Adorashon Ku Ta Bon pa Bo

“HALA serka Dios ta bon pa mi,” e salmista Asaf a deklará. Un dado momento el a bin riba e idea pa imitá hende ku no tabata sirbi Dios pensando ku asina lo e por a hiba un bida kómodo. Pero despues Asaf a kòrda riba e bentahanan di hala serka Dios i a konkluí ku esei tabata bon p’e. (Salmo 73:2, 3, 12, 28, NW) Adorashon berdadero ta bon pa bo awe? Kon e por benefisiá bo?

Adorashon di e Dios berdadero ta yuda bo poseé algu hopi mas balioso ku un bida puramente egoista. E manera ku “e Dios di amor” a krea nos ta pone ku hende ku ta buska nan mes interesnan so nunka por ta felis. (2 Korintionan 13:11) Hesus a siña hende un bèrdat fundamental tokante naturalesa humano ora el a bisa: “Ta mas bendishoná pa duna ku pa risibí.” (Echonan 20:35) P’e motibu ei nos ta gusta hasi kosnan pa nos amigunan i famianan. Pero e felisidat di mas grandi ta bini di hasi kosnan pa Dios. E meresé nos amor mas ku kualke otro persona. Miónes di hende di tur gremio sosial ta haña un satisfakshon profundo den rindi adorashon na Dios, kumpliendo ku su mandamentunan.—1 Juan 5:3.

Un Bida ku Propósito

Adorashon berdadero ta bon tambe pa bo pasobra e ta duna bo un propósito den bida. Bo no a ripará kuantu biaha felisidat ta konektá ku e sintimentu ku bo ta logrando algu ku ta bale la pena? Mayoria hende tin un meta den bida, por ehèmpel en konekshon ku nan famia, amigunan, negoshi òf plaser. Pero pa motibu di e insiguridatnan di bida, hopi bes e kosnan aki no ta hasi nan felis. (Eklesiastés 9:11, NW) Sin embargo, adorashon berdadero ta yuda bo haña un propósito mas haltu, unu ku ta sigui duna bo satisfakshon asta ora otro aspektonan di bida laga bo na kaya.

Adorashon berdadero ta enserá konosé Yehova i sirbié fielmente. Hende ku ta praktik’é ta hala hopi serka di Dios. (Eklesiastés 12:13; Juan 4:23; Santiago 4:8) Kisas e idea di konosé Dios asina bon te ku e ta bira bo amigu ta difísil pa bo imaginá. Pero ora bo meditá riba e relatonan di kon e ta trata hende i ora bo pensa riba su kreashon, bo por distinguí vários aspekto di su personalidat. (Romanonan 1:20) Ademas, ora bo lesa e Palabra di Dios, bo por komprondé pakiko nos ta aki, pakiko Dios ta permití sufrimentu, kon lo e pone fin na sufrimentu, i kisas loke ta mas fasinante ainda, kon bo por hunga un papel importante den e propósito di Dios. (Isaias 43:10; 1 Korintionan 3:9) E komprondementu ei por duna bo un motivashon nobo den bida!

Bo Ta Bira un Mihó Hende

Adorashon berdadero ta bon pa bo pasobra e ta yuda bo bira un mihó hende. Segun ku bo ta praktiká adorashon berdadero, bo ta kultivá un personalidat ku ta hiba na relashonnan mas felis ku otro hende. Bo ta siña for di Dios i su Yu kon pa ser onrado, kon pa papia ku bondat i biba na un manera responsabel. (Efesionan 4:20–5:5) Ora bo siña konosé Dios asina bon ku bo ta kuminsá stim’é, bo ta sinti bo impulsá pa imit’é. Beibel ta bisa: “Sea imitadónan di Dios, manera yunan stimá; i kana den amor.”—Efesionan 5:1, 2.

Lo no ta un goso pa biba meimei di hende ku ta imitá e amor di Dios? Afortunadamente,  adorashon di e Dios berdadero no ta un aktividat solitario. E ta pone bo den kontakto ku otro hende ku ta stima loke ta hustu i bon. Kisas bo no ta gusta e idea di pertenesé na un religion organisá. Pero manera nos a mira den e artíkulo anterior, e problema ku mayoria religion no ta ku nan ta organisá; e punto ta ku nan no ta organisá den e manera korekto i pa e motibunan korekto. Hopi religion tin metanan no-kristian. Yehova mes ta organisá su pueblo pa un propósito noble. Beibel ta bisa: “Dios no ta un Dios di konfushon [“desòrdu,” NW], sino di pas.” (1 Korintionan 14:33) Meskos ku miónes di otro hende, ora bo ta afiliá na un grupo di kristian bon organisá bo tambe por sinti e influensia plasentero ku esaki tin riba bo punto di bista.

Speransa pa Futuro

E Santu Skritura ta mustra ku Dios ta organisando adoradónan berdadero pa nan por sobrebibí e fin di e sistema di kosnan aki i heredá un tera nobo den kua ‘hustisia lo biba.’ (2 Pedro 3:13; Revelashon 7:9-17) Den e forma ei adorashon ku ta bon pa bo ta duna bo speransa, lokual ta indispensabel pa felisidat. Algun hende ta basa nan ekspektativanan pa futuro riba stabilidat di gobièrnunan, oportunidatnan komersial òf e speransa di por gosa di bon salú i un penshon satisfaktorio. Pero niun di e kosnan aki no ta pone un base sólido pa un futuro felis. Di otro banda, apòstel Pablo a skirbi: “Nos a fiha nos speransa den e Dios bibu.”—1 Timoteo 4:10.

Si bo buska kuidadosamente, lo bo haña e adoradónan berdadero. Den e mundu dividí djawe, amor i union ta distinguí Testigunan di Yehova klaramente. Nan ta bini di kasi tur nashon i kondishon sosial; ma nan amor pa otro i pa Yehova ta uni nan. (Juan 13:35) Nan ta invitá bo pa bo mes deskubrí loke nan a eksperensiá. Asaf a skirbi: “Hala serka Dios ta bon pa mi.”—Salmo 73:28, NW.

[Plachi na página 7]

Bo por bira amigu di Dios