Su Fe Ta Animá Otro Hende

ORA ku Silvia a nase na desèmber 1992, a parse ku e tabata un mucha muhé kompletamente salú. Pero na edat di dos aña, dòkternan a saka afó ku Silvia tin fibrósis kístika, un malesa inkurabel ku gradualmente ta kousa problemanan severo di respirashon i di digestion. Pa trata ku su malesa, Silvia tin ku guli 36 tablèt pa dia, e ta usa remedi ku e mester inhalá i ta haña fisioterapia. Komo ku e kapasidat di su pulmonnan ta 25 porshento so di loke ta normal, e tin ku usa un tanki di oksígeno portátil pa hala rosea, asta ora ku e sali for di kas.

“Pero e manera ku Silvia ta lucha ku e malesa aki ta asombroso,” segun su mama, Teresa. E mama a sigui bisa: “Grásias na su konosementu di e Skritura, e tin un fe firme. E fe aki ta yud’é dil ku su tristesa i dolónan. Semper e ta kòrda riba Yehova su promesa di un mundu nobo, kaminda tur hende enfermo lo ser kurá.” (Revelashon 21:4) Tin biaha ora ku e famia ta desanimá, Silvia su sonrisa yen di konfiansa ta lanta nan ánimo. E ta bisa su mayornan i su ruman hòmber: “Bida den e mundu nobo lo bai kompensá tur nos sufrimentu aktual.”

Silvia ku regularidat ta kompartí e bon notisia di e Palabra di Dios ku otro hende, i e hendenan ku e ta papia kuné ta ripará ku su kara ta bria di felisidat i goso. E miembronan di e kongregashon kristian kaminda e ta asistí na Islanan Canaria, tambe ta gusta tende su komentarionan i di mir’é partisipá den e reunionnan. Anto despues di kada reunion, Silvia gusta keda pa papia ku su rumannan kristian. Su personalidat masha amigabel i alegre a motivá tur hende den e kongregashon pa stim’é.

Su tata, Antonio, a remarká: “Silvia ta siña nos un lès hopi importante. Asta ora nos tin problema, bida ta un regalo for di Dios, i nos mester apresi’é.” Meskos ku Silvia, tur sirbidó di Dios—hóben i bieu—ansiosamente ta spera e tempu ora ku “ningun habitante lo no bisa: ‘Mi ta malu.’”—Isaias 33:24.

[Plachi na página 31]

Silvia ta lesa un versíkulo di Beibel pa un persona miéntras ku su mama ta tene e tanki di oksígeno