“Kuantu Mi Ta Stima Bo Lei!”

SALMO 119 ta un kantika ku ta ekspresá e sintimentunan ku e kompositor tabatin pa ku e palabra òf mensahe inspirá di Dios. E salmista a kanta: “Bo palabra mi a skonde den mi kurason.” “Lo mi tin delisia den bo statutonan.” “Mi alma ta muri di anhelo pa bo ordenansanan na tur momento.” “Bo testimonionan tambe ta mi delisia.” “Mi ta anhelá na bo preseptonan.” “Lo mi tin delisia den bo mandamentunan ku mi ta stima.” “Lo mi meditá den bo statutonan.” “Kuantu mi ta stima bo lei! E ta mi meditashon henter dia.”—Salmo 119:11, 16, 20, 24, 40, 47, 48, 97.

Ki un gran apresio e salmista tabatin pa Dios su palabra revelá! Abo tin e mesun sintimentu aki pa ku e mensahe di Beibel, e Palabra di Dios? Lo bo ke haña delisia den dje? Si ta asina, bo tin ku desaroyá na promé lugá e kustumber di lesa Beibel regularmente, si ta posibel tur dia. Hesukristu a bisa: “Hende lo no biba di pan so, ma di tur palabra ku ta sali for di boka di Dios.” (Mateo 4:4) Na di dos lugá, bo tin ku meditá riba loke bo ta lesa. Dor di meditá riba e bèrdat tokante Dios, su kualidatnan, su boluntat i su propósito, lo bo haña mas apresio pa Beibel. (Salmo 143:5) I mas importante ainda, apliká su konseho sano den bo bida di tur dia.—Lukas 11:28; Juan 13:17.

Ora bo tin delisia den e mensahe di Beibel, kon esei lo benefisiá bo? Salmo 119:2 ta bisa: “Bendishoná ta esnan ku ta warda [Dios] su testimonionan.” E testimonionan òf rekordatorionan hañá den Beibel lo yuda bo enfrentá problemanan di bida ku éksito. (Salmo 1:1-3) Lo bo haña e sabiduria i komprondementu ku lo yuda bo frena òf ‘detené bo pianan for di tur mal kaminda.’ (Salmo 119:98-101) E echo ku bo sa e bèrdat tokante Dios i su propósito pa e tera lo duna bo bida mas sentido i un speransa mas briante pa futuro.—Isaias 45:18; Juan 17:3; Revelashon 21:3, 4.

Testigunan di Yehova ta masha interesá den yuda otro hende konosé Beibel mihó i haña un amor pa su mensahe. Nos ta invitá bo kalurosamente pa aseptá e siguiente oferta.