Pregunta di Lektor

Despues di e último prueba na fin di e Milenio, lo ta posibel pa hende peka i muri?

Den Revelashon tin dos teksto ku ta duna nos informashon ku ta yuda nos kontestá esaki: “Morto i Hades a wòrdu tirá den e lago di kandela. Esaki ta e di dos morto, e lago di kandela.” (Revelashon 20:14) “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:4.

Tuma nota di e tempu ku e kosnan aki lo sosodé. E tiramentu di “morto i Hades” den e lago di kandela ta tuma lugá despues ku a husga e sobrebibientenan di Armagedón, e mortonan resusitá i ken ku a nase despues di Armagedón, for di “loke tabata pará skirbí den e bukinan.” Pues, e husgamentu ei lo ta a base di Yehova su rekisitonan detayá pa humanidat durante e mil aña. (Revelashon 20:12, 13) Apòstel Juan a registrá un otro vishon, ku nos ta haña na Revelashon kapítulo 21, i ku lo kumpli durante di Kristu Hesus su Reinado di Mil Aña. Sin embargo, e kumplimentu kompletu di e vishon ei ta na final di e Dia di Huisio di mil aña. E ora ei Yehova lo biba ku humanidat den e pleno sentido di palabra sin ningun mediadó, ya ku Hesus lo a entregá e Reino na su Tata. Yehova simbólikamente lo biba ku “su pueblo” den un manera permanente i direkto. E promesa ku “lo no tin morto mas” lo kumpli den e sentido kompletu ora ku humanidat lo a alkansá perfekshon debí ku e balor di Kristu su sakrifisio di reskate a ser apliká plenamente.—Revelashon 21:3, 4.

Pues, e morto menshoná den e versíkulonan sitá ariba ta e morto heredá di Adam ku lo ser anulá pa medio di Kristu su reskate. (Romanonan 5:12-21) Unabes e morto ku humanidat a heredá for di e promé hòmber keda anulá, hende lo ta meskos ku Adam ora ku el a ser kreá. Adam tabata perfekto, pero esei no tabata ke men ku e no por a muri. Yehova a bisa Adam pa no kome for di “e palu di konosementu di bon i malu” i a agregá: “E dia ku bo kome di dje, lo bo muri sigur.” (Génesis 2:17) E morto ei tabata debí na piká deliberá. Despues di e último prueba na final di e Reinado di Mil Aña, hende ainda lo tin boluntat liber. (Revelashon 20:7-10) Ainda nan lo por skohe di nan propio boluntat si nan lo sigui sirbi Yehova òf nò. P’esei, nos no por bisa ku ningun hende nunka lo bira lomba pa Dios, manera Adam a hasi.

Kiko lo pasa ku un persona ku skohe pa rebeldiá despues di e último prueba ora ku lo no tin morto ni Hades? E tempu ei e morto heredá di Adam no t’ei mas. I Hades, e graf komun di humanidat ku tin e speransa di resurekshon, tampoko no t’ei mas. Sin embargo, Yehova por destruí kualke rebelde den e lago di kandela, i asina nenga di duna e persona aki kualke speransa di resurekshon. E morto ei lo ta manera e morto ku Adam ku Eva a eksperensiá, no e morto ku hende a heredá for di Adam.

Sin embargo, nos no tin motibu pa ferwagt ku esaki lo sosodé. E hendenan ku pasa e último prueba lo ta distinto for di Adam den un aspekto krusial. Nan a ser di tèst plenamente. Nos por tin sigur ku e último prueba lo ta kabal pasobra Yehova sa kon pa saminá hende paden i pafó. Nos por keda trankil ku e último prueba lo eliminá ken ku malusá su libertat di skohe. Pues, maske ta posibel pa esnan ku a pasa e último prueba rebeldiá kontra Dios i konsekuentemente ser destruí, e chèns ta masha chikí ku un kos asina lo sosodé.

[Plachi na página 31]

Despues di e último prueba, den ki aspekto humanidat por ser kompará ku Adam?