Ora un Ser Kerí Bandoná Yehova

MARK i Louise ta Testigunan di Yehova. * Ku amor i dedikashon, nan a siña nan yunan e Skritura, manera Beibel ta manda mayornan kristian hasi. (Proverbionan 22:6; 2 Timoteo 3:15) Lamentablemente, no ta tur nan yunan a sigui sirbi Yehova ora nan a bira grandi. Louise ta bisa: “Mi kurason ta hasi doló ora mi kòrda riba mi yunan ku a bai for di e bèrdat. Mi no por nenga, tur dia mi ta pena profundamente. Ora otro rumannan ta papia di nan yunan, mi ta sinti un kos ta choka mi den mi garganta i mi tin ku lucha pa wanta mi lágrimanan.”

Sí, ora un persona skohe pa bandoná Yehova i e kaminda ku ta hiba na bida ku e Skritura ta papia di dje, e miembronan di famia ku sí a keda fiel por lo general ta sufri hopi. “Mi stima mi ruman muhé masha tantu,” Irene ta bisa. “Mi ta dispuesto pa hasi tur loke mi por p’e bolbe na Yehova!” Maria, kende su ruman hòmber a bira lomba pa Yehova pa hiba un bida inmoral, ta bisa: “Tabata hopi duru pa mi pasobra den tur otro sentido, e tabata un tremendo ruman pa mi. Mi ta sinti su falta foral na reunionnan grandi di famia.”

Dikon E Ta Asina Duru?

Pakiko e famia kristian di un yu òf otro ser kerí ku ta bandoná Yehova ta keda hopi tristu? Pasobra nan sa ku e Skritura ta primintí bida eterno den un paradeis riba tera pa hende ku ta keda fiel na Yehova. (Salmo 37:29; 2 Pedro 3:13; Revelashon 21:3-5) Nan ta ansioso pa kompartí e bendishonnan aki ku nan kasá, nan yunan, mayornan, rumannan i nietunan. E idea ku nan sernan kerí ku a stòp di sirbi Yehova ta keda sin haña e bendishonnan ei ta hasi nan tristu! Asta pa loke ta toka nan bida aktual, kristiannan ta komprondé ku e lei- i prinsipionan di Yehova ta pa nan benefisio. P’esei nan kurason ta hasi doló ora nan mira nan sernan kerí hiba un bida ku lo resultá solamente den amargura.—Isaias 48:17, 18; Galationan 6:7, 8.

 Kisas ta difísil pa algun ruman spiritual ku nunka a pasa den e eksperensia di mira un ser kerí bira lomba pa Yehova komprondé kon devastador esei por ta. Kasi tur aspekto di bida ta ser afektá. “A bira mas i mas difísil pa sinta na reunionnan kristian i mira mayornan hari i papia ku nan yunan,” segun Louise. “Na kualke okashon di alegria mi ta sinti un bashí pa motibu di e ousensia di mi sernan kerí.” Un ansiano kristian ta kòrda e kuater añanan durante kua yu muhé di su kasá a stòp di asosiá ku nan. E ta bisa: “Hopi bes, asta e ‘momentonan dushi’ di bida tabata difísil. Si mi a duna mi esposa un regalo òf hib’é kualke lugá bunita pa un wikènt, un dado momento e tabata kuminsá yora, kòrdando ku su yu muhé no tabat’ei pa kompartí nos felisidat.”

E kristiannan ei ta eksagerá e asuntu? No nesesariamente. De echo, den un sentido nan ta reflehando e kualidatnan di Yehova, den kende su imágen hende a ser trahá. (Génesis 1:26, 27) Kiko esaki ta nifiká? Wèl, kon Yehova a sinti ora su pueblo Israel a rebeldiá kontra dje? Na Salmo 78:38-41 nos ta lesa ku nan a hasié tristu. Tòg, ku pasenshi el a spièrta nan i disipliná nan, pordonando nan vários biaha ora nan a demostrá arepentimentu. Opviamente, Yehova ta sinti un apego personal na su kriaturanan, “e obra di [su] mannan,” i no ta bira lomba fásil pa nan. (Jòb 14:15; Jonas 4:10, 11) El a inkulká den hende tambe e kapasidat di sinti un apego leal na otro, i e lasonan  entre miembronan di famia por ta hopi fuerte. Pues no ta nada straño ku hende ta sinti nan tristu ora un famia stimá bandoná Yehova.

En bèrdat, e ‘pèrdida spiritual’ di un ser kerí ta un di e pruebanan di mas difísil ku adoradónan berdadero por haña nan kuné. (Echonan 14:22) Hesus a bisa ku aseptashon di su mensahe lo a trese divishon den algun famia. (Mateo 10:34-38) Esaki no ta pasobra e mensahe di Beibel riba su mes ta kousa divishon den famia. Mas bien, ta e miembronan di famia no-kreyente òf infiel ta kousa un separashon dor ku nan ta rechasá, bandoná òf asta oponé e kaminda di kristianismo. Sin embargo, nos por ta gradisidu ku Yehova sí no ta laga su sirbidónan fiel sin yudansa pa enfrentá e pruebanan ku nan ta pasa aden. Si aktualmente bo ta tristu pa motibu ku un ser kerí a bandoná Yehova, ki prinsipionan di Beibel por yuda bo wanta e tristesa i haña goso i kontentamentu?

Kon pa Trata ku e Situashon

“Edifikando boso mes . . . , konserbá boso mes den e amor di Dios.” (Hudas 20, 21) Dependiendo di bo sirkunstansianan partikular, kisas no tin nada ku bo por hasi n’e momentonan aki pa yuda un miembro di famia ku a stòp di sirbi Yehova. No opstante, bo por i bo mester edifiká bo mes i tambe kualke miembro di famia ku a keda fiel. Veronica, kende a mira dos di su tres yu hòmbernan bai for di e bèrdat, ta bisa: “Ami ku mi esposo a haña konseho pa nos mantené nos mes spiritualmente fuerte pa asina nos por ta den e mihó kondishon pa risibí nos yunan bèk ora nan bolbe na nan sano huisio. Unda e yu pèrdí lo tabata si su tata no tabata den un kondishon pa risibié bèk?”

Pa bo por mantené bo mes den un kondishon fuerte, bo mester keda okupá ku aktividatnan spiritual. Esaki ta inkluí mantené un programa di estudio profundo di Beibel i asistensia na reunionnan kristian. Hasi bo mes disponibel pa yuda otronan den e kongregashon te n’e grado ku bo sirkunstansianan ta permití. Ta bèrdat ku na promé instante kisas bo ta haña e aktividatnan ei difísil. Veronica ta kòrda: “Mi promé inklinashon tabata pa isolá mi mes manera un bestia heridá. Pero mi kasá a insistí pa nos a mantené un bon rutina spiritual. El a hasi sigur ku nos a bai e reunionnan. Ora tabata tempu pa asistí na un kongreso, mi tabatin mester di hopi kurashi pa bai i enfrentá hende. Pero, e programa a hala nos mas serka Yehova. E kongreso ei a animá spesialmente nos yu hòmber ku a keda fiel.”

Maria, menshoná anteriormente, ta haña ku ta masha probechoso pa keda aktivo den sirbishi di vèlt i aktualmente e ta studiando Beibel ku kuater persona. Di igual manera, Laura ta bisa: “Ounke ainda mi ta yora tur dia, mi ta gradisí Yehova ku mi tin e mensahe perfekto di Beibel, ku ta kapas pa yuda famianan den e último dianan aki, maske mi mes no tabatin e éksito ku algun mayor tin den lanta yu.” Ken i Eleanor, kende nan yunan adulto a bai laga e kongregashon, a ahustá nan sirkunstansianan pa muda bai un área kaminda tin mas nesesidat pa publikadónan di Reino i a drenta e ministerio di tempu kompletu. Esaki  a yuda nan mantené asuntunan den e perspektiva korekto i evitá di laga tristesa kaba ku nan.

No pèrdè speransa. Amor ‘ta spera tur kos.’ (1 Korintionan 13:7) Ken, menshoná anteriormente, a bisa: “Ora nos yunan a bai laga e bèrdat, mi a sinti komo si fuera ta muri nan a muri. Pero despues ku mi ruman muhé a fayesé, mi punto di bista a kambia. Mi ta gradisidu ku mi yunan no ta literalmente morto i ku ainda Yehova tin e kaminda habrí pa nan bolbe na dje.” En bèrdat, eksperensia a mustra ku hopi persona ku a bandoná e bèrdat ta bini bèk ku tempu.—Lukas 15:11-24.

No kulpa bo mes. Mayornan spesialmente por tin tendensia di wak bèk i lamentá ku nan no a atendé sierto situashonnan na un manera diferente. Sin embargo, e idea prinsipal ku Ezekiel 18:20 ta trese dilanti ta ku Yehova ta tene e pekadó, i no su mayornan, responsabel pa su mal eskoho. Ta interesante pa nota ku ounke e buki di Proverbionan ta papia hopi tokante e obligashon di mayornan pa lanta nan yunan den e kaminda korekto, e ta kontené kuater biaha mas tantu konseho pa hóbennan skucha i obedesé nan mayornan. Sí, yunan tin e responsabilidat pa sigui e guia basá riba Beibel ku nan ta haña di nan mayornan imperfekto. Probablemente bo a atendé asuntunan lo mihó ku bo tabata por n’e tempu ei. Pero, maske bo ta sinti ku bo a kometé sierto fayonan i ku esakinan en bèrdat tabata bo falta, esei no nesesariamente ke men ku ta bo fayonan a pone bo ser kerí bandoná e bèrdat. En todo kaso, bo no ta gana nada ku keda lamentá bo akshonnan di pasado. Siña for di bo foutnan, determiná pa no ripití nan i pidi Yehova pordoná bo. (Salmo 103:8-14; Isaias 55:7) Anto wak futuro, no pasado.

Tene pasenshi ku otronan. Kisas ta difísil pa algun ruman sa eksaktamente kon pa animá bo òf konsolá bo, foral si nunka nan no a yega di pasa den un eksperensia similar. Ademas, kada hende por tin nan konsepto di kiko ta animá nan òf konsolá nan. Pues si un hende bisa algu ku ta pone bo rabia, apliká e konseho di Pablo na Kolosensenan 3:13: “Soportá otro i pordoná otro, si un di boso tin un keho kontra un otro.”

Respetá Yehova su areglo pa disiplina. Si bo famia a risibí disiplina di e kongregashon, kòrda ku esaki ta parti di Yehova su areglo i ku esei ta mihó pa tur persona enbolbí, inkluso pa esun ku a hasi malu. (Hebreonan 12:11) P’esei, resistí kualke inklinashon pa kritiká e ansianonan ku tabata enbolbí den e kaso òf e desishonnan ku nan a tuma. Kòrda ku e mihó resultadonan ta bini ora hende hasi kosnan na e manera di Yehova; en kambio, ora nan bai kontra e areglonan di Yehova esei por resultá solamente den mas sufrimentu.

Despues ku Israel a ser librá for di Egipto, Moisés tabata sirbi regularmente komo hues. (Eksodo 18:13-16) Siendo ku un huisio na fabor di un persona probablemente lo tabata kontra un otro, no ta difísil pa imaginá ku e desishonnan di Moisés a desapuntá algun hende. Krítika kontra Moisés tal bes lo a hiba na algun kaso di rebeldia kontra su liderato. Sin embargo, ta Yehova tabata usando Moisés pa guia Su pueblo, i El a kastigá, no Moisés, sino e rebeldenan i nan famianan ku a apoyá nan. (Numbernan 16:31-35) E lès ku nos por siña for di esaki ta ku nos tin ku hasi esfuerso pa respetá i koperá ku e desishonnan ku e personanan ku tin outoridat teokrátiko awe ta tuma.

 Den e konteksto aki, Delores ta kòrda kon difísil tabata pa el a mantené un punto di bista balansá ora su yu muhé a risibí disiplina di e kongregashon. E ta bisa: “Loke a yuda mi tabata pa lesa bes tras bes e artíkulonan ku a splika kon rasonabel Yehova su areglonan ta. Mi a traha un buki di nota spesial di puntonan ku mi a haña den diskursonan i artíkulonan ku lo a yuda mi wanta i sigui padilanti.” Esaki ta hiba na un otro medio importante ku ta yuda bo wanta.

Ekspresá bo sintimentunan. Tal bes lo bo haña ta probechoso pa deshogá bo mes serka un òf dos amigu di konfiansa ku por komprondé bo. Skohe amigu ku lo yuda bo mantené un aktitut positivo. Sin duda lo ta muchu mas efektivo pa ‘drama bo kurason’ den orashon na Yehova. * (Salmo 62:7, 8) Pakiko? Pasobra e ta komprondé kompletamente e profundidat di bo sintimentunan. Por ehèmpel, kisas bo ta sinti ku ta inhustu ku bo mester pasa den e angustia emoshonal ei. Al fin i al kabo, no ta abo a bandoná Yehova. Papia di bo sintimentunan ku Yehova i pidié yuda bo mira e situashon den un manera ménos doloroso.—Salmo 37:5.

Segun ku tempu ta pasa, probablemente lo bo por kontrolá bo sintimentunan mihó. Miéntras tantu, sigui hasi esfuerso pa agradá bo Tata selestial, i nunka sinti ku esakinan ta en bano. (Galationan 6:9) Kòrda, si nos bandoná Yehova, esei no ta libra nos di problema. Di otro banda, dor di keda leal na dje, e ta yuda nos soportá e pruebanan ku nos ta enfrentá. Bo por ta sigur anto ku Yehova ta komprondé kon difísil bo situashon ta i lo e sigui duna bo e forsa nesesario na e momento ku bo tin mester di dje.—2 Korintionan 4:7; Filipensenan 4:13, NW; Hebreonan 4:16.

[Nota]

[Kuadro na página 19]

Kon pa Trata ku e Situashon

◆ “Edifikando boso mes . . . , konserbá boso mes den e amor di Dios.”—Hudas 20, 21.

◆ No pèrdè speransa.—1 Korintionan 13:7.

◆ No kulpa bo mes.—Ezekiel 18:20.

◆ Tene pasenshi ku otronan.—Kolosensenan 3:13.

◆ Respetá Yehova su areglo pa disiplina.—Hebreonan 12:11.

◆ Ekspresá bo sintimentunan. —Salmo 62:7, 8.

[Kuadro/​Plachi na página 21]

Abo A Bandoná Yehova?

Si ta asina, sea kual sea e motibu, bo relashon ku Yehova i bo speransa pa haña bida eterno ta na peliger. Tal bes bo tin intenshon di bolbe na Yehova. Bo ta hasiendo esfuerso ku empeño pa logra esaki aworakí? Òf bo ta posponiendo esei te na “e momento apropiá”? Kòrda, e nubianan di Armagedón ta aserkando rápidamente. Ademas, bida den e sistema di kosnan aki ta kòrtiku i insigur. Bo no sa mes si bo ta na bida mañan. (Salmo 102:3; Santiago 4:13, 14) Un hòmber ku tin un malesa inkurabel a bisa: “Mi a haña e enfermedat aki miéntras mi tabata sirbiendo Yehova tempu kompletu, sin nada riba mi konsenshi. I esei ta un kos ku ta laga mi sinti mi bon aworakí.” Pero imaginá bo kon lo el a sinti si el a haña e enfermedat ora e tabata bisando: “Un dia lo mi bolbe na Yehova!” Si bo a bandoná Yehova, awor ta e mihó tempu pa bolbe bèk.

[Plachinan na página 18]

Loke por yuda bo mantené e perspektiva korekto ta di keda okupá den aktividatnan spiritual