Kon pa Haña Berdadero Iluminashon

TABATA 18 di desèmber 1810. Nochi tabata serando. Den e laman brutu di un tempestat pafó di e kosta zùitost di Eskosia, e fragata HMS Pallas di e Ehérsito Naval britániko a pèrdè rumbo. Pa motibu di skuridat i kaida pisá di sneu, a bira mas i mas difísil pa e tripulantenan lokalisá e faronan ku nan tabatin mester pa guia nan barku na un lugá sigur. Imaginá bo e alivio ku nan a sinti ora ku por fin nan a mira lus i a stür nan barku den direkshon di esakinan! Pero, lamentablemente, loke nan a mira no tabata lusnan di faro ku mester a guia nan. Tabata mas bien kandelanan kant’i kosta ku obreronan tabatin sendé. Pallas a bai dal den baranka i a kibra kompletamente. Diesun marinero a hoga trágikamente.

Den e kaso di Pallas, un fayo a kousa e desaster. Pero na otro okashonnan, marineronan a enfrentá un peliger asta mas grandi ainda—lusnan di faro engañoso. E lusnan ei tabata ser poné intenshonalmente pa lòk e barkunan i laga nan bin dal kibra riba baranka kant’i kosta pa nan wòrdu di plùnder, segun e buki Wrecks, Wreckers and Rescuers.

‘Skrituranan Santu Ku Por Hiba na Salbashon’

Den bo buskamentu di iluminashon, bo ta enfrentá e mesun peligernan ku e marineronan dje tempu ei a haña nan kuné. Kisas bo ta sigui informashon engañoso, òf bo por asta bira víktima di engaño premeditá. Tur dos kaminda por hiba na tragedia. Kiko bo por hasi pa protehá bo mes? Hasi sigur ku bo fuente di iluminashon ta outéntiko i konfiabel. Pa mas ku 125 aña, e revista aki a defendé Beibel, e Palabra inspirá di Dios, komo e fuente mas konfiabel di iluminashon pasobra e ta kontené “skrituranan santu, kuanan por duna bo e sabiduria ku ta hiba na salbashon.”—2 Timoteo 3:15-17.

Klaru ku ta masha rasonabel ku bo ke sa si Beibel ta outéntiko, promé ku bo dependé  riba dje komo un lus di guia konfiabel. (Salmo 119:105; Proverbionan 14:15) Sinti bo liber pa skirbi e editornan di e revista aki pa optené informashon ku a yuda konvensé miónes di hende ku Beibel en bèrdat ta inspirá pa Dios. Lesa, por ehèmpel, e foyeto titulá Un Buki pa Tur Hende. * E ta presentá hopi informashon ku ta mustra ku Beibel ta eksakto, outéntiko i inspirá.

Bèrdatnan Fundamental

Kiko anto ta algun di e bèrdatnan fundamental ku e “skrituranan santu” aki ta kontené? Konsiderá e siguiente ehèmpelnan.

Tin un solo Dios Todopoderoso i Kreadó kende a traha tur kos. (Génesis 1:1) Nos ta eksistí únikamente “pasobra [Dios] a krea tur kos” i a duna nos bida. (Revelashon 4:11) P’e motibu ei ta e so meresé nos adorashon. E Kreadó ta e Fuente supremo di tur iluminashon. (Salmo 36:9; Isaias 30:20, 21; 48:17, 18) E tin un nòmber personal ku e ke pa nos usa. (Eksodo 3:15, BPK, nota na pia di página) E nòmber ei, skirbí na hebreo i transliterá komo YHWH, ta aparesé komo 7.000 biaha den Beibel. Pa hopi tempu el a ser usá na papiamentu den e forma di “Yehova.”—Salmo 83:18, NW.

Yehova a traha hòmber i muhé pa biba pa semper den un paradeis aki riba tera. El a dota hende ku e mesun kualidatnan spiritual ku e tin. El a duna nan talento- i abilidatnan ku lo a permití nan disfrutá di bida humano plasentero pa semper aki riba tera. (Génesis 1:26-28) Nunka tabata su propósito pa tera bira un tipo di tereno di prueba pa hòmber i muhé—un trampolin pa bai biba komo spiritu den shelu, komo si fuera ta einan so nan por a disfrutá di un relashon ku Dios.

No tabatin nada malu den Dios su kreashon humano. Ta ora algun kriatura di Dios—tantu humano komo spiritual—a hasi mal uso di nan boluntat liber i a rebeldiá kontra dje, maldat a bini. (Deuteronomio 32:5) Nos promé mayornan a tuma e derecho pa nan mes disidí kiko ta bon i kiko ta malu. (Génesis 2:17; 3:1-5) Esei a trese morto p’e famia humano. (Génesis 3:19; Romanonan 5:12) Pa resolvé e kuestionnan ku e rebelion a lanta, Yehova a disidí di permití maldat pa un tempu. Pero su propósito pa tera i pa e famia humano no a kambia. (Isaias 45:18) Pronto, hòmber i muhé lo biba pa semper den Paradeis riba un tera hasí limpi.—Mateo 6:10; Revelashon 21:1-5.

Hesukristu no ta Dios Todopoderoso, sino Yu di Dios. Hesukristu mes a siña su siguidónan pidi den orashon: “Nos Tata ku ta den shelu, bo nòmber sea santifiká.” (Mateo 6:9) Nunka el a pretendé ku e ta igual ku Dios. El a bisa mas bien: “E Tata ta mas ku mi.”—Juan 14:28.

Hesus ta hunga un papel vital den e realisashon di Dios su propósito. Dios a mand’é “komo lus den mundu, pa tur esnan ku kere den [dje] no keda den skuridat.” (Juan 12:46) Apòstel Pedro a bisa: “No tin salbashon den  ningun otro.” (Echonan 4:12) Esaki ta e kaso pasobra nos salbashon ta dependé di e sanger presioso di Kristu. (1 Pedro 1:18, 19) Hesukristu a duna su bida komo un sakrifisio di reskate pa libra humanidat for di e piká ku nos promé mayornan, Adam i Eva, a introdusí den e famia humano. (Mateo 20:28; 1 Timoteo 2:6) Ademas, Dios a usa Hesus pa revelá Su boluntat i propósito.—Juan 8:12, 32, 46, 47; 14:6; Echonan 26:23.

Dios a establesé un Reino òf gobièrnu selestial ku ta konsistí di Hesukristu i personanan skohí for di entre humanidat. Esaki ta e tema ku ta bini kada bes padilanti den Beibel. Dios a enkargá e gobièrnu aki ku e tarea di hasi sigur ku su boluntat ta sosodé riba tera meskos ku den shelu. (Mateo 6:10) No tabata e propósito original di Dios pa ningun ser humano bai shelu. Nan hogar mester tabata aki riba tera. Pero despues ku hende a kai den piká, Dios a bini ku algu nobo. El a hasi areglo pa skohe hende “for di tur tribu i lenga i pueblo i nashon” pa “reina” komo rei huntu ku Kristu den un gobièrnu selestial. (Revelashon 5:9, 10) Pronto e gobernashon di Reino ei lo “garna i pone un fin” na tur forma di gobernashon humano ku a trese asina tantu miseria i doló pa e famia humano.—Daniel 2:44.

Alma ta muri. E bèrdat fundamental aki di Beibel ta klarifiká hopi kos tokante hende i su perspektivanan di bida. E ta eliminá tambe e mal komprondementu i informashon eróneo ku a konfundí hende tokante e kondishon di e mortonan.

E promé buki di Beibel ta bisa nos: “Yehova Dios a forma e hende di stòf di suela i supla den su nanishi e rosea di bida, i e hende a bira un alma bibu.” (Génesis 2:7, NW) Bo ta komprondé kiko esei ta nifiká? Alma no ta un kos vago ku ta eksistí den e kurpa humano. Hende no tin un alma. E ta un alma—un kombinashon di elemento hañá den “stòf di suela” i un forsa di bida ku ta bini for di Dios. Alma no ta inmortal. Ora hende muri, e alma ta muri.—Génesis 3:19; Eklesiastés 9:5, 10.

Hende ku a muri por bolbe haña bida pa medio di un resurekshon. Ora e tempu ku Dios a permití maldat temporalmente ta tras di lomba, “tur [hende] ku ta den graf lo tende [Hesus] su bos, i lo sali; esnan ku a hasi bon, pa un resurekshon di bida, esnan ku a kometé maldat, pa un resurekshon di huisio.” (Juan 5:28, 29; Echonan 24:15) E resurekshon lo restorá hende bèk na bida humano den un paradeis riba tera, e klase di bida ku Dios tabata ke originalmente pa e famia humano.

 Eksaminá e Skritura Kuidadosamente Tur Dia

Bo ta mira kon un konosementu di e bèrdatnan fundamental ei por yuda bo? Den e tempu krítiko i turbulento aki e konosementu ei por protehá bo for di “loke falsamente ta wòrdu yamá ‘konosementu,’” lokual Satanas e Diabel ta propagá. E ta pretendé di ta “un angel di lus,” i su representantenan, “sirbidónan di hustisia.” (1 Timoteo 6:20; 2 Korintionan 11:13-15) Konosementu eksakto di Beibel por protehá bo for di e asina yamá iluminashon basá riba e filosofianan di e “sabínan i inteligentenan” di mundu ku “a rechasá e palabra di SEÑOR.”—Mateo 11:25; Jeremias 8:9.

Pa motibu ku tabatin asina tantu siñansa i filosofia engañoso den tempu di apòstel Juan, el a spièrta e kristiannan di promé siglo: “No kere tur hende ku pretendé ku nan tin [e] spiritu di Dios.” Anto el a agregá: “Mira si e spiritu ku nan tin ta pertenesé na Dios.” (1 Juan 4:1, BPK) Pensa riba lo siguiente. Si bo risibí un mensahe ku por tin un efekto profundo riba bo bida, lo bo asept’é sin mas djis pasobra aparentemente e ta bini di un bon fuente? Klaru ku nò. Lo bo verifiká su fuente i analisá su kontenido promé ku bo asept’é, no ta bèrdat?

Dor di perkurá un registro inspirá por eskrito ku ta kontené bèrdatnan fundamental, Dios a hasi posibel pa bo hasi eksaktamente esei—“saminá” si e lusnan guiadó, òf faronan, ku bo ta sigui ta outéntiko. (1 Tesalonisensenan 5:21) E hendenan di mentalidat noble den e promé siglo a haña elogio pasobra nan tabata “skudriñá e Skrituranan tur dia” pa hasi sigur ku loke nan a siña tabata realmente e bèrdat. (Echonan 17:11) Bo por hasi meskos. Laga Beibel, manera “un lampi ku ta lusa den un lugá skur,” guia bo na un lugá sigur. (2 Pedro 1:19-21) Si bo hasi esei, lo bo “deskubrí e konosementu di Dios” ku ta trese berdadero iluminashon.—Proverbionan 2:5.

[Nota]

[Plachi na página 4]

E Palabra di Dios ta manera un lampi

[Plachi na página 5]

Kiko ta e nòmber di Dios?

[Plachi na página 5]

Kiko futuro ta trese pa humanidat?

[Plachi na página 6]

Hesus ta Dios Todopoderoso?

[Plachi na página 6]

Unda e mortonan ta?

[Plachi na página 7]

Resurekshon di e mortonan ta un di e bèrdatnan fundamental ku Beibel ta siña