“Nos Mester Obedesé Dios Mas Ku Hende”

‘Nos Dios Por Libra Nos’

INTENSHON di e evento tabata p’e ta algu impreshonante. Nan a traha un imágen di oro masha grandi mes riba e sabana di Dura, aparentemente serka di e stat di Babilonia. E imágen lo a keda inougurá durante un seremonia spesial na kua lo a asistí funshonarionan haltu ku mester a bùig dilanti di e imágen na momento ku kuminsá toka un variedat di instrumènt musikal. Rei Nabukodonosor di Babilonia a dekretá ku esun ku keda sin adorá e imágen lo a muri den un fòrnu superkayente. Ken lo a tribi desobedesé e órden aki?

Pa sorpresa di e presentenan, tres persona ku tabata teme Yehova i ador’é—Sadrak, Mesak i Abed-nego—no a bùig. Nan tabata sa ku esei lo tabata un violashon di nan deboshon eksklusivo na Yehova. (Deuteronomio 5:8-10, NW) Ora ku Nabukodonosor a eksigí for di nan pa splika nan posishon firme, nan a bis’é sin tene miedu: “Si t’asina, nos Dios, kende nos ta sirbi, por libra nos for di e fòrnu di kandela kayente-kayente, i e lo libra nos for di bo man, o rei. Ma asta si e no hasi esei, sea sigur, o rei, ku nos no ta bai sirbi bo diosnan, ni adorá e imágen di oro ku bo a lanta.”—Daniel 3:17, 18.

Ora ku a tira e tres hebreonan den e fòrnu di kandela, ta un milager a pone ku nan a skapa. Dios a manda un angel pa protehá su sirbidónan fiel. Pero ya nan a skohe ku nan lo a preferá di muri ku desobedesé Yehova. * Nan a tuma e mesun posishon ku e apòstelnan di Hesukristu, kendenan mas ku seis siglo despues a deklará dilanti di e korte supremo hudiu: “Nos mester obedesé Dios mas ku hende.”—Echonan 5:29.

Lèsnan Masha Importante pa Nos

Sadrak, Mesak i Abed-nego ta ehèmpelnan ekselente di fe, obedensia i lealtat. E tres hebreonan a ehersé fe den Yehova. Nan konsenshi bíblikamente entrená no a permití nan partisipá den ningun akto di adorashon falsu ni di deboshon nashonalista. Kristiannan djawe tambe ta pone nan pleno konfiansa den e Dios berdadero. Nan ta ser guiá pa nan konsenshi bíblikamente entrená i nan ta nenga di partisipá den aktonan di adorashon falsu òf den seremonianan ku ta violá Dios su lei- i prinsipionan.

E tres hebreonan fiel a konfia den Yehova i a nenga di legumai nan obedensia na Dios pa haña a kambio rekonosementu, status òf gloria ku e Imperio di Babilonia tabata ofresé. E hòmbernan hóben ei a preferá di sufri i muri ku daña nan relashon ku Dios. Meskos ku Moisés a hasi mas promé, nan “a keda firme, komo si fuera [nan] tabata mira Esun ku ta invisibel.” (Hebreonan 11:27) Sea ku Yehova a skohe pa libra nan di morto òf nò, e tres hóbennan ei tabata desididu pa mantené  integridat na dje i no komprometé nan fe djis pa salba nan bida. Apòstel Pablo, refiriendo evidentemente na nan ehèmpel, ta menshoná personanan fiel ku “a paga e poder di kandela.” (Hebreonan 11:34) Awe tambe sirbidónan di Yehova ta manifestá tal fe i obedensia ora ku nan ta konfrontá pruebanan di integridat.

For di e eksperensia di Sadrak, Mesak i Abed-nego, nos ta siña tambe ku Dios ta rekompensá lealtat na dje. E salmista a kanta: “Yehova . . . [lo] no bandoná su lealnan.” (Salmo 37:28, NW) Awe, nos no por ferwagt ku Dios ta libra nos milagrosamente, manera el a hasi ku e tres hebreonan. Pero sin importá ki situashon difísil nos ta konfrontá, nos por tin sigur ku nos Tata selestial lo perkurá yudansa. Dios por sea eliminá e problema, duna nos e fortalesa pa soport’é òf resusitá nos si nos mantené nos integridat te na morto. (Salmo 37:10, 11, 29; Juan 5:28, 29) Fe, obedensia i lealtat ta triunfá kada biaha ku nos integridat ser poné na prueba i nos skohe pa obedesé Dios mas ku hende.

[Nota]

[Kuadro/​Plachi na página 9]

BO TABATA SA?

• E tres hebreonan tabatin kasi 30 aña ora ku nan a konfrontá e prueba aki di nan integridat.

• Evidentemente a hasi e fòrnu mas kayente posibel.—Daniel 3:19.