Sea Sabí i Teme Dios!

‘E temor di Yehova ta e prinsipio di sabiduria.’—PROVERBIONAN 9:10.

1. Dikon hopi hende ta haña e idea di teme Dios un kos difísil pa komprondé?

UN TEMPU, tabata un kòmplimènt pa deskribí un persona komo un hende temeroso di Dios. Awendia, hopi hende ta haña e idea di teme Dios un kos un poko ouderwets i difísil pa komprondé. Kisas nan ta puntra: ‘Si Dios ta amor, pakiko lo mi tin ku tem’é?’ Pa nan, temor ta un emoshon negativo i asta paralisante. Sin embargo, berdadero temor di Dios tin un nifikashon hopi mas amplio i, manera nos lo bai mira, e no ta simplemente un sintimentu òf emoshon.

2, 3. Kiko berdadero temor di Dios ta enserá?

² Den Beibel, temor di Dios ta un karakterístika positivo. (Isaias 11:3) E ta un rèspèt i atmirashon profundo pa Dios, un deseo fuerte di no ke desagrad’é. (Salmo 115:11) E ta inkluí ku bo ta aseptá i pega estriktamente na Dios su normanan moral i ku bo tin e deseo di biba di akuerdo ku loke Dios ta bisa ta bon òf malu. Un dikshonario a señalá ku un temor saludabel asina ta ekspresá “un aktitut fundamental pa ku Dios ku ta hiba na komportashon sabí i na evitá tur forma di maldat.” Apropiadamente e Palabra di Dios ta bisa nos: ‘E temor di Yehova ta e prinsipio di sabiduria.’—Proverbionan 9:10.

³ De echo, temor di Dios ta ligá ku hopi aspekto di asuntunan humano. E ta ser konektá no solamente ku sabiduria sino tambe ku goso, pas, prosperidat, bida largu, speransa i konfiansa. (Salmo 2:11; Proverbionan 1:7; 10:27; 14:26; 22:4; 23:17, 18; Echonan 9:31) E ta estrechamente konektá ku fe i amor. De echo, e ta enserá tur kos ku tin keber ku nos relashon ku Dios i ku nos próhimo. (Deuteronomio 10:12; Jòb 6:14, BPK; Hebreonan 11:7) Temor di Dios ta inkluí e konvikshon profundo ku nos Tata selestial personalmente ta kuida nos i ta kla pa pordoná nos ofensanan. (Salmo 130:4) Ta solamente malbadonan ku no repentí tin motibu pa ta yen di miedu di Dios. *—Hebreonan 10:26-31.

Siña Teme Yehova

4. Kiko por yuda nos ‘siña teme Yehova’?

⁴ Ya ku temor di Dios ta esensial pa nos por tuma desishonnan sabí i haña Dios su bendishon, kon nos por ‘siña teme Yehova’ korektamente? (Deuteronomio 17:19) Den e Skritura tin hopi ehèmpel di hende hòmber i hende muhé temeroso di Dios. E ehèmpelnan ei a keda registrá “pa nos instrukshon.” (Romanonan 15:4) Pa yuda nos komprondé loke teme Dios realmente ta nifiká, laga nos reflekshoná riba e bida di un di e personanan ei: Rei David di antiguo Israel.

5. Kon e trabou di kuida karné a yuda siña David teme Yehova?

⁵ Yehova a rechasá Saul, e promé rei di Israel, debí na Saul su miedu di hende i su falta di temor di Dios. (1 Samuel 15:24-26) Di otro banda, David su bida i su relashon íntimo ku Yehova ta indiká bon kla ku e tabata un hòmber realmente temeroso di Dios. David, for di su hubentut, tabata keda hopi biaha pafó den sabana pa kuida e karnénan di su tata. (1 Samuel 16:11) E anochinan ku David a pasa pafó ta kuida karné bou di e streanan lo mester a yud’é komprondé e temor di Yehova. Ounke David por a mira solamente un parti chikitu di e universo inmenso, el a saka e konklushon korekto, esta, ku Dios meresé nos rèspèt i adorashon. Mas despues el a skirbi: “Ora mi kontemplá bo  shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje? I e yu di hende, ku bo ta hasi kaso di dje?”—Salmo 8:3, 4.

6. Kon David a sinti ora el a ripará Yehova su grandesa?

⁶ Ta na su lugá ku David a keda impreshoná ora ku el a realisá kon chikitu e ta na komparashon ku e shelu inmenso yen di strea. En bes di spant’é, e konosementu aki a motiv’é pa alabá Yehova i bisa: “E shelunan ta konta di e gloria di Dios; i e firmamentu ta proklamá e obra di su mannan.” (Salmo 19:1) E rèspèt i atmirashon profundo aki pa Dios a hala David mas serka di Yehova i a pone ku e kier a siña Yehova su kamindanan perfekto i sigui nan. Imaginá bo kon David a sinti ora ku el a kanta na Yehova: “Bo ta grandi i ta hasi obranan maravioso; abo so ta Dios. Siña mi bo kaminda, o SEÑOR; lo mi kana den bo bèrdat; uni mi kurason pa teme bo nòmber.”—Salmo 86:10, 11.

7. Kon e echo ku David a teme Dios a yud’é bringa kontra Goliat?

⁷ Ora ku e filisteonan a invadí e tera di Israel, nan guerero Goliat, ku tabata midi tres meter haltu, a hasi bofon di e israelitanan i a reta nan, bisando básikamente: ‘Skohe un hòmber pa ami kuné so bringa! Si e gana, nos lo sirbi boso.’ (1 Samuel 17:4-10) Saul i henter su ehérsito tabata morto spantá; pero David sí no. E tabata sa ku Yehova ta esun ku nos mester teme, i no hende, sin importá kon poderoso e hende ta. P’esei David a bisa Goliat: ‘Ami ta bin riba bo den e nòmber di Yehova di ehérsitonan. Pa henter e asamblea aki por sa ku Yehova no ta libra ku spada ni ku lansa; pasobra e bataya ta di Yehova.’ Ku su slenger i un solo piedra—i ku e yudansa di Yehova—David a mata e gigante.—1 Samuel 17:45-47.

8. Kiko nos ta siña for di e ehèmpelnan den Beibel di personanan temeroso di Dios?

⁸ Podisé nos ta konfrontá opstákulo òf enemigu ku ta mesun difísil ku esnan ku David a konfrontá. Kiko nos por hasi? Nos por trata ku nan den e mesun manera ku David i otro personanan fiel di pasado a trata, esta, ku temor di Dios. Temor di Dios por vense miedu di hende. Dios su fiel sirbidó Nehemias a urgi su kompañeronan israelita, ku tabata bou di preshon di opositor: “No tene miedu di nan; kòrda riba Señor [Yehova], kende ta grandi i temibel.” (Nehemias 4:14) Ku e sosten di Yehova, tantu David, Nehemias komo otro sirbidónan fiel di Dios a logra kumpli ku e asignashon ku Dios a duna nan. Ku temor di Dios, nos tambe por.

Enfrentá Problema ku Temor di Dios

9. Den ki sirkunstansianan David a desplegá temor di Dios?

⁹ Despues ku David a mata Goliat, Yehova a dun’é mas viktoria. Sin embargo, Saul a bira hopi yalurs i a purba mata David, na promé instante impulsivamente, despues ku astusia i finalmente ku un ehérsito. Ounke Yehova a sigurá David ku lo e bira rei, pa años David tabatin ku hui, bringa i warda riba Yehova su tempu pa hasié rei. Atraves di tur esaki, David a demostrá ku e tabata teme e Dios berdadero.—1 Samuel 18:9, 11, 17; 24:2.

10. Kon David a demostrá temor di Dios ora el a konfrontá peliger?

¹⁰ Na un okashon, David a buska refugio serka Akis, rei di e stat filisteo di Gat, for di unda Goliat tabata. (1 Samuel 21:10-15) E sirbidónan di e rei a denunsiá David di ta un enemigu di nan nashon. Kon David a reakshoná den e situashon peligroso ei? El a deshogá su kurason den orashon na Yehova. (Salmo 56:1-4, 11-13) Ounke David tabatin ku hasi manera ta loko e ta p’e por a skapa, e tabata sa ku en realidat ta Yehova a libr’é dor di bendishoná su esfuerso. E echo ku David a stèns di henter kurason riba Yehova i e konfiansa ku el a pone den Yehova ta demostrá ku di bèrdat e tabata un hòmber temeroso di Dios.—Salmo 34:4-6, 9-11.

11. Kon nos, meskos ku David, por demostrá temor di Dios ora nos ta pasa den prueba?

¹¹ Meskos ku David, nos por demostrá temor di Dios dor di konfia den su promesa ku lo e yuda nos trata ku nos problemanan. David a bisa: “Enkomendá bo kaminda na SEÑOR, konfia  tambe den dje, i e lo hasié [òf, “e mes lo aktua,” NW].” (Salmo 37:5) Esaki no ke men ku nos ta djis tira nos problemanan riba Yehova sin hasi nada ku nan, anto ferwagt ku é lo solushoná e problemanan pa nos. David no a djis hasi orashon pidi Dios yud’é anto sin hasi nada mas. El a usa su kapasidatnan físiko i intelektual ku Yehova a dun’é i a dil ku e problema su dilanti. Sin embargo, David tabata sa ku e no por a stèns riba esfuerso humano so p’e por tin éksito. Meskos mester ta e kaso ku nos. Despues di a hasi tur loke nos por, nos tin ku laga sobrá den man di Yehova. De echo, hopi biaha no tin nada otro ku nos por hasi sino di dependé riba Yehova. Aki ta kaminda nos ta demostrá personalmente nos temor di Dios. Nos por haña konsuelo den David su ekspreshon sinsero: “E komunion íntimo di SEÑOR ta ku esnan ku ta tem’é.”—Salmo 25:14.

12. Dikon nos tin ku tuma nos orashonnan masha na serio, i ki aktitut nunka nos mester tin?

¹² P’esei nos tin ku mira nos orashonnan i nos relashon ku Dios komo un asuntu masha serio. Ora nos ta aserka Yehova, nos mester “kere ku e ta, i ku e ta Esun ku ta rekompensá esnan ku ta busk’é.” (Hebreonan 11:6; Santiago 1:5-8) Anto ora e yuda nos, nos mester mustra ku nos ta “gradisidu,” manera apòstel Pablo a konsehá nos. (Kolosensenan 3:15, 17) Nunka nos no mester ta manera e personanan deskribí pa un kristian ungí di hopi eksperensia. El a bisa: “Nan ta mira Dios manera un tipo di weter selestial. Ora ku nan tin mester di algu, nan ke djis klap nan man pa Dios kore bin. Anto unabes nan a haña loke nan kier, nan ke p’e bai.” Un aktitut asina ta revelá un falta di temor di Dios.

Ora Ku Temor di Dios A Mengua

13. Na ki okashon David a keda sin mustra rèspèt pa e Lei di Dios?

¹³ E echo ku David a eksperensiá Yehova su yudansa durante angustia a profundisá su temor di Dios i a fortalesé su konfiansa den Yehova. (Salmo 31:22-24) Sin embargo, na tres okashon notabel David su temor di Dios a mengua, lokual a hiba na konsekuensianan serio. E promé okashon tabatin keber ku e areglonan ku el a hasi pa hiba Yehova su arka di aliansa Yerusalèm riba un garoshi en bes di riba skouder di e levitanan, manera e Lei di Dios a manda. Ora ku Uzah, kende tabata dirigí e garoshi, a  kue e Arka tene pa e no kai, el a kai muri mesora pa su “ireverensia,” òf falta di rèspèt. Sí, Uzah a peka gravemente, pero loke na final di kuenta a kousa e resultado trágiko ei tabata pasobra David no a mustra e debido rèspèt pa e Lei di Dios. Temor di Dios ta nifiká hasi kosnan segun su areglo.—2 Samuel 6:2-9; Numbernan 4:15; 7:9.

14. Kiko a resultá for di e echo ku David a konta Israel?

¹⁴ Mas despues David, instigá pa Satanas, a hasi un konteo di e kantidat di hòmbernan guerero den Israel. (1 Krónikanan 21:1) Ku esei David a demostrá ku su temor di Dios a mengua, i esei a hiba na e morto di 70.000 israelita. Ounke David a repentí dilanti di Yehova, é i e pueblo a sufri masha hopi.—2 Samuel 24:1-16.

15. Kiko a pone David kai den piká seksual?

¹⁵ Na un otro okashon David su temor di Dios a mengua temporalmente i esei a pon’é drenta den un relashon inmoral ku Bètsabé, esposa di Urias. David tabata sa ku adulterio òf asta deseá e kasá di un otro hende tabata malu. (Eksodo 20:14, 17) E problema a kuminsá ora ku David a mira Bètsabé ta baña. Debido temor di Dios lo mester a motivá David mesora pa stòp di wak i bai pensa riba otro kos. Pero na lugá di esei, David evidentemente a sigui “wak” Bètsabé te ora ku pashon a superá su temor di Dios. (Mateo 5:28; 2 Samuel 11:1-4) David a lubidá ku Yehova tabata enbolbí den tur aspekto di su bida.—Salmo 139:1-7.

16. Ki konsekuensianan David a sufri pa su malecho?

¹⁶ David su relashon inmoral ku Bètsabé a produsí un yu hòmber. Poko despues, Yehova a manda su profeta Natan pa saka David su piká na kla. Despues di a ser restorá na su sano huisio, David a rekuperá su temor di Dios i a repentí. El a roga Yehova pa no tir’é afó ni kita Su spiritu santu for di dje. (Salmo 51:7, 11) Yehova a pordoná David i a redusí e kastigu, pero e no a  protehá David di tur e mal konsekuensianan di su akshon. David su yu a muri, i doló di kurason i tragedia a asotá su famia djei padilanti. Ki un preis haltu el a paga p’e echo ku su temor di Dios a mengua temporalmente!—2 Samuel 12:10-14; 13:10-14; 15:14.

17. Duna un ehèmpel di e doló ku aktonan pekaminoso ta produsí.

¹⁷ Awe tambe si un hende keda sin demostrá temor di Dios den asuntunan moral esei por tin konsekuensianan serio i duradero. Imaginá bo e doló di un esposa hóben ora ku el a haña sa ku su esposo kristian tabata infiel na dje durante ku e tabata traha den eksterior. Tur doblá di shòk i tristesa, e esposa a tapa su kara ku su mannan i a grita yora. Kuantu tempu lo tuma promé ku su esposo lo por bolbe gana su konfiansa i rèspèt? Konsekuensianan trágiko asina por ser evitá dor di realmente teme Dios.—1 Korintionan 6:18.

Temor di Dios Ta Frena Nos di Piká

18. Kiko ta Satanas su meta i ki método e ta usa pa logra esei?

¹⁸ Satanas ta kabando rápidamente ku e normanan moral di e mundu, i e kier korumpí foral kristiannan berdadero. Pa hasi esei, e ta probechá di nos sentidonan, spesialmente nos bista i nos oido, ya ku nan ta e ruta mas direkto pa yega na nos kurason i nos mente. (Efesionan 4:17-19) Kon abo lo reakshoná si bo haña bo konfrontá ònferwagt ku imágennan, palabranan òf hendenan inmoral?

19. Kon temor di Dios a yuda un kristian vense tentashon?

¹⁹ Tuma e kaso di André, * ku ta un ansiano kristian, tata i dòkter na Europa. Tempu ku André tabatin ku traha warda di henter anochi na hospital, koleganan femenino tabata pega notanan—dekorá tur na kurason—na su kusinchi ku e invitashon p’e tene relashon seksual ku nan. André tabata nenga firmemente di pensa mes riba nan proposishonnan. Es mas, pa saka su mes for di e mal ambiente ei el a buska trabou otro kaminda. E echo ku e tabata teme Dios a resultá di ta e proseder sabí i a hiba na bendishon, pasobra awe André ta sirbi partaim na e sukursal di Testigunan di Yehova den su pais.

20, 21. (a) Kon temor di Dios por yuda nos evitá di kometé piká? (b) Kiko nos lo konsiderá den e siguiente artíkulo?

²⁰ Ora un persona ta keda pensa riba loke ta malu, esei por hib’é na un estado mental kaminda e ta dispuesto pa bandoná su relashon ku Yehova a kambio di algu ku e no tin derecho riba dje. (Santiago 1:14, 15) Di otro banda, si nos ta teme Yehova, nos lo keda leu—nos lo asta kana bai—for di hende, lugá, aktividat i entretenimentu ku lo por pone nos rebahá nos vigilansia moral. (Proverbionan 22:3) Kualke bèrgwensa òf sakrifisio ku esei lo por enserá, ta nada na komparashon ku pèrdè e aprobashon di Dios. (Mateo 5:29, 30) Teme Dios definitivamente ta enserá ku nunka nos lo eksponé nos mes deliberadamente na kos inmoral, i esei ta inkluí kualke forma di pornografia. Mas bien nos ta ‘kita nos bista for di banidat.’ Si nos hasi esei, nos por tin e konfiansa ku Yehova lo preservá nos na bida i perkurá tur loke nos realmente tin mester.—Salmo 84:11; 119:37.

²¹ Sí, aktua ku berdadero temor di Dios semper ta e proseder sabí. Esei ta ademas e fuente di berdadero felisidat. (Salmo 34:9) E siguiente artíkulo lo mustra esaki bon kla.

[Nota]

Bo Por Splika?

• Kua kualidatnan kristian temor di Dios ta inkluí?

• Kon temor di Dios ta kontrarestá miedu di hende?

• Kon nos por demostrá ku nos tin e punto di bista korekto di orashon?

• Kon temor di Dios por frena nos di kometé piká?

[Preguntanan di Estudio]

[Plachi na página 23]

David a siña teme Dios tempu ku el a opservá Yehova su kreashon

[Plachinan na página 24]

Kon abo lo reakshoná si bo haña bo ònferwagt ku un tentashon?