Kiko Ta “e Último Dianan”?

BO SA puntra bo mes kiko tin den futuro pa bo i pa bo sernan kerí? Hopi hende ta sigui notisia ku sumo atenshon pa mira den ki manera susesonan di mundu lo por bai afektá nan bida. Sin embargo, si nos presta atenshon na e Palabra inspirá di Dios, nos ta bin komprondé realmente kiko nan ta nifiká. Esaki ta debí ku for di hopi tempu pasá Beibel a papia no solamente di e kondishonnan aktual sino tambe di loke mester sosodé ainda.

Por ehèmpel, tempu Hesukristu tabata riba tera, el a papia hopi tokante e Reino di Dios. (Lukas 4:43) Di mes e hendenan ku a tend’é kier a sa na ki tempu e Reino maravioso ei lo a bini. De echo, tres dia promé ku Hesus a wòrdu matá inhustamente, su disipelnan a puntr’é: “Kiko lo ta e señal di bo presensia [den poder di Reino] i dje konklushon dje sistema di kosnan?” (Mateo 24:3, NW) Hesus a bisa nan ku ta Yehova Dios so tabata sa na ki momento eksakto e Reino lo a tuma pleno kontròl di tera. (Mateo 24:36; Marko 13:32) Sin embargo, loke sí Hesus i algun eskritor di Beibel a pronostiká ta sierto desaroyonan riba tera ku lo a sirbi komo prueba ku Kristu lo ta gobernando den poder di Reino.

Promé ku nos analisá e evidensia visibel ku nos ta bibando den “e último dianan” di e mundu aki su sistema di kosnan, laga nos konsiderá brevemente un suseso importante ku a tuma lugá den e region invisibel di spiritu. (2 Timoteo 3:1) Hesukristu a bira Rei den shelu na aña 1914. * (Daniel 7:13, 14) Djis despues ku el a risibí poder di Reino, el a tuma akshon. Beibel ta bisa nos: “Tabatin guera den shelu, Miguel i su angelnan tabata hasi guera kontra e dragon. I e dragon i su angelnan tabata hasi guera.” (Revelashon 12:7) “E arkangel Miguel” ta Hesukristu den su posishon selestial. * (Hudas 9; 1 Tesalonisensenan 4:16) E dragon ta Satanas e Diabel. Kiko tabata e resultado di e konflikto aki pa Satanas i e angelnan, òf demoñonan, ku a siguié? Nan a pèrdè e guera ei i a ser saká for di shelu, esta, “tirá abou” den bisindario di tera. (Revelashon 12:9) Pa e motibu aki, “shelunan i [esnan] ku ta biba den nan,” esta, e yunan spiritual fiel di Dios, a alegrá. Pero hende sí no por a alegrá, ya ku Beibel a profetisá: “Ai di tera . . . pasobra Diabel a baha bin serka boso ku gran furia, sabiendo ku ta ked’é solamente un poko tempu mas.”—Revelashon 12:12.

Satanas, den su furia, a trese kalamidat òf “ai”—sufrimentu i aflikshon—pa hende ku ta biba riba tera. Sin embargo, e kalamidat ei lo ta kòrtiku, pa “un poko tempu mas.” Beibel ta referí na e periodo ei komo “e último dianan.” Nos por ta kontentu ku pronto e influensia di Diabel riba tera lo ser eliminá kompletamente. Pero kiko ta proba ku nos ta bibando den e último dianan?

[Nota]

 [Rekonosementu pa Potrèt na página 2]

PORTADA: Promé plano: © Chris Stowers/Panos Pictures; den fondo: FAROOQ NAEEM/AFP/Getty Images