Kiko Religion Ta Yuda Kuné?

“MI POR ta bon hende sin mester di ta den un religion!” Esei ta un pensamentu komun i koriente. Hopi hende onrado, kompasivo i konfiabel no ta interesá den religion. Por ehèmpel, masha poko hende di paisnan di Wèst Europa ta baidó di misa, ounke mayoria ta bisa ku nan ta kere den Dios. * Asta na Latinoamérika, apénas 15 pa 20 porshento di katólikonan ta bai misa regularmente.

Meskos ku hopi otro hende, tal bes bo tambe ta haña ku religion no ta yuda bo hiba un mihó bida. Pero, podisé bo sa tambe ku hopi aña pasá, tempu di bo grandinan, mayoria hende tabata hopi mas religioso ku awe. Kiko a pone asina tantu hende pèrdè interes den religion? Un persona por ta bon hende sin ku e ta den un religion? Tin un religion ku por benefisiá bo?

Pakiko Hopi Hende A Bira Lomba pa Religion

Pa hopi siglo, mayoria hende di kristiandat tabatin e kreensia ku Dios ta rekerí obedensia. Nan tabata bai misa pa haña e aprobashon di Dios, sea mediante ritonan efektuá dor di un pastor òf mediante guia di un predikadó. Sin duda hopi tabata mira tambe e hipokresia ku tin den religion. E papel di religion den guera, meskos ku e kondukta korumpí di algun lider religioso, tabata bon konosí. Pero mayoria hende tabata pensa ku religion riba su mes tabata bon. Otronan tabata gusta e ambiente di reverensia, e tradishon i e músika; algun tabata mira sierto benefisio asta den e peliger di tormento eterno den fièrnu, lokual ta un siñansa ku no ta aparesé den e Skritura. Despues, vários desaroyo a pone hende haña un otro punto di bista di religion.

E teoria di evolushon a bira popular. Algun hende tabata konvensí ku bida a originá pa kasualidat—sin intervenshon di Dios. Mayoria religion no a duna prueba konvinsente ku Dios ta e Fuente di bida. (Salmo 36:9) Ademas, segun ku teknologia a avansá, logronan remarkabel riba tereno di medisina, transporte i komunikashon a duna hende e impreshon ku siensia por resolvé kualke problema. Komo si fuera no tabata basta, hopi hende tabata haña ku sosiólogo- i sikólogonan tabata duna mihó guia ku religion. Religionnan, di nan parti, no a demostrá bon kla ku un bida konforme e lei di Dios ta e mihó manera di biba.—Santiago 1:25.

E desaroyonan aki a pone hopi religion kambia nan mensahe. Pastor- i predikadónan a stòp di siña hende ku Dios ta rekerí obedensia. En bes di esei, hopi di nan a kuminsá siña hende ku ta kada ken mester disidí pa su mes kiko ta bon i kiko ta malu. Pa purba gana popularidat, algun lider religioso a pretendé ku Dios ta aseptá bo sin importá kon bo ta biba. E siñansa ei ta pone nos kòrda un profesia di  Beibel: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende.”—2 Timoteo 4:3.

En bes di atraé hende, tal siñansa a alehá nan for di religion. Ku rason nan a puntra nan mes: ‘Si religionnan ta duda ku Dios tin poder pa krea kosnan i sabiduria pa traha leinan, kiko ami ta bai hasi den misa? Pakiko mi tin ku wòri lanta mi yunan den un religion?’ Pues nèt e hendenan ku tabata purba hiba un bida desente a kuminsá bira indiferente pa ku religion. Nan a bandoná e iglesianan, i religion no tabata importante mas pa nan. Kiko a bai asina robes ku algu ku lo mester tabata bon? Beibel ta duna un splikashon konvinsente.

Religion pa Logra Metanan Malbado

Apòstel Pablo a spièrta e promé kristiannan ku algun individuo lo a usa kristianismo pa logra metanan malbado. El a bisa: “Lobo brabu lo drenta meimei di boso, ku lo no tin miserikòrdia di e tou; i for di meimei di boso mes lo lanta hòmbernan ku ta papia kosnan pèrvèrso, pa desviá e disipelnan i hasi nan bai nan tras.” (Echonan 20:29, 30) Un di esnan ku a papia “kosnan pèrvèrso” tabata e teólogo katóliko romano Agustin. Hesus a siña su siguidónan pa konvensé otro hende dor di rasoná ku nan for di e Skritura. Sin embargo, Agustin a pervertí òf trose e nifikashon di Hesus su palabranan registrá na Lukas 14:23, “obligá nan drenta,” pa hasi parse ku ta bon pa usa forsa den e obra di kombertí hende. (Mateo 28:19, 20; Echonan 28:23, 24) Agustin a usa religion pa dominá hende.

Esun ku ta tras di e mal uso i korupshon di religion ta Satanas, un angel rebelde. El a provoká hende religioso den e promé siglo pa purba korumpí kongregashonnan kristian. Beibel ta bisa di e hòmbernan ei: “Hòmbernan asina ta apòstelnan falsu, trahadónan engañoso, kendenan ta disfrasá nan mes komo apòstelnan di Kristu. I no ta nada straño, pasobra Satanas mes ta disfrasá su mes komo un angel di lus. P’esei no ta nada straño si su sirbidónan tambe ta disfrasá nan mes komo sirbidónan di hustisia.”—2 Korintionan 11:13-15.

Ainda Satanas ta usa religion ku ta pretendé di ta kristian, moralmente limpi i edukativo pa pone hende biba segun su normanan i no segun esnan di Dios. (Lukas 4:5-7) Probablemente bo a ripará ku hopi lider religioso awe ta usa religion pa halsa nan mes ku títulonan ku ta zona impreshonante i pa haña plaka for di nan miembronan. Gobièrnunan tambe a usa religion pa konvensé siudadanonan pa sakrifiká nan mes den guera.

Diabel ta usa religion den un forma hopi mas ekstenso ku mayoria hende ta realisá. Kisas bo ta imaginá ku ta solamente algun ekstremista religioso ta sirbiendo interesnan di Satanas. Pero segun Beibel, esun “kende ta wòrdu yamá Diabel i Satanas . . . ta gaña henter mundu.” Beibel ta bisa tambe: “Henter mundu ta bou di kontròl di e malbado.” (Revelashon  12:9; 1 Juan 5:19) Kiko Dios ta pensa di religion ku lidernan religioso i polítiko ta usa djis pa buska siguidónan pa nan mes?

‘Ki Mi Ta Gana Kuné?’

Si e kondukta di algun religion di kristiandat a shòk bo, bo por ta sigur ku e Dios Todopoderoso ta hopi mal kontentu ku nan. Kristiandat ta pretendé di a sera un pakto ku Dios; Israel di antigwedat a pretendé algu similar. Tur dos a resultá di ta infiel. P’esei e denunsia di Yehova kontra Israel ta konta mes pisá pa kristiandat awe. Yehova a bisa nan: “Nan no a paga tinu na loke mi a bisa nan, nan a rechasá asta e lei ku mi a duna nan. Ki mi ta gana ku e sensia ku boso a importá pa mi for di Seba? . . . Pa loke ta toka e otro sakrifisionan, nan no ta agradá mi.” (Jeremias 6:19, 20, BPK) Dios no a rekonosé e aktonan di adorashon ku hipókritanan a rindi na dje. E no tabata interesá den nan ritonan i orashonnan. El a bisa Israel: “Mi ta odia boso . . . fiestanan stipulá; nan a bira un karga pa mi. Mi ta kansá di soportá nan. P’esei, ora boso habri boso mannan den orashon, lo mi skonde mi wowonan pa boso; sí, maske boso hasi hopi orashon, lo mi no skucha.”—Isaias 1:14, 15.

Yehova ta kontentu ku e fiestanan ku religion a duna un bachi kristian pero ku originalmente tabata na onor di dios falsu? E ta skucha orashon di lidernan religioso ku ta korumpí e siñansanan di Kristu? Dios ta aseptá kualke religion ku ta rechasá su lei? Bo por ta sigur ku awe e ta mira ritonan religioso meskos ku el a mira e sakrifisionan di Israel di antigwedat, di kua el a bisa: ‘Ki mi ta gana ku nan?’

Pero loke Yehova ta hopi interesá den dje sí ta e adorashon basá riba e bèrdat ku hende sinsero ta rindi na dje. Ora hende ta ekspresá apresio pa tur loke nan ta risibí for di dje, e ta keda masha kontentu. (Malakias 3:16, 17) Pues bo por ta un bon hende sin ta adorá Dios? Un persona ku no ta hasi nada pa su mayornan amoroso no tin niun base pa bisa ku e ta un bon hende, no ta bèrdat? Un persona ku no ta hasi nada pa Dios por ta bon hende? Ta lógiko anto ku nos echonan mester mustra ku nos tin interes den e Dios berdadero, esun ku a origina bida. Den e siguiente artíkulo, nos lo mira kon adorashon berdadero no solamente ta onra Dios sino ta benefisiá nos tambe.

[Nota]

[Plachi na página 4]

Religionnan a mustra riba pruebanan ku ta Dios a krea tur kos?

[Plachi na página 4, 5]

Un hende ku ta representá Dios ta pas den e esena aki?

[Plachi na página 5]

Kon Dios ta mira e tipo di fiestanan aki?

[Rekonosementu]

AP Photo/​Georgy Abdaladze