Kresementu Refreskante Riba un Isla Bunita

HENDE ku bishita Taiwan sin duda ta keda impreshoná ku e matanan tropikal bèrdè ku ta krese rònt e isla. E bunita koló bèrdè di e planchinan di aros ta kambia bira koló di oro na tempu di kosecha. Selvanan será i bèrdè ta kubri e barikanan di seru. Na kontraste ku e statnan superpoblá, e matanan bèrdè ku ta krese den kunuku i riba seru ta sumamente refreskante. De echo, ta esei a motivá e promé persona di Oksidente ku a mira e isla pa skohe e nòmber Ilha Formosa, es desir, “Isla Bunita.”

Sí, Taiwan ta un isla bunita pero chikí: apénas 390 kilometer largu i mas o ménos 160 kilometer na su punto mas hanchu. Mayor parti di e isla ta konsistí di serunan haltu. Yü Shan (Seru Morrison) ta mas haltu ku Seru Fuji di Hapon òf ku Seru Cook di Nueva Zelandia. E serunan ku ta keda meimei di e isla ta rondoná pa yanuranan smal kant’i kosta ku ta yega te na laman. E partinan plat ei na kosta di Taiwan ta yenyen ku un poblashon hopi drùk i ku awor ta konsistí di mas ku 22 mion hende.

Un Otro Tipo di Kresementu

Sin embargo, tin un otro tipo di kresementu ku ta birando mas i mas bisto na Taiwan: kresementu spiritual, esta, kresementu den e trabou di Testigunan di Yehova. Esaki ta ser reflehá den e entusiasmo ku e hendenan, tantu hóben komo bieu, ta desplegá unabes ku nan siña konosé e Dios berdadero, Yehova. Ta realmente impreshonante pa opservá e kresementu ku tin den e kantidat di personanan ku ta trahando ku entusiasmo pa yuda otro hende siña tokante Yehova i su propósito.

Kresementu ta pone ku mester hasi ekspanshon. Na desèmber 1990, Testigunan di Yehova a kumpra tereno pa traha un sukursal mas grandi. E fasilidat anterior, situá na Taipei, a bira muchu chikí pa atendé e aktividatnan di e 1.777 publikadónan di Reino ku tabatin na Taiwan e tempu ei. Despues ku pa vários  aña boluntarionan internashonal i lokal di tur edat a traha diligentemente, e bunita fasilidatnan nobo na Hsinwu a keda kla na ougùstùs 1994. Pa e tempu ei tabatin 2.515 hende ta prediká e bon nobo for di Dios su Palabra, e Beibel. Awe, mas ku dies aña despues, e kantidat aki a bira mas ku dòbel, pasando e marka di 5.500 publikadó, i tur luna tin rònt di un kuart di e kantidat ei ku ta partisipá fultaim den e trabou di prediká. Loke ta destaká ta e hóbennan—mucha hòmber i mucha muhé—ku ta manera “serena” refreskante di mainta.—Salmo 110:3.

Kresementu Spiritual Entre e Hóbennan

Hopi di e publikadónan seloso di e bon nobo ta bastante yòn. Tin di nan ta alumno di skol básiko. Por ehèmpel, den un pueblo den nort di Taiwan, un pareha kasá a haña invitashon pa asistí pa promé biaha na e Skol di Ministerio Teokrátiko, kaminda Testigunan di Yehova ta haña instrukshon kon pa siña hende bèrdatnan bíbliko. E pareha a keda babuká ora nan a mira un mucha hòmber chikí, Weijun, lesa Beibel for di plataforma mas mihó ku hopi adulto. Anto na e otro reunionnan ku nan a asistí, nan a keda profundamente impreshoná ku asta muchanan ku no ta bai skol ainda tabata duna kontesta inteligente. E pareha aki a komentá riba e bon komportashon di e muchanan chikí na e Salòn di Reino.

Dikon e hóbennan aki ta asina enfoká riba edukashon bíbliko den e pais aki kaminda mayoria hende ta budista òf taoista? Esei ta pasobra nan mayornan kristian a apliká prinsipionan bíbliko i a edifiká un bida di famia felis ku ta drei rònt di un relashon ku Yehova. Komo ku Weijun su mayornan ta hasi esfuerso pa laga e famia disfrutá di nan estudio bíbliko i di sirbishi di vèlt, Weijun su ruman hòmber i ruman muhé mas grandi ya a bira Testigunan batisá. Ora ku poko tempu pasá Weijun a pidi p’e partisipá den e trabou di prediká públikamente, su mama a komentá ku ya Weijun a laga mas revista e luna ei ku henter e famia huntu. Ta masha bisto ku e gusta papia tokante e bèrdat, duna komentario na reunion i kompartí ku otro hende loke el a siña.

Segun Ku e Hóbennan Ta Bira Mas Grandi

Kon ta bai ku e chikitinnan ei segun ku nan ta bira mas grandi? Mayoria di nan ta sigui mustra berdadero amor pa Yehova i pa e trabou di prediká. Por ehèmpel, Huiping ta un studiante di skol. Un dia su dosente a bisa ku miembronan di un sierto religion no ta aseptá sanger pero e no sa ta ken nan ta. Despues di e lès, e hóben kristian aki a bisa su dosente ku e hendenan ei ta Testigunan di Yehova i a splik’é dikon nan no ta aseptá sanger.

Un otro dosente a mustra un vidio tokante malesanan transmití seksualmente. E vidio a menshoná 1 Korintionan 6:9, pero e dosente a bisa ku Beibel no ta kondena homoseksualidat. Un biaha mas Huiping por a duna un dosente Dios su punto di bista di e asuntu.

Ora ku Shuxia, un kompañera di klas, tabata prepará un scriptie tokante violensia den famia, Huiping a dun’é e Spièrta! di 8 di novèmber 2001 ku tabatin e título riba portada “Yudansa pa Hende Muhé Maltratá.” Huiping a splik’é ku e revista tabatin hopi informashon basá riba Beibel tokante e tópiko ei. Ku tempu, Shuxia a bira un publikadó no-batisá. Awor e ku Huiping ta kompartí e bon nobo ku otro hende.

Hopi mucha kristian na skol ta haña ku no ta fásil ora ku bo ta konosí komo un hende ku ta biba segun prinsipionan di Beibel. Foral den pueblonan chikí den kunuku esaki ta e kaso. Zhihao tabatin ku trata ku e preshon di muchanan di su pareu debí na su kreensianan religioso i su aktividat di prediká. El a konta: “Mi tabata sinti mi asina frustrá ku mi tabatin miedu di topa muchanan di mi klas ora ku mi tabata den e trabou di prediká. Tabatin biaha ku dies di nan tabata tenta mi!” Un dia, Zhihao su mener a dun’é komo tarea pa hasi  un spreekbeurt tokante su religion. Zhihao a konta: “Mi a disidí di kuminsá mi spreekbeurt ku Génesis kapítulo 1 i despues papia tokante preguntanan manera: Ken a traha e tera i tur loke tin riba dje? Kon hende a bin na eksistensia? Asina ku mi a lesa for di e Skritura, algun mucha a kuminsá hari mi, i bisa ku mi ta superstisioso. Sin embargo, mi a sigui ku mi presentashon i kab’é. Despues, mi a haña chèns di papia un pa un ku algun mucha di mi klas tokante nos obra i nos kreensianan religioso. Awor, ora nan mira mi den e trabou di prediká, nan no ta hari mi mas!”

Zhihao a sigui konta: “Komo ku mi mayornan ta Testigu di Yehova, nos ta papia tokante e teksto di dia tur mainta. Tambe nos ta studia Beibel i asistí ku regularidat na e reunionnan. Ta p’esei mi por dil ku kualke mucha ku ainda ke tenta mi ora mi ta purba kompartí ku otro hende siñansanan di Beibel ku ta refreskante.”

Tingmei ta alumno na un skol tékniko pa mucha muhé so. Un biaha algun mucha muhé di su klas a invit’é pa bai un piknik huntu ku mucha hòmbernan di un skol pa mucha hòmber. Tingmei por a mira e peliger ku e tipo di asosiashon ei tabata forma pa su moralidat i el a nenga di bai. Nan a invitá Tingmei vários biaha, maske ku el a kompartí bon informashon ku nan for di e buki Loke hovenan sa puntra—Contesta práctica. * E mucha muhénan a hasi bofon di dje, i bis’é ku e tabata ouderwets. Sin embargo, poko despues e sabiduria di sigui prinsipionan bíbliko a keda komprobá ora ku un di e mucha muhénan a sali na estado i a kometé aborto. Tingmei a bisa: “Hasi loke Yehova ta manda a duna mi un konsenshi limpi. Komo resultado, mi tin goso den mi kurason i un satisfakshon profundo.”

Superando Opstákulo pa Kresementu

Un amiga íntimo di Tingmei ta Ruiwen. Tempu ku Ruiwen tabata mas yòn, e tabata haña baimentu di reunionnan kristian i salimentu den sirbishi di vèlt un rutina masha laf. Sin embargo, el a mira e kontraste entre e berdadero amor di e personanan den su kongregashon na komparashon ku e amistat superfisial di su kompañeranan di klas. Esei a konvens’é ku e tabatin ku hasi algun kambio den su bida. Ruiwen a kuminsá prediká na e muchanan di su skol i den korto tempu el a mira bon kla kiko e tabatin ku hasi. El a kuminsá sirbi komo pionero ousiliar, dedikando  mas ku 50 ora pa luna na e trabou di prediká. Despues el a kuminsá sirbi komo pionero regular, dedikando mas ku 70 ora na sirbishi. Ruiwen a bisa: “Mi no tin palabra pa ekspresá mi gratitut na Yehova. Nunka e no a mira mi komo un kaso pèrdí. Ounke mi a hasi kosnan ku a desepshon’é, el a sigui stima mi. Mi mama i otro rumannan den kongregashon a trata mi ku e mesun aktitut amoroso ei. Awor ku mi ta kondusí sinku estudio di Beibel, mi ta sinti ku mi ta partisipá den e trabou ku ta duna mas satisfakshon ku tur.”

Na un skol sekundario pafó di stat, dos mucha Testigu di Yehova a ser asigná pa representá e skol den un kompetensia di baile folklóriko. Ora ku e hóbennan Testigu a haña sa presis ki tipo di kompetensia esei lo ta, nan a sinti ku si nan partisipá den dje esei lo violá nan konsenshi kristian. Nan a purba splika nan punto di bista i a pidi pa saka nan for di e kompetensia, pero nan petishon a ser rechasá. E dosentenan a bisa nan ku komo ku nan a ser asigná, nan mester bai. E hóbennan Testigu no tabatin intenshon di komprometé nan fe, p’esei nan a subi e Website di departamento di enseñansa i a manda un E-mail den kua nan a splika nan problema. Ounke e hóbennan no a haña un kontesta personal, poko despues e skol sí a haña instrukshon pa no fòrsa ningun hende partisipá den un kompetensia asina. E dos hóbennan aki a keda hopi kontentu di mira ku e entrenamentu bíbliko ku nan a haña, no solamente a moldia nan konsenshi sino tambe a duna nan e fortalesa pa para firme pa loke ta korekto!

Asta hóbennan ku tin limitashonnan físiko tin hopi goso den kompartí ku otro hende nan speransa basá riba Beibel. Minyu ta paralisá for di nasementu. Komo ku e no por usa su mannan, e ta bira e páginanan di Beibel ku su lenga, i asina ta haña e teksto ku e ke lesa. Ora e tin ku duna parti den e Skol di Ministerio Teokrátiko na Salòn di Reino, e ta drumi riba un sofá i su doño di kas ta sinta riba un banki chikí i tene e mikrofon p’e. Ta masha alentador pa mira e esfuerso ku Minyu ta hasi pa prepará e partinan aki!

Ora ku Minyu kier a bira un publikadó di Reino, algun ruman muhé den e kongregashon a bai siña kon pa prediká via telefòn pa asina nan por a yud’é. E ta primi e number di telefòn ku su lenga miéntras ku e rumannan ta yud’é tene un registro di e yamadanan ku e hasi. E ta gusta e trabou di prediká ei asina tantu ku el a bira pionero ousiliar, i ta papia 50 pa 60 ora pa luna ku otro hende tokante e Reino di Dios via telefòn. El a haña algun hende ku ta aseptá literatura bíbliko i ku ta lag’é bèl nan bèk pa hasi rebishita. Awor e ta kondusí tres estudio di Beibel ku personanan ku el a drenta den kontakto kuné via telefòn.

Sí, e hóbennan—hòmber i muhé—den e 78 kongregashonnan di Testigunan di Yehova ku tin na Taiwan ta meskos ku gota di serena refreskante. Di buena gana i ku entusiasmo nan ta hibando e bon notisia di Reino ku ta sostené bida na e miónes di hendenan ku tin riba e isla superpoblá aki. Esaki ta djis un parti chikí di e kumplimentu mundial di e siguiente profesia bíbliko: “Bo pueblo lo pone su mes disponibel den e dia di bo poder; den e splendor di santidat, for di e matris di mardugá, bo hóbennan ta pa bo manera serena.” (Salmo 110:3) E hóbennan aki ta un fuente di estímulo pa e publikadónan di mas edat entre nan, i mas ku tur kos, nan ta un fuente di goso pa nan Tata selestial, Yehova Dios!—Proverbionan 27:11.

[Nota]

[Kuadro/​Plachi na página 10]

TIN MESTER DI MAS SALÒN DI REINO

Ku e kresementu ku tin na Taiwan, a bira mas difísil ainda pa haña sufisiente Salòn di Reino. Dikon? Pasobra ku eksepshon di algun region di kunuku, kasi no tin tereno apropiá pa traha Salòn di Reino. Ademas, preis di tereno ta eksorbitante i tin leinan estrikto relashoná ku destinashon di tereno. Den pueblo- i statnan mas grandi, e úniko alternativa ta pa kumpra edifisio òf piso diseñá pa ofisina i transformá nan den Salòn di Reino. Asina mes, mayoria ofisina tin plafòn muchu abou, kuota haltu pa mantenshon, regla ku públiko no tin mag di drenta e edifisio òf otro faktornan ku ta hasi nan inapropiá pa usa komo Salòn di Reino.

Apesar di esei, den añanan resien, Testigunan di Yehova na Taiwan a logra optené vários Salòn di Reino nobo. Pero e búskeda pa mas lugá ta sigui segun ku e Testigunan ta demostrá di ta dispuesto pa karga e responsabilidat finansiero i tambe pa desaroyá e abilidatnan nesesario den trabou di konstrukshon.