Baruk​—E Fiel Sekretario di Jeremias

BO KONOSÉ “Baruk, yu hòmber di Nerias”? (Jeremias 36:4) Ounke ta den kuater kapítulo so di Beibel e ta ser menshoná, e ta bon konosí serka lesadónan di Beibel komo e sekretario personal di profeta Jeremias i tambe su amigu íntimo. Huntu nan a eksperensiá e último 18 añanan turbulento di e reino di Huda, e destrukshon teribel di Yerusalèm na man di Babilonia na aña 607 promé ku nos era (P.E.K.), i e eksilio na Egipto ku a sigui despues di esei.

Den añanan resien, deskubrimentu di dos bula * di siglo 7 P.E.K. a lanta interes di ekspertonan den e persona aki menshoná den Beibel. E bulanan tabatin e teksto: “Ta pertenesé na Berekhyahu [Baruk su nòmber na hebreo], yu di Neriyahu [Nerias su nòmber na hebreo], e Eskriba.” Ken Baruk tabata? For di kua famia el a bin? Ki edukashon i posishon e tabatin? Kiko e echo ku el a tuma un posishon firme na banda di Jeremias ta revelá? Kiko nos por siña for di dje? Laga nos buska e kontestanan dor di analisá e informashon ku tin den fuentenan bíbliko i históriko.

Baruk Su Antesedente i Posishon

Hopi eksperto djawe ta kere ku Baruk tabata forma parti di un famia prominente di eskriba na Huda. Nan ta duna vários motibu pa e konklushon aki. Por ehèmpel, e relato bíbliko ta referí na Baruk menshonando e título spesial, “e sekretario,” òf “e eskriba” den algun tradukshon. E Skritura ta menshoná tambe ku Seraias, e ruman hòmber di Baruk, tabata un ofisial importante den palasio di Rei Sedekias.—Jeremias 36:32; 51:59.

Arkeólogo Philip J. King a skirbi tokante e eskribanan den tempu di Jeremias: “Eskribanan—miembronan di un grupo profeshonal—tabata prominente den Huda durante e último parti di siglo 7 i prinsipio di siglo 6 P.E.K. . . . E título tabata ser duná na ofisialnan haltu di rei.”

Ademas, e relato na Jeremias kapítulo 36, ku nos lo bai konsiderá en detaye, ta duna e impreshon ku Baruk tabatin akseso na e konseheronan di rei i ku e tabatin mag di usa e sala di reunion di Gemarias, kende tabata un ofisial òf un prens. James Muilenberg, eksperto riba tereno di Beibel, ta duna un motibu pakiko nan ta pensa ku tabata asina: “Baruk por a drenta e sala di reunion di eskriba pasobra e tabatin derecho di hasié i pasobra e mes tambe tabata un miembro di e ofisialnan di rei ku a reuní huntu na e okashon krusial ei di e lesamentu públiko di e ròl. E tabata meimei di su koleganan.”

E publikashon Corpus of West Semitic Stamp Seals (Kolekshon Kompletu di Stèmpel di Seyo Semítiko Oksidental) ta agregá un argumento mas na fabor di Baruk su posishon di eskriba: “Komo ku e bula di Berekhyahu a ser hañá huntu ku un grupo grandi di bula di otro ofisialnan haltu, ta rasonabel pa asumí ku Baruk/Berekhyahu tabata aktua denter di e mesun kategoria ofisial den kua e otro ofisialnan tabata funshoná.” E informashon ku tin disponibel ta indiká ku muy probablemente Baruk ku su ruman hòmber Seraias tabata ofisialnan  haltu ku a sostené fiel profeta Jeremias durante e añanan dramátiko promé ku destrukshon di Yerusalèm.

Baruk Ta Sostené Jeremias Públikamente

A base di kronologia, Baruk ta aparesé pa promé biaha na Jeremias kapítulo 36, den “e di kuater aña di Joakim,” esta, rònt di aña 625 P.E.K. Pa e tempu ei ya Jeremias tabatin 23 aña ta sirbi komo profeta.—Jeremias 25:1-3; 36:1, 4.

E ora ei Yehova a bisa Jeremias: “Kohe un ròl i skirbi riba dje tur e palabranan ku mi a papia ku bo tokante di Israel, tokante di Huda i tokante di tur e nashonnan, . . . for di tempu di Josias, te dia djawe.” E relato ta sigui: “E ora ei Jeremias a yama Baruk, yu hòmber di Nerias, i segun Jeremias tabata dikt’é, Baruk tabata skirbi riba un ròl tur e palabranan di SEÑOR.”—Jeremias 36:2-4.

Dikon el a manda yama Baruk? Jeremias a bis’é: “Mi a wòrdu prohibí; mi no por bai den e kas di SEÑOR.” (Jeremias 36:5) Evidentemente, nan a prohibí Jeremias di drenta e área di tèmpel kaminda e mester a lesa Yehova su mensahe, kisas pasobra e mensahenan anterior a pone e outoridatnan rabia. (Jeremias 26:1-9) No tin duda ku Baruk tabata un adoradó sinsero di Yehova, i el “a hasi konforme tur loke profeta Jeremias a orden’é.”—Jeremias 36:8.

A tuma tempu pa Baruk skirbi e spièrtamentunan ku a ser duná durante e 23 añanan ku a pasa, i podisé Jeremias a warda tambe pa e momento oportuno. Pero den novèmber òf desèmber di aña 624 P.E.K., Baruk ku kurashi “a lesa for di e buki, pa henter e pueblo tende e palabranan di Jeremias, den e kas di SEÑOR, den e sala di Gemarias.”—Jeremias 36:8-10.

Mikaias, yu hòmber di Gemarias, a informá su tata i un kantidat di ofisial di loke a sosodé, i nan a invitá Baruk pa bin lesa e ròl na bos haltu pa di dos biaha. E relato ta bisa: “Awor a sosodé ku ora nan a tende tur e palabranan, un a bira wak otro tur spantá, i a bisa Baruk: ‘Siguramente nos lo raportá tur e palabranan aki na rei. . . . Abo i Jeremias, bai skonde, i no laga ningun hende sa unda boso ta.’”—Jeremias 36:11-19.

Ora ku Rei Joakim a tende loke Baruk a skirbi manera Jeremias a dikta p’e skirbi, el a rabia sker e ròl, i tir’é den kandela. Anto el a duna òrdu na su hòmbernan pa arestá Jeremias i Baruk. Riba òrdu di Yehova, e dos hòmbernan a bolbe skirbi un kopia di e ròl miéntras ku nan tabata skondí.—Jeremias 36:21-32.

No tin duda ku Baruk a realisá ki peliger tabatin den e asignashon aki. Lo e mester tabata sa di e menasanan ku tabatin kontra Jeremias algun aña promé. Tambe lo el a tende di loke a pasa ku Urias, kende a profetisá “palabranan similar na tur esnan di Jeremias,” pero ku Rei Joakim a laga mata. Apesar di esei, Baruk tabata dispuesto pa usa su abilidatnan profeshonal i su kontakto ku ofisialnan gubernamental pa sostené Jeremias den e asignashon aki.—Jeremias 26:1-9, 20-24.

No Buska “Kosnan Grandi”

Durante skirbimentu di e promé ròl, Baruk a pasa dor di un periodo di angustia. El a sklama: “Ai di mi! Pasobra SEÑOR a añadí tristesa na mi doló; mi ta kansá di mi kehamentu i mi no a haña deskanso.” Kiko tabata e motibu di e krísis aki?—Jeremias 45:1-3.

Beibel no ta duna un kontesta direkto. Pero purba imaginá e situashon di Baruk. Hasiendo un resúmen di 23 aña di spièrtamentu duná na e pueblo di Israel i Huda lo mester a hasi nan apostasia i rechaso di Yehova hopi bisto. Yehova su desishon di destruí Yerusalèm i Huda i manda e nashon den eksilio na Babilonia pa 70 aña—un informashon ku Yehova a revelá e aña ei i ku kisas el a inkluí den e ròl—lo mester a shòk Baruk. (Jeremias 25:1-11) Es mas, Baruk tabata kore e riesgo di pèrdè su posishon i su karera debí na e sosten firme ku el a duna Jeremias na e tempu krusial aki.

 Sea kual sea e kaso, Yehova mes a intervení pa yuda Baruk tene na mente e huisio ku tabata na kaminda. Yehova a bisa: “Loke mi a edifiká mi ta bai bash’abou, i loke mi a planta mi ta bai ranka, esta, henter e tera.” Anto el a konsehá Baruk: “Ma abo, bo ta buska kosnan grandi pa bo mes? No buska eseinan.”—Jeremias 45:4, 5.

Yehova no a spesifiká kiko e “kosnan grandi” aki tabata, pero Baruk lo mester tabata sa si esei tabata ambishonnan egoista, prominensia òf prosperidat material. Yehova a konseh’é p’e ta realístiko i kòrda loke tin su dilanti: “Mi ta bai trese desaster riba tur karni, . . . ma lo mi duna bo bo bida komo botin, na tur lugá ku bo bai.” Baruk su poseshon di mas balioso, su bida, lo a ser konserbá na unda ku e bai.—Jeremias 45:5.

Despues di e susesonan aki deskribí den Jeremias kapítulo 36 i 45, ku a tuma lugá di aña 625 pa 624 P.E.K., Beibel no ta menshoná Baruk mas sino te algun luna promé ku e ehérsito di Babilonia a destruí Yerusalèm i Huda na aña 607 P.E.K. Kiko a pasa na e aña ei?

Baruk Ta Bolbe Sostené Jeremias

Durante e tempu ku e ehérsito di Babilonia tabatin Yerusalèm rondoná, Baruk ta bolbe aparesé den e relato bíbliko. Jeremias “tabata será den e plenchi di prizon” ora ku Yehova a bis’é pa kumpra e tereno di su primu na Anatot komo un señal ku lo tin un restorashon. Jeremias a manda yama Baruk pa yud’é ku e trámitenan legal.—Jeremias 32:1, 2, 6, 7.

Jeremias a splika: “Mi a firma i seya e dokumento, i a laga testigunan konfirmá esaki i a pisa e plata den balansa. E ora ei mi a kohe e dokumentonan di benta, tantu e kopia seyá . . . komo e kopia habrí. I mi a duna Baruk.” E ora ei el a duna òrdu na Baruk pa seya e dokumentonan di benta aki den un butishi di klei pa konserbá nan. Tin erudito ta kere ku ora Jeremias a bisa ku el a “firma” e dokumento, esaki ke men ku el a dikt’é pa Baruk, e eskriba profeshonal, kende tabata esun ku a hasi e  trabou di skirbi.—Jeremias 32:10-14; 36:4, 17, 18; 45:1.

Baruk ku Jeremias a sigui e kustumbernan legal di e tempu ei. Un aspekto di esei tabata e dokumentonan dòbel. E buki Corpus of West Semitic Stamp Seals ta splika: “E promé dokumento a ser yamá e ‘dokumento seyá’ pasobra nan a lor’é i sey’é ku un òf vários bula; e tabata kontené e vershon original di e kontrakt. . . . E di dos, e ‘dokumento habrí’ tabata un kopia di e vershon seyá i definitivo, i por a ser usá pa lesamentu normal. Pues, tabatin dos manuskrito, un original i un duplikado, skirbí riba dos papel separá di papiro.” Deskubrimentunan arkeológiko ta konfirmá e kustumber di warda dokumento den butishi di klei.

Al final, e sòldánan di Babilonia a kapturá Yerusalèm, kim’é i a hiba tur hudiu den eksilio, ku eksepshon di algun hende pober. Nabukodonosor a apuntá Gedalias komo gobernadó. Dos luna despues algun hudiu a asesin’é. E hudiunan ku a resta a plania pa muda pa Egipto, bayendo kontra di e konseho inspirá di Jeremias, i den e sirkunstansianan aki Beibel ta bolbe menshoná Baruk.—Jeremias 39:2, 8; 40:5; 41:1, 2; 42:13-17.

E lidernan hudiu a bisa Jeremias: “Bo ta papia mentira! SEÑOR nos Dios no a manda bo bisa: ‘Boso no mester bai Egipto pa keda biba ayanan’; ma Baruk, yu hòmber di Nerias, ta instigá bo kontra nos pa entregá nos den man di e kaldeonan, pa nan mata nos òf hiba nos den eksilio na Babilonia.” (Jeremias 43:2, 3) E akusashon ta revelá ku evidentemente e lidernan hudiu tabata kere ku Baruk a ehersé bastante influensia riba Jeremias. Akaso nan tabata kere ku Baruk a aktua komo mas ku un simpel eskriba pa Jeremias debí na su posishon òf debí na su amistat di hopi aña ku e profeta? Kisas, pero loke sea ku e lidernan hudiu a pensa, e mensahe a bin di Yehova.

Apesar di spièrtamentu divino, e hudiunan ku a resta a bai Egipto i nan a hiba “profeta Jeremias i Baruk, yu hòmber di Nerias” huntu ku nan. Jeremias a skirbi: “Asina nan a drenta tera di Egipto, pasobra nan no a obedesé e bos di SEÑOR, i a yega te na Tafnes.” Tafnes tabata un stat pegá ku frontera den e delta oriental di Riu Nilo, pegá ku Sinaí. Despues di esei, Baruk no ta ser menshoná mas den Beibel.—Jeremias 43:5-7.

Kiko Nos Por Siña for di Baruk?

Tin hopi lès balioso ku nos por siña for di Baruk. Un lès sobresaliente ta e echo ku e tabata dispuesto pa usa e abilidatnan profeshonal i kontaktonan ku e tabatin na fabor di e sirbishi di Yehova, sin importá e konsekuensia. Hopi Testigu di Yehova awe—hòmber i muhé—ta demostrá e mesun aktitut, i ta ofresé pa usa nan abilidatnan en konekshon ku sirbishi di Bètel, trabou di konstrukshon i kosnan por estilo. Kon abo por demostrá e mesun aktitut aki ku Baruk?

Ora ku Dios a rekordá Baruk ku durante e último dianan di Huda no tabata tempu pa “kosnan grandi” personal, el a reakshoná evidentemente den un manera positivo, pasobra el a haña su bida komo botin. Ta na su lugá pa apliká e konseho aki na nos mes, ya ku nos tambe ta biba den e último dianan di un sistema di kosnan. Yehova ta primintí nos mesun kos: lo e spar nos bida. Nos por reakshoná riba tal rekordatorionan meskos ku Baruk a reakshoná?

Ademas tin un lès práktiko ku nos por siña for di e relato aki. Baruk a yuda Jeremias i su primu pa nan hasi e trámitenan legal nesesario den nan asuntu di negoshi, apesar ku e dos hòmbernan ei tabata famia di otro. Esaki ta sirbi komo un presedente bíbliko pa kristiannan ku ta hasi negoshi ku nan rumannan spiritual. Ta bíbliko, práktiko i amoroso pa sigui e ehèmpel di pone akuerdonan komersial riba papel.

Ounke Baruk ta aparesé brevemente den Beibel, ta bale la pena pa tur kristian djawe tuma nota di dje. Abo lo imitá e ekselente ehèmpel di e fiel sekretario di Jeremias aki?

[Nota]

[Plachi na página 16]

Bula di Baruk

[Rekonosementu]

Bula: Kortesia di Museo di Israel, Yerusalèm