Nan A Nase Komo Parti di Dios Su Nashon Skohí

“[Yehova] bo Dios a skohe bo . . . pa ta un pueblo spesial pa su mes.”—DEUTERONOMIO 7:6.

1, 2. Ki aktonan poderoso Yehova a efektuá na fabor di su pueblo, i ki relashon e israelitanan a forma ku Dios?

NA AÑA 1513 promé ku nos era, Yehova a forma un relashon nobo ku su sirbidónan riba tera. E aña ei, Yehova a humiá un potensia mundial i a libra e israelitanan for di sklabitut. Ku e akshon ei el a bira nan Salbadó i Doño. Promé ku Dios a aktua el a bisa Moisés: “Bisa e yunan di Israel: ‘Ami ta SEÑOR [Yehova], i ami lo saka boso for di bou di e karganan di e egipsionan, i lo mi libra boso for di nan sklabitut. Tambe lo mi redimí boso ku un brasa ekstendí i ku huisionan pisá. I lo mi tuma boso komo mi pueblo, i lo mi ta boso Dios.’”—Eksodo 6:6, 7; 15:1-7, 11.

² Poko despues di e israelitanan su Éksodo for di Egipto, nan a drenta den un relashon ku nan Dios, Yehova, basá riba un aliansa òf pakto. En bes di trata ku personanan individual, famianan òf grupo di famia, Yehova djawó en adelante lo tabatin un pueblo organisá, un nashon, riba tera. (Eksodo 19:5, 6; 24:7) El a duna su pueblo lei ku a dirigí nan bida diario i, mas importante ainda, nan adorashon. Moisés a bisa nan: “Ki gran nashon tin, ku tin un dios asina serka di dje, manera SEÑOR nos Dios ta ki ora ku nos yama na dje? Òf ki gran nashon tin, ku tin statutonan i huisionan asina hustu, manera henter e lei aki ku mi ta pone boso dilanti awe?”—Deuteronomio 4:7, 8.

Nasí den un Nashon di Testigu

3, 4. Kua tabata un motibu importante di Israel su eksistensia komo nashon?

³ Siglonan despues, Yehova mediante su profeta Isaias a rekordá e israelitanan di un motibu importante pakiko nan ta eksistí komo nashon. Isaias a bisa: “Asina SEÑOR [Yehova], bo Kreadó, ta bisa, o Jakòb i Esun ku a forma bo, o Israel: ‘No tene miedu, pasobra ami a redimí bo; mi a yama bo na bo nòmber; bo ta di mi! Pasobra ami ta SEÑOR bo Dios, Esun Santu di Israel, bo Salbadó . . . Trese mi yu hòmbernan for di leu, i mi yu muhénan for di e finnan di tera, kada un ku ta wòrdu yamá na mi nòmber, i ku mi a krea pa mi gloria, ku mi a forma i ku mi a traha. Boso ta mi testigunan,’ SEÑOR [Yehova] ta deklará, ‘i mi sirbidó ku mi a skohe . . . E pueblo  ku mi a forma pa mi mes lo deklará mi alabansa.’”—Isaias 43:1, 3, 6, 7, 10, 21.

⁴ Komo un pueblo yamá na Yehova su nòmber, e israelitanan lo a aktua komo testigu di su soberania dilanti di e nashonnan. Nan mester tabata un pueblo ‘kreá pa Yehova su gloria.’ Nan mester a ‘deklará Yehova su alabansa,’ es desir, konta tokante su aktonan maravioso di liberashon i asina glorifiká su nòmber santu. En korto, nan mester a fungi komo un nashon di testigu pa Yehova.

5. Den ki manera Israel tabata un nashon dediká?

⁵ Den siglo 11 promé ku nos era, Rei Salomon a indiká ku Yehova a hasi Israel un nashon separá. Den orashon na Yehova, el a deklará: “Bo a separá nan for di tur e pueblonan di tera komo bo herensia.” (1 Reinan 8:53) Israelitanan individual tambe tabatin un relashon spesial ku Yehova. Mas promé, Moisés a bisa nan: ‘Boso ta e yunan di Yehova boso Dios. Pasobra bo ta un pueblo santu pa Yehova bo Dios.’ (Deuteronomio 14:1, 2) Pues, israelitanan hóben no tabatin nodi dediká nan bida na Yehova. Nan a nase komo miembro di Dios su pueblo dediká. (Salmo 79:13; 95:7) Kada generashon nobo tabata ser instruí den e leinan di Yehova i tabata obligá na warda nan debí na e aliansa ku a mara Israel na Yehova.—Deuteronomio 11:18, 19.

Liber pa Skohe

6. Ki eskoho e israelitanan individual tabatin ku hasi?

⁶ Ounke e israelitanan a nase den un nashon dediká, kada persona tabatin ku tuma un desishon personal pa sirbi Dios. Promé ku nan a drenta e Tera Primintí, Moisés a bisa nan: “Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje; pasobra esaki ta bo bida i e largura di bo dianan, pa bo biba na e tera ku SEÑOR a hura na bo tatanan, na Abraham, Isaak i Jakòb, pa duna nan.” (Deuteronomio 30:19, 20) Pues, individualmente e israelitanan tabatin ku skohe pa stima Yehova, obedesé su bos i tene duru na dje. Ya ku e israelitanan tabatin boluntat liber, nan lo tabatin ku karga e konsekuensianan di e eskoho ku nan hasi.—Deuteronomio 30:16-18.

7. Kiko a pasa despues ku e generashon di Josué a muri?

⁷ E periodo di Huesnan ta ilustrá bon kla e konsekuensianan di fieldat i di infieldat. Djis promé ku e periodo ei a kuminsá, e israelitanan a sigui e bon ehèmpel di Josué i Dios a bendishoná nan. “E pueblo a sirbi SEÑOR tur e dianan di Josué, i tur e dianan di e ansianonan ku a biba mas ku Josué, ku a mira henter e gran obra di SEÑOR ku el a hasi pa Israel.” Sin embargo, poko despues di Josué su morto, “a lanta un otro generashon despues di nan ku no tabata konosé SEÑOR, ni e obra ku el a hasi pa Israel. Anto e yunan di Israel a hasi maldat den bista di SEÑOR.” (Huesnan 2:7, 10, 11) Aparentemente, e generashon nobo i sin eksperensia, no a duna masha balor na nan herensia komo miembro di un pueblo dediká, na kende su fabor nan Dios, Yehova, a efektuá aktonan poderoso den pasado.—Salmo 78:3-7, 10, 11.

Kumpliendo ku Nan Dedikashon

8, 9. (a) Ki areglo a permití e israelitanan demostrá nan dedikashon na Yehova? (b) Kiko esnan ku a hasi ofrenda boluntario a gana pa nan mes?

⁸ Yehova a duna su pueblo vários oportunidat pa kumpli ku nan dedikashon komo nashon. Por ehèmpel, Dios su Lei tabatin un sistema di sakrifisio, òf ofrenda, di kua algun tabata obligatorio, miéntras ku otronan tabata boluntario. (Hebreonan 8:3) E sakrifisionan ei a inkluí ofrendanan boluntario  manera, ofrenda kimá, ofrenda di grano i ofrenda di pas (òf di komunion). E ofrendanan aki tabata regalonan presentá na Yehova pa haña su aprobashon i pa ekspresá gradisimentu.—Levítiko 7:11-13.

⁹ E sakrifisionan boluntario aki a agradá Yehova. Beibel ta bisa ku e ofrenda kimá i e ofrenda di grano tabata ‘un holó dushi pa Yehova.’ (Levítiko 1:9; 2:2) Den e ofrenda di pas, nan a ofresé e sanger i e vèt di e bestia na Yehova, miéntras ku e saserdotenan i e persona ku a hasi e ofrenda a kome sierto porshon di e karni. Pues e tabata un sena simbóliko ku a nifiká un relashon di pas ku Yehova. E Lei a deklará: “Awor ora boso ta ofresé un sakrifisio di e ofrendanan di pas na SEÑOR, boso mester ofresé esaki di tal manera ku boso lo ta aseptá.” (Levítiko 19:5) Ounke di nasementu tur israelita tabata dediká na Yehova, esnan ku realmente a deseá di skohe Yehova komo nan Dios dor di hasi ofrendanan boluntario, ‘lo a ser aseptá’ i a haña bendishon riku.—Malakias 3:10.

10. Kon Yehova a ekspresá su mal kontentu den tempu di Isaias i di Malakias?

¹⁰ Sin embargo, e nashon dediká di Israel ku frekuensia a duna prueba di ta infiel na Yehova. Yehova a bisa nan mediante su profeta Isaias: “Bo no a trese pa mi henter e karné di bo ofrendanan kimá, i bo no a glorifiká mi ku bo sakrifisionan. Mi no a obligá bo sirbi mi ku un regalo.” (Isaias 43:23, NW) Ademas, ofrendanan ku no tabata hasí boluntariamente i motivá pa amor, no tabatin balor den bista di Yehova. Por ehèmpel, tres siglo despues di Isaias, den tempu di profeta Malakias, e israelitanan tabata ofresé bestia mankaron. P’esei Malakias a bisa nan: “‘Mi no ta kontentu ku boso,’ e SEÑOR di ehérsitonan ta bisa, ‘ni lo mi no aseptá un ofrenda for di boso man.’ . . . ‘Boso ta trese loke a wòrdu hòrtá, i loke ta lam òf malu; asina boso ta trese e ofrenda! Mi mester aseptá esei for di boso man?’ SEÑOR ta bisa.”—Malakias 1:10, 13; Amos 5:22.

 Rechasá Komo un Nashon Dediká

11. Ki oportunidat Yehova a duna Israel?

¹¹ Tempu ku e israelitanan a bira un nashon dediká na Yehova, el a primintí nan: “Si di bèrdat boso kier obedesé mi bos i warda mi aliansa, e ora ei boso lo ta un tesoro pekuliar riba tur pueblo, pasobra henter tera ta di mi; i boso lo ta pa mi un reino di saserdotenan i un nashon santu.” (Eksodo 19:5, 6) E Mesias primintí lo a aparesé meimei di nan i duna nan e promé chèns di bira miembro di Dios su gobernashon di Reino. (Génesis 22:17, 18; 49:10; 2 Samuel 7:12, 16; Lukas 1:31-33; Romanonan 9:4, 5) Pero mayoria hende di e nashon di Israel no a kumpli ku nan dedikashon. (Mateo 22:14) Nan a rechasá e Mesias i ku tempu a mat’é.—Echonan 7:51-53.

12. Ki deklarashonnan di Hesus ta mustra ku Israel a ser rechasá komo Yehova su nashon dediká?

¹² Un par di dia promé ku Hesus su morto, el a bisa e lidernan religioso hudiu: “Boso no a lesa nunka den e Skrituranan: ‘E piedra ku e trahadónan a rechasá, esaki a bira e piedra-di-skina prinsipal; esaki a bin di SEÑOR, i e ta maravioso den nos bista’? P’esei mi ta bisa boso, e reino di Dios lo wòrdu kitá for di boso, i duná na un nashon ku sí ta hasié produsí fruta.” (Mateo 21:42, 43) Pa mustra ku Yehova a rechasá nan komo un nashon dediká na Dje, Hesus a deklará: “O Yerusalèm, Yerusalèm, abo ku ta mata e profetanan i ta piedra esnan ku ta wòrdu mandá serka dje! Kuantu biaha mi no tabata kier a hunta bo yunan, manera un galiña ta hunta su puitunan bou di su alanan, i boso no tabata kier. Mira, boso kas ta keda desolá pa boso!”—Mateo 23:37, 38.

Un Nashon Dediká Nobo

13. Ki deklarashon profétiko Yehova a hasi den tempu di Jeremias?

¹³ Den tempu di profeta Jeremias, Yehova a profetisá un kos nobo relashoná ku su pueblo. Nos ta lesa: “‘Ata, e dianan ta bin,’ SEÑOR ta deklará, ‘ku lo mi sera un aliansa nobo ku e kas di Israel i ku e kas di Huda, no manera e aliansa ku mi a sera ku nan tatanan den e dia ku mi a kohe nan na nan man pa saka nan for di tera di Egipto, mi aliansa ku nan a kibra, ounke ku mi tabata un esposo pa nan,’ SEÑOR ta deklará. ‘Ma esaki ta e aliansa ku lo mi sera ku e kas di Israel despues di e dianan ei,’ SEÑOR ta deklará. ‘Lo mi pone mi lei den nan i lo mi skirbié riba nan kurason; i ami lo ta nan Dios i nan lo ta mi pueblo.’”—Jeremias 31:31-33.

14. Ki tempu i a base di kiko Yehova su nashon dediká nobo a keda formá? Identifiká e nashon nobo ei.

¹⁴ E base pa e aliansa nobo aki a ser poné ora ku Hesus a muri i despues a presentá e balor di su sanger dramá na su Tata na aña 33 di nos era. (Lukas 22:20; Hebreonan 9:15, 24-26) Sin embargo, e aliansa nobo a drenta na vigor ora ku Dios a drama spiritu santu na Pentekòste di aña 33 i un nashon nobo, “e Israel di Dios,” a keda formá. (Galationan 6:16; Romanonan 2:28, 29; 9:6; 11:25, 26) Den un karta na kristiannan ungí, apòstel  Pedro a deklará: “Boso ta un rasa skohí, un saserdosio real, un nashon santu, un pueblo pekuliar, pa boso por proklamá e alabansanan di esun ku a yama boso for di skuridat na su lus maravioso; pasobra un tempu boso no tabata un pueblo, ma awor boso ta e pueblo di Dios.” (1 Pedro 2:9, 10) Pues, e relashon spesial entre Yehova i Israel karnal a terminá. Na aña 33 di nos era, Yehova a transferí su bendishon for di Israel terenal pa Israel spiritual, esta e kongregashon kristian, ‘un nashon ku sí ta produsí fruta’ di e Reino Mesiániko.—Mateo 21:43.

Dedikashon Individual

15. Riba e dia di Pentekòste di aña 33, Pedro a urgi su oyentenan pa hasi kua boutismo?

¹⁵ Despues di Pentekòste di aña 33, kada persona individual, hudiu òf no-hudiu, tabatin ku hasi un dedikashon personal na Dios i ser batisá “den nòmber di e Tata i di e Yu i di e spiritu santu.” * (Mateo 28:19) Na Pentekòste, apòstel Pedro a bisa hudiunan i prosélitonan reseptivo: “Repentí, i laga kada un di boso wòrdu batisá den e nòmber di Hesukristu pa pordon di boso pikánan; i boso lo risibí e don di spiritu santu.” (Echonan 2:38) E hudiunan i prosélitonan ei tabatin ku indiká mediante nan boutismo no solamente ku nan a dediká nan bida na Yehova sino tambe ku nan a aseptá Hesus komo e medio ku Yehova lo usa pa pordoná nan pikánan. Nan tabatin ku rekonosé Hesus komo Yehova su Sumo Saserdote i komo nan Lider, e Kabes di e kongregashon kristian.—Kolosensenan 1:13, 14, 18.

16. Den tempu di Pablo, kon hende ku tabatin e disposishon korekto—tantu hudiu komo no-hudiu—a bira parti di Israel spiritual?

¹⁶ Añanan despues, apòstel Pablo a deklará: “[Mi] a deklará promé na esnan na Damasko, despues na Yerusalèm i den henter e region di Hudea i na e paganonan, ku nan mester repentí i kombertí na Dios, i hasi obranan ku ta kuadra ku repentimentu.” (Echonan 26:20) Despues di a konvensé hende—tantu hudiu komo no-hudiu—ku Hesus tabata Kristu, e Mesias, Pablo a yuda nan yega na dedikashon i boutismo. (Echonan 16:14, 15, 31-33; 17:3, 4; 18:8) Dor di akudí na Dios, e disipelnan nobo a bira miembro di Israel spiritual.

17. Ki trabou di seyamentu ta serka di terminá, i ki otro trabou ta tumando lugá rápidamente?

¹⁷ Awe, e seyamentu definitivo di e restu di israelitanan spiritual ta serka di terminá. Ora esei keda kompletá, e ‘kuater angelnan’ ku ta wanta e bientunan di destrukshon di “e gran tribulashon” lo haña outorisashon pa laga nan lòs. Miéntras tantu, rekohementu di e “multitut grandi,” ku tin e speransa di biba pa semper riba tera, ta tumando lugá rápidamente. E “otro karnénan” aki boluntariamente ta skohe pa ehersé fe den “e sanger di e Lamchi” i ta batisá komo símbolo di nan dedikashon na Yehova. (Revelashon 7:1-4, 9-15; 22:17; Juan 10:16; Mateo 28:19, 20) Entre nan tin hopi hóben ku a ser eduká pa mayornan kristian. Si bo ta un hóben asina, e siguiente artíkulo lo interesá bo.

[Nota]

Komo Repaso

• Dikon israelitanan hóben no tabatin nodi hasi un dedikashon personal na Yehova?

• Kon e israelitanan por a demostrá ku nan a kumpli ku nan dedikashon?

• Dikon Yehova a rechasá Israel komo su nashon dediká, i kon nan a ser remplasá?

• Di Pentekòste di aña 33 en adelante, kiko tantu hende hudiu komo no-hudiu tabatin ku hasi pa bira miembro di Israel spiritual?

[Preguntanan di Estudio]

[Plachi na página 21]

Muchanan israelita a nase komo miembro di Dios su nashon skohí

[Plachi na página 23]

Kada israelita mester a tuma un desishon personal pa sirbi Dios

[Plachi na página 23]

Ofrendanan boluntario a duna e israelitanan e oportunidat di demostrá nan amor pa Yehova

[Plachi na página 25]

Despues di Pentekòste di aña 33, siguidónan di Kristu tabatin ku hasi un dedikashon personal na Dios i simbolisá esaki mediante boutismo