Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kon Hesus lo “libra esun den nesesidat,” manera Salmo 72:12 a profetisá?

Durante Hesus su reinado, lo tin hustisia pa un i tur, sin nada di korupshon. Guera hopi biaha ta resultá den pobresa, pero Kristu lo trese pas perfekto. E tin sintimentu pa hende i lo uni tur hende, i lo e hasi sigur ku tin kuminda na abundansia pa humanidat. (Salmo 72:4-16)—1/5, página 7.

• Kon nos komo kristian por desplegá “frankesa di ekspreshon” [NW]? (1 Timoteo 3:13; Filemon 8; Hebreonan 4:16)

Nos por hasi esei dor di prediká na otro hende ku entusiasmo i kurashi, dor di siña hende i duna nan konseho umbes i na un manera efektivo, i dor di deshogá nos kurason serka Dios den orashon, ku e konfiansa ku lo e tende nos orashonnan i kontestá nan.—15/5, página 14-16.

• Dikon bou di e Lei di Moisés, sierto prosesonan natural relashoná ku órganonan seksual a hasi un hende “impuru”?

E leinan relashoná ku impuresa kousá pa emishon di simia, menstruashon i hañamentu di yu a kontribuí na bon higiena i un estilo di bida saludabel. Tambe nan a enfatisá e echo ku sanger ta sagrado i a mustra ku mester hasi ekspiashon pa piká.—1/6, página 31.

• Si un persona ke ta felis, dikon lo ta bon p’e analisá e buki di Salmonan?

E kompositornan di e Salmonan tabata sa ku felisidat ta bin dor di tin un bon relashon ku Dios. (Salmo 112:1) Nan a enfatisá ku ningun relashon humano, ningun poseshon material ni ningun logro personal por trese e felisidat ku hende ta haña dor ku nan ta pertenesé na ‘e pueblo ku su Dios ta Yehova!’ (Salmo 144:15)—15/6, página 12.

• Ki relashon spesial ku Yehova e israelitanan di antigwedat tabatin?

Na aña 1513 promé ku nos era, Yehova a forma un relashon nobo ku e israelitanan, basá riba un aliansa òf pakto. (Eksodo 19:5, 6; 24:7) Despues di esei, israelitanan a nase komo miembro di Dios su nashon skohí i dediká na dje. Pero tòg, kada persona tabatin ku tuma un desishon personal pa sirbi Dios.—1/7, página 21-2.

• Dikon nos mester hasi tur kos “sin murmurá”? (Filipensenan 2:14)

Mayoria ehèmpel bíbliko ta mustra ku murmuramentu a kousa daño den e pueblo di Dios. P’esei ta bon pa nos pensa seriamente riba e influensia destruktivo ku e por tin awe. Hende imperfekto tin e tendensia di keha, i nos mester paga tinu pa detektá kualke señal di esaki i evit’é.—15/7, página 16-17.

• Kon nos por sa ku e deskripshon di sabiduria ku tin na Proverbionan 8:22-31 no ta sabiduria den e sentido apstrakto?

E sabiduria ei a ser “kreá” komo e prinsipio di Yehova su kaminda. Dios semper a eksistí i semper tabata sabí; su sabiduria no a ser kreá. E sabiduria deskribí den Proverbionan 8:22-31 tabata na Dios su lado komo “un trahadó eksperto,” lokual ta apliká na e kriatura spiritual ku a bira Hesus i ku a traha estrechamente ku Dios den kreashon. (Kolosensenan 1:17, NW; Revelashon 3:14)—1/8, página 31.