Kon pa Aserká Esun “Ku Ta Skucha Orashon”

“Abo ku ta skucha orashon, serka bo tur hende ta bin.”​—SALMO 65:2.

1. Kiko ta distinguí hende for di e otro kriaturanan riba tera i ki posibilidat esaki ta duna nos?

DI TUR e míles di kriaturanan ku tin riba tera, ta hende so tin e kapasidat di adorá e Kreadó. Ta hende so ta konsiente ku nan tin un nesesidat spiritual—es desir, ku nan tin ku adorá Dios—i ta sinti e deseo di satisfasé e nesesidat ei. Esaki ta duna nos e maravioso oportunidat di por tin un relashon personal ku nos Tata selestial.

2. Ki mal efekto piká tabatin riba hende su relashon ku su Kreadó?

² Dios a traha hende ku e kapasidat di komuniká ku su Kreadó. Adam ku Eva a ser kreá sin piká. Pues, nan por a aserká Dios libremente meskos ku un yu ta aserká su tata. Sin embargo, piká a pone nan pèrdè e gran privilegio ei. Adam ku Eva a desobedesé Dios i a pèrdè nan relashon íntimo kuné. (Génesis 3:8-13, 17-24) Akaso esei ke men ku Adam su desendientenan imperfekto no por komuniká mas ku Dios? Nò, e no ke men esei. Yehova te ainda ta permití nan aserk’é pero solamente si nan kumpli ku sierto rekisitonan fundamental. Kiko e rekisitonan ei ta?

Rekisitonan pa Aserká Dios

3. Kon hende pekaminoso mester aserká Dios, i ki ehèmpel ta ilustrá esaki?

³ Un suseso den kua dos yu di Adam tabata enbolbí ta yuda nos mira kiko Dios ta rekerí di hende imperfekto ku ta deseá di aserk’é. Tantu Kain komo Abel a purba aserká Dios dor di presentá sakrifisio na dje. Dios a aseptá e ofrenda di Abel, miéntras ku esun di Kain nò. (Génesis 4:3-5) Kiko a kousa e diferensia? Hebreonan 11:4 ta deklará: “Pa medio di fe Abel a ofresé na Dios un mihó sakrifisio ku Kain, dor di kual el a optené e testimonio ku e tabata hustu.” Ta bisto anto ku fe ta un rekisito básiko pa haña akseso na Dios. Un otro rekisito básiko nos ta mira den loke Yehova a bisa Kain: “Si bo hasi bon, lo bo no wòrdu aseptá?” Sí, Kain su intento pa aserká Dios lo a ser aseptá si Kain a bira di su kaminda i hasi loke ta bon. Sin embargo, Kain a rechasá Dios su konseho. El a mata Abel i na final a hañ’é ta biba ekskluí for di sosiedat. (Génesis 4:7-12) Pues, for di trempan di historia humano, e importansia di aserká Dios ku fe kompañá ku hasimentu di bon obra a keda enfatisá.

4. Kiko nos mester rekonosé tokante nos manera di aserká Dios?

⁴ Si nos ta deseá di aserká Dios ta masha importante pa nos rekonosé nos estado pekaminoso. Tur hende ta pekadó, i piká ta un opstákulo ku ta stroba nos di aserká Dios. Profeta Jeremias a skirbi tokante Israel: “Nos a transgresá . . . Bo a tapa bo mes ku un nubia, asina ku ningun orashon no por pasa.” (Lamentashon 3:42, 44) Pero apesar ku hende ta pekaminoso, Dios a demostrá atraves di henter historia humano ku e ta dispuesto na aseptá e orashonnan di hende ku ta aserk’é ku fe i un bon aktitut di kurason, i ku ta opservá su mandamentunan. (Salmo 119:145) Ken tabata algun di e personanan aki, i kiko nos por siña for di nan orashonnan?

5, 6. Kiko nos por siña for di Abraham su manera di aserká Dios?

⁵ Un di e personanan ei tabata Abraham.  Dios a aseptá Abraham su esfuerso pa aserk’é, pasobra Dios a yama Abraham “mi amigu.” (Isaias 41:8) Kiko nos por siña for di Abraham su manera di aserká Dios? E patriarka fiel aki a puntra Yehova tokante un heredero, bisando: “Kiko lo bo duna mi, siendo ku mi no tin yu”? (Génesis 15:2, 3; 17:18) Na un otro okashon, el a ekspresá su preokupashon tokante ken lo a skapa ora Dios trese huisio kontra e malbadonan den Sodoma i Gomora. (Génesis 18:23-33) Tambe Abraham a súplika Dios na fabor di otro hende. (Génesis 20:7, 17) I meskos ku den e kaso di Abel, tabatin biaha ku Abraham su manera di aserká Dios a enserá un ofrenda na Yehova.—Génesis 22:9-14.

⁶ Na tur e okashonnan aki, Abraham a sintié liber pa papia ku Yehova. Sin embargo, su frankesa di ekspreshon a reflehá tambe un punto di bista humilde di su posishon dilanti di su Kreadó. Tuma nota di su palabranan respetuoso ku nos ta haña na Génesis 18:27: “At’awor mi a tribi papia ku Señor, ounke ta djis stòf i shinishi mi ta.” Ki un aktitut ekselente pa imitá!

7. Ki asuntunan e patriarkanan a inkluí den nan orashonnan na Yehova?

⁷ E patriarkanan a hasi orashon tokante un variedat di asuntu, i Yehova a skucha nan faborablemente. Jakòb a ekspresá un orashon den forma di un promesa solèm. Despues ku el a pidi Dios sosten’é, el a primintí solemnemente: “Di tur loke bo duna mi, siguramente lo mi duna bo un désimo parti.” (Génesis 28:20-22) Mas despues, ora ku e tabata a punto di topa su ruman hòmber, Jakòb a roga Yehova pa proteh’é, bisando: “Mi ta pidi bo, libra mi for di man di mi ruman hòmber, for di man di Esau; pasobra mi tin miedu di dje.” (Génesis 32:9-12) Patriarka Jòb a aserká Yehova na fabor di su famia, ofresiendo sakrifisio pa nan. Ora ku Jòb su tres kompañeronan a peka ku nan palabranan, Jòb a hasi orashon na nan fabor i Yehova “a aseptá e orashon di Jòb.” (Jòb 1:5; 42:7-9) E relatonan aki ta yuda nos mira ki asuntunan nos por inkluí den nos orashonnan na Yehova. Tambe nos ta mira ku Yehova ta dispuesto na aseptá e orashonnan di hende ku ta aserk’é den e manera korekto.

Bou di e Pakto di Lei

8. Bou di e pakto di Lei, kon asuntunan tabata ser presentá na Yehova na fabor di e pueblo?

⁸ Despues ku Yehova a libra e nashon di Israel for di Egipto, el a duna nan e pakto di Lei. E Lei a preskribí e areglo pa aserká Dios mediante un saserdosio apuntá. Algun levita a ser asigná pa fungi komo saserdote na fabor  di e pueblo. Ora ku a surgi asuntunan di importansia nashonal, un representante di e pueblo—tin biaha un rei òf profeta—a presentá e asuntu na Dios den orashon. (1 Samuel 8:21, 22; 14:36-41; Jeremias 42:1-3) Por ehèmpel, na dedikashon di e tèmpel, Rei Salomon a aserká Yehova den un orashon ferviente i sinsero. Yehova, na su turno, a indiká ku el a aseptá Salomon su orashon dor di yena e tèmpel ku Su gloria i bisa: “Mi orea [lo ta] atento na e orashon hasí den e lugá aki.”—2 Krónikanan 6:12–7:3, 15.

9. Ki rekisito mester a kumpli kuné na e santuario pa aserká Yehova na e manera korekto?

⁹ Den e Lei duná na Israel, Yehova a inkluí un rekisito pa por aserk’é na un manera aseptabel na e santuario. Kiko esei tabata? Tur mainta i tur anochi, fuera di ofresé sakrifisio di bestia, e sumo saserdote mester a kima sensia aromátiko dilanti di Yehova. Mas despues, supsaserdotenan tambe a rindi e servisio aki, eksepto riba Dia di Ekspiashon. Si e saserdotenan no a rindi tal homenahe respetuoso, Yehova lo no a keda kontentu ku nan sirbishi.—Eksodo 30:7, 8; 2 Krónikanan 13:11.

10, 11. Ki evidensia nos tin ku Yehova a aseptá orashon di hende individual?

¹⁰ Den antiguo Israel, ta solamente mediante representantenan spesialmente apuntá hende por a aserká Dios? Nò, e Skritura ta mustra ku Yehova gustosamente a aseptá orashonnan personal di hende individual. Salomon a supliká Yehova den su orashon di dedikashon di e tèmpel, bisando: “Kualke orashon òf súplika ku un hende òf ku henter bo pueblo Israel hasi . . . [ora e] habri su mannan den direkshon di e kas aki, e ora ei tende abo for di shelu.” (2 Krónikanan 6:29, 30) E relato di Lukas ta konta nos ku ora Zakarias, tata di Juan Boutista, tabata ofresé sensia den e santuario, un multitut di adoradó di Yehova ku no tabata saserdote tabata “hasi orashon pafó.” Evidentemente, despues a bira un kustumber ku hende tabata reuní pafó di e santuario pa hasi orashon na momento ku tabata ofresé sensia na Yehova riba e altar di oro.—Lukas 1:8-10.

¹¹ Pues, ora ku e personanan ku a representá e nashon kompletu i hende individual ku a trata di aserka Yehova personalmente, a aserk’é den e manera korekto, gustosamente el a aseptá nan petishonnan. Awe, nos no ta biba bou di e pakto di Lei mas. Tòg nos por siña algun lès balioso tokante orashon for di e maneranan ku e israelitanan di pasado a aserká Dios.

Bou di e Areglo Kristian

12. Kua areglo tin pa kristiannan aserká Yehova?

¹² Nos ta biba awor bou di e areglo kristian, esun establesé pa Kristu. No tin un tèmpel literal mas den kua saserdotenan ta representá henter e pueblo di Dios òf den kua su direkshon nos por bira ora nos ta hasi orashon na Dios. Pero tòg Yehova ainda tin un areglo ku el a establesé pa nos por aserk’é. Kua esei ta? Na aña 29 di nos era, ora ku Kristu a ser ungí i apuntá komo Sumo Saserdote, un tèmpel  spiritual a kuminsá funshoná. * E tèmpel spiritual aki tabata e areglo nobo pa aserká Yehova den adorashon a base di e sakrifisio di rekonsiliashon di Hesukristu.—Hebreonan 9:11, 12.

13. Relashoná ku orashon, kiko ta un paralelo entre e tèmpel na Yerusalèm i e tèmpel spiritual?

¹³ Hopi di e aspektonan di e tèmpel na Yerusalèm aptamente ta representá e vários rasgonan di e tèmpel spiritual, inkluso esnan relashoná ku orashon. (Hebreonan 9:1-10) Por ehèmpel, kiko e sensia ku a ser ofresé, mainta i anochi, riba e altar di sensia den e lugá Santu di e tèmpel a representá? Segun e buki di Revelashon, e ‘sensia ta e orashonnan di e santunan.’ (Revelashon 5:8; 8:3, 4) David a ser inspirá pa skirbi: “Laga mi orashon wòrdu poné bo dilanti manera sensia.” (Salmo 141:2) Pues, den e areglo kristian, e sensia di holó dushi apropiadamente ta representá orashonnan aseptabel i alabansa na Yehova.—1 Tesalonisensenan 3:10.

14, 15. Kiko nos por bisa di e oportunidat pa aserká Yehova pa (a) kristiannan ungí? (b) e “otro karnénan”?

¹⁴ Ken por aserká Dios na e tèmpel spiritual aki? Na e tèmpel literal, e saserdotenan i levitanan tabatin e privilegio di sirbi den e patio òf plenchi paden, pero solamente e saserdotenan por a drenta den e lugá Santu. Kristiannan ungí ku tin e speransa selestial ta disfrutá di un kondishon spiritual úniko prefigurá pa e plenchi paden i e lugá Santu, lokual ta hasi posibel ku nan por rindi orashon i alabansa na Dios.

¹⁵ Kiko di e hendenan ku tin un speransa terenal, esta, e “otro karnénan”? (Juan 10:16) Profeta Isaias a indiká ku hende for di hopi nashon lo a bin adorá Yehova “den e último dianan.” (Isaias 2:2, 3) Tambe el a skirbi ku “stranheronan” lo a uni nan mes na Yehova. Indikando ku e ta dispuesto pa aseptá nan intento pa aserk’é, Dios a bisa: “Lo mi hasi nan kontentu den mi kas di orashon.” (Isaias 56:6, 7) Revelashon 7:9-15 ta duna mas detaye. E ta deskribí “un multitut grandi” for di “tur nashon” ku ta reuní huntu den adorashon i orashon na Dios “di dia i anochi” miéntras nan ta para riba e plenchi pafó di e tèmpel spiritual. Ta ki un konsuelo ku tur sirbidó di Dios djawe por aserká Dios libremente ku e pleno konfiansa ku e ta skucha nan!

Ki Tipo di Orashonnan Dios Ta Aseptá?

16. Kiko nos por siña tokante orashon for di e kristiannan di promé?

¹⁶ E kristiannan di promé tabata hende di orashon. Tokante kiko asina nan a hasi orashon? Ansianonan kristian a pidi guia ora di skohe hòmbernan pa karga responsabilidat den e organisashon. (Echonan 1:24, 25; 6:5, 6) Epafras a hasi orashon na fabor di rumannan den fe. (Kolosensenan 4:12) Miembronan di e kongregashon na Yerusalèm a hasi orashon pa Pedro ora ku e tabata den prizon. (Echonan 12:5) E kristiannan di promé a  pidi Dios duna nan kurashi i konfiansa pa papia apesar di oposishon, bisando: “Señor, tuma nota di nan menasanan i laga bo sirbidónan papia bo palabra ku tur konfiansa.” (Echonan 4:23-30) Disipel Santiago a urgi kristiannan pa pidi Dios sabiduria ora ku nan ta bou di prueba. (Santiago 1:5) Abo ta inkluí e tipo di asuntunan ei den bo petishonnan na Yehova?

17. Ken su orashonnan Yehova ta aseptá?

¹⁷ Dios no ta aseptá tur orashon. Kon anto nos por hasi orashon ku e siguransa ku nos orashonnan lo ser aseptá? Hende fiel ku Dios a skucha den tempu antiguo a aserk’é ku sinseridat i ku un bon aktitut di kurason. Nan a demostrá fe i a apoyá nan fe ku obranan ekselente. Nos por tin sigur ku Yehova lo skucha esnan ku aserk’é den mesun manera awe.

18. Pa kristiannan su orashon ser skuchá, ki rekisito nan tin ku kumpli kuné?

¹⁸ Pero tin un rekisito adishonal. Apòstel Pablo a splika esaki, bisando: “Pa medio di dje nos . . . [tin] entrada den ún spiritu serka e Tata.” Na ken Pablo tabata referí ora ku el a skirbi “pa medio di dje”? Na Hesukristu. (Efesionan 2:13, 18) Sí, nos por aserká e Tata libremente solamente pa medio di Hesus.—Juan 14:6; 15:16; 16:23, 24.

19. (a) Ki ora e ofrenda di sensia di Israel a bira repugnante pa Yehova? (b) Kon nos por hasi sigur ku nos orashonnan ta manera sensia di holó dushi pa Yehova?

¹⁹ Manera a ser menshoná kaba, e sensia ku e saserdotenan israelita a ofresé ta representá e orashonnan aseptabel di Dios su sirbidónan fiel. Sin embargo, tabatin biaha ku e ofrenda di sensia di e israelitanan tabata repugnante pa Yehova. Esaki tabata e kaso ora ku e israelitanan a kima sensia den e tèmpel pero na mesun tempu nan a bùig pa diosnan falsu. (Ezekiel 8:10, 11) Awe ta meskos, orashon di esnan ku ta pretendé di ta sirbi Yehova pero ku na mesun tempu ta praktiká obranan ku ta na konflikto ku su leinan ta bira manera un holó stinki p’e. (Proverbionan 15:8) P’esei laga nos sigui mantené tur aspekto di nos bida limpi di manera ku nos orashonnan por ta manera un sensia di holó dushi pa Dios. Yehova tin goso den orashon di esnan ku ta sigui su kamindanan hustu. (Juan 9:31) Sin embargo, tin algun pregunta ku no a haña kontesta. Kon nos mester hasi orashon? Kiko nos por pidi den orashon? I kon Dios ta kontestá nos orashonnan? Nos siguiente artíkulo lo konsiderá e preguntanan aki i otronan mas.

[Nota]

Bo Por Splika?

• Kon hende imperfekto por aserká Dios na un manera ku e ta aseptá?

• Kon nos por imitá e patriarkanan den nos orashonnan?

• Kiko nos ta siña for di e orashonnan di e kristiannan di promé?

• Ki ora nos orashonnan ta manera un sensia di holó dushi pa Dios?

[Preguntanan di Estudio]

[Plachi na página 23]

Dikon Dios a aseptá e ofrenda di Abel pero no esun di Kain?

[Plachi na página 24]

“Ta djis stòf i shinishi mi ta”

[Plachi na página 25]

“Siguramente lo mi duna bo un désimo parti”

[Plachi na página 26]

Bo orashonnan ta manera sensia di holó dushi pa Yehova?