Historia di Bida

Benefisiando di e Lealtat di Mi Sernan Kerí

SEGUN E RELATO DI KATHLEEN COOKE

NA AÑA 1911, durante un bishita serka su famia na Glasgow, Eskosia, mi wela Mary Ellen Thompson a asistí na un charla di Charles Taze Russell, un miembro prominente di e Studiantenan di Beibel, kendenan despues a bira konosí komo Testigunan di Yehova. Mi wela a keda masha emoshoná ku loke el a tende. Ora el a regresá Suráfrika, el a tuma kontakto ku e Studiantenan di Beibel lokal. Na aprel 1914 e tabata un di e 16 personanan ku a batisá na e promé kongreso di Studiantenan di Beibel tené na Suráfrika. Mi wela su yu muhé Edith, ku despues a bira mi mama, tabatin seis aña e tempu ei.

Despues ku Ruman Russell a muri na aña 1916, a surgi mundialmente un frikshon den e Studiantenan di Beibel. E kantidat di rumannan fiel na Durban a baha di 60 te rònt di 12. Mi wela parti tata, Ingeborg Myrdal, i su yu hòmber Henry, un tiner ku a batisá poko promé ku esei, a apoyá esnan leal. Na 1924, Henry a bira un colporteur, manera tabata yama predikadónan di tempu kompletu di Testigunan di Yehova e tempu ei. Durante e siguiente sinku añanan el a prediká den hopi parti di e region den sur di Afrika. Na 1930, Henry ku Edith a kasa, i tres aña despues ami a nase.

Un Famia Grandi

Pa un tempu nos a biba na Mozambique, pero na 1939 nos a bai biba serka mi wela i tawela parti mama na Johannesburg. Mi tawela no tabata interesá den e bèrdat di Beibel i tabatin  biaha ku el a asta oponé mi wela, pero apesar di esei e tabata un persona masha hospitalario. Mi ruman muhé, Thelma, a nase na 1940, i ami kuné a siña kuida hende grandi. Anochi ora di kome hopi biaha nos a pasa basta tempu huntu ya ku nos tabata kòmbersá ku otro tokante loke a pasa durante dia òf a sinta rekordá kosnan di ántes.

Nos famia tabata gusta pa Testigunan ku a pasa di bishita keda serka nos, foral esnan den sirbishi di tempu kompletu. Nan tambe tabata partisipá den nos kòmbersashon na ora di sena, i loke nan tabata konta a oumentá nos apresio pa e herensia spiritual ku nos tabatin. Esaki a duna ami ku Thelma mas gana di bira pionero meskos ku nan.

For di un edat hopi yòn, nan a siña nos disfrutá di lesamentu. Mi mama, tata i wela tur tabata lesa pa nos for di bon bukinan di kuenta òf for di Beibel mes. Reunionnan kristian i e ministerio tabata un parti integral di nos bida. Mi tata tabata e sirbidó di kompania (awor yamá superintendente presidente) di Kongregashon Johannesburg, pues nos tur mester a yega reunion trempan. Ora ku nos tabatin kongreso, mi tata tabata drùk ta yuda den atministrashon di e kongreso, miéntras ku mi mama tabata yuda ku alohamentu pa e delegadonan.

Un Kongreso Masha Spesial pa Nos

E kongreso di 1948 na Johannesburg tabata unu spesial. Pa promé bes, miembronan di e sede mundial di Testigunan di Yehova na Brooklyn, New York, tabata presente. Mi tata tabata asigná pa transportá Nathan Knorr i Milton Henschel ku su outo durante nan estadia. Ta na e kongreso ei mi a batisá.

Poko despues, pa mi tata su sorpresa su tata a bis’é ku e ta lamentá profundamente ku despues di morto di Ruman Russell, el a laga e personanan ku a bandona e Studiantenan di Beibel influensi’é. El a fayesé un par di luna despues. Di otro banda, mi tata su mama a keda leal te ora ku el a terminá su karera terenal na 1955.

Susesonan Ku A Influensiá Mi Bida

Mi a kuminsá sirbi komo pionero regular dia promé di febrüari 1949. Poko despues, tur hende tabata masha emoshoná pasobra e siguiente aña lo tabatin un kongreso internashonal na New York City. Nos tabatin masha gana di bai, pero nos no tabatin moda. Sin embargo, na febrüari 1950, mi tawela parti mama a fayesé, anto mi wela a usa e plaka ku el a heredá pa paga pasashi pa nos sinku.

Algun siman promé ku nos biahe, a yega un karta for di e sede mundial di Testigunan di Yehova na Brooklyn, New York. Tabata un invitashon pa mi asistí na e di 16 klas di e skol di misionero di Galaad. Esta emoshonante, pasobra mi no tabatin ni 17 aña ainda! Ora ku e klas  a kuminsá, ata mi meimei di e dies studiantenan di Suráfrika, disfrutando di e gran privilegio ei.

Despues ku nos a gradua na febrüari 1951, ocho di nos a regresá Suráfrika pa sirbi komo misionero. Durante e siguiente añanan, ami ku mi kompañera a prediká prinsipalmente den pueblonan mas chikí kaminda e hendenan tabata papia afrikaans. Na prinsipio mi no tabata bon den e idioma ei, i mi ta kòrda kon un dia mi tabata bai kas riba mi baiskel awa na wowo pasobra mi no tabata efektivo den e ministerio. Sin embargo, ku tempu mi a siña papi’é mas bon i Yehova a bendishoná mi esfuersonan.

Matrimonio i e Trabou Biahero

Na 1955 mi a sera konosí ku John Cooke. El a yuda habri e trabou di prediká na Fransia, Portugal i Spaña promé i tambe despues di Segundo Guera Mundial, i el a kaba di bira un misionero na Afrika e aña ku mi a top’é. Mas despues el a skirbi: “Mi a haña tres shòk den un solo siman . . . Un ruman masha generoso a duna mi un outo chikí; mi a keda nombra komo sirbidó di distrito; i mi a namorá di un mucha muhé.” * Nos a kasa na desèmber 1957.

Durante nos namorashon, John a sigurá mi ku mi bida kuné nunka lo ta laf, i e tabatin rason. Nos a bishitá kongregashonnan rònt Suráfrika, mayoria di nan den área kaminda hende pretu ta biba. Tur siman, nos tabata konfrontá e reto di haña pèrmit pa djis drenta e áreanan ei, pa keda drumi anochi tabata kasi imposibel. Na algun okashon, nos a drumi riba flur di un tienda bashí den un bario di hende blanku den bisindario, i a purba pa hende ku pasa no mira nos. Por lo general nos tabatin ku keda serka e Testigunan blanku ku tabata biba mas serka, i hopi biaha nan tabata keda hopi kilometer leu.

Tambe nos a konfrontá e reto di fasilidatnan simpel di asamblea trahá den pleno mondi.  Nos tabata mustra pelíkulanan produsí dor di Testigunan di Yehova ku a yuda e hendenan haña apresio pa nos hermandat mundial. Nos tabata bai ku nos mes generator, pasobra generalmente no tabatin koriente den e áreanan ei. Tambe nos tabatin ku lucha ku problemanan den e regionnan bou di gobièrnu britániko kaminda nos literatura tabata prohibí i ademas nos tabatin e reto di siña e idioma zulu. Sin embargo, nos tabata kontentu ku nos por a sirbi nos rumannan.

Na ougùstùs 1961, John a bira e promé instruktor di e Skol di Ministerio di Reino di Suráfrika, un skol di kuater siman prepará spesialmente pa yuda superintendentenan di kongregashon. John tabata bon den e arte di siña i el a alkansá kurason di e studiantenan ku su lógika simpel i ilustrashonnan bibu. Pa kasi un aña i mei, nos a biaha di un lugá pa otro pa kada klas di abla ingles ku a sigui. Miéntras ku John tabata duna e lès, ami tabata sali den sirbishi di vèlt ku e Testigunan lokal. Anto pa nos sorpresa, nos a haña un karta ku a invitá nos pa bin sirbi na e ofisina di sukursal di Suráfrika pegá ku Johannesburg kuminsando 1 di yüli 1964.

Pero pa e tempu ei, John su salú a kuminsá preokupá nos. Na 1948 el a haña un atake di tuberkulósis i despues di esei kada bes e tabata sufri di falta di energia. E tabata sinti síntomanan di grip i tabata keda malu pa vários dia tras di otro, sin por a hasi nada ni mira niun hende. Un dòkter ku nos a konsultá djis promé ku nos a haña invitashon pa bin sukursal a diagnostiká John su problema komo depreshon.

Pa nos tabata imposibel pa hiba un bida mas trankil, manera e dòkter a sugerí. Na sukursal, John a ser asigná na e Departamento di Sirbishi i ami na hasi ‘proofreading,’ esta, korekshon di kosnan skirbí. Anto esta un bendishon e tabata di por tin nos mes kuarto! John tabata sirbi den teritorio portugues promé ku nos a kasa, p’esei na 1967 e rumannan a pidi nos pa yuda e úniko famia Testigu lokal portugues prediká na e komunidat grandi di portugues ku tabatin alrededor di Johannesburg. Esaki a nifiká ku mi mester a siña un idioma mas.

Komo ku e komunidat portugues tabata plamá den un área grandi, nos tabatin ku biaha hopi, tin bes te ku 300 kilometer pa por yega na hendenan meresedor. Rònt di e tempu aki, Testigunan di abla portugues for di Mozambique a kuminsá bishitá nos ora nos tabatin asamblea, lokual tabata un gran yudansa pa esnan nobo. Durante e 11 añanan ku nos a prediká den e teritorio portugues, nos a mira nos grupo chikí di rònt di 30 miembro krese bira kuater kongregashon.

Kambionan na Kas

Miéntras tantu, kambionan a sosodé na kas di mi mayornan. Na aña 1960 mi ruman muhé, Thelma, a kasa ku John Urban, un pionero di Merka. Na 1965 nan a asistí na e di 40 klas di Galaad i a sirbi lealmente komo misionero na Brazil pa 25 aña. Na 1990 nan a regresá Ohio pa kuida John su mayornan enfermo. Apesar di e strès di kuida hende malu, nan a keda den e sirbishi di tempu kompletu te awe.

Mi wela parti mama a terminá su karera terenal na 1965 na edat di 98 aña, kedando semper fiel na Dios. E mesun aña ei mi tata a baha ku penshon. P’esei ora ku e rumannan a pidi ami ku John pa bai yuda den e teritorio portugues, mi mama ku mi tata a ofresé pa nan djòin nos. Nan a kontribuí na stabilidat di e grupo i despues di algun luna e promé kongregashon a keda formá. Poko despues, mi mama a kuminsá sinti e efektonan di kanser i esei a hiba na su morto na 1971. Mi tata a muri shete aña despues.

Tratando ku e Malesa di John

Den dékada di 1970 a bira bisto ku John su salú no tabata mehorá. Pokopoko e tabatin ku entregá algun di su asignashonnan presioso na Bètel. Por ehèmpel, e no por a kondusí e Estudio di Toren di Vigilansia semanal di e famia di Bètel mas ni e konsiderashonnan di Beibel na mesa mainta. Su asignashon a kambia for di e  Departamento di Sirbishi pa e Afdeling di Pòst i mas despues pa traha den hardin.

John su selo a pone ku tabata difísil p’e hasi kambio. Ora ku persistentemente mi tabata purba pon’é baha man na su aktividatnan, e tabata bisa den wega ku mi tabata manera e kadena ku bala di heru na su pia, anto por lo general ora e kaba di bisa asina e tabata brasa mi kariñosamente. Ku tempu nos a haña ta mihó pa stòp di traha den e teritorio portugues i sirbi huntu ku e kongregashon ku tabata reuní den e Salòn di Reino na sukursal.

Segun ku John su salú a sigui bai atras, tabata konmovedor pa mira su relashon íntimo ku Yehova. Ora ku John tabata lanta meianochi den un estado di depreshon profundo, nos tabata papia ku otro te ora ku el a sinti su mes sufisiente kalmu pa hasi orashon pidi Yehova su yudansa. Ku tempu el a siña trata ku e mal momentonan ei su so dor di obligá su mes pa ripití lentamente Filipensenan 4:6 i 7: “No preokupá pa nada . . . ” E ora ei e tabata bira sufisiente trankil pa kuminsá hasi orashon. Hopi biaha mi tabata lantá i mi tabata wak ketu-ketu kon su lepnan tabata move segun ku el a keda roga Yehova sinseramente.

Komo ku nos sukursal a bira hopi pèrtá, e rumannan a kuminsá traha un sukursal nobo grandi pafó di Johannesburg. Ami ku John hopi biaha tabata bai bishitá e lugá trankil ei, leu for di e bochincha i polushon di stat. Un kos ku a yuda John hopi tabata ora ku nos tabatin mag di muda bai einan den alohamentu temporal te ora ku e sukursal nobo a keda kla.

Retonan Nobo

Segun ku John su kapasidat di pensa i rasoná a bai mas atras, a bira tambe mas difísil p’e kumpli ku su asignashonnan di trabou. Pero e manera ku otro rumannan tabata apoyá John den su esfuerso tabata konmové mi profundamente. Por ehèmpel, ora un ruman mester a bai un biblioteka públiko pa hasi investigashon, e tabata bai ku John. John tabata bai ku su sakunan di karson yenyen di tratado ku revista pa e salida di e dia ei. Esaki a yuda John mantené un sentido di logro i balor propio.

Dado momento e malesa di Alzheimer a pone ku John no por a komprondé palabra skirbí mas. Nos tabata gradisidu pa e oudiokasètnan di literatura bíbliko i kantikanan di Reino. Nos tabata skucha nan bes tras bes. Hopi biaha John tabata bira agitá si mi no sinta i skucha nan huntu kuné, p’esei mi a tene mi mes okupá durante e tantísimo oranan ei hasiendo obra di man manera por ehèmpel hak i brei. Esei a pone ku nos tabatin un bon stòk di suèter i deken!

Ku tempu, John su kondishon a eksigí mas kuido di mi parti. Ounke hopi biaha mi tabata muchu kansá pa lesa òf studia, tabata un privilegio di por a kuid’é te na fin. E fin ei a yega na 1998 ora ku John a muri trankilamente den mi brasa poko despues ku el a hasi 85 aña. El a keda kompletamente firme den su lealtat te na final. Mi ta anhelá masha hopi mes di mir’é den e resurekshon, ku su salú i mente restorá!

Hañando Refreskamentu

Despues di John su morto, no tabata fásil pa mi siña hiba un bida mi so. P’esei na mei 1999 mi a bai bishitá mi ruman muhé, Thelma, ku su kasá na Merka. Esta dushi i refreskante tabata pa topa ku hopi amigu stimá i leal, spesialmente durante nos bishita na e sede mundial di Testigunan di Yehova na New York! Esei tabata definitivamente e estímulo spiritual ku mi tabatin mester.

Ora mi sinta pensa riba e bida di mi sernan kerí leal, mi ta ser rekordá di tantísimo kos ku tabata bon pa mi. Pa medio di nan instrukshon, ehèmpel i yudansa, mi a siña pa amplia mi amor pa hende di otro nashon i rasa. Mi a siña demostrá pasenshi, perseveransia i adaptabilidat. Mas ku tur kos, mi a eksperensiá e bondat di Yehova, Esun ku ta skucha orashon. Mi ta sinti e mesun sintimentunan ku e salmista ku a skirbi: “Bendishoná ta esun ku bo ta skohe i ta hala serka bo, pa biba den bo pationan. Nos lo keda satisfecho ku e bondat di bo kas.”—Salmo 65:4.

[Nota]

[Plachi na página 8]

Mi wela huntu ku su yu muhénan

[Plachi na página 9]

Ami ku mi mayornan dia ku mi a batisá na 1948

[Plachi na página 10]

Huntu ku Albert Schroeder, sekretario di Galaad, i e nuebe otro studiantenan for di Suráfrika

[Plachi na página 10]

Ami ku John na 1984