Historia di Bida

Por Fin Nos Famia A Uni!

SEGUN E RELATO DI SUMIKO HIRANO

Mi a haña e mihó manera di biba, i mi a deseá pa mi esposo kompartí esei ku mi. A tuma kuarent’i dos aña pa esei a tuma lugá.

NOS a kasa na 1951, tempu ku mi tabatin 21 aña. Den kuater aña, nos a haña dos yu hòmber, i mi bida a parse bendishoná den tur manera.

Un dia na 1957, mi ruman muhé mayó a bisa mi ku un misionero di Testigunan di Yehova tabata bishitand’e. Ounke e tabata un budista, el a kuminsá studia Beibel ku e misionero i a animá mi pa mi tambe studia Beibel, lokual mi a aseptá. Mi tabata asistí na un iglesia protestant, i mi a pensa ku lo mi por a mustra e Testigunan di Yehova riba supuesto fayonan den nan doktrina.

No a tarda muchu ku mi a deskubrí ku mi tabata sa masha tiki di Beibel. Mi a haña mi ta puntra e misionero: “Ken ta Yehova?” Nunka mi a yega di tende nan usa e nòmber ei den mi iglesia. E misionero, Daphne Cooke (despues Pettitt), a manda mi na Isaias 42:8, ku ta bisa klaramente ku e nòmber di e Dios Todopoderoso ta Yehova. Daphne a kontestá tur mi preguntanan usando Beibel.

Mi a hasi e mesun preguntanan ei na mi domi. El a bisa mi: “Ta un piká pa hasi pregunta. Djis kere loke nos bisa bo.” Ounke mi no a haña ku tabata malu pa hasi pregunta, pa seis luna mi a bai misa tur djadumingu mainta i a asistí n’e reunionnan di Testigunan di Yehova parti atardi.

 E Efekto Riba Mi Matrimonio

Loke mi tabata siña for di Beibel a konmové mi, i mi tabata kompartí esei ku mi esposo, Kazuhiko. Despues di kada estudio i reunion, mi tabata kont’é loke mi a siña. Esei a pone e relashon entre nos dos fria. E no tabata ke pa mi bira Testigu di Yehova. Pero mi tabata gusta studia Beibel asina tantu ku mi a sigui ku mi estudionan i asosiashon ku e Testigunan.

Promé ku mi tabata sali kas riba e anochinan di reunion, mi tabata prepará Kazuhiko su kumindanan faborito p’e, pero el a kuminsá ta bai kome na restorant. Ora mi tabata yega kas bèk despues di reunion, mi tabata hañ’é ku mal beis i e tabata nenga di papia ku mi. Despues di dos òf tres dia, su beis tabata drecha atrobe, pero tabata dia di bai e siguiente reunion.

Rònt di e tempu aki, mi a bira malu ku tuberkulósis, un enfermedat ku ya kaba a kousa vários morto den famia di mi esposo. Kazuhiko a bira masha preokupá i a bisa mi ku dia mi bira bon, lo mi por a hasi kualke kos ku mi tabata gusta. E úniko kos ku mi a pidié tabata p’e tabatin e bondat di permití mi bai mi reunionnan tur siman, lokual el a aseptá.

A tuma seis luna pa mi rekuperá, i durante e tempu ei mi a hasi un estudio intensivo di Beibel. Mi a buska fayo den e siñansanan di e Testigunan, ku e idea ku si mi a haña maske ta un, lo mi a stòp di studia Beibel ku nan. Wèl, mi no por a haña ni un. Na lugá di esei, e doktrinanan eróneo di Iglesia Protestant a bira mas bisto. Mi a yega na konosé e amor i hustisia di Yehova i a mira e benefisio di biba na armonia ku su leinan.

Despues ku mi a rekuperá, mi esposo a kumpli ku su palabra i no a oponé mi baimentu di reunion mas. Mi a sigui krese spiritualmente, i na mei 1958 mi a batisá komo Testigu di Yehova. Mi a anhelá pa mi famia tambe kuminsá adorá e Dios berdadero.

Mi A Yuda Mi Yunan Spiritualmente

Semper mi yunan a kompañá mi na e reunionnan i den e trabou di prediká, pero tabatin algun kos ku a laga mi mira ku nan tabata kresiendo den konosementu di Beibel. Un dia, Masahiko, mi yu hòmber di seis aña, tabata hunga pafó di kas. Mi a tende un zonidu duru i un hende a dal un gritu skèrpi. Un bisiña a kore drenta mi kas, gritando ku outo a dal mi yu. El a muri? Mi a obligá mi mes pa keda kalmu segun ku mi a kore sali pafó. E bista di su baiskel tur machiká a pone mi tembla, pero despues mi a mir’é ta kana yega serka mi, levemente heridá. El a kohe mi tene i bisa: “Mami, Yehova a yuda mi, no ta bèrdat?” Ora mi a mir’é bibu i a tende e bunita palabranan ei, mi a yora.

Un otro dia, den sirbishi nos a topa un biehitu ku tabata grita mi: “Kon bo por hinka den bo kabes pa lastra un mucha chikitu asina bo tras? Mi tin duele di dje.” Promé ku mi por a kontestá, Tomoyoshi, ku e tempu ei tabatin ocho aña, a bis’é: “Opa, no ta mi mama ta fòrsa mi pa prediká. Mi ta prediká pasobra  mi ke sirbi Yehova.” E biehitu a keda wak sin por a bisa niun pia di palabra.

Den sentido spiritual, mi yunan no tabatin tata. Ta ami tabatin ku siña nan e bèrdatnan di Beibel, ounke mi mes tabatin hopi di siña. Mi a kultivá mi mes amor, fe i selo i a purba di pone un bon ehèmpel. Tur dia mi tabata gradisí Yehova dilanti mi yunan. Mi tabata konta nan di mi eksperensianan den e trabou di prediká. Esaki a animá nan. Ora a puntra nan despues pakiko nan a bira pionero, òf predikadónan di tempu kompletu di Testigunan di Yehova, nan a kontestá: “Nos a mira ku nos mama tabata felis sirbiendo komo pionero, i nos tambe ke tabata felis.”

Mi tabata tene masha kuidou pa no papia malu di nan tata ni di ningun miembro di e kongregashon. Mi a realisá ku papiamentu negativo por tabatin un efekto perhudisial riba mi yunan. Nan lo por a pèrdè rèspèt no solamente pa esun ku ta ser kritiká sino tambe pa esun ku ta kritiká.

Mi A Vense Opstákulo pa Progresá

Na 1963 nos famia mester a muda bai Taiwan pa motibu di e trabou di mi esposo. El a bisa mi ku si mi a bai prediká n’e komunidat hapones einan, esei lo a trese difikultat. Nan lo a manda nos bèk Hapon, i esei lo a krea problema pa su kompania. E tabata kier a separá nos for di e Testigunan.

Na Taiwan, kaminda nan tabata tene tur e reunionnan na chines, e Testigunan a duna nos un kordial bonbiní. Mi a disidí di siña chines pa mi por a prediká na e hendenan lokal en bes di e haponesnan. Di e manera ei, lo mi por a evitá e problemanan ku mi esposo a menshoná.

Nos amistat ku e Testigunan na Taiwan a fortalesé nos. Un pareha misionero, Harvey i Kathy Logan, a yuda nos masha tantu. Ruman Logan a bira un tata spiritual pa mi yunan. El a mustra nan ku sirbi Yehova no ta un bida rígido i sin goso. Mi ta kere ku ta tempu ku nos tabata na Taiwan mi yunan a tuma nan desishon di sirbi Yehova.

Tomoyoshi i Masahiko a bai un skol merikano, kaminda nan a siña ingles i tambe chines. E enseñansa ei a prepará nan pa nan futuro sirbishi komo predikadó di e Dios berdadero, Yehova. Mi ta hopi gradisidu na Yehova ku el a kambia loke por tabata un periodo difísil pa nos den un tempu di bendishon duradero. Despues di tres aña i mei memorabel na Taiwan, nos famia a regresá Hapon.

Awor e hóbennan tabata teenager i ke tabata mas independiente. Mi a dediká hopi ora rasonando ku nan riba prinsipionan bíbliko,  i Yehova a yuda nan atraves di e tempu difísil ei. Ora Tomoyoshi a kaba su skol sekundario, el a kuminsá traha komo pionero. E por a yuda kuater persona yega na dedikashon i boutismo durante su promé añanan komo pionero. Masahiko a sigui e ehèmpel di su ruman hòmber i a kuminsá traha pionero mesora despues di skol sekundario. El a yuda kuater hóben bira Testigu den su promé kuater añanan komo pionero.

Pero despues Yehova a drama mas bendishon riba mi yunan. Tomoyoshi a studia ku e esposo di un señora kende ami a yuda siña e bèrdatnan di Beibel. Nan dos yu muhénan tambe a bira Testigu. Despues, Tomoyoshi a kasa ku esun mas grandi, Nobuko, i Masahiko a kasa ku esun mas yòn, Masako. Aworakí Tomoyoshi ku Nobuko ta sirbi n’e sede mundial di Testigunan di Yehova na Brooklyn, New York, i Masahiko ku Masako ta traha komo misionero na Paraguay.

Kambionan Gradual den Mi Esposo

Den e añanan ei, aparentemente mi esposo no tabatin muchu interes den nos religion, pero nos a kuminsá mira señalnan di kambio den dje. Por ehèmpel, ora otro hende tabata bai kontra mi, e tabata defendé mi kreensianan i en realidat e tabata apoyá e bèrdatnan di Beibel sin realisá esei. Ademas, e tabata duna yudansa material na Testigunan den nesesidat. Den un diskurso kòrtiku na kasamentu di un di nos yunan, el a bisa: “E mihó trabou, a la bes esun di mas difísil, ku un hende por hasi, ta esun di siña hende e forma korekto di biba. Mi yunan i nan esposanan a skohe e rumbo difísil aki komo nan karera. Por fabor, yuda nan.” Tur e kosnan aki a pone mi pensa ku un dia e tambe lo a kuminsá sirbi Yehova huntu ku nos.

Mi a hasi areglo p’e asosiá ku otro Testigunan na nos kas. Mi tabata invitá Kazuhiko na reunion- i asambleanan kristian i tambe na e Memorial di e morto di Kristu. Ora su trabou a permitié, e tabata asistí na esakinan, ounke sin muchu smak. Hopi biaha mi tabata sinti ku lo e por a aseptá un estudio di Beibel, p’esei mi tabata invitá ansianonan kristian na nos kas. Pero el a nenga di aseptá un estudio. Mi tabata puntra mi mes ta dikon.

E palabranan di apòstel Pedro a bini na mi mente: “Boso, esposanan, sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.” (1 Pedro 3:1, 2) Mi a realisá ku no ta semper mi a sigui e konseho ei. Pa kumpli kuné kompletamente, mi tabatin ku mehorá mi spiritualidat.

Na 1970, mi a kuminsá traha pionero ku e meta di bira un persona mas spiritual. Dies aña a pasa, despues 20. Ainda mi no a mira kambio spiritual den mi esposo. Un biaha un studiante di Beibel a remarká: “Lo mester ta hopi duru pa yuda otro hende anto bo no por yuda ni bo mes kasá.” Esei a desanimá mi, pero mi no a entregá.

Pa kabamentu di añanan ’80, ya nos mayornan tabata hopi grandi. E trabou di kuida nan, i a la bes kumpli ku mi otro debernan, tabata un kansansio i a kousa hopi strès. Pa hopi aña, nan tur tabata kontra mi fe den Yehova, pero mi a purba mustra nan mi amor mas tantu posibel. Djis promé ku mi mama a muri ku 96 aña di edat, el a bisa mi: “Sumiko, si mi resusitá, lo mi djòin bo religion.” Mi a realisá ku mi esfuersonan no tabata pòrnada.

Mi esposo a tuma nota di tur loke mi a hasi pa nos mayornan. Pa mustra su apresio, el a kuminsá asistí n’e reunionnan regularmente. El a hasi esei pa hopi aña pero sin hasi berdadero progreso spiritual. Mi a sigui purba agrad’é. Mi tabata invitá su amigunan i asta su koleganan di trabou di otro pais pa bin kome serka nos na kas. Mi tabata rekreá huntu kuné. Ora a redusí e rekisito pa sirbishi di pionero na 70 ora pa luna, mi tabata pasa mas tempu huntu kuné.

 Penshon Ta Trese un Kambio

Mi kasá a baha ku penshon na 1993. Mi a pensa ku awor sí lo e tabatin tempu pa studia Beibel. Pero el a bisa ku adorá Dios djis pasobra e tabatin tempu lo ta blasfemia. Mas bien, el a bisa ku lo e adorá Dios ora su kurason impuls’é p’e hasi esei i ku ami no mester a oblig’é.

Un dia Kazuhiko a puntra mi si lo mi kier a pasa e restu di mi bida bibando p’e. Esaki a sinti mi pasobra for di dia mi a kasa kuné mi ta hasiendo tur loke mi por p’e. Mi a hasi hopi esfuerso pa hasié kontentu, pero e tabata haña ku mi tabata biba mas pa Yehova ku p’e. Despues di pensa un ratu, mi a bis’é ku mi no por hasi mas di loke mi tabata hasiendo kaba p’e. Pero si el a djòin mi den loke mi tabata hasiendo, nos lo por a kuminsá un bida nobo huntu ku lo a dura, no pa un par di aña so, sino pa eternidat. Pa hopi dia, mi esposo no tabatin un kontesta. Finalmente el a puntra: “Bon, bo ke studia Beibel ku mi?” Kada bes ku mi pensa riba e palabranan aki, mi kurason ta yena ku goso.

Na promé instante, mi a hasi areglo pa un ansiano kristian studia ku mi esposo, pero el a bisa mi: “Ta ku bo mi ke studia, ku niun otro hende.” P’esei nos a kuminsá studia Beibel tur dia. Siendo ku mi ta den un kongregashon chines i mi kasá ta bon den e idioma ei, nos a studia na chines. Tambe nos a lesa Beibel kompletu huntu den ménos ku un aña.

Durante e tempu aki, un ansiano den e kongregashon chines, huntu ku su kasá, a mustra interes den nos komo pareha. Ounke nan tabata mas yòn ku nos yunan, nan a bira nos bon amigunan. Hopi otro Testigu tambe a mustra un interes spesial den mi kasá. Nan a mustra hospitalidat na nos i a kòmbersá ku Kazuhiko komo si fuera e tabata nan tata. Esei a hasié mashá felis.

Un dia nos a haña un invitashon na kas pa un kasamentu den e kongregashon, dirigí na mi esposo. E rekonosementu ei komo kabes di famia a konmov’é profundamente, i el a disidí di asistí. Djis despues el a bira mas habrí ku e Testigunan i a kuminsá studia Beibel ku un ansiano kristian. Su estudio di Beibel, asistensia na reunion i e amor di e kongregashon a yud’é progresá bon spiritualmente.

Por Fin un Famia Uní

Na desèmber 2000, mi esposo a batisá komo símbolo di su dedikashon na Yehova. Mi yunan i nan kasánan a bini for di leu pa mira e “milager” di tempu moderno aki. A tuma 42 aña, pero por fin nos ta un famia uní.

Awor tur mainta, nos dos ta konsiderá e teksto di dia i ta lesa Beibel huntu. Tur dia, nos ta disfrutá di kòmbersashonnan spiritual i ta partisipá den aktividatnan spiritual. Awor mi esposo ta un sirbidó ministerial den e kongregashon, i resientemente el a duna un diskurso públiko na chines basá riba Beibel. Mi ta gradisí Yehova pa e echo ku el a uni nos. Huntu ku tur famia i amigunan stimá, mi ta anhelá pa sostené su nòmber i soberania pa eternidat.

[Mapa na página 13]

(Pa e teksto den su formato kompleto, wak e publikashon)

CHINA

REPÚBLIKA POPULAR DEMOKRÁTIKO DI KOREA

REPÚBLIKA DI KOREA

Laman di Hapon

HAPON

Tokio

Laman di Ost China

TAIWAN

Taipei

[Plachi na página 12]

Huntu ku mi famia na 1958, e aña ku mi a batisá

[Plachinan na página 13

Tempu ku nos a muda for di Tokio pa Taipei, amigunan manera Harvey i Kathy Logan a fortalesé nos spiritualmente

[Plachi na página 15]

Awe mi famia ta uní den adorashon berdadero