Historia di Bida

Perseveransia Ta Trese Goso

SEGUN E RELATO DI MÁRIO ROCHA DE SOUZA

“No ta probabel ku Sr. Rocha lo sobrebibí un operashon.” Apesar di e pesimismo di e dòkter, awe, un 20 aña despues, ainda mi ta na bida sirbiendo komo un predikadó di tempu kompletu di Testigunan di Yehova. Kiko a yuda mi perseverá tur e añanan aki?

MI A pasa mi infansia na un hasienda banda di Santo Estêvão, un pueblito den e estado di Bahia, nortost di Brazil. Tempu mi tabatin shete aña, mi a kuminsá yuda mi tata ku trabou di hasienda. Tur dia despues di skol, e tabata duna mi un tarea. Despues di tempu, ki ora ku Tata tabata bai hasi negoshi na Salvador, e stat kapital, e tabata laga e hasienda na mi enkargo.

Ounke nos no tabatin elektrisidat, awa di kranchi òf e otro komodidatnan komun djawe, tòg nos tabata felis. Nos tabata subi fli òf kore e garoshinan di palu ku ami ku mi amigunan tabata traha. Ademas, mi tabata toka klarinèt den proseshonnan religioso. Mi tabata kanta den kor di mucha den e misa lokal, i ta einan mi a mira un buki ku yama História Sagrada, ku a lanta mi kuriosidat den Beibel.

Na 1932, tempu mi tabatin 20 aña, un sekura severo i largu a asotá e parti nortost di Brazil. Nos bestianan a muri i e kultivonan a frakasá, p’esei mi a muda bai Salvador, kaminda mi a haña trabou komo konduktor di tram. Despues mi a hür un kas i a trese mi famia pa biba serka mi. Ora mi tata a muri na 1944, mi a keda ku e enkargo di perkurá pa mi mama i mi ocho ruman muhénan i tres ruman hòmbernan.

 Di Konduktor di Tram pa Predikadó

Un di e promé kosnan ku mi a hasi ora mi a yega Salvador tabata kumpra un Beibel. Despues ku mi a asistí na iglesia baptista pa algun aña, mi a sera amistat ku Durval, un kolega konduktor di tram. Hopi bes ami ku Durval tabata papia oranan largu tokante Beibel. Riba un dia el a duna mi un foyeto titulá Unda e Mortonan Ta? * Ounke mi tabata konvensí ku hende tin un alma inmortal, mi kuriosidat a pone mi buska e tekstonan di Beibel sitá den e foyeto. Pa mi sorpresa, Beibel a konfirmá ku e alma ku ta peka lo muri.—Ezekiel 18:4.

Notando mi interes, Durval a pidi Antônio Andrade, un predikadó di tempu kompletu di Testigunan di Yehova, pa bishitá mi na kas. Despues di su di tres bishita, Antônio a invitá mi pa kompañ’é den e trabou di kompartí siñansanan di Beibel ku otro hende. Despues ku el a papia na e promé dos kasnan, e di: “Awor ta bo bùrt.” Mi tabata hopi nervioso, pero pa mi gran alegria, un famia a skucha ku atenshon i a aseptá e dos bukinan ku mi a ofresé. Te n’e dia djawe, mi ta haña e mesun sintimentu di goso ora mi topa un persona ku ta interesá den e bèrdat di Beibel.

Dia 19 di aprel 1943, riba e aniversario di e morto di Kristu pa e aña ei, mi a batisá den Oséano Atlántiko, banda di Salvador. Pa motibu ku no tabatin sufisiente hòmbernan kristian ku eksperensia, nan a nombra ami pa yuda e grupo di Testigunan ku tabata reuní den kas di Ruman Andrade den un di e kayanan smal ku ta konektá e parti haltu i e parti mas abou di e stat di Salvador.

Oposishon na Prinsipio

Durante e añanan di Segundo Guera Mundial (1939-45) nos aktividat kristian no tabata muchu popular. Algun ofisial tabata sospechá ku nos tabata spion norteamerikano pasobra mayoria di nos publikashonnan tabata bini di Merka. Esei a pone ku ta kada bes nan tabata arestá nos i interogá nos. Ora un Testigu no a bolbe bèk for di sirbishi di vèlt, nos tabata konkluí ku el a ser detené, i nos tabata bai warda di polis pa buska moda di sak’é liber.

Na ougùstùs 1943, Adolphe Messmer, un Testigu aleman, a yega Salvador pa yuda organisá nos promé asamblea. Despues ku nos a haña pèrmit di outoridatnan pa tene e asamblea, nos a kuminsá pone anunsionan pa e diskurso públiko “Libertat den e Mundu Nobo” den korantnan lokal, i tambe plak posternan riba bentana di pakus i den banda di e tramnan. Pero riba e di dos dia di e asamblea, un polis a informá nos ku nos pèrmit pa tene reunion a keda kanselá. E arsobispu di Salvador a pone preshon riba e hefe di polis pa para nos asamblea. Sin embargo, e siguiente aprel nos a haña pèrmit finalmente pa tene e diskurso públiko ku a ser anunsiá mas promé.

 Un Meta pa Alkansá

Na 1946, mi a risibí un invitashon pa asistí na e Asamblea Teokrátiko Nashonnan Gososo den e stat di São Paulo. E kapitan di un barku di karga na Salvador a permití un grupo di nos biaha riba su barku, basta nos a drumi riba dèk. Apesar ku nos a pasa dor di un tormenta durante kua nos tur a maria, despues di kuater dia riba laman nos a yega sano i salvo na Rio de Janeiro. E Testigunan na Rio a risibí nos den nan kas, i nos por a sosegá un par di dia promé ku nos a sigui ku nos biahe ku trein. Un grupo chikitu ku tabatin spandoek ku e mensahe “Bonbiní Testigunan di Yehova” a saludá nos ora nos trein a yega São Paulo.

Djis despues ku nos a regresá Salvador, mi a papia ku Harry Black, un misionero di Merka, tokante mi deseo pa bira pionero, manera predikadónan di tempu kompletu di Testigunan di Yehova ta ser yamá. Harry a rekordá mi ku mi tabatin responsabilidat di famia i a konsehá mi pa mi tene pasenshi. Finalmente, pa yüni 1952, mi rumannan a bira finansieramente independiente, i mi a haña e asignashon pa sirbi komo pionero den un kongregashon chikitu na Ilhéus, kant’i kosta, 210 kilometer sur di Salvador.

Un Provishon Generoso

E siguiente aña, mi a haña asignashon pa bai Jequié, un stat den interior di e pais kaminda no tabatin Testigu. E promé persona ku mi a bishitá tabata e pastor lokal. El a splika mi ku e stat tabata di dje i a prohibí mi di prediká einan. El a spièrta e parokianonan tokante yegada di un “profeta falsu” i a instalá spionnan rònt e stat pa kontrolá mi aktividatnan. No opstante, riba e dia ei mi a laga mas ku 90 literatura bíbliko i a kuminsá kuater estudio di Beibel. Dos aña despues, Jequié tabatin su mes Salòn di Reino ku 36 Testigu! Awe, tin ocho kongregashon i rònt di 700 Testigu na Jequié.

Durante mi promé lunanan na Jequié, mi tabata biba den un kuarto chikitu di hür pafó di e stat. E tempu ei mi a topa Miguel Vaz de Oliveira, doño di Hotel Sudoeste, un di e mihó hotèlnan na Jequié. Miguel a aseptá un estudio di Beibel i a insistí pa mi muda bai den un kuarto na su hotèl. Despues, Miguel ku su kasá a bira Testigu.

Otro grato rekuerdo di e tempu ku mi a pasa na Jequié tin di haber ku Luiz Cotrim, un maestro di skol sekundario ku kende mi a studia Beibel. Luiz a ofresé pa yuda mi mehorá mi konosementu di portugues i matemátika. Apénas mi a kaba skol básiko, p’esei mi a aseptá su invitashon mesora. E lèsnan ei despues di Luiz su estudio di Beibel tur siman a yuda prepará mi pa e privilegionan adishonal ku mi a risibí pronto for di e organisashon di Yehova.

Dilanti un Reto Nobo

Na 1956, mi a risibí un karta di invitashon pa bini na nos sukursal, e tempu ei, na Rio de Janeiro, pa risibí entrenamentu komo superintendente di sirkuito, manera ministernan biahero di Testigunan di Yehova ta ser yamá. E kurso na kua ocho ruman mas a asistí, a dura algu mas ku un luna. Ora mi a kaba e kurso, mi a wòrdu asigná na São Paulo, lokual a pone mi duda un tiki. Mi a puntra mi mes: ‘Kiko ami, un hòmber pretu, ta bai hasi aya meimei di tur e italianonan ei? Nan lo aseptá mi?’ *

 Dia mi a bishitá e promé kongregashon den e distrito di Santo Amaro, mi a keda hopi animá ora mi a mira e Salòn di Reino yen di Testigu i otro hende interesá. Loke a konvensé mi ku mi temornan tabata infundá tabata ku tur e 97 publikadónan di e kongregashon a partisipá den sirbishi di vèlt e fin di siman ei. Mi a pensa den mi mes: ‘Nan en bèrdat ta mi rumannan.’ E kalor di e rumannan stimá ei a duna mi kurashi pa perseverá den e sirbishi biahero.

Buriku, Kabai i Miereneter

Un di e retonan di mas grandi ku superintendentenan biahero tabata haña nan kuné den e tempunan ei tabata e biahenan largu ku nan mester a hasi pa yega na e kongregashonnan i gruponan mas chikitu di Testigu den áreanan pafó di stat. N’e lugánan ei, te na ora ku tabatin transporte públiko mes, e tabata insigur i mayoria di e kamindanan tabata hanchinan smal di tera.

Algun sirkuito a resolvé e problema aki dor di kumpra un buriku òf un kabai pa e superintendente di sirkuito usa. Hopi biaha, riba djaluna, mi tabata pone e sia riba lomba di e bestia, mara mi pertinensianan i kore tin biaha 12 ora pa yega e siguiente kongregashon. Na Santa Fé do Sul, e Testigunan tabatin un buriku ku tabata yama Dourado ku tabata konosé e ruta pa yega e gruponan di estudio den kunuku. Dourado tabata yega para na e portanan di hasienda i warda ku pasenshi pa mi habri esakinan. Despues di e bishita, ami ku Dourado tabata sigui pa e siguiente grupo.

Falta di medionan konfiabel di komunikashon tambe a hasi e trabou di sirkuito un reto. Por ehèmpel, pa por a bishitá un grupo chikitu di Testigu ku tabata reuní na un hasienda den e estado di Mato Grosso, mi tabatin ku krusa Riu Araguaia ku boto i kore 25 kilometer dor di e selva riba lomba di un bestia. Na un okashon, mi a skirbi e grupo pa informá nan di mi bishita, pero aparentemente e karta a pèrdè pasobra niun hende no tabata warda mi ora mi a krusa e riu. Tabata atardi lat, p’esei mi a pidi e doño di un bar chikitu pa wak mi ekipahe, i mi a sali na pia ku mi tas.

A bira skur hopi lihé. Segun ku mi tabata kana trompeká den e skuridat, na un dado momento mi a tende un miereneter ta supla. Mi a yega di tende ku un miereneter por lanta para i mata un hende ku su poderoso patanan di dilanti. Pues ki ora ku mi a tende un zonidu den e matanan ku a krese bou di palu, mi a kana ku kuidou ku mi tas dilanti mi komo un protekshon. Despues di a kana pa oranan largu, mi a yega na un riu chikitu. Pa mi di malu, den e skuridat mi no a ripará ku tabatin prikkeldraad na e otro banda di e riu. Mi a logra bula over di e riu ku un solo stap, pero mi a bin kai riba e prikkeldraad i kòrta mi kurpa!

Finalmente, mi a yega na e hasienda. Mi a wòrdu risibí pa un grupo di kachó ku tabata  blaf. E tempu ei tabata masha komun pa ladronnan di karné ataká hende anochi. P’esei asina ku e porta a habri, mi a identifiká mi mes mesora. E rumannan lo mester a haña duele di mi ora nan a mira mi pañanan tur manchá na sanger. Pero nan tabata kontentu ku mi a yega.

Apesar di e difikultatnan, tabata un dushi tempu. Mi tabata gusta e biahenan largu riba kabai i na pia, tin biaha sosegando den sombra di palu, skuchando e paranan kanta i mirando e zoronan krusa mi dilanti riba e kamindanan bandoná ei. Un otro fuente di goso tabata e echo ku mi bishitanan tabata un berdadero yudansa pa e hendenan. Hopi di nan tabata skirbi mi pa ekspresá nan gratitut. Otronan a gradisí mi personalmente ora nos tabata topa na asambleanan. Tabata un plaser pa mira kon hende tabata vense problema personal i progresá spiritualmente!

Por Fin un Ayudante

Durante e añanan ei den e trabou biahero, hopi bes mi tabata mi so, i esei a siña mi dependé riba Yehova komo “mi baranka i mi fòrti.” (Salmo 18:2) Ademas, mi a realisá ku komo soltero mi por a pone tur mi atenshon na interesnan di Reino.

Sin embargo, na 1978, mi a topa un ruman muhé pionero ku yama Júlia Takahashi. El a kita for di un trabou bon pagá komo verplegster den un hospital grandi na São Paulo pa por a bai sirbi kaminda tabatin mas nesesidat di publikadó di Reino. E ansianonan kristian ku tabata konos’é tabata papia masha bon di su kualidatnan spiritual i abilidatnan komo pionero. Manera bo por imaginá, mi desishon pa kasa despues di asina tantu aña tabata un sorpresa pa algun hende. Un bon amigu di mi no por a kere, i el a primintí mi un toro di 270 kilo si di bèrdat mi a kasa. Na nos resepshon di kasamentu dia 1 di yüli 1978 nos a kome e toro ei na alaparia.

Perseveransia Apesar di Problema ku Salú

Júlia a djòin mi den e trabou biahero, i huntu nos a bishitá kongregashonnan den e parti zùit i zùitost di Brazil durante e ocho añanan ku a sigui. E tempu ei mi a kuminsá haña problema ku kurason. Dos biaha mi a kai flou ora mi tabata papia ku un doño di kas den e trabou di prediká. En bista di mi limitashonnan, nos a aseptá un asignashon komo pionero spesial na Birigüi, Estado di São Paulo.

E Testigunan na Birigüi a ofresé pa hiba mi ku outo pa bishitá un dòkter na Goiânia, rònt di 500 kilometer leu. Unabes mi kondishon a stabilisá, mi a laga hasi un operashon pa pone un pacemaker (markapaso). Esei tabata rònt di 20 aña pasá. Apesar ku mi a hasi dos operashon mas di kurason, ainda mi ta aktivo den e trabou di hasi disipel. Meskos ku hopi otro esposa kristian leal, Júlia ta un fuente konstante di fortalesa i animashon pa mi.

Ounke problema ku salú a limitá mi aktividat i tin biaha ta desanimá mi, ainda mi por traha komo pionero. Mi ta konsiente ku nunka Yehova a primintí nos ku bida den e sistema bieu aki lo ta liber di problema. Si apòstel Pablo i otro kristiannan fiel di antigwedat tabatin ku perseverá, nos lo no tin ku hasi meskos?—Echonan 14:22.

Resientemente, mi a bin topa e promé Beibel ku mi a kumpra den dékada di 1930. Parti paden di e kaft mi a skirbi 350—e kantidat di proklamadó di Reino na Brazil tempu mi a kuminsá asistí n’e reunionnan kristian na 1943. Kasi mi no por kere ku aworakí tin hopi mas ku 600.000 Testigu na Brazil. Esta un privilegio di por a duna un aporte chikitu den e kresementu aki! Yehova sin duda a bendishoná mi perseveransia. Meskos ku e salmista, mi por bisa: “SEÑOR a hasi kosnan grandi pa nos; p’esei nos ta kontentu.”—Salmo 126:3.

[Nota]

[Plachi na página 9]

Testigunan ta anunsiá e diskurso públiko na e promé asamblea den e stat di Salvador, 1943

[Plachi na página 10]

Yegada di Testigunan na São Paulo pa e Asamblea Nashonnan Gososo, 1946

[Plachinan na página 10, 11]

Den e trabou biahero na final di dékada di 1950

[Plachi na página 12]

Huntu ku mi kasá, Júlia