Pregunta di Lektor

Un persona por ser ekspulsá for di e kongregashon kristian pa motibu di impuresa meskos ku pa motibu di fornikashon òf libertinahe?

Sí, un persona por ser ekspulsá for di e kongregashon si e ta praktiká sea fornikashon, sierto forma di impuresa òf libertinahe sin repentí. Apòstel Pablo ta menshoná tur e tres pikánan aki huntu ku otro pikánan ku tambe por hiba na ekspulshon, ora e ta skirbi: “E obranan di karni ta evidente, kuanan ta: inmoralidat [“fornikashon,” NW], impuresa, sensualidat [“libertinahe,” NW] . . . mi ta spièrta boso di antemano . . . ku esnan ku praktiká sorto di kosnan asina lo no heredá e reino di Dios.”​—Galationan 5:19-21.

Fornikashon (na griego, por·néi·a) ta apliká na relashon seksual ilísito pafó di matrimonio bíbliko. E ta enserá adulterio, prostitushon i relashon seksual entre personanan ku no ta kasá, i tambe sèks oral i anal, i karisiamentu di órganonan seksual entre personanan ku no ta kasá ku otro. Un persona ku ta praktiká fornikashon  sin repentí no por ta parti di e kongregashon kristian.

Libertinahe (na griego, a·sél·gei·a) ta nifiká “kondukta desenfrená; bagamunderia, opsenidat, sensualidat.” The New Thayer’s Greek English Lexicon ta definí e palabra griego komo “pashon desenfrená, violashon di normanan di desensia, sinbèrgwenseria, un aktitut sin eskrúpulo.” Segun un otro dikshonario, libertinahe ta un forma di kondukta ku ta “surpasá tur límite di loke ta sosialmente aseptabel.”

Manera e definishonnan menshoná anteriormente ta mustra, “libertinahe” ta enserá dos kos: (1) E kondukta mes ta un violashon serio di e leinan di Dios; i (2) e malechor ta demostrá un aktitut di falta di rèspèt i sin eskrúpulo.

P’esei, “libertinahe” no ta referí na mal kondukta di un karakter menor òf insignifikante. Ta trata aki di aktonan ku ta violashonnan serio di e leinan di Dios i ku ta reflehá un aktitut sin bèrgwensa òf di despresio flagrante—unu ku ta manifestá un falta di rèspèt òf asta despresio pa outoridat, lei- i normanan. Pablo ta konektá libertinahe ku relashon seksual ilísito. (Romanonan 13:13, 14) Siendo ku Galationan 5:19-21 ta menshoná libertinahe huntu ku vários otro práktika pekaminoso ku por stroba un persona di heredá e Reino di Dios, libertinahe por bira e base pa reprendé i posiblemente ekspulsá un persona for di e kongregashon kristian.

Impuresa (na griego, a·ka·thar·sí·a): Di e tres palabranan tradusí komo “fornikashon,” “impuresa” i “libertinahe,” impuresa ta esun di mas amplio. E ta enserá tur tipo di impuresa den asuntunan seksual, den abla, den akshon i den relashonnan spiritual. “Impuresa” ta abarká un variedat amplio di piká serio.

Manera 2 Korintionan 12:21 ta trese dilanti, Pablo ta referí na esnan ku ‘a peka den pasado pero ku no a repentí di e impuresa, e fornikashon i e libertinahe ku nan a praktiká.’ Siendo ku “impuresa” ta ser menshoná huntu ku “fornikashon i libertinahe,” algun forma di impuresa ta bira motibu pa tuma akshon hudisial. Pero impuresa ta un término hopi amplio ku ta enserá kosnan ku no nesesariamente lo hiba na akshon hudisial. Meskos ku un kas por ta sea un poko na stòf òf tur sushi, asina tin vários grado di impuresa.

Na Efesionan 4:19, Pablo ta bisa ku algun hende a ‘pèrdè tur heful i a entregá nan mes na libertinahe pa, ku golosidat, nan praktiká tur klase di impuresa.’ Asina Pablo ta pone ‘impuresa ku golosidat’ den e mesun kategoria ku libertinahe. Si un persona batisá praktiká ‘impuresa ku golosidat’ sin repentí, e por wòrdu ekspulsá for di e kongregashon a base di impuresa grave.

Suponé ku na vários okashon un pareha komprometí pa kasa ta karisiá, brasa i sunchi otro intensamente den un manera ku ta eksitá nan seksualmente. E ansianonan por determiná ku ounke e personanan aki no a manifestá un aktitut sin bèrgwensa ku por wòrdu kualifiká komo libertinahe, tabatin un grado di golosidat den nan kondukta. Pues e ansianonan por tuma akshon hudisial ya ku tabata trata aki di impuresa grave. Impuresa grave por ta un base apropiá tambe pa atendé un kaso ku tin di haber ku un persona ku bes tras bes ta yama otro hende na telefòn pa papia eksplísitamente tokante asuntunan seksual, foral si el a yega di ser konsehá anteriormente kaba tokante e asuntu.

E ansianonan tin ku usa disernimentu ora di evaluá un ke otro. Pa determiná si mester kuminsá un kaso hudisial, nan mester investigá kuidadosamente kiko a tuma lugá i te na ki grado esaki a tuma lugá. No ta kuestion di akusá un persona di libertinahe djis pasobra e no ta aseptá konseho bíbliko. Tampoko no ta djis un asuntu di disidí matemátikamente kuantu biaha un persona por kometé un sierto piká promé ku kuminsá un kaso hudisial. E ansianonan tin ku analisá kada situashon a fondo huntu ku orashon i saka afó kiko a sosodé i ku ki frekuensia, e tipo i e grado di e mal kondukta, i tambe e intenshon i motibu di e malechor.

No ta pikánan seksual so ta kai bou di impuresa grave. Por ehèmpel, kisas un mucha hòmber batisá ta huma un par di sigaria durante un tempu kòrtiku i ta konfesá esaki na su mayornan. E ta determiná pa no huma mas. Por  papia aki di impuresa, pero ku no a eskalá te n’e grado ku el a bira impuresa grave òf ‘impuresa ku golosidat.’ Den un kaso asina, konseho bíbliko di un òf dos ansiano huntu ku e apoyo di mayornan di e mucha lo mester ta sufisiente. Pero si e mucha ta usa tabako regularmente, esaki lo ta un kontaminashon di karni intenshonal, i lo mester forma un komité hudisial pa konsiderá e kaso aki di impuresa grave. (2 Korintionan 7:1) Si e mucha no repentí, lo e ser ekspulsá.

Algun kristian a haña nan enbolbí den wakmentu di pornografia. Esaki ta un piká kontra Dios, i kisas e ansianonan lo keda asombrá ku un ruman den fe a hasi esaki. Pero no ta tur kaso di wakmentu di pornografia lo eksigí un oudiensia dilanti un komité hudisial. Por ehèmpel, suponé ku un ruman hòmber a sinta wak e asina yamá pornografia “soft-core” [pornografia leve] na vários okashon. E ta sinti bèrgwensa di loke el a hasi, e ta konfesá na un ansiano i ta desididu pa no ripití e piká aki. Ta bien posibel ku e ansiano ta yega na e konklushon ku e komportashon di e ruman no a eskalá te n’e grado ku el a bira ‘impuresa ku golosidat;’ ni e no a manifestá un aktitut sin bèrgwensa, lokual ta indiká libertinahe. Ounke no tin motibu pa kuminsá un kaso hudisial, e tipo di impuresa aki lo rekerí konseho bíbliko firme i tal bes mas yudansa di parti di e ansianonan.

Sin embargo, suponé ku un kristian pa hopi aña a sinta wak den sekreto pornografia repugnante ku ta seksualmente degradante i a hasi tur loke ta posibel pa skonde e piká aki. E pornografia ei por ta inkluí violashon seksual na grupo, masokismo (saka plaser seksual for di abusu físiko i humiashon), tortura sadista, maltrato di hende muhé den aktonan seksual òf asta pornografia di mucha. Ora otro hende haña sa di su kondukta, e ta sinti un bèrgwensa profundo. Ounke e no tin un aktitut sin bèrgwensa, e ansianonan por determiná ku el a ‘entregá su mes’ na e kustumber sushi aki i a praktiká ‘impuresa ku golosidat,’ esta, impuresa grave. Nan lo forma un komité hudisial pasobra esaki ta enserá impuresa grave. Si e malechor no demostrá repentimentu piadoso i e determinashon pa nunka mas wak pornografia, lo e wòrdu ekspulsá. Den kaso ku el a invitá otro personanan na su kas pa wak pornografia, den un sentido promoviend’e, el a duna evidensia di un aktitut sin bèrgwensa ku ta karakterístika di libertinahe.

E ekspreshon bíbliko “libertinahe” semper ta enbolbé un piká serio, por lo general un piká seksual. Ora ansianonan ta purba determiná si por papia di libertinahe, nan mester wak si tabatin sinbèrgwenseria, bagamunderia, opsenidat i un komportashon skandaloso pa desensia públiko. Di otro banda, un persona ku kometé un falta serio kontra lei di Yehova—ounke e no a manifestá un aktitut sin bèrgwensa—tòg por ta duna evidensia di “golosidat.” Mester trata e kasonan aki a base di e impuresa grave ku nan ta enbolbé.

E responsabilidat ku ansianonan tin pa determiná si un persona a bai asina leu pa e ta kulpabel di impuresa grave òf libertinahe ta unu serio, pasobra bida di hende ta den wega. Esnan ku ta husga kasonan asina mester resa i pidi Yehova pa su spiritu santu, disernimentu i komprondementu. Ansianonan tin ku mantené e kongregashon limpi i nan mester basa nan huisio riba e Palabra di Dios i tambe riba e guia di “e esklabo fiel i prudente.” (Mateo 18:18; 24:45) I den e tempu malu aki, awor mas ku nunka ansianonan tin ku tene na mente e palabranan: ‘Pensa bon kiko boso ta hasi, pasobra no ta pa hende boso ta husga, sino pa Yehova.’—2 Krónikanan 19:6.