“Boso A Tende di e Perseveransia di Jòb”

“Boso a tende di e perseveransia di Jòb i a mira e fin ku Señor tabatin na bista, ku Señor ta yen di kompashon i ta miserikòrdioso.”​—SANTIAGO 5:11.

1, 2. Ki prueba un pareha na Polonia a konfrontá?

HARALD ABT tabata Testigu di Yehova pa ménos ku un aña ora ku e ehérsito di Hitler a tuma kontròl di Danzig (awor Gdańsk) den parti nort di Polonia. E ora ei kosnan a bira difísil i asta peligroso pa kristiannan berdadero einan. Gestapo a purba obligá Harald firma un dokumento den kua e ta renunsiá su fe, pero el a nenga. Despues di algun siman den prizon, nan a manda Harald na e kampo di konsentrashon na Sachsenhausen, kaminda bes tras bes nan tabata menas’é i batié. Un ofisial a mustra riba e skorsten di e krematorio i a bisa Harald: “Si bo sigui tene na bo fe, den ménos ku 14 dia lo bo subi for djeinan bai serka bo Yehova.”

² Ora ku nan a arestá Harald, su kasá Elsa ainda tabata duna nan yu muhé di dies luna pechu. Pero Gestapo no a pasa Elsa por haltu. No a tarda hopi ku nan a kita su beibi for di dje, i a manda Elsa na e kampo di eksterminashon na Auschwitz. Sin embargo, meskos ku Harald, el a logra sobrebibí pa años. Den E Toren di Vigilansia na spañó di 15 di mei 1980, bo por lesa mas tokante kon nan a perseverá. Harald a skirbi: “Na tur mi a pasa 14 aña di mi bida den kampo di konsentrashon i prizon debí na mi fe den Dios. Hende a yega di puntra mi: ‘Bo esposa a yuda bo wanta tur esaki?’ Definitivamente el a yuda mi! Mi tabata sa for di prinsipio ku hamas lo el a komprometé su fe, i sabiendo esei a yuda sostené mi. Mi tabata sa ku lo el a preferá di mira mi morto riba un brankar ku sa ku mi a ser librá pasobra mi a komprometé. . . . Elsa a wanta hopi miseria durante e añanan ku el a pasa den kamponan di konsentrashon aleman.”

3, 4. (a) Ken su ehèmpel por animá kristiannan pa perseverá? (b) Dikon Beibel ta urgi nos pa analisá Jòb su eksperensia?

³ Manera hopi Testigu por konfirmá, no ta niun tiki fásil pa sufri maldat. Pa e motibu aki, Beibel ta konsehá tur kristian: “Tuma e profetanan ku a papia den e nòmber di Señor komo un ehèmpel di sufrimentu i di pasenshi.” (Santiago 5:10) Atraves di siglonan, hopi sirbidó di Dios a ser persiguí sin  motibu. E ehèmpelnan ku e ‘nubia grandi aki di testigu’ ta pone pa nos por animá nos pa sigui kore ku perseveransia den nos kareda kristian.—Hebreonan 11:32-38; 12:1.

⁴ Den Beibel, Jòb ta destaká komo un bon ehèmpel di perseveransia. Santiago a skirbi: “Mira, nos ta konsiderá komo bendishoná esnan ku a perseverá. Boso a tende di e perseveransia di Jòb i a mira e fin ku Señor tabatin na bista, ku Señor ta yen di kompashon i ta miserikòrdioso.” (Santiago 5:11) Jòb su eksperensia ta duna nos un idea di e rekompensa ku ta spera personanan fiel ku Yehova ta bendishoná. Mas importante ainda, e ta revelá bèrdatnan ku lo benefisiá nos durante periodonan di atversidat. E buki di Jòb ta yuda nos kontestá e siguiente preguntanan: Ora nos ta bou di prueba, dikon nos tin ku purba komprondé e kuestionnan fundamental ku esei ta enserá? Kua ta e kualidatnan i aktitutnan ku lo yuda nos perseverá? Kon nos por fortifiká nos rumannan kristian ku ta sufri aflikshon?

Kapta e Kuadro Kompletu

5. Kua ta e kuestion prinsipal ku nos mester tene na mente ora nos ta konfrontá prueba òf tentashon?

⁵ Pa nos por mantené nos stabilidat den asuntunan spiritual ora ku nos ta konfrontá atversidat, nos tin ku mira e kuadro kompletu, es desir, komprondé tur e kuestionnan enbolbí. Si no ta asina, problemanan personal lo por pone nos pèrdè nos punto di bista skèrpi di asuntunan relashoná ku nos adorashon. E kuestion di lealtat na Dios ta sumamente importante. Nos Tata selestial ta hasi un apelashon ku nos kada un por tuma na pechu: “Sea sabí, mi yu, i hasi mi kurason kontentu, pa mi por kontestá esun ku reprochá mi.” (Proverbionan 27:11) Ki un privilegio úniko nos tin! Apesar di nos debilidat- i imperfekshonnan, nos por hasi nos Kreadó kontentu. Nos ta hasi esei ora ku nos amor pa Yehova ta kapasitá nos pa resistí prueba i tentashon. Berdadero amor kristian ta soportá tur kos. Nunka e ta faya.—1 Korintionan 13:7, 8.

6. Kon Satanas ta reprochá Yehova, i te na ki grado?

⁶ E buki di Jòb klaramente ta identifiká Satanas komo esun ku ta reprochá Yehova. Tambe e buki ta revelá e karakter malisioso di e enemigu invisibel aki i su deseo pa destruí nos relashon ku Dios. Manera a keda demostrá den e kaso di Jòb, Satanas básikamente ta akusá tur sirbidó di Yehova ku nan motivashon ta egoista i e ta buska manera pa proba ku nan amor pa Dios por fria. E tin míles di aña ta reprochá Dios. Ora ku Satanas a ser tirá for di shelu, un bos den shelu a deskribié komo “e akusadó di nos rumannan,” i a bisa ku e ta hasi e akusashonnan ei “di dia i anochi dilanti di nos Dios.” (Revelashon 12:10) Dor di perseverá fielmente, nos por demostrá ku su akusashonnan ta infundá.

7. Kua ta e mihó manera pa nos kontrarestá debilidat físiko i asina wanta prueba?

⁷ Nos tin ku kòrda ku Diabel lo probechá di kualke tribulashon ku nos lo por ta konfrontá afin di purba alehá nos for di Yehova. Por ehèmpel, ki ora el a tenta Hesus? Despues ku Hesus a yuna pa basta dia i tabatin hamber. (Lukas 4:1-3) Sin embargo, Hesus su fortalesa spiritual a yud’é rechasá e tentashonnan di Diabel firmemente. P’esei ta masha importante pa nos kontrarestá kualke debilidat físiko—kousá podisé pa malesa òf behes—ku fortalesa spiritual! Maske “nos hende eksterior ta  degenerá,” nos no ta entregá pasobra “nos hende interior ta wòrdu renobá dia pa dia.”—2 Korintionan 4:16.

8. (a) Kon e efekto di emoshonnan negativo por debilitá nos? (b) Ki aktitut Hesus tabatin?

⁸ Ademas, emoshonnan negativo tin e tendensia di debilitá nos fortalesa spiritual. Un kristian lo por kuminsá puntra su mes: ‘Dikon Yehova ta permití e kos aki?’ Òf un otro kristian, despues di a ser tratá ku falta di bondat, lo por puntra: ‘Kon un ruman por a trata mi asina?’ Sintimentunan asina lo por pone nos pasa por haltu di e kuestionnan prinsipal i konsentrá kompletamente riba nos sirkunstansianan personal. Jòb a sintié hopi frustrá debí na su tres kompañeronan ku tabatin ideanan inkorekto. E daño emoshonal ku el a sufri debí na esei, tabata mes fuerte ku e daño físiko kousá pa su malesa. (Jòb 16:20; 19:2) Di igual manera, apòstel Pablo a indiká ku keda rabiá pa un periodo prolongá por “duna Diabel oportunidat.” (Efesionan 4:26, 27) En bes di kristiannan baha nan frustrashon òf rabia riba personanan individual òf konsentrá muchu riba e inhustisia di un situashon, ta mihó pa nan imitá Hesus i “konfia [nan] mes na Esun ku ta husga ku hustisia,” esta, Yehova Dios. (1 Pedro 2:21-23) Si nos tin mesun “disposishon mental” ku Hesus, esei por ta un gran defensa kontra e atakenan di Satanas.—1 Pedro 4:1, NW.

9. Ki siguransa Dios ta duna nos relashoná ku e pesonan ku nos tin ku karga òf e tentashonnan ku nos ta konfrontá?

⁹ Mas ku tur kos, nos nunka mester mira nos problemanan komo un evidensia di ku Dios ta mal kontentu ku nos. Ta e mal komprondementu ei a hùrt Jòb ora ku e tabata ser ataká ku e palabranan skèrpi di su supuesto konsoladónan. (Jòb 19:21, 22) Beibel ta sigurá nos: “Dios no por wòrdu tentá dor di maldat, i e mes no ta tenta ningun hende.” (Santiago 1:13) Al kontrario, Yehova a primintí di yuda nos karga kualke peso ku kai riba nos i di proveé salida for di kualke tentashon ku nos ta konfrontá. (Salmo 55:22; 1 Korintionan 10:13) Dor di hala serka Dios den tempu di angustia, nos por evaluá e situashon den un manera ophetivo i resistí Diabel ku éksito.—Santiago 4:7, 8.

Kosnan Ku Por Yuda Nos Perseverá

10, 11. (a) Kiko a yuda Jòb perseverá? (b) Kon un bon konsenshi a yuda Jòb?

¹⁰ Apesar di Jòb su situashon penoso—inkluso e palabranan di abusu di su supuesto konsoladónan i su propio konfushon tokante e berdadero kousa di su kalamidat—tòg Jòb a mantené su integridat. Kiko nos por siña for di su perseveransia? Sin duda, e motibu fundamental pakiko el a logra perseverá tabata su fieldat na Yehova. El a ‘teme Dios i apartá su mes for di maldat.’ (Jòb 1:1) Esei tabata e manera ku el a biba. Jòb a nenga di bira lomba pa Yehova, asta ora ku e no a komprondé dikon diripiente tur kos a bai malu. Jòb tabata kere ku e mester sirbi Dios den tempu bon i den tempu malu.—Jòb 1:21; 2:10.

¹¹ Un otro kos ku a konsolá Jòb tabata e echo ku e tabatin un bon konsenshi. Na momento ku a parse ku su bida tabata yegando su fin, e tabatin e konsuelo di sa ku el a hasi su bèst pa yuda otro hende, ku el a tene firmemente na e normanan hustu di Yehova i ku el a evitá tur forma di adorashon falsu.—Jòb 31:4-11.

12. Kon Jòb a reakshoná riba e yudansa ku el a haña di Eliú?

¹² Pero echo ta ku Jòb tabatin mester di yudansa pa kambia su punto di bista den algun aspekto. Anto humildemente el a aseptá e yudansa ei, lokual tabata un otro faktor klave ku a yud’é perseverá ku éksito. Ku rèspèt Jòb a skucha e konseho sabí di Eliú, i el a reakshoná na un manera positivo riba Yehova su korekshon. El a atmití: “Mi a deklará loke mi no tabata komprondé.” I a agregá: “Mi ta hala mi palabranan atras, i ta repentí den stòf i shinishi.” (Jòb 42:3, 6) Apesar ku ainda Jòb tabata sufri di su malesa, el a keda kontentu ku e ahuste aki di su manera di pensa a hal’é mas serka di Dios. Jòb a bisa: “Mi sa ku bo [Yehova] por hasi tur kos.” (Jòb 42:2) Grásias na e deskripshon ku Yehova a duna di Su grandesa,  Jòb a komprondé muchu mas mihó kiko tabata su posishon na komparashon ku e Kreadó.

13. Kon e echo ku Jòb a mustra miserikòrdia a resultá probechoso p’e?

¹³ Por último, Jòb ta un ehèmpel sobresaliente di miserikòrdia. Su konsoladónan falsu a hùrt e profundamente, pero tòg ora Yehova a pidi Jòb hasi orashon pa nan, el a hasi esaki. Despues di esei, Yehova a restorá Jòb su salú. (Jòb 42:8, 10) Ta bisto anto ku karga renkor lo no yuda nos perseverá, miéntras ku mustra amor i miserikòrdia sí lo yuda nos. Ora nos stòp di karga renkor nos ta sinti nos refreská den sentido spiritual, i esei ta un proseder ku Yehova ta bendishoná.—Marko 11:25.

Konseheronan Sabí Ku Ta Yuda Nos Perseverá

14, 15. (a) Kua kualidatnan lo yuda un konsehero kura otro hende? (b) Splika dikon Eliú tabatin éksito den yuda Jòb.

¹⁴ Un lès mas ku nos por siña for di e relato di Jòb ta e balor di konsehero sabí. Personanan asina ta manera ruman “nasí pa tempu di atversidat.” (Proverbionan 17:17) Sin embargo, manera e eksperensia di Jòb ta mustra, tin konsehero por kousa herida na lugá di kura. Un bon konsehero tin ku mustra komprenshon, rèspèt i bondat, meskos ku Eliú a hasi. Ansianonan i otro kristiannan maduro kisas tin ku ahustá e manera di pensa di rumannan ku ta kargá ku problema, i den esaki e konseheronan ei por siña hopi for di e buki di Jòb.—Galationan 6:1; Hebreonan 12:12, 13.

¹⁵ Tin hopi lès ekselente ku nos ta saka for di e manera ku Eliú a atendé e asuntu. El a skucha ku pasenshi promé ku el a reakshoná riba e komentarionan eróneo di Jòb su tres kompañeronan. (Jòb 32:11; Proverbionan 18:13) Eliú a yama Jòb na su nòmber i a apelá na dje manera un amigu. (Jòb 33:1) Distinto for di e tres konsoladónan falsu, Eliú no a konsiderá su mes superior ku Jòb. E di: “Mi tambe a wòrdu formá for di klei.” E no kier a laga Jòb sufri mas tantu dor di papia palabranan sin pensa. (Jòb 33:6, 7; Proverbionan 12:18) Anto en bes di kritiká Jòb su kondukta anterior, Eliú a elogi’é pa su hustisia. (Jòb 33:32, NW) Mas importante ainda, Eliú a mira kosnan for di Dios su punto di bista, i el a yuda Jòb enfoká riba e echo ku Yehova nunka lo aktua inhustamente. (Jòb 34:10-12) El a animá Jòb pa warda riba Yehova, en bes di purba demostrá su propio hustisia. (Jòb 35:2; 37:14, 23) Ansianonan kristian i otro hende sigur por benefisiá di e lèsnan ei.

16. Kon Jòb su tres konsoladónan falsu a bira hèrmènt di Satanas?

¹⁶ Eliú su konseho sabí tabata un kontraste ku e palabranan ofensivo di Elifaz, Bildad i Sofar. Yehova a bisa nan: “Boso no a papia di mi loke ta rekto.” (Jòb 42:7) Asta si nan a pretendé ku ta ku bon intenshon nan a hasié, nan a aktua mas komo hèrmènt di Satanas ku komo kompañeronan fiel. Tur tres a asumí for di prinsipio ku e kalamidatnan di Jòb tabata su mes falta. (Jòb 4:7, 8; 8:6; 20:22, 29) Segun Elifaz, Dios no tin konfiansa den su sirbidónan, i e no tin kunes si nos ta hustu òf nò. (Jòb 15:15; 22:2, 3) Elifaz asta a akusá Jòb di erornan ku e no a kometé. (Jòb 22:5, 9) Eliú, di otro banda, a fortalesé Jòb p’e bolbe haña un punto di bista balansá di su relashon ku Dios, lokual semper ta e meta di un konsehero amoroso.

17. Kiko nos mester tene na mente ora nos ta bou di prueba?

 ¹⁷ Tin un otro lès tokante perseveransia ku nos por saka for di e buki di Jòb. Nos Dios amoroso ta opservá nos situashon i e tin tantu e boluntat komo e poder pa yuda nos den vários manera. Na prinsipio di e artíkulo aki nos a menshoná e eksperensia di Elsa Abt. Reflekshoná un ratu riba e konklushon ku el a saka: “Promé ku nan a arestá mi, mi a lesa un karta di un ruman muhé ku a bisa ku bou di prueba severo e spiritu di Yehova ta laga bo sinti un trankilidat. Mi a pensa ku e ruman lo mester tabata eksagerá un poko. Pero ora ku mi mes a pasa den prueba, mi a realisá ku loke el a bisa tabata bèrdat. Di bèrdat esei ta sosodé. Ta difísil pa imaginá esei si bo mes no a eksperensi’é. Sin embargo, esei ta realmente loke a pasa ku mi. Yehova ta yuda.” Elsa no tabata papia di loke Yehova lo por hasi òf a hasi míles di aña pasá den tempu di Jòb. E tabata papia di nos tempu. Sí, “Yehova ta yuda”!

Felis Ta e Hende Ku Perseverá

18. Ki benefisionan Jòb a saka dor di perseverá?

¹⁸ Poko di nos lo tin ku enfrentá tribulashonnan severo manera esnan ku Jòb a eksperensiá. Pero sea kual sea e pruebanan ku e sistema di kosnan aki ta trese riba nos, nos tin motibunan válido pa mantené nos integridat meskos ku Jòb a hasi. De echo, perseveransia a enrikesé Jòb su bida. Esei a hasi Jòb perfekto, es desir, kompletu. (Santiago 1:2-4) Perseveransia a fortalesé su relashon ku Dios. Jòb a afirmá: “Ta tende mi a tende di bo, ma awor mi wowo ta mira bo.” (Jòb 42:5) Tambe a keda demostrá ku Satanas ta un mentiroso i ku e no por a kibra Jòb su integridat. Siglonan despues, Yehova tabata referí ainda na su sirbidó Jòb komo un ehèmpel di hustisia. (Ezekiel 14:14) Jòb su registro di integridat i perseveransia ta motivá Dios su pueblo te awe.

19. Dikon bo ta haña ku perseveransia ta bale la pena?

¹⁹ Ora ku Santiago a skirbi na e kristiannan di promé siglo tokante perseveransia, el a referí na e satisfakshon ku perseveransia ta trese. Anto el a usa Jòb su ehèmpel pa rekordá nan ku Yehova ta rekompensá su sirbidónan fiel rikamente. (Santiago 5:11) Nos ta lesa na Jòb 42:12: “[Yehova] a bendishoná e último dianan di Jòb mas ku e proménan.” Dios a duna Jòb dòbel di loke el a pèrdè, i Jòb tabatin un bida largu i felis. (Jòb 42:16, 17) Di igual manera, kualke doló, sufrimentu òf pena ku nos kisas tin ku wanta durante e fin di e sistema di kosnan aki lo ser eliminá i lubidá den Dios su mundu nobo. (Isaias 65:17; Revelashon 21:4) Nos a tende di e perseveransia di Jòb, i nos ta determiná—ku Yehova su yudansa—pa imitá Jòb su ehèmpel. Beibel ta primintí: “Bendishoná [“Felis,” NW] ta un hende ku ta perseverá den prueba; pasobra unabes ku el a pasa e prueba, e lo risibí e korona di bida, ku Señor a primintí na esnan ku ta stim’é.”—Santiago 1:12.

Kon Lo Bo Kontestá?

• Kon nos por hasi Yehova su kurason kontentu?

• Dikon nos no mester konkluí ku nos problemanan ta evidensia ku Dios ta mal kontentu ku nos?

• Kua ta e faktornan ku a yuda Jòb perseverá?

• Kon nos por imitá Eliú ora di fortifiká nos rumannan den fe?

[Preguntanan di Estudio]

[Plachi na página 28]

Un bon konsehero ta mustra komprenshon, rèspèt i bondat

[Plachinan na página 29]

Elsa i Harald Abt