Pronto Tur Hende Lo Sinti Nan Digno

“Nos mester konstruí un mundu nobo​—un mundu muchu mas mihó—​den kua e dignidat eterno di hende ta ser respetá.”​—PRESIDENTE MERIKANO HARRY TRUMAN, SAN FRANCISCO, CALIFORNIA, MERKA, 25 DI APREL 1945.

MESKOS ku hopi hende den e añanan despues di Segundo Guera Mundial, presidente Truman tabata konvensí ku hende por a siña di nan pasado i krea “un mundu nobo” ku dignidat pa tur hende. Lamentablemente, historia moderno ta presentá un otro realidat. Ainda “e dignidat eterno di hende” ta ser trapá pasobra e rais di e problema ta sinta, no serka hende, sino serka e enemigu di mas grandi di hende.

Rais di e Problema

Beibel ta identifiká e enemigu aki komo Satanas e Diabel, un kriatura spiritual malbado ku for di kuminsamentu di historia humano a desafiá e derecho di Dios di goberná. For di ora Satanas a komuniká ku Eva den e hòfi di Edén, su meta tabata pa stroba hende di sirbi nan Kreadó. (Génesis 3:1-5) Pensa riba e konsekuensianan desastroso ku Adam i Eva a haña nan kuné ora nan a sukumbí na e tentashon di Diabel! Dirèkt despues di nan desobedensia na e lei di Dios relashoná ku e fruta prohibí, nan dos a bai “skonde pa e presensia di SEÑOR Dios.” Pakiko? Adam a konfesá: “Mi tabatin miedu, pasobra mi tabata sunú; p’esei mi a bai skonde.” (Génesis 3:8-10)  E  relashon ku Adam tabatin ku su Tata selestial i e manera ku el a mira su mes a kambia. E tabatin bèrgwensa i no tabata sinti su mes kómodo mas den presensia di Yehova.

Pakiko Diabel tabata ke pa Adam pèrdè rèspèt propio? Pasobra hende a ser kreá den imágen di Dios, i Satanas ta gosa pa mira hende aktua na un manera ku ta mancha su refleho di e gloria di Dios. (Génesis 1:27; Romanonan 3:23) Esaki ta yuda nos komprondé pakiko tabatin asina tantu aktonan di humiashon den historia. Satanas, komo “e dios di e mundu aki,” a promové e spiritu aki durante e tempu ku “hende a ehersé outoridat riba . . . hende pa su daño.” (2 Korintionan 4:4; Eklesiastés 8:9; 1 Juan 5:19) Esaki ta nifiká ku nunka mas hende no por sinti nan berdaderamente digno?

Yehova Ta Trata Su Kreashon ku Dignidat

Pensa atrobe riba e kondishonnan ku a eksistí den e hòfi di Edén promé ku Adam i Eva a peka. Nan tabatin kuminda na abundansia, trabou agradabel i e posibilidat di biba pa semper den salú perfekto tantu pa nan mes komo pa nan desendientenan. (Génesis 1:28) Kada aspekto di nan eksistensia a resaltá Dios su propósito amoroso i digno pa humanidat.

Yehova su punto di bista di dignidat humano a kambia ora Adam ku Eva a peka? Nò. El a mustra konsiderashon pa e bèrgwensa ku nan a sinti awor p’e echo ku nan tabata sunú. Den su gran amor, el a traha “bistí di kueru” pa remplasá e blachinan di figu ku nan a kose na otro pa tapa nan kurpa. (Génesis 3:7, 21) En bes di laga nan na bèrgwensa, Dios a trata nan ku dignidat.

Despues, ora Yehova a trata ku e nashon di Israel, el a mustra kompashon pa huérfano, biuda i residente stranhero—miembronan di sosiedat ku hopi bes ta ser tratá malu. (Salmo 72:13) Por ehèmpel, ora e israelitanan tabata kosechá nan grano, oleifi i wendrùif, nan no tabatin mag di bai bèk pa rekohé loke a keda atras. Mas bien, Dios a bisa ku loke a sobra mester a “keda pa e stranhero, pa e huérfano i pa e biuda.” (Deuteronomio 24:19-21) Ora e leinan aki a ser apliká, hende no tabatin nodi kana pidi limosna, i asta pa e hendenan di mas pober tabatin trabou digno.

Hesus A Trata Otro Hende ku Dignidat

Tempu ku Hesukristu, Yu di Dios, tabata na tera, el a demostrá interes den e dignidat di otro hende. Por ehèmpel, den e dianan ku e tabata na Galilea, un hòmber ku tabata tur na lepra a aserk’é. Segun e Lei di Moisés, pa evitá di pega otro hende, e leproso mester a grita: “Impuru! Impuru!” (Levítiko 13:45) Sin embargo, e hòmber aki no a dal un gritu di atvertensia ora el a aserká Hesus. Na lugá di esei, el a kai riba su kara i a roga Hesus: “Señor, si bo kier, bo por hasi mi bira limpi.” (Lukas 5:12)  Kon Hesus a reakshoná? Hesus no a skual e hòmber pa motibu ku el a kibra e Lei, ni E no a ignor’é òf hala leu for di dje. Mas bien, el a trata e leproso na un manera digno dor di mishi kuné i a bisa: “Mi kier, sea limpi.”—Lukas 5:13.

Na otro okashonnan, Hesus a demostrá su kapasidat pa kura sin ningun kontakto físiko—algun biaha for di un distansia. Sin embargo, den e kaso aki el a opta pa mishi ku e hòmber. (Mateo 15:21-28; Marko 10:51, 52; Lukas 7:1-10) Dor ku e hòmber tabata “yen di lepra,” pa hopi aña kaba lo e no tabatin ningun kontakto físiko ku otro hende. Lo mester tabata un gran konsuelo p’e sinti un otro hende mishi kuné atrobe! Tur loke e hòmber a ferwagt tabata p’e kura di su lepra. Pero e manera ku Hesus a kur’é sin duda a yuda restorá algu mas, esta, e hòmber su dignidat. Ta realístiko pa pensa ku e interes ei den e dignidat di otro hende por ta eksistí den e sosiedat djawe? Si ta asina, kon lo e ser manifestá?

E Regla Ku Ta Pone Hende Sinti Nan Digno

Hesus a deklará loke hopi hende ta konsiderá e instrukshon di mas famoso ku a yega di ser duná enkuanto relashonnan humano: “Tur loke boso kier pa hende hasi pa boso, hasi meskos pa nan.” (Mateo 7:12) E Regla di Oro aki, manera e sa ser yamá, ta impulsá un hende pa respetá su próhimo ku e speransa di haña e mesun trato bèk.

Manera historia ta mustra, hende no ta aplikando e regla aki di nan mes. Hopi biaha ta sosodé nèt kontrali. Un hòmber ku nos lo yama Harold a bisa: “Mi tin ku atmití ku ami tabata gusta humiá otro hende. Ku djis un par di palabra, mi por a laga nan keda perturbá,  pone nan na bèrgwensa i asta pone nan yora.” Pero a sosodé algu ku a pone Harold kambia su manera di trata otro hende. “Vários Testigu di Yehova a kuminsá bishitá mi na kas. Ora mi wak bèk, mi ta haña bèrgwensa ora mi pensa riba algun di e kosnan ku mi a bisa nan i e manera ku mi tabata trata nan tin biaha. Pero nunka nan no a entregá, i tiki-tiki e bèrdatnan di Beibel a yega na mi kurason i a motivá mi pa kambia.” Awe, Harold ta sirbi komo ansiano den e kongregashon kristian.

E eksperensia di Harold ta duna prueba ku “e palabra di Dios ta bibu i aktivo i mas skèrpi ku kualke spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Hebreonan 4:12) E Palabra di Dios tin e poder pa konmové un persona su kurason i kambia su manera di pensa i aktua. Esaki ta e klave pa pone otro hende sinti nan digno: un deseo sinsero pa yuda, no pa ofendé, pa onra i no pa humiá.—Echonan 20:35; Romanonan 12:10.

Dignidat Apropiá Restorá

Ta e mesun deseo aki ta motivá Testigunan di Yehova pa papia ku otro hende tokante e speransa maravioso di Beibel. (Echonan 5:42) E mihó manera pa mustra rèspèt pa nos próhimo i trat’é na un manera digno ta di kompartí kuné e “bon nobo di felisidat [“algu mihó,” NW].” (Isaias 52:7) “Algu mihó” ta inkluí bisti “e hende nobo,” ku lo mata e “deseo malu” di humiá otro hende. (Kolosensenan 3:5-10) E ta inkluí tambe e propósito di Yehova pa pronto eliminá e kondishon- i aktitutnan ku ta trapa hende su dignidat, huntu ku e instigadó, Satanas e Diabel. (Daniel 2:44; Mateo 6:9, 10; Revelashon 20:1, 2, 10) Ta solamente n’e tempu ei, ora tera ta “yen di e konosementu di SEÑOR,” tur hende lo sinti nan finalmente digno.—Isaias 11:9.

Nos ta invitá bo pa siña tokante e speransa maravioso aki. Dor di asosiá ku Testigunan di Yehova, bo mes lo mira ku aplikashon di prinsipionan bíbliko ta hasi otro hende digno. Ademas, lo bo por siña kon e Reino di Dios pronto lo trese ‘un mundu nobo i muchu mas mihó,’ un mundu den kua “e dignidat eterno di hende” lo bira un realidat, pa nunka mas e ser trapá atrobe.

[Kuadro/​Plachi na página 6]

Nan Integridat A Konserbá Nan Dignidat

Durante Segundo Guera Mundial, mas ku 2.000 Testigu di Yehova a ser mandá kamponan di konsentrashon nazi pa motibu di nan fe. Impreshoná p’e manera remarkabel den kua nan a demostrá nan integridat, e eks-prezu di Ravensbrück, Gemma La Guardia Gluck, ta konta den su buki My Story: “Na un dado momento Gestapo a anunsiá ku kualke Studiante di Beibel ku a renunsiá su fe i firma un deklarashon pa konfirmá esei lo a haña su libertat i lo no a wòrdu persiguí mas.” Di esnan ku a nenga di firma e deklarashon, e ta skirbi: “Nan a preferá di sigui sufri i spera ku pasenshi riba e dia di liberashon.” Pakiko nan a asumí e posishon ei? Magdalena, menshoná na kuminsamentu di e artíkulo anterior, kende awor tin 80 i piku aña, ta splika: “Keda fiel na Yehova tabata mas importante ku hasi kualke otro kos pa keda na bida. Mantené nos dignidat a nifiká mantené nos integridat.” *

[Nota]

[Plachi na página 5]

Hesus a trata hende ku el a kura ku dignidat

[Plachi na página 7]

Testigunan di Yehova ta trata otro hende ku dignidat dor di kompartí ku nan e “bon nobo di algu mihó”