiko a motivá e dosente aki, ku ta claim di ta ateo, pa hasi un deklarashon asina?

Tur kos a kuminsá ora ku Noemí, un mucha muhé Testigu di Yehova i alumno di skol sekundario, a haña komo tarea pa skirbi un òpstèl komo parti di su eksamen final. El a disidí di desaroyá e tema “E Triángulonan Püs bou di Dominio Nazi.”

Dikon el a skohe e tema ei? Noemí a splika: “Komo ku un dosente lo a supervisá mi trabou, mi a pensa ku lo mi por probechá di e oportunidat aki pa dun’é un testimonio. E relato di e manera ku Testigunan di Yehova den Alemania nazi a keda fiel na nan prinsipionan a konmové mi kurason. Mi tabatin sigur ku lo e impreshoná otro hende tambe.”

Noemí su òpstèl tabatin un impakto riba hopi mas tantu hende ku lo e por a imaginá. Dia 5 di òktober 2002, su òpstèl a haña un premio den un kompetensia nashonal riba tereno di investigashon sientífiko i tópikonan relashoná ku humanidat. Un hurado ku ta konsistí di 20 akadémiko for di universidatnan spañó prominente ta saka e premionan di e kompetensia ei.

Noemí a risibí su premio for di man di Pilar del Castillo, minister di enseñansa di Spaña. Noemí a probechá di e oportunidat pa duna e minister un ehemplar di e vidiokasèt Testigunan di Yehova Ta Para Firme Kontra Atake Nazi. E minister gustosamente a aseptá e regalo.

Na Manresa, Noemí su pueblo natal, e korant lokal a hala atenshon na Noemí su logro akadémiko i a repasá e kontenido di su òpstèl. Ademas, e kabes di su skol a pidié un kopia di su òpstèl afin di inkluyé den un programa pa konmemorá e di 75 aniversario di e skol sekundario.

Noemí a bisa: “Esaki ta e mihó final ku mi por a imaginá pa mi estudio na skol sekundario. Mi a keda superkontentu ora ku mi a lesa e palabranan aki ku mi dosente, Sr. Jorge Tomás Calot, a skirbi komo parti di su introdukshon di mi informe:

‘Mi ta ateo, pero lo mi tin gana di ta apsolutamente konvensí di e eksistensia di e Ser Supremo aki ku ta inspirá den su adoradónan e “amor pa próhimo” di mas outéntiko.’”