“Laga Boso Petishonnan Ta Konosí Dilanti di Dios”

“Den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.”—FILIPENSENAN 4:6.

1. Ku ken nos tin e privilegio di komuniká i dikon esaki ta algu masha asombroso?

SI BO mester pidi pa haña oudiensia serka un gobernante di bo pais, ki klase di reakshon lo bo haña? Su ofisina kisas ta manda un kontesta kortes pa bo, pero ta masha improbabel ku lo bo haña chèns di papia ku e gobernante mes en persona. Sin embargo, serka e Gobernante mas grandi di tur, Yehova Dios, Soberano di universo, e situashon ta diferente. Nos tin akseso na dje na unda ku nos ta i ki ora ku nos ke. Orashonnan aseptabel semper ta yega serka dje. (Proverbionan 15:29) Esei ta algu realmente maravioso! Nos apresio pa esaki no mester stimulá nos pa hasi orashon ku regularidat na Esun ku Beibel korektamente ta referí na dje komo “Abo ku ta skucha orashon”?—Salmo 65:2.

2. Kiko ta nesesario pa orashonnan ta aseptabel pa Dios?

² Sin embargo, un hende por puntra: ‘Kua orashonnan Dios ta aseptá?’ Beibel ta menshoná un kos ku ta nesesario pa orashonnan ser aseptá ora e ta deklará: “Sin fe ta imposibel pa agrad’é, pasobra esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” (Hebreonan 11:6) Sí, manera a splika den e artíkulo anterior, fe ta un faktor klave ora di aserká Dios. Dios ta dispuesto na aseptá orashon di hende ku ta aserk’é, pero nan mester hasi esei ku fe i ku obranan ku ta aseptabel pa Dios kompañá pa sinseridat i un aktitut korekto di kurason.

3. (a) Manera nos por mira na e orashonnan di sirbidónan fiel di pasado, ki tipo di ekspreshonnan nos por inkluí den orashon? (b) Kua ta e vários formanan di orashon ku tin?

³ Apòstel Pablo a urgi kristiannan den su tempu: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.” (Filipensenan 4:6, 7) Den Beibel nos ta haña hopi ehèmpel di personanan ku a hasi orashon na Dios tokante nan preokupashonnan. Entre nan tin Ana, Elias, Ezekias i Daniel. (1 Samuel 2:1-10; 1 Reinan 18:36, 37; 2 Reinan 19:15-19; Daniel 9:3-21) Ta bon pa nos sigui nan ehèmpel. Tuma nota tambe ku e palabranan di Pablo ta indiká ku tin vários forma di orashon. El a menshoná gradisimentu, esta, orashon den kua nos ta ekspresá apresio pa loke Dios ta hasi pa nos. Esaki por ta kompañá ku alabansa. Súplika ta referí na rogamentu humilde i sinsero. I nos por ekspresá petishonnan, esta, orashonnan den kua nos ta pidi un kos spesífiko. (Lukas 11:2, 3) Nos Tata selestial gustosamente ta aseptá nos esfuerso pa aserk’é den kualke un di e maneranan aki.

4. Ounke Yehova sa kiko nos tin mester, dikon tòg nos tin ku hasi petishon na dje?

⁴ Tin hende kisas ta puntra: ‘Pero Yehova no sa kaba tur loke nos tin mester?’ Sí, e sa. (Mateo 6:8, 32) Pakiko anto tòg e ke pa nos aserk’é ku nos petishonnan? Pensa riba e ehèmpel aki: Un doño di un negoshi podisé ta ofresé un regalo na algun di su klientenan. Sin embargo, pa haña e regalo aki, e klientenan tin ku bin serka e doño i pidié. Klientenan ku no ta dispuesto na hasi e esfuerso ei ta mustra ku en realidat  nan no ta apresiá e oferta. Di igual manera, si nos neglishá di hasi nos petishonnan konosí mediante orashon, esei lo indiká un falta di apresio pa loke Yehova ta perkurá. Hesus a bisa: “Pidi, i boso lo risibí.” (Juan 16:24) Den e manera aki nos ta demostrá ku nos ta dependé riba Dios.

Kon Nos Mester Aserká Dios?

5. Dikon nos tin ku hasi orashon den nòmber di Hesus?

⁵ Yehova no a traha un lista largu di reglanan estrikto tokante kon pa hasi orashon. Pero tòg nos tin ku siña e manera korekto di aserká Dios ku ta ser spliká den Beibel. Por ehèmpel, Hesus a siña su siguidónan: “Kiko ku boso pidi e Tata, e lo duna boso den mi nòmber.” (Juan 16:23) Pues nos mester hasi orashon den nòmber di Hesus, rekonosiendo Hesus komo e úniko medio via kua e bendishonnan di Dios ta ser ekstendé na henter humanidat.

6. Ora di hasi orashon, ki posishon di kurpa nos mester tin?

⁶ Ki posishon di kurpa nos mester tin ora di hasi orashon? Beibel no ta indiká un posishon spesífiko ku nos mester tin pa Dios skucha nos orashonnan. (1 Reinan 8:22; Nehemias 8:6; Marko 11:25; Lukas 22:41) Loke ta importante ta pa hasi orashon na Dios ku sinseridat i ku e aktitut korekto di kurason.—Joel 2:12, 13.

7. (a) Kiko “amèn” ta nifiká? (b) Kon ta usa “amèn” apropiadamente den orashon?

⁷ Kiko di e uso di e palabra “amèn”? E Skritura ta indiká ku esaki por lo general ta un konklushon apropiá pa nos orashonnan, foral ora nos ta hasi orashon den públiko. (Salmo 72:19; 89:52) E palabra hebreo ʼa·mén tin e nifikashon básiko di “sea asina.” E Cyclopedia di McClintock i Strong ta splika ku e nifikashon di bisa “Amèn” na final di orashon ta “pa konfirmá e palabranan ku a kaba di ser ekspresá, i supliká nan kumplimentu.” Pues, ora e persona ku ta hasi orashon konkluí ku un “Amèn” di kurason, e ta indiká su sinseridat relashoná ku loke el a kaba di bisa. Ora un kristian ku ta representá e kongregashon den orashon konkluí ku “Amèn,” esnan ku ta skuch’é tambe por agregá nan “Amèn” den nan kurason òf na bos haltu pa indiká ku nan ta kompletamente di akuerdo ku loke a kaba di ser ekspresá.—1 Korintionan 14:16.

8. Kon algun di nos orashonnan por parse e orashonnan di Jakòb òf Abraham, i kiko esaki lo demostrá di nos parti?

⁸ Tin biaha ku Dios por laga nos demostrá kon profundo nos preokupashon ta pa e asuntunan pa kua nos ta hasi orashon. Kisas nos lo tin ku bira manera Jakòb di pasado, kende a lucha henter anochi ku un angel p’e haña un bendishon. (Génesis 32:24-26) Òf algun sirkunstansia por rekerí pa nos bira manera Abraham, kende a supliká Yehova bes tras bes na fabor di Lòt i otro personanan hustu ku lo por tabatin den Sodoma. (Génesis 18:22-33) Asina tambe nos por supliká Yehova tokante kosnan ku ta balioso pa nos, rogand’e a base di su hustisia, bondat amoroso i miserikòrdia.

Kiko Nos Por Pidi den Orashon?

9. Kiko mester ta loke mas ta interesá nos ora nos ta hasi orashon?

⁹ Kòrda ku Pablo a bisa: “Den tur kos . . . laga boso petishonnan ta konosí dilanti di Dios.” (Filipensenan 4:6) Pues, orashonnan personal por inkluí preokupashonnan ku ta toka kasi tur faseta di bida. Sin embargo, e promé preokupashon den nos orashonnan mester ta e interesnan di Yehova. Daniel a pone un ekselente ehèmpel den esaki. Ora ku Israel tabata sufri kastigu debí na nan pikánan, Daniel a roga Yehova pa mustra miserikòrdia, bisando: “Pa bo mes kousa, o mi Dios, no tarda, pasobra bo stat i bo pueblo ta wòrdu yamá na bo nòmber.” (Daniel 9:15-19) Nos orashonnan tambe ta mustra ku santifikashon di Yehova su nòmber i kumplimentu di su boluntat ta nos preokupashonnan prinsipal?

10. Kon nos sa ku ta apropiá pa hasi orashon tokante asuntunan personal?

¹⁰ Pero ta apropiá tambe pa hasi petishonnan relashoná ku asuntunan personal. Por ehèmpel, meskos ku e salmista, nos por pidi pa komprondé  e kosnan mas profundo di Dios. El a pidi den orashon: “Duna mi komprondementu, pa mi por warda bo lei i kumpli kuné ku henter mi kurason.” (Salmo 119:33, 34; Kolosensenan 1:9, 10) Hesus a “ofresé orashon i súplika . . . na Esun ku ta kapas pa salb’é for di morto.” (Hebreonan 5:7) Hasiendo esei Hesus a demostrá ku ta masha apropiá pa buska fortalesa ora ku bo ta konfrontá peliger òf prueba. Ora ku Hesus a duna su disipelnan e orashon modelo, el a inkluí asuntunan di interes personal, manera pordon pa eror i pa haña pan di kada dia.

11. Kon orashon por yuda nos pa nos no kai den tentashon?

¹¹ Den e orashon modelo ei, Hesus a inkluí e petishon: “No hiba nos den tentashon, ma libra nos for di e malbado.” (Mateo 6:9-13) Despues el a konsehá: “Keda vigilá i hasi orashon, pa boso no kai den tentashon.” (Mateo 26:41) Orashon ta esensial ora ku nos ta konfrontá tentashon. Nos por sinti nos tentá pa ignorá prinsipionan bíbliko na trabou òf na skol. Personanan ku no ta Testigu di Yehova por invitá nos pa djòin nan den aktividatnan ku kisas no ta aseptabel pa kristian. Un hende por pidi nos hasi algu ku ta violá prinsipionan hustu. Na momentonan asina, ta bon pa nos sigui Hesus su konseho di hasi orashon—tantu promé ku e tentashon komo ora ku nos ta konfrontando e tentashon—i pidi Dios yuda nos pa nos no kai den tentashon.

12. Ki kousanan di ansiedat lo por motivá nos pa hasi orashon, i kiko nos por ferwagt di Yehova?

¹² Vários preshon i ansiedat ta surgi den bida di Dios su sirbidónan awe. Malesa i tenshon emoshonal ta e fuentenan prinsipal di ansiedat pa hopi hende. Kondishonnan violento rònt di nos ta yena bida ku tenshon. Problemanan ekonómiko ta pone ku ta difísil pa optené e  nesesidatnan di bida. Ta un gran konsuelo pa sa ku Yehova ta skucha su sirbidónan ku ta presentá e asuntunan aki na dje den orashon! Salmo 102:17 ta deklará tokante Yehova: “El a konsiderá e orashon di esnan desampará i no a despresiá nan orashon.”

13. (a) Ki asuntunan personal ta tópikonan apropiá pa orashon? (b) Konta un ehèmpel di un orashon asina.

¹³ Bon mirá, kualke asuntu ku ta afektá nos sirbishi na Yehova òf nos relashon kuné por ta un tópiko apropiá pa orashon. (1 Juan 5:14) Si bo tin ku tuma desishonnan tokante matrimonio òf empleo òf tokante hasi mas den bo sirbishi, sinti bo liber pa papia ku Dios tokante esakinan i pidié guia bo. Por ehèmpel, un ruman muhé hóben na Filipina kier a bai den sirbishi di tempu kompletu. Sin embargo, e no tabatin un trabou pa mantené su mes. El a konta: “Un djasabra, mi a hasi orashon na Yehova spesífikamente tokante sirbishi di pionero. Mas despues riba e dia ei, ora ku mi tabata den e trabou di prediká, mi a ofresé un buki na un tiner. Ònferwagt, e mucha muhé a bisa mi: ‘Bo mester bin mi skol djaluna mainta trempan.’ Mi a puntr’é: ‘Dikon?’ El a splika mi ku nan tabatin mester di un hende pa kuminsá traha mas pronto posibel. Mi a bai, i nan a tuma mi mesora. Tur kos a sosodé masha lihé.” Kantidat di Testigu rònt mundu tabatin eksperensianan similar. Pues no vasilá pa presentá bo petishonnan sinsero na Dios den orashon!

Kiko si Nos A Peka?

14, 15. (a) Dikon un persona no mester keda sin hasi orashon asta si el a peka? (b) Fuera di orashonnan personal, kiko mas lo yuda un persona rekuperá di su piká?

¹⁴ Kon orashon por yuda si un persona a peka? Bèrgwensa ta pone algun kristian ku a peka keda sin hasi orashon. Sin embargo, esei no ta un proseder sabí. Un ehèmpel: Pilotonan di avion sa ku si nan dual, nan por komuniká ku toren di kontròl pa haña yudansa. Pero kiko si un piloto ku a dual ta vasilá pa tuma kontakto ku toren di kontròl pasobra e tin bèrgwensa ku el a dual? Esei lo por hiba na desaster! Di igual manera, e persona ku a peka i ku tin bèrgwensa di hasi orashon na Dios lo por sufri mas daño. Bèrgwensa pa motibu di a peka no mester stroba un persona di papia ku Yehova. De echo, Dios ta invitá esnan ku a kometé erornan serio pa hasi orashon na dje. Profeta Isaias a urgi pekadónan den su tempu pa yama riba Yehova, “pasobra e lo pordoná abundantemente.” (Isaias 55:6, 7) Klaru ku e persona lo tin ku ‘buska e fabor di Yehova’ promé dor di humiá su mes, bira for di su kaminda pekaminoso i repentí sinseramente.—Salmo 119:58; Daniel 9:13.

¹⁵ Pa loke ta trata piká, orashon ta bira importante pa un otro motibu mas. Disipel Santiago a deklará relashoná ku un persona ku tin mester di yudansa spiritual: “Lag’é yama e ansianonan di iglesia, i laga nan hasi orashon p’e, . . . i Señor lo lant’é.” (Santiago 5:14, 15) Sí, un persona mester konfesá su piká personalmente na Yehova den orashon, pero tambe e por pidi e ansianonan hasi orashon na su fabor. Esei lo yud’é drecha su relashon ku Dios.

Kontesta Riba Orashon

16, 17. (a) Kon Yehova ta kontestá orashon? (b) Menshoná algun eksperensia ku ta mustra ku orashon i e trabou di prediká ta estrechamente ligá ku otro.

¹⁶ Kon orashonnan ta ser kontestá? Tin orashon ta ser kontestá umbes i masha bisto. (2 Reinan 20:1-6) Otro orashonnan kisas ta tuma tempu pa haña kontesta i kisas ta mas difísil pa mira e kontesta. Manera a keda demostrá  den Hesus su ilustrashon tokante e biuda ku a keda bin bèk serka e hues, kisas ta nesesario pa nos keda hasi orashon na Dios bes tras bes tokante un asuntu. (Lukas 18:1-8) Sin embargo, nos por tin sigur ku ora nos ta hasi orashon na armonia ku e boluntat di Dios, Yehova nunka lo bisa nos: “No molestiá mi.”—Lukas 11:5-9.

¹⁷ Yehova su pueblo den hopi kaso a mira nan orashonnan ser kontestá. Esaki hopi biaha ta bisto den nos predikashon públiko. Por ehèmpel, dos ruman muhé kristian na Filipina tabata parti literatura bíbliko den un área aislá di e pais. Ora ku nan a duna un tratado na un señora, su wowonan a yena ku awa. E di: “Ayera nochi mi a resa pidi Dios manda un hende pa siña mi Beibel, i mi ta kere ku esaki ta e kontesta riba mi orashon.” Poko despues, e señora a kuminsá asistí na reunion na Salòn di Reino. Den un otro parti di Zùitost Asia, un ruman hòmber kristian tabata nervioso pasobra e mester a prediká den un edifisio residensial di alta siguridat. Sin embargo, el a hasi orashon na Yehova, tuma un kurashi i drenta e edifisio. El a bati na porta di un apartamento i un mucha muhé a sali. Ora ku e ruman a splik’é e motibu di su bishita, e mucha muhé a kuminsá yora. El a bisa e ruman ku e tabata buska Testigunan di Yehova i a hasi orashon pa Dios yud’é haña nan. E ruman gustosamente a pon’é den kontakto ku e kongregashon lokal di Testigunan di Yehova.

18. (a) Kon nos mester reakshoná ora ku nos orashonnan ser kontestá? (b) Di kiko nos por ta sigur si nos ta hasi orashon na tur oportunidat ku nos haña?

¹⁸ Orashon ta realmente un provishon maravioso. Yehova ta kla pa skucha i reakshoná riba nos orashonnan. (Isaias 30:18, 19) Sin embargo, nos mester opservá bon pa wak kon Yehova ta kontestá nos orashonnan. Kisas no ta tur biaha e ta hasi esei den e manera ku nos a ferwagt. Pero ora nos ripará ku el a duna nos su guia, nunka nos no mester lubidá di gradisié i alab’é. (1 Tesalonisensenan 5:18) Ademas, semper kòrda e konseho di apòstel Pablo: “Den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.” Sí, probechá di tur oportunidat pa papia ku Dios. Den e manera ei, lo bo sigui eksperensiá e bèrdat di loke Pablo a deklará relashoná ku e personanan kende nan orashonnan ta ser kontestá: “E pas di Dios, ku ta surpasá tur komprondementu, lo warda boso kurason i boso mente.”—Filipensenan 4:6, 7.

Bo Por Kontestá Esaki?

• Kua ta e vários formanan di orashon ku tin?

• Kon nos mester hasi orashon?

• Ki tópikonan nos por inkluí den nos orashonnan?

• Kiko ta e papel di orashon ora ku un hende peka?

[Preguntanan di Estudio]

[Plachinan na página 29]

Orashon di kurason ta yuda nos pa nos no kai den tentashon

[Plachinan na página 31]

Mediante orashon, nos ta ekspresá na Dios nos gratitut, preokupashonnan i petishonnan