KI UN desaster teribel a asotá humanidat na prinsipio di historia humano! Un angel a rebeldiá kontra e outoridat di Esun ku a trah’é. E rebelde aki a tenta e promé muhé, Eva, pa kome di e fruta prohibí. Refiriendo na Eva ku su kasá, Adam, e angel a bisa: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.” (Génesis 2:16, 17; 3:1-5) E angel rebelde despues a haña e nòmbernan Diabel i Satanas.—Revelashon 12:9.

Akaso Eva a presta atenshon na e palabranan di Satanas? Beibel ta konta nos: “Ora ku e muhé a mira ku e palu tabata bon pa kuminda, i ku e tabata un delisia pa bista, i ku e palu tabata deseabel pa hasi hende bira sabí, el a kohe di su fruta i a kome; i el a duna su esposo tambe ku tabata huntu kuné, i el a kome.” (Génesis 3:6) Sí, e promé pareha, Adam ku Eva, a djòin Satanas den su rebelion. Komo konsekuensia, nan a pèrdè e Paradeis tantu pa nan mes komo pa nan desendiente. Nan yunan ku lo mester a nase perfekto ku bida eterno nan dilanti, awor lo a heredá piká i morto.—Romanonan 5:12.

Kon Yehova Dios, e Gobernante Soberano di universo, a reakshoná? El a fiha komo su propósito pa bin ku un areglo pa pordoná piká. (Romanonan 5:8) Tambe Yehova Dios a establesé un sistema di gobièrnu pa manehá e krísis. E areglo aki ta ser yamá “e reino di Dios.” (Lukas 21:31) E Reino aki tin un propósito spesífiko, i Dios a estables’é komo un parti sekundario di su gobernashon universal.

Kiko ta e propósito di e Reino di Dios? Kiko ta algun di su aspektonan, i kon nan ta na komparashon ku gobernashon humano? Na ki tempu e Reino mester a kuminsá goberná? Nos lo trata e preguntanan aki den e siguiente artíkulo.