Hóbennan, Skohe pa Sirbi Yehova

‘Skohe pa boso mes awe ken boso lo sirbi.’—JOSUÉ 24:15.

1, 2. Kristiandat a práktika ki formanan robes di boutismo?

“LAGA [muchanan] bira kristian ora ku nan tin sufisiente tinu pa por siña konosé Kristu.” Un eskritor ku yama Tertuliano a skirbi e palabranan ei na fin di siglo 2 di nos era. E tabata protestando kontra boutismo di beibi, un práktika ku a kuminsá bira un kustumber den kristianismo apóstata di su tempu. Agustin, un di e tatanan di iglesia, kontradisiendo Tertuliano i Beibel, tabata pretendé ku boutismo ta kita e mancha di piká original i ku beibinan ku muri sin ta batisá ta ser kondená na fièrnu di kandela. E kreensia ei a promové e kustumber di batisá beibi mas lihé posibel despues ku nan nase.

² Hopi religion tradishonal di kristiandat te ainda ta batisá beibi resien nasí. Ademas, atraves di historia, gobernante- i lidernan religioso di nashonnan asina yamá kristian tabatin e kustumber di tene boutismo obligatorio di “paganonan” konkistá. Pero boutismo di beibi i boutismo obligatorio di hende adulto no ta basá riba Beibel.

Awe Dedikashon No Ta Outomátikamente

3, 4. Kiko por yuda yunan di mayornan dediká na Dios hasi un dedikashon boluntario?

³ Beibel ta mustra ku Dios ta konsiderá ku yu chikitu ta santu ora ku maske ta un di nan mayornan so ta un fiel kristian. (1 Korintionan 7:14) Pero, esaki ta hasi e muchanan ei sirbidó dediká di Yehova? Nò. Sin embargo, muchanan ku ser kriá pa mayornan dediká na Yehova ta haña entrenamentu ku por hiba e muchanan ei na hasi un dedikashon boluntario na Yehova. Rei sabí Salomon a skirbi: “Mi yu, warda e mandamentu  di bo tata, i no bandoná e siñansa di bo mama . . . Ora bo ta riba kaminda, nan lo guia bo; ora bo ta drumi, nan lo kuida bo; i ora bo lanta, nan lo papia ku bo. Pasobra e mandamentu ta un lampi, i e siñansa ta lus; i e reprendementunan di disiplina ta e kaminda di bida.”—Proverbionan 6:20-23.

⁴ E guia di mayornan kristian por ta un protekshon pa hóbennan, basta ku nan ta dispuesto pa siguié. Salomon a deklará tambe: “Un yu sabí ta hasi su tata kontentu, ma un yu bobo ta un tristesa pa su mama.” “Skucha, mi yu, i sea sabí, i dirigí bo kurason riba e kaminda.” (Proverbionan 10:1; 23:19) Sí, pa boso hóbennan benefisiá di e entrenamentu di boso mayornan, boso mester ta dispuesto pa aseptá konseho i disiplina. Boso no ta nase sabí, pero boso por ‘bira sabí’ i boluntariamente sigui “e kaminda di bida.”

Kiko Ta Reglamentu Mental?

5. Ki konseho Pablo a duna yunan i tatanan?

⁵ Apòstel Pablo a skirbi: “Yunan, obedesé boso mayornan den Señor, pasobra esaki ta hustu. Onra bo tata i bo mama (ku ta e promé mandamentu ku un promesa), pa bai bo bon i pa bo tin bida largu riba tera. I boso, tatanan, no provoká boso yunan na rabia, ma lanta nan den e disiplina i instrukshon di Señor [òf, “reglamentu mental di Yehova,” NW].”—Efesionan 6:1-4.

6, 7. Kiko lanta yu den e “reglamentu mental di Yehova” ta enserá, i dikon esaki no ta nifiká ku e mayornan ta influensiando nan yunan inhustamente?

⁶ Akaso mayornan kristian ta influensiando nan yunan inhustamente ora ku nan ta lanta nan den ‘e disiplina i reglamentu mental di Yehova’? Nò. Ken por kritiká mayornan pasobra nan ta siña nan yunan loke nan ta konsiderá korekto i moralmente probechoso? Ateonan no ta ser kritiká pasobra nan ta siña nan yunan ku Dios no ta eksistí. Mayornan katóliko romano ta sinti ku nan tin e obligashon di lanta nan yunan den e fe katóliko, i masha poko biaha nan ta ser kritiká pasobra nan ta purba hasi esei. Di igual manera, hende no mester akusá Testigunan di Yehova di ta manipulá mente di nan yunan ora ku nan ta lanta nan pa adoptá Yehova su manera di mira bèrdatnan básiko i prinsipionan moral.

⁷ Segun e dikshonario Theological Dictionary of the New Testament, e palabra griego original tradusí komo “instrukshon” òf “reglamentu mental” na Efesionan 6:4 ta referí na un proseso ku ta “trata di korigí e mente, di drecha loke ta robes, di mehorá e aktitut spiritual.” Kiko si un hóben ta resistí entrenamentu di su mayornan debí na preshon di su pareunan, esta, e deseo di hasi loke su pareunan ta hasi? Ta ken nos por bisa ta ehersé preshon perhudisial: e mayornan òf e pareunan di e hóben? Si e hóben su pareunan ta preshon’é pa usa droga, bebe hopi alkohòl òf partisipá den kondukta inmoral, lo mester kritiká e mayornan pasobra nan ta purba ahustá nan yu su manera di pensa i yud’é realisá e konsekuensianan di tal kondukta peligroso?

8. Kiko a yuda ku Timoteo “a keda konvensí” di loke el a siña?

⁸ Apòstel Pablo a skirbi na e hòmber hóben Timoteo: “Kontinuá den e kosnan ku bo a siña i a keda konvensí di dje, sabiendo di ken bo a siña nan; i ku for di infansia bo a konosé e skrituranan santu, kualnan por duna bo e sabiduria ku ta hiba na salbashon pa medio di fe, ku ta den Kristu Hesus.” (2 Timoteo 3:14, 15) For di den Timoteo su infansia, su mama i su wela a pone un fundeshi firme pa su fe den Dios basá riba konosementu di e Santu Skritura. (Echonan 16:1; 2 Timoteo 1:5) Despues, ora ku nan a bira kristian, nan no a fòrsa Timoteo pa kere  sino mas bien el a “keda konvensí” dor di nan rasonamentu sano basá riba konosementu bíbliko.

Yehova Ta Invitá Bo pa Skohe

9. (a) Kon Yehova a onra su kriaturanan, i pa ki motibu? (b) Kon Dios su Yu unigénito a usa su boluntat liber?

⁹ Yehova por a traha su kriaturanan manera robòt, programá pa hasi su boluntat i sin ku nan por a tuma nan propio desishonnan. Pero na lugá di esei, el a duna nan e onor di tin boluntat liber. Nos Dios ke tin sirbidónan boluntario. E tin delisia den mira su kriaturanan, bieu i hóben, sirbié pasobra nan stim’é. E mihó ehèmpel di someté na Dios su boluntat pa motibu di amor ta di su Yu unigénito, di ken Yehova a bisa: “Esaki ta mi Yu stimá, den kende mi tin goso.” (Mateo 3:17) E Yu primogénito aki a bisa su Tata: “Pa hasi bo boluntat, o mi Dios, ta un delisia pa mi; bo lei ta den mi kurason.”—Salmo 40:8; Hebreonan 10:9, 10.

10. Kiko ta e base pa sirbi Yehova aseptablemente?

¹⁰ Yehova ta ferwagt ku e hendenan ku ta sirbié bou di guia di su Yu ta demostrá e mesun aktitut di someté nan mes di buena gana na Su boluntat. Profétikamente, e salmista a kanta: “Bo pueblo lo pone su mes disponibel den e dia di bo poder; den e splendor di santidat, for di e matris di mardugá, bo hóbennan ta pa bo manera serena.” (Salmo 110:3) Henter Yehova su organisashon, tantu e parti den shelu komo esun riba tera, ta funshoná a base di sumishon na Dios motivá pa amor.

11. Ki chòis tin poné dilanti di hóbennan ku ta ser kriá pa mayornan dediká?

¹¹ Pues, boso hóbennan, mester komprondé ku ni boso mayornan ni e ansianonan kristian den kongregashon lo no bai fòrsa boso pa batisá. E deseo pa sirbi Yehova mester sali for di boso mes. Josué di pasado a bisa e israelitanan: “Sirbi [Yehova] ku sinseridat i den bèrdat . . . Skohe pa boso mes awe [ken] boso lo sirbi.” (Josué 24:14-22) Asina tambe, ta di boso propio boluntat boso mester skohe pa dediká boso mes na Yehova i usa boso bida pa hasi su boluntat.

Aseptá Bo Responsabilidat

12. (a) Ounke mayornan por eduká nan yunan, kiko sí nan no por hasi pa nan? (b) Ki ora un hóben ta bira responsabel dilanti di Yehova pa e desishonnan ku e ta tuma?

¹² Hóbennan, ta yega un momento ku boso no ta kai mas bou di e protekshon ku ta bin dor di e fieldat di boso mayornan. (1 Korintionan 7:14) Disipel Santiago a skirbi: “Pa esun ku sa di hasi loke ta bon, i no ta hasié, p’e esaki ta piká.” (Santiago 4:17) Mayornan no por sirbi Dios pa nan yunan, meskos ku yunan no por sirbi Dios pa nan mayornan. (Ezekiel 18:20) Bo a siña tokante Yehova i su propósito? Bo tin sufisiente edat pa komprondé loke bo a siña i pa kuminsá desaroyá un relashon personal ku Yehova? Lo no ta rasonabel anto pa pensa ku Dios ta konsiderá bo sufisiente kapasitá pa tuma e desishon di sirbié?

13. Kua ta algun pregunta ku lo ta bon pa tinernan no-batisá hasi nan mes?

¹³ Bo ta un publikadó no-batisá ku ta ser kriá pa mayornan ku ta adorá Dios? Bo ta asistiendo na reunionnan kristian i asta ta partisipá den e predikashon di e bon nobo di Reino? Si ta asina, puntra bo mes onestamente: ‘Dikon mi ta hasi esaki? Mi ta asistí  na reunion i partisipá den e trabou di prediká pasobra mi mayornan ta rekerí esei òf pasobra ami ke agradá Yehova?’ Bo a komprobá pa bo mes “kiko ta e bon i agradabel i perfekto boluntat di Dios”?—Romanonan 12:2.

Pakiko Posponé Boutismo?

14. Menshoná algun ehèmpel bíbliko ku ta mustra ku no mester posponé boutismo innesesariamente.

¹⁴ “Kiko ta stroba pa mi wòrdu batisá?” E hòmber etiopio ku a hasi e pregunta ei na e evangelisadó Felipe a kaba di siña ku Hesus tabata e Mesias. Pero e etiopio tabatin sufisiente konosementu di e Skritura p’e realisá ku e no mester tarda pa duna testimonio abiertamente ku for di e momento ei en adelante lo e sirbi Yehova komo parti di e kongregashon kristian, i esei a dun’é hopi goso. (Echonan 8:26-39) Meskos tambe tabata e kaso ku un muhé ku yama Lidia, kende ‘su kurason a ser habrí pa paga atenshon na e kosnan ku Pablo tabata bisa.’ El a “batisá” mesora, é huntu ku e hendenan di su kas. (Echonan 16:14, 15) Di igual manera, e wardadó di prizon na Filipos a skucha Pablo ku Silas segun ku nan ‘a papia e palabra di Yehova kuné,’ i “el a wòrdu batisá mesora, é i tur e hendenan di su kas.” (Echonan 16:25-34) Pues anto, si bo tin un konosementu básiko di Yehova i di su propósito, un deseo sinsero di hasi su boluntat, i un bon reputashon den e kongregashon i bo ta asistí fielmente na reunion i partisipá den e predikashon di e bon nobo di Reino, pakiko lo bo mester posponé boutismo?—Mateo 28:19, 20.

15, 16. (a) Ki rasonamentu inkorekto kisas ta stroba algun hóben di batisá? (b) Kon dedikashon i boutismo por sirbi komo un protekshon pa hóbennan?

¹⁵ Ta posibel ku bo ta vasilá pa dal e paso importante aki pasobra bo tin miedu ku lo bo tin ku rindi kuenta si bo haña bo enbolbí den mal kondukta? Si ta asina, pensa riba esaki: Lo bo nenga di bai saka bo reibeweis djis pasobra bo tin miedu ku un dia lo bo por ta enbolbí den un aksidente? Klaru ku nò! Wèl, bo no mester vasilá tampoko pa batisá si bo ta kualifiká. De echo, si bo a dediká bo bida na Yehova i a bai di akuerdo pa hasi su boluntat, lo bo tin un motivashon fuerte pa hasi bo bèst pa resistí malecho. (Isaias 12:2) Hóbennan, por fabor no kere ku dor di posponé boutismo boso ta evitá di tin ku rindi kuenta. Ora bo alkansá un edat ku bo ta karga bo propio responsabilidat, sea ku bo ta batisá òf nò, bo tin ku rindi kuenta na Yehova pa e manera ku bo ta aktua.—Romanonan 14:11, 12.

¹⁶ Rònt mundu tin kantidat di Testigu di Yehova ku ta sinti ku nan desishon di batisá tempu nan tabata yòn a yuda nan masha hopi. Tuma por ehèmpel un hóben Testigu di 23 aña di edat na Wèst Europa. E ta kòrda  ku e echo ku el a batisá ku 13 aña a motiv’é pa tene kuidou pa “e pashonnan di hubentut” no domin’é. (2 Timoteo 2:22) For di chikitu el a fiha su bista riba e meta di sirbi komo un minister di tempu kompletu. Awe, felismente e ta sirbi na un sukursal di Testigunan di Yehova. Bendishon na abundansia ta spera tur hóben ku skohe pa sirbi Yehova, i esei ta inkluí abo tambe.

17. Relashoná ku ki aktividatnan ta nesesario pa komprondé kiko ta ‘e boluntat di Yehova’?

¹⁷ Dedikashon i boutismo ta marka e komienso di un bida den kua nos ta tuma Yehova su boluntat na kuenta den tur nos aktividatnan. Pa kumpli ku nos dedikashon nos mester ‘kumpra tempu.’ Kon nos ta hasi esei? Dor di usa e tempu ku di otro manera nos lo a dediká na aktividatnan bano, pa mas bien studia Beibel seriamente, asistí ku regularidat na reunion i partisipá mas plenamente posibel den e predikashon di e evangelio òf ‘bon nobo di reino.’ (Efesionan 5:15, 16; Mateo 24:14) Nos dedikashon na Yehova i nos deseo di hasi su boluntat lo tin un bon influensia riba tur aspekto di nos bida, inkluso riba e manera ku nos ta usa nos tempu liber, nos kustumbernan di kome i bebe, i e tipo di muzik ku nos ta skucha. Dikon bo no ta skohe e tipo di rekreo ku lo bo por disfrutá di dje pa eternidat? Míles di Testigu hóben i felis lo por konta bo ku tin hopi manera sano pa dibertí i tòg keda denter di e límitenan di ‘e boluntat di Yehova.’—Efesionan 5:17-19.

“Laga Nos Bai ku Boso”

18. Ki pregunta hóbennan tin ku puntra nan mes?

¹⁸ Di aña 1513 promé ku nos era te ku Pentekòste di aña 33 di nos era, Yehova tabatin riba tera un pueblo organisá ku el a skohe pa ador’é i pa nan ta su testigunan. (Isaias 43:12) Israelitanan hóben tabata nase komo parti di e nashon ei. Desde Pentekòste, Yehova tin un “nashon” nobo riba tera, Israel spiritual, “un pueblo pa su nòmber.” (1 Pedro 2:9, 10; Echonan 15:14; Galationan 6:16) Apòstel Pablo a deklará ku Kristu a purifiká pa su mes “un pueblo pekuliar, ku selo den hasimentu di bon obra.” (Tito 2:14) Hóbennan, boso ta liber pa determiná personalmente unda boso ta haña e pueblo ei. Ken awe ta forma ‘e nashon hustu ku ta keda fiel,’ ku ta biba na armonia ku prinsipionan bíbliko, ku ta aktua komo Testigunan fiel di Yehova, i ku ta proklamá su Reino komo e úniko speransa pa humanidat? (Isaias 26:2-4) Wak e iglesianan di kristiandat i otro religionnan, i kompará nan kondukta ku loke Beibel ta rekerí di berdadero sirbidónan di Dios.

19. Di kiko miónes di hende rònt mundu a bira konvensí?

¹⁹ Miónes di hende rònt mundu, inkluso hopi hóben, a bira konvensí ku e restu ungí di Testigunan di Yehova ta forma e “nashon hustu” ei. Nan ta bisa e israelitanan spiritual aki: “Laga nos bai ku boso, pasobra nos a tende ku Dios ta ku boso.” (Zakarias 8:23) Di kurason nos ta spera i ta pidi den orashon ku boso, hóbennan, lo disidí di bira parti di Dios su pueblo i asina “skohe bida,” esta, bida eterno den Yehova su mundu nobo.—Deuteronomio 30:15-20; 2 Pedro 3:11-13.

Komo Repaso

• Kiko reglamentu mental ta enserá?

• Ki klase di sirbishi ta aseptabel pa Yehova?

• Ki chòis tin dilanti di tur hóben ku ta ser kriá pa mayornan dediká?

• Pakiko no mester posponé boutismo innesesariamente?

[Preguntanan di Estudio]

[Plachinan na página 26]

Ken lo bo skucha?

[Plachi na página 28]

Kon dedikashon i boutismo por sirbi komo un protekshon pa bo?

[Plachi na página 29]

Kiko ta stroba bo di batisá?