Jòb​—Un Hòmber di Perseveransia i Integridat

“Bo a konsiderá mi sirbidó Jòb? Pasobra no tin ningun hende manera é riba tera, un hende perfekto i rekto, ku ta teme Dios i ku ta apartá su mes for di maldat.”​—JÒB 1:8.

1, 2. (a) Ki tragedianan inesperá Jòb a eksperensiá? (b) Deskribí Jòb su bida promé ku e tragedianan.

TABATIN un hòmber ku a parse di tin tur kos: rikesa, prestigio, bon salú i un bida di famia felis. Diripiente tragedia a bati tres biaha na su porta, un tras di otro. Den un tiru el a pèrdè su rikesa. Despues un tormenta inusual a mata tur su yunan. Poko despues, el a haña un malesa debilitante ku a laga henter su kurpa tur na blufein masha doloroso. Probablemente bo a realisá ku ta trata aki di Jòb, un personahe prinsipal den e buki bíbliko ku ta karga su nòmber.—Jòb, kapítulo 1 i 2.

² Jòb a keña: “Mara mi tabata manera mi tabata lunanan pasá.” (Jòb 3:3; 29:2) Ora kalamidat asotá nos, ta ken no ta anhelá e bon tempu di ántes? Den kaso di Jòb, el a hiba un bida rekto, aparentemente protehá kontra tragedia i desaster. Hendenan prominente tabata respet’é i buska su konseho. (Jòb 29:5-11) E tabata riku, pero ku un punto di bista balansá di plaka. (Jòb 31:24, 25, 28) Ora ku el a topa huérfano i biuda den nesesidat, el a yuda nan. (Jòb 29:12-16) I e tabata fiel na su esposa.—Jòb 31:1, 9, 11.

3. Kiko Yehova tabata pensa di Jòb?

³ Jòb a hiba un bida rekto i sin kulpa pasobra e tabata adorá Dios. Yehova a bisa: “No tin ningun hende manera é riba tera, un hende perfekto [“sin kulpa,” NW] i rekto, ku ta teme Dios i ku ta apartá su mes for di maldat.” (Jòb 1:1, 8) Pero apesar di Jòb su integridat moral, tragedia a pone un fin na su bida kómodo. Tur loke el a traha p’e a disparsé, i doló, angustia i frustrashon a tèst su berdadero karakter.

4. Dikon lo ta bon pa nos konsiderá Jòb su prueba difísil?

⁴ Klaru ku Jòb no ta e úniko sirbidó di Dios ku a sufri kalamidat personal. Hopi kristian djawe fásilmente por mira algun similaridat entre nan eksperensia i esun di Jòb. Pa e motibu aki ta bale la pena pa nos konsiderá dos pregunta: Kon un repaso di Jòb su prueba difísil por yuda nos ora nos ta konfrontá tragedia? I kon e por siña nos pa ta mas komprensivo ku hende ku ta sufri?

 Un Kuestion di Lealtat i un Prueba di Integridat

5. Segun Satanas, pakiko Jòb tabata sirbi Dios?

⁵ Jòb su kaso tabata eksepshonal. Sin ku Jòb tabata sa, Diabel a kuestioná e berdadero motibu pakiko Jòb tabata sirbi Dios. Ora ku Yehova durante un reunion den shelu a hala atenshon na Jòb su kualidatnan ekselente, Satanas a kontestá: “Bo no a traha un tranké rònt di dje, rònt di su kas, i rònt di tur loke e tin na tur banda?” Pues Satanas a pretendé ku loke a motivá Jòb tabata interes propio, i indirektamente el a duna di konosé ku esei tabata konta pa tur sirbidó di Dios. Satanas a bisa Yehova: “Saka bo man awor i mishi ku tur loke e tin; siguramente e lo maldishoná bo den bo kara.”—Jòb 1:8-11.

6. Kua kuestion importante Satanas a lanta?

⁶ Esaki tabata un kuestion importante. Satanas a kuestioná e manera ku Yehova ta ehersé su soberania. Ta realmente posibel pa Dios goberná e universo pa medio di amor? Òf egoismo na final di kuenta semper lo sali ganá, manera Satanas a insinuá? Yehova a permití Diabel usa Jòb su kaso komo un ehèmpel, teniendo konfiansa den e integridat i lealtat di Su sirbidó. Pues, ta Satanas mes a kousa e kalamidatnan ku a asotá Jòb un tras di otro. Ora ku Satanas a frakasá ku su atakenan inisial, el a suta Jòb ku un malesa doloroso. Diabel a pretendé: “Kueru pa kueru! Sí, tur loke un hende tin e lo duna pa su bida.”—Jòb 2:4.

7. Kua ta e maneranan ku sirbidónan di Dios djawe ta haña nan konfrontá ku pruebanan similar na esnan di Jòb?

⁷ Ounke ku mayoria kristian djawe no ta sufri te na e grado ku Jòb a sufri, nan ta enfrentá diferente tipo di tribulashon. Hopi kristian ta konfrontá persekushon òf problema den famia. Difikultat ekonómiko òf problema ku salú por ta devastador. Tin ku a entregá nan bida pa motibu di nan fe. Klaru ku nos no tin ku asumí ku Satanas personalmente ta kousa delaster un tragedia ku nos ta sufri. De echo, tin problema ku kisas ta ser kousá asta dor di nos propio erornan òf dor di un kondishon físiko heredá. (Galationan 6:7) Ademas, nos tur ta ser afektá pa e efektonan perhudisial di behes i di desasternan natural. Beibel ta splika bon kla ku den e tempu aktual Yehova no ta protehá su sirbidónan milagrosamente for di e aflikshonnan aki.—Eklesiastés 9:11, NW.

8. Kon Satanas lo por purba probechá di e tribulashonnan ku nos ta sufri?

⁸ Sin embargo, Satanas lo por usa e tribulashonnan ku nos ta pasa aden pa debilitá nos fe. Apòstel Pablo a konta ku e tabata sufri di “un sumpiña den karni, un mensahero di Satanas,” ku tabata blo dal e “bòftá.” (2 Korintionan 12:7) Sea ku esaki tabata un problema físiko, podisé bista skur òf algu otro, Pablo a komprondé ku Satanas lo por a usa e problema i e frustrashon ku esaki a trese kuné, pa kibra Pablo su goso i integridat. (Proverbionan 24:10) Awe, Satanas lo por instigá miembronan di famia, kompañeronan di skol òf asta gobièrnunan diktatorial pa den un manera òf otro persiguí e sirbidónan di Dios.

9. Dikon nos no mester keda muchu sorprendí si nos konfrontá atversidat òf persekushon?

⁹ Kon nos por enfrentá e problemanan aki ku éksito? Dor di mira nan komo un oportunidat pa demostrá ku nos amor pa Yehova i nos sumishon na su soberania no ta algu inkonsistente. (Santiago 1:2-4) Sea kual sea e kousa di nos angustia, si nos ta komprondé e importansia di lealtat na Dios, esei lo yuda nos mantené nos stabilidat den asuntunan relashoná ku nos adorashon na Yehova. Apòstel Pedro a skirbi e kristiannan: “Stimánan, no sea sorprendí pa motibu di e kandela di prueba ku tin meimei di boso, ku ta bin riba boso pa boso wòrdu probá, komo si fuera ta algu straño ta pasa ku boso.” (1 Pedro 4:12) Anto Pablo a splika: “Tur hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12) Te ainda Satanas ta kuestioná e integridat di e Testigunan di  Yehova, meskos ku el a hasi den e kaso di Jòb. De echo, Beibel ta indiká ku Satanas a oumentá su atakenan kontra e pueblo di Dios durante e último dianan aki.—Revelashon 12:9, 17.

Un Mal Komprondementu i Algun Mal Konseho

10. Ki desbentaha Jòb tabatin?

¹⁰ Jòb tabatin un desbentaha ku nos no tin nodi eksperensiá. E no tabata sa dikon e tabata pasa den e kalamidatnan aki. Eróneamente Jòb a konkluí ku den un manera òf otro ta ‘Yehova a duna i Yehova a kita.’ (Jòb 1:21) Podisé Satanas deliberadamente a purba duna Jòb e impreshon ku ta Dios tabata esun ku a kousa su sufrimentu.

11. Splika kon Jòb a reakshoná riba su kalamidatnan.

¹¹ Jòb a bira profundamente desanimá, ounke el a nenga di maldishoná Dios, manera su kasá a urgié pa hasi. (Jòb 2:9, 10) Jòb a bisa: ‘Kos ta bai mas bon pa e malbadonan ku pa ami.’ (Jòb 21:7-9) Lo e mester a puntra su mes: ‘Dikon Dios ta kastigá mi?’ Tabatin biaha ku simplemente e kier a muri. El a sklama: “O ku bo lo a skonde mi den Seol, ku bo lo a skonde mi te ora bo furia pasa!”—Jòb 14:13.

12, 13. Kon e komentarionan di Jòb su tres kompañeronan a afekt’é?

¹² Jòb tabatin tres kompañero ku a bishit’é, supuestamente pa “kondoler Jòb i konsol’é.” (Jòb 2:11) Sin embargo, nan a resultá di ta “konsoladó molestoso.” (Jòb 16:2, NW) Jòb lo por a benefisiá di amigunan serka ken lo e por a deshogá su mes relashoná ku su problemanan, pero e tres kompañeronan aki a konfundí Jòb mas tantu i a lag’é sinti mas frustrá.—Jòb 19:2; 26:2.

¹³ Ta di komprondé ku Jòb lo por a puntra su mes: ‘Dikon nèt ami? Kiko mi a hasi pa meresé tur e kalamidat aki?’ Su kompañeronan a dun’é splikashonnan ku tabata totalmente falsu. Por ehèmpel, nan a asumí ku ta Jòb mes a trese sufrimentu riba su kabes dor di kometé un òf otro piká serio. Elifaz a puntra: “Ken a yega di peresé, siendo inosente?” I el a agregá: “Konforme loke mi a mira: esnan ku plug inikidat i esnan ku sembra problema, ta kosechá esei.”—Jòb 4:7, 8.

14. Dikon nos no mester konkluí outomátikamente ku sufrimentu ta debí na mal kondukta?

¹⁴ Ta bèrdat ku problema por surgi si nos ta sembra segun karni en bes di segun spiritu. (Galationan 6:7, 8) Sin embargo, den e mundu aktual problema por surgi sin importá kon nos komportá nos mes. Es mas, di ningun manera no ta asina ku hende inosente ta ser di spar di tur kalamidat. Hesukristu, kende tabata “sin mancha, separá for di pekadónan,” a sufri un morto doloroso riba un staka di tormento, i apòstel Santiago a muri komo mártir. (Hebreonan 7:26; Echonan 12:1, 2) E rasonamentu robes di Elifaz i su dos kompañeronan a pone Jòb defendé su bon reputashon i insistí riba su inosensia. Pero tòg, nan alegashonnan insistente ku evidentemente Jòb su sufrimentu tabata debí na mal kondukta, kisas a influensiá Jòb su punto di bista di Dios su hustisia.—Jòb 34:5; 35:2.

Kon pa Haña Yudansa Ora Nos Ta Konfrontá Tribulashon

15. Ki rasonamentu lo yuda nos ora nos ta konfrontá sufrimentu?

¹⁵ Nos por siña un lès for di esaki? Tragedia, malesa òf persekushon por parse masha inhustu. Kisas ta manera ku otro hendenan sí ta skapa di hopi di e problemanan ei. (Salmo 73:3-12) Tin biaha, nos lo tin ku puntra nos mes e preguntanan fundamental aki: ‘Mi amor pa Dios ta motivá mi pa sirbié pase loke pase? Mi ta anhelá pa duna Yehova “un kontesta na esun ku ta reproch’é?”’ (Proverbionan 27:11; Mateo 22:37) Nunka nos no mester laga komentarionan deskonsiderá di otro hende pone nos duda ku nos Tata selestial lo yuda nos. Un kristian fiel ku pa hopi aña a sufri di malesa króniko a bisa un biaha: “Mi sa ku loke  sea ku Yehova permití, pa mi ta bon. Mi sa ku lo e duna mi e fortalesa ku mi mester. Semper el a hasi esei.”

16. Kon e Palabra di Dios ta perkurá yudansa pa personanan ku ta konfrontá difikultat?

¹⁶ Relashoná ku e táktikanan di Satanas, nos ta den un mihó posishon pa komprondé nan ku Jòb. “Su trikinan no ta deskonosí pa nos.” (2 Korintionan 2:11) Ademas, nos tin un abundansia di sabiduria práktiko ku nos por hasi uso di dje. Den Beibel nos ta haña relatonan di hende hòmber i muhé ku a perseverá atraves di tur sorto di difikultat. Apòstel Pablo, kende a sufri mas ku mayoria kristian, a skirbi: “Tur loke a wòrdu skirbí promé ayá a wòrdu skirbí pa nos instrukshon, pa dor di perseveransia i e enkurashamentu di Skrituranan nos por tin speransa.” (Romanonan 15:4) Un Testigu na Europa ku tabata enkarselá pa su fe durante segundo guera mundial a kambia su porshon di kuminda di tres dia pa un Beibel. El a bisa: “E kambio ei sí a bale la pena! Apesar di mi hamber físiko, mi a risibí alimento spiritual ku a yuda sostené ami i otronan den e pruebanan ku nos a pasa durante e tempu difísil ei. Te ainda mi tin e Beibel.”

17. Kua perkurashon divino por yuda nos perseverá?

¹⁷ Fuera di e konsuelo for di e Skritura, nos tin hopi hèrmènt pa studia Beibel ku ta duna nos guia práktiko pa trata ku problema. Si bo konsulta e Indèks di Publikashonnan Watch Tower, probablemente lo bo haña eksperensia di un ruman kristian ku a pasa dor di un prueba similar na esun di bo. (1 Pedro 5:9) Tambe  por ta bon pa papia tokante bo sirkunstansianan ku ansianonan komprensivo òf ku otro kristiannan maduro. Mas ku tur kos, mediante orashon bo por konta ku e yudansa di Yehova i di su spiritu santu. Kon Pablo a resistí e ‘bòftánan’ di Satanas? Dor di siña dependé riba e poder di Dios. (2 Korintionan 12:9, 10) El a skirbi: “Pa tur kos mi tin e forsa mediante esun ku ta duna mi poder.”—Filipensenan 4:13, NW.

18. Kon otro kristiannan por duna animashon sumamente balioso?

¹⁸ Pues anto, tin yudansa disponibel, i nunka bo no mester vasilá pa busk’é. E proverbio ta bisa: “Bo a mustra bo mes desanimá den e dia di aflikshon? Bo poder lo ta poko.” (Proverbionan 24:10, NW) Meskos ku komehein por pone un kas di palu basha den otro, asina desanimashon por debilitá un kristian su integridat. Pa kontrarestá e peliger aki, Yehova ta sostené nos mediante su otro sirbidónan. Un angel a aparesé na Hesus i a fortales’é durante e anochi ku el a ser arestá. (Lukas 22:43) Ora ku Pablo tabata riba kaminda pa Roma komo prezu, el a “gradisí Dios i a haña ánimo” ora ku el a topa e rumannan na e Foro di Apio i e Tres Posadanan. (Echonan 28:15) Un Testigu di Yehova aleman te ainda ta kòrda e yudansa ku el a haña ora el a yega na e kampo di konsentrashon na Ravensbrück komo un tiner poko spantá. El a konta: “Un ruman kristian a haña mi mesora i a duna mi un kaluroso bonbiní. Un otro ruman muhé fiel a enkargá su mes di mi, i a bira manera un mama spiritual pa mi.”

“Sea Fiel”

19. Kiko a yuda Jòb resistí e esfuersonan di Satanas?

¹⁹ Yehova a deskribí Jòb komo un hòmber ku a “mantené su integridat.” (Jòb 2:3) Apesar ku Jòb a sinti su mes desanimá i no por a komprondé pakiko e tabata sufri, nunka e no a tambaleá relashoná ku e kuestion krusial di lealtat. Jòb a nenga di rechasá tur loke el a biba p’e. El a insistí: “Te na mi morto lo mi no bandoná mi integridat”!—Jòb 27:5.

20. Dikon ta bale la pena perseverá?

²⁰ Si nos tin e mesun determinashon, esei lo yuda nos mantené nos integridat bou di tur sirkunstansia, sea ta tentashon, oposishon òf atversidat. Hesus a bisa e kongregashon na Smirna: “No tene miedu di loke bo ta bai sufri. Mira, Diabel ta bai tira algun di boso den prizon, pa boso wòrdu poní na prueba, i boso lo sufri tribulashon [problema, angustia òf opreshon] dies dia largu. Sea fiel te na morto i lo mi duna bo e korona di bida.”—Revelashon 2:10.

21, 22. Ki konosementu por konsolá nos ora nos ta wanta tribulashon?

²¹ Nos perseveransia i integridat lo ser poné na prueba den e mundu aki goberná pa Satanas. Sin embargo, Hesus ta sigurá nos ku ora nos spera riba futuro, nos no tin nodi tene miedu. E kos importante ta pa nos keda fiel. Pablo a bisa ku nos tribulashon òf ‘aflikshon ta pa un momento so,’ miéntras ku e “gloria,” òf rekompensa ku Yehova ta primintí nos, ta di ‘un peso muchu mas grandi i eterno.’ (2 Korintionan 4:17, 18) Asta e tribulashon di Jòb tabata pa un momento so si kompará esei ku e hopi añanan felis ku el a disfrutá di dje promé i despues di su prueba.—Jòb 42:16.

²² Pero tòg por tin momentonan den nos bida ku nos pruebanan ta parse sin final i nos sufrimentu ta parse kasi insoportabel. Den e siguiente artíkulo, nos lo konsiderá kon Jòb su eksperensia por siña nos mas lès relashoná ku perseveransia. Tambe nos lo analisá algun manera ku nos por fortalesé otro hende ku ta konfrontá atversidat.

Kon Lo Bo Kontestá?

• Ki kuestion krusial Satanas a lanta relashoná ku Jòb su integridat?

• Dikon nos no mester keda muchu sorprendí si nos konfrontá atversidat?

• Kon Yehova ta yuda nos perseverá?

[Preguntanan di Estudio]

[Plachinan na página 23]

Hasi investigashon, papia ku kristiannan maduro i deshogá nos kurason den orashon, por yuda nos perseverá