Un Bishita Ku A Kousa un Kambio Total

“MI TABATA ansioso pa konta mi famia tokante e dos ‘angelnan’ ku Dios a manda serka mi.” Asina un kabayero ku a haña bishita di dos mucha muhé Testigu di Yehova a skirbi. Un par di siman promé ku nan bishita, su esposa a muri despues ku nan tabatin 45 aña kasá. E hòmber a keda destrosá. Su yunan adulto a dun’é konsuelo, pero nan tabata biba basta leu. Ningun amigu ni bisiña no a bin bishit’é.

“Mi no ta papia ku Dios,” e hòmber a bisa e hóbennan ora nan a bishit’é. Sin embargo, nan a demostrá komprenshon, i a lag’é ku un tratado bíbliko titulá Ki speranza tin pa stimánan cu a fayece? El a les’é e anochi ei i a haña konsuelo.

Poko tempu despues, e dos mucha muhénan kristian a bin bèk. Nan a keda kòrda kon tristu e tabata durante e bishita anterior i nan a pasa pa wak kon a sigui kuné. Despues e hòmber a skirbi: “M’a keda babuká ku dos persona totalmente deskonosí tabata interesá den mi i tabata preokupá pa mi bienestar.” E palabranan ku nan a kompartí kuné for di Beibel a anim’é. E mucha muhénan a bis’é ku nan lo bolbe pasa. E kabayero a keda hopi kontentu i a sintié konmoví pa skirbi e komentarionan menshoná ariba den un karta ku el a manda pa e Salòn di Reino lokal di Testigunan di Yehova.

Promé ku e kabayero aki a muda pa un lugá ku ta keda mas serka di un di su yunan, el a asistí na un reunion kristian di Testigunan di Yehova i a bai kome serka famia di un di e mucha muhénan. El a skirbi: “Mi ta bai for di e área aki, pero e hóbennan ei i boso iglesia semper lo tin un lugá den mi kurason i den mi orashonnan. Sí, awor mi ta hasi orashon, anto hopi. Mi a hasi un kambio total. E hóbennan ei a hunga un papel importante den esei, i lo mi ta semper gradisidu na nan.”